lisalarson.hk

［Rest in Peace] 遺憾地向大家宣布，瑞典國寶級陶藝家Lisa Larson於2024年3月11日與世長辭，享年92歲，感謝她為世界創造了一系列充滿溫度與趣味的作品，為家居增添生氣🙏🏼

God Jul🎄

較早前預告的Curious Santa限量聖誕套裝面世啦！置身於 悉心設計的聖誕松裝飾內的curious santa已經準備好同大家一齊過聖誕啦！

童趣與幽默，是Lisa Larson作品的特色，任職AB Gustavsberg駐廠藝術家期間，她亦身兼妻子及母親的角色，成長中的子女更是部分作品的靈感來源。

某天，她如常在工作室搓掐陶泥，忽然看到兒子在花園中俯身凝視草地，細問下發現他正在觀察螞蟻的移動路線，當頭棒喝的Lisa立即以陶泥紀錄這身影，創作出Curious，提醒大家時刻保持好奇心，發掘身邊的美好。

由於設計太受歡迎，原本身穿短褲的小男孩要一人分飾兩角，於聖誕節變身Curious Santa，那頂因為上半身彎曲而觸地的聖誕帽，令可愛的造型更為突出～

今年，Curious Santa將首次登陸香港，現身 的聖誕聯乘套裝，數量有限，而且不設單獨販售，想帶返屋企就記得留意我哋IG啦！

［12月限定優惠］沉寂了一陣子，店長決定於12月再啟動，讓更多人認識、欣賞Lisa Larson的設計及Keramikstudion Gustavsberg的傳統工藝。

首先，小店將與同樣推崇匠人精神的日本眼鏡選物店二弧眼鏡店 合作，為顧客提供雙向優惠，二弧顧客憑單可以八折選購小店貨品，而小店顧客憑單於二弧選配眼鏡滿HK$1,000即可減HK$100。

在此溫馨提示一下，小店貨品價格將於2023年1月隨Keramikstudion Gustavsberg作出調整，由於通脹嚴重，原材料價格急升，預計貨品加幅會比去年高，若早已有心儀款式，最好趁此機會入手啦！

此外，店長還洽商了另一項應節的聖誕聯乘，詳情不日公布，敬請留意👀

［新品推介］造型玲瓏浮凸的Face Flower Pot，絕對是最百搭的Lisa Larson作品，沒有之一。

採單色設計，使人臉輪廓更深刻；名叫flower pot，卻適合存放很多物品，除店長示範的鮮花跟小型盆栽，亦可像Keramik Studion Gustavsberg的工匠般，用它來插起大小的畫筆釉掃！

歡迎大家發揮創意，留言告訴店長，你又會如何讓作品融入日常生活？

［母親節禮物推介］母親，大概是一個家庭中，最講究物品實用程度的成員，Lisa Larson的Wardrobe系列，以大褸、連身裙、毛衣、背心及短裙為創作靈感，製作出趣味與功能兼備的陶瓷花樽，輕鬆隨意地為家居添上生氣。

值得一提的是，每件由瑞典工匠以傳統技藝製作的作品，至今依然源用天然礦物顏料上色，並不存在褪色或異味等問題。今年母親節打算循例送花的你，不妨考慮連花帶樽一起奉上，就算鮮花凋謝，還有一份歴久常新的心意可以留下🎁

小店位處銅鑼灣，姜man生日咁大件事點可以唔做啲嘢！店長決定，小店即日起恢復正常營業，緊接5月1-8日嘅懲罰祭亦會有特別開放時間，歡迎大家嚟揀份充滿北歐生活品味嘅母親節禮物，盡情懲罰小店💥

由於大部分貨品已移師 深水埗pop-up store，小店即日起更改營業時間為預約開放，直至瑞典補貨完畢，感激大家支持🙇🏻‍♀️

Pop-up反應異常熱烈，店長衷心感謝大家的支持與喜愛🙇🏻‍♀️🙇🏻‍♀️

集合吧！全球最受歡迎的陶瓷動物｜首現360mm高超巨大Lion Maxi｜特色小店 - HK Insider 緊貼本地資訊平台 座落於深水埗的選物店Foreforehead，近日與瑞典國寶級陶藝家Lisa Larson，舉行香港首個作品最齊全的陶瓷Pop-Up～這些在全球最受歡迎的陶瓷動物，包括獅子Lion和胖貓Mia等也有四個size，更首現360mm高超巨大Lion Maxi！

[店長私心推介系列] 除了各款常規作品，Keramik Studion Gustavsberg的工匠亦會不定期復刻製作已停產的Lisa Larson作品。

造型勁浪漫超溫馨的Dancing Couple，是店長一見傾心的作品，但由於製作工序繁複且失敗率高，2001年限量生產600件後便告停產，至近年獲工匠挑選為復刻對象，作有限度make to order (不設存貨，接獲訂單才製作)，店長才有機會在此介紹。

每件復刻製作的Dancing Couple作品底部均有生產篇號，客人亦可指定男、女主角的禮服顏色 (黑、白或藍)，目前正開放預售，歡迎大家先到小店看過實物再訂購屬於自己的禮服顏色組合🖤🤍

📍銅鑼灣希慎道8號裕景商業中心地庫UB117
☎️9874 6255
⏰15:00-20:00（星期四至星期六）

店長分身寫咗篇介紹香港瑞典小店的介紹文，歡迎同樣喜歡瑞典文化嘅朋友幫忙補充

香港人真係好鍾意用鈔票說話，唔少網友知道瑞典向烏克蘭提供軍事援助後，即時話要爆買瑞典貨😂

不過買還買，溫馨提示返，香港嘅姨媽家俬隸屬某大財團，並唔係瑞典總公司直接擁有❌想對瑞典經濟作出正面貢獻，旅子憑個人對瑞典及本港瑞典社群嘅有限度認知，簡單整理咗啲品牌同小店，希望幫到大家啦～

1️⃣Absolut Vodka
戰鬥民族vodka當水飲，但全球最出名嘅vodka品牌Absolut其實made in Sweden！唔係鼓勵大家酗酒，不過無色無味清純度高嘅vodka真係調配雞尾酒嘅百搭之選🍸

2️⃣Swish Pizza
由居港瑞典人開設的家鄉風味薄餅店Swish Pizza，極受居港瑞典社群歡迎，就連香港嘅SwedCham都喺呢度搞過活動！餅底貫徹瑞典人喜愛的薄脆造法，原材料麵粉及toppings用的芝士堅持只用瑞典貨，咁仲唔係直接支持當地經濟？

3️⃣MrMeatball來自瑞典的肉丸先生
呢間肉丸先生應該唔少人聽過，就連餓底tv都採訪過。同樣是居港瑞典人開設的小店，除咗著名嘅瑞典肉丸，仲有各款來自北歐嘅超高質急凍食物，旅子就有位嘴刁朋友，淨係食北歐無污染海域出產嘅深海魚，貪佢肉質彈滑之餘又無腥味喎😅

4️⃣15squarestreet
要知道，瑞典人對fika的重視，比英國人對下午茶的執着有過之而無不及，在這間由居港斯德哥爾摩設計師開設的cafe兼選物店15squarestreet，就可以還原邊飲瑞典咖啡邊食玉桂卷的經典場景。

5️⃣lisalarson.hk
終於有香港人經營嘅瑞典小店！前旅遊記者（即本人）http://xn--lisalarson-hk5yu93o344a.hk/，主要代理瑞典國寶級藝術家Lisa Larson設計的陶瓷擺設，由工匠以傳統工藝製作的貨品全部瑞典直送，既可直接支持當地經濟，又可以為日漸式微的傳統工藝延續生命。

店長在開業前曾為選址煩惱，最後因要兼顧零售及代理業務而揀咗現處的商業大廈地庫，既有處理文件時所需的寧靜，又有showroom必備的玻璃櫥窗，而家仲多咗唔使嘟嘟嘟嘅方便 (暫時)，真係估佢唔到嘅bonus😅

二人限聚，各位睇路👀
留返啲罰款，足夠帶好多件Lisa Larson作品返去佈置屋企㗎！

都市傳說，香港人除咗鍾意返工，仲好鍾意排隊😂

不過，排隊買限量名牌手袋、排隊撲演唱會飛、排隊食打卡甜品、排隊玩機動遊戲，同被迫排隊強檢，心情應該好大落差😢

面對以小時作單位的漫長等待，Lisa Larson貓貓系列最年輕的成員Moa都排住隊為大家打氣，希望香港人坎坷過後有艇搭，好人好事在今個大貓年排住隊不請自來💪🏼

插好年花，掛好注連繩，小店正式收爐，希望虎年會多啲人嚟搵店長啦🥰

有心水清的顧客問店長：你哋開咗唔夠3個月，點解咁快加價？

🥺實不相瞞，Keramik Studion Gustavsberg每年2月均會調整價格，但加幅處於合理範圍，對小店成本並未構成太大壓力；相反，某位唔戴口罩發表講話嘅首長，一而再地以防疫為由收緊空運限制，令瑞典直送的運輸成本以倍數增長，即使降低利潤，依然無法補償當中差價，實在是殺了店長一個措手不及😢

由於不想將天價運輸費全數轉嫁予消費者，惟有減少運輸次數及加大訂單數量來攤分成本，換句話說，店內作品有機會出現缺貨情況，而補貨及預售亦未必能在原來的4-6星期內辦到……如果情況持續惡化，令空運變得不可能，Lisa Larson的作品，有機會需要經歷幾個月飄洋過海之旅才能抵港，但易碎品能否承受顛簸的航程，又是另一個未知數❤️‍🩹

面對一籃子不確定，小店不知道，還可以走多遠，但香港人絕對值得擁有高質的生活小物選擇，只要還有欣賞傳統工藝的顧客，小店會努力在狹縫中求存，希望大家都多點探望店長，了解Lisa Larson跟Keramik Studion Gustavsberg的故事😊

［為什麼要將人類的錯誤諉過於其他生命？］從前，有種自以為是的生物，把小型哺乳類動物帶到實驗室，強行注射病毒令牠們染病，用以研發、測試疫苗。如今，卻因為同一物種帶有病毒而殘殺過千條無辜生命…

鼠鼠和兔兔，對不起，讓你們受委屈了，願你們到達彩虹橋的另一端，能夠自由自在地奔跑跳躍，享受這個世界無法給予你們的快樂🙏🏼

#尊重生命 #請勿棄養

由於入貨成本增加，小店所有商品都要加價啦，如果已經有心水，不妨喺農曆新年前帶佢哋走呀～

［越是不安的日子，更應好好善待自己］瑞典的冬天，嚴寒又漫長，永夜聽來浪漫，實際上每年都有人因日短夜長而誘發季節性情緒失調，亦因為每年有接近一半時間要留在室內度過，北歐人向來講究家居的裝飾佈置，既要美觀耐用，又要溫馨愜意。

香港人嘛，自古受土地問題影響，一放假就出走，所謂家居，只是個生活作息的空間，直至近兩年，外遊習慣被中止，在家時間急速增長，卻依然有不少人低估了裝飾擺設的功能，忘記了會心微笑帶來的療癒滿足。

晚市堂食的自由被再次剝削了，但我們可以選擇以怎樣的態度應對，畢竟，在荒謬不安的年代，活得安好就是最佳的對抗，只要家中有個如北歐家居般溫暖的角落，食外賣又有乜好怕喎！

睇到花多眼亂的Kennel系列，由多個品種的汪星人組成，高貴的阿富汗犬、苗條的臘腸、傻氣的布爹利、圓潤的老虎/法鬥、溫馴的德國牧羊、嬌小的玩具貴婦、機靈的King Charles (Spaniel)等，與各位家中主子的相似程度有多高呢？

拜拜2021年條尾👋🏼
請大家2022年繼續拚命無恙🙏🏼

元旦周末，店長會帶埋部分Lisa Larson作品遠征將軍澳市集，有意到訪銅鑼灣店的話，請留意營業安排🎊

🎄聖誕日，小店休息一天

周末市集期間，店長被客人一句「有冇可以鎮宅嘅款式？」問得啞口無言，一直耿耿於懷，畢竟Lisa Larson自1955年投身陶瓷藝術創作，至今仍保持常規生產的作品超過300款，未能滿足客人的情況少之又少…

輾轉反側幾日，終於想起這兩個維京戰士擺件！公元8-11世紀，瑞典、挪威、丹麥等國家尚未成形，整個北歐半島均是維京文化的天下，以勇武見稱的戰士更令敵人聞風喪膽，雖然經Lisa一雙巧手卡通化後已殺傷力大減，但手持劍盾與長矛的模樣，依然絕不比我們熟悉的門神遜色，就算鎮宅不成，鎮紙都綽綽有餘😜

(on left) Viking with Sword
size (mm): 95w x 130h x 50d
price: hkd980

(on right) Viking with Bird
size (mm): 95w x 110h x 45d
price: hkd980

噢聖誕節托它歸家～聖誕最後召集，仲未買到心水禮物的話，小店今個星期有特別營業安排，歡迎大家將各款手感北歐設計帶返屋企

港島區嘅朋友注意啦，小店星期五、六、日會過海擺市集，銅鑼灣店暫時休息，星期四照常營業。

九龍區嘅朋友你哋好👋🏻小店首次參加市集，揀咗尖沙咀K11 Art Mall，除咗有店長精選嘅Lisa Larson作品同應節嘅Santa系列，主辦單位仲準備咗 傭仔日記 Maid's diary 嘅紀念品畀大家免費換領，希望到時見到大家啦！

近年流行的北歐詞語，除了來自丹麥的「hygge」，還有瑞典語「lagom」，兩者都與work-life balance生活哲學有關，而Lisa Larson創作的聖誕老人，正正示範了繁忙工作之餘亦要享受me time的道理，如果你也是個盲目地發奮忙忙忙的人，就讓Yoga Santa提醒你，休息與調整的重要性吧～

北歐民間傳說中，聖誕老人並非人類，而是自然界的精靈，因此，Lisa Larson的Santa系列中，會有這款坐在大雪球上的聖誕小精靈出現，作品名原叫Snowball Tomte (瑞典文精靈)，後來為了照顧不懂瑞典文的fans才改名叫Snowball Santa🎅🏼

Ho! Ho! Ho! 休息咗一年，聖誕老人終於重新投入工作啦！向左走向右走的Busy Santa，到底為世界各地的小朋友準備咗乜嘢禮物呢？歡迎大家親自嚟舖頭問吓佢🎅🏼