Al Ostorgy

3
-
طبعا الاسد كان في قمة الذهول🙃 من كلام الارنب بس بردو كمان كان في قمة الغضب😡 لما الارنب قاله مش انت الاسد الوحيد في الغابة ولا الملك الاوحد ... وان فيه اسد تاني قطع علي الارنب الطريق لا وكمان خد الارنب "المدملك" رهينة
ومن كتر غليان الاسد شخط في الارنب وقاله
الاسد : اتفضل قدامي وريني مكان الاسد التاني ... ولو طلع كلامك كذب هتستحق اللي هعمله فيك قبل ما اكلك
الارنب "بخبث" : صدقني هنبسط لما انت اللي تاكلني مش هو
الاسد : هو فيييين ؟؟؟
فضل الارنب ماشي بثقة لحد بير "ماء" كان وضع عليه علامة وبص للاسد وقاله
الارنب : كنت مكدبني صح طب تعالي بنفسك وبص شوف الاسد اللي في البير دا وقلي مين هياكلني فيكوا عايز اخلص؟؟؟
مقدرشي الاسد يتمالك نفسه
لما شاف اسد تاني في البير بيبصله هو كمان بغضب 👹
----
ياله من ارنب عجيب ... كان يخطف اسدا
كحال فرعون الذي استمع الي هامان ... والنمرود الذي استمع الي الشيطان
فالعدو وان حدثك بلهجة الصديق ... اعتبره فخا وان حدثك حتي عن الحب

2
_
عرفنا البوست اللي فات ان القرعة رسيت علي الارنب عشان يروح للاسد وياكله.بس صاحبنا الارنب قعد يتنطط ويقول:مش انا اللي اموت الموتة دي.مش انا اللي اتاكل بلوشي كدا.ثم انا اساسا كنت نايم لما اتفقتوا مع الاسد. (الحيوانات قالتله :لا كنت صاحي وكل ما القرعه ترسي علي حد غيرك كنت تاكل الجزر وتقعد تتف علي الاسد كمان).
الارنب قالهم افتكرت خلاص سيبوني بقي اركز شوية يمكن ربنا يهديني واعرف انا هعمل ايه في مصيبتي السودة دي .الحيوانات قالتله ركز براحتك بس اوعي تتاخر علي ملك الغابة.
الجملة دي رنت اوي في ودن الارنب "اوعي تتاخر علي ملك الغابة"
فاتت ساعة والاسد مستني علي نار يسب ويلعن في يوم الاتفاق والحيوانات والارنب اللي اتاخر عليه.لحد ما لقي الارنب جاي يجري.
الاسد بصوت غليظ :انت ازاي تتاخر علي ملك الغابة ؟انت عارف ممكن اعمل فيك ايه ؟
الارنب: ايه اكتر من انك هتاكلني؟ثم ايه ملك الغابة ملك الغابة ؟هي الغابة ليها كام ملك بس عشان ابقي فاهم؟
الاسد:كام ملك؟ انت اهبل؟ ولا عشان دا اخر يوم في عمرك اتجننت؟ ثم بردو مردتشي علي سؤالي انت ليه اتاخرت؟
ولا حاجة الحيوانات اصلا استرفعتني وشافتني ضعيف وكانت بعتالك معايا ارنب تاني سمين ومدملك كدا عشان توجب معاك
الاسد: هو فين الارنب التاني؟
الارنب :بص يا برنس في طريقنا احنا الاتنين انا والمدملك قطع علينا الطريق اسد تاني وكان هياكلنا احنا الاتنين بس لما قلتلوا اننا رايحين لاسد تاني اصلا عشان متفقين معاه اتنرفز جدااا وقالي انا هاخد الارنب المدملك دا رهن لحد ما تروح وتجيبلي الاسد التاني دا اللي بتقول عليه.
روحت خدت وداني في سناني وجيتلك جري شوف انت بقي هتعمل ايه.
تفتكروا الاسد هيصدق الارنب؟ولو صدقوا تفتكروا هيعمل ايه؟هنعرف البوست اللي جاي

1
_
كان الاسد اصلا بدأ يهنج من الجري ورا الحيوانات اللي بدأ نفسها يتقطع.فالحيوانات لمت نفسها وراحت علي الاسد وقالتله : تعبتنا وتعبت نفسك ولا انت بتبطل تشبع ولا احنا عارفين نعيش في امان.علي ايه ؟ ليك مننا وجبتك_اللي هي حد مننا ترسي عليه القرعة_ توصل لحد عندك في يوم معلوم وتبطل تجري ورا حد فينا يبقي انت استريحت واحنا كمان.
الاسد قالهم : بس دا تواكل ولازم اتعب في اكلي
الحيوانات قالت : لا دا بردو رزقك وبيجيلك لحد عندك . طب بص اللي يجيلك مننا ابقي العب معاه استغماية واجري وراه شوية كده وكده قبل ما تاكله بس احنا علي اتفاقنا؟
وبعد ما الاسد وافق طبعا والدنيا ماشية تمام كل مرة القرعه ترسي علي حيوان من الحيوانات ياخد بعضة ويطلع علي الاسد عشان ياكله هم هم هم
لحد الدور ما جه علي "الارنب " ...تفتكرو الارنب بكل سهولة كده هيروح للاسد عشان ياكلة ؟؟؟ دا اللي هنعرفة المرة اللي جاية