Dio Chhatrapati Sambhajinagar

जिल्हाधिकारी कार्यालयात डॉ.गोविंदभाई श्रॉफ यांना अभिवादन

छत्रपती संभाजीनगर, दि.22(जिमाका):- जिल्हाधिकारी कार्यालयात आज डॉ.गोविंदभाई श्रॉफ यांच्या पुण्यतिथी निमित्त अभिवादन करण्यात आले. तहसिलदार श्रीमती तेजस्विनी जाधव यांनी प्रतिमेस पुष्पहार अर्पण केला. नायब तहसिलदार सोहम वायळ, नायब तहसिलदार अरुण पंडुरे, तसेच जिल्हाधिकारी कार्यालयातील अधिकारी कर्मचारी यावेळी उपस्थित होते.
00000

दौलताबाद किल्ला ते वेरुळ लेणी वाहतूक मार्गात रविवारी(दि.26) बदल

छत्रपती संभाजीनगर, दि.21(जिमाका):- दौलताबाद किल्ला ते वेरुळ लेणी या दरम्यान रविवार दि.26 रोजी औरंगाबाद ब्लॅक बक्स समूहा तर्फे मॅरेथॉन रन स्पर्धा आयोजित करण्यात आली आहे. त्यामुळे या मॅरेथॉन स्पर्धेच्या कालावधीत (पहाटे साडेचार ते सकाळी साडेअकरा) छत्रपती संभाजीनगर आयुक्तालय हद्दीतील दौलताबाद टी पॉईंट ते वेरुळ लेणी मार्गावरील वाहतुक बंद ठेवून वाहतुकीत बदल करण्यात आला आहे,तसे आदेश पोलीस अधीक्षक मनिष कलवानिया यांनी निर्गमित केले आहेत.

आदेशात म्हटल्यानुसार, मॅरेथॉन स्पर्धा ही दौलताबाद ते वेरुळ लेणी या रोडवर असून रविवार दि.26 रोजी पहाटे साडेचार ते सकाळी साडेअकरा वा. पर्यंत छत्रपती संभाजीनगर ते वेरुळ मार्गावरील वेरुळ लेणी ते कागजीपूरा पोलीस आयुक्तालयातील हद्दीपर्यंतचा रस्ता सर्व प्रकाराच्या वाहनांसाठी बंद राहील. या कालावधीत वाहतुकीच्या मार्गात बदल करण्यात आला आहे.

तो या प्रमाणे-
छत्रपती संभाजीनगर – दौलताबाद मार्गे वेरुळ लेणी जाणारी वाहने छत्रपती संभाजीनगर – दैलताबाद टी पाँईन्ट (शरनापुर) कसाबखेडा-वेरुळ मार्गे जातील.
वेरुळ – खुलताबाद – दौलताबाद मार्गे छत्रपती संभाजीनगर कडे येणारी वाहतूक वेरुळ – कसाबखेडा – माळीवाडा – दौलताबाद टि पाँईन्ट मार्गे- छत्रपती संभाजीनगर कडे येईल.
फुलंब्री - खुलताबाद – वेरुळ जाणारी वाहतुक फुलंब्री – छत्रपती संभाजीनगर- नगरनाका – दौलताबाद टि पाँईन्ट- कसाबखेडा मार्गे वेरुळला जाईल.
वेरुळ- खुलताबाद- फुलंब्री जाणारी वाहतूक वेरुळ- कसाबखेडा – दौलताबाद टि पाँईन्ट छत्रपती संभाजीनगर मार्गे फुलंब्री कडे जाईल.
छत्रपती संभाजीनगर- दौलताबाद – खुलताबद जाणारी वाहतुक छत्रपती संभाजीनगर – फुलंब्री मार्गे खुलताबाद जाईल.
खुलताबाद- दौलताबाद मार्गे छत्रपती संभाजीनगर जाणारी वाहतुकखुलताबाद – फुलंब्री मार्गे छत्रपती संभाजीनगर ला जाईल.
00000

मनाई आदेश जारी

छत्रपती संभाजीनगर,दि.20 (जिमाका)- जिल्ह्यातील ग्रामीण भागात कायदा सुव्यवस्था अबाधित रहावी यासाठी अपर जिल्हादंडाधिकारी जनार्दन विधाते यांनी मनाई आदेश जारी केले आहेत. हे आदेश दि. 30 नोव्हेंबर पर्यंत अंमलात असतील. या आदेशाद्वारे शस्त्र बाळगणे, विना परवानगी पाच पेक्षा अधिक व्यक्तिंनी एकत्र येण्यास मनाई केली आहे. पाच पेक्षा जास्त व्यक्ती जमण्यासाठी सभा, मिरवणूक, मोर्चा, ध्वनिक्षेपक वाजविण्यास परवानगी देण्याचे अधिकार जिल्हा पोलीस अधीक्षक (ग्रामीण) तसेच त्यांनी प्राधिकृत केलेल्या पोलीस अधिकाऱ्यांना असतील. या आदेशाचा भंग करणाऱ्यांविरुद्ध कायदेशीर कारवाई करण्यात येईल असेही स्पष्ट करण्यात आले आहे.

साहित्यरत्न लोकशाहीर अण्णाभाऊ साठे विकास महामंडळ; २९ रोजी मेळावा

छत्रपती संभाजीनगर, दि.२०(जिमाका):- साहित्यरत्न लोकशाहीर अण्णाभाऊ साठे विकास महामंडळातर्फे राबविण्यात येणाऱ्या विविध योजनांच्या प्रचारासाठी बुधवार दि.२९ रोजी मेळाव्याचे आयोजन करण्यात आले आहे. डॉ. बाबासाहेब आंबेडकर सामाजिक न्याय भवन, शिवाजी हायस्कूल शेजारी, खोकडपुरा, छत्रपती संभाजीनगर येथे बुधवार दि.२९ रोजी सकाळी ११ वाजता हा मेळावा होणार आहे. अध्यक्षस्थानी डॉ. बाबासाहेब आंबेडकर संशोधन प्रशिक्षण संस्था (बार्टी) पुणेचे महासंचालक सुनिल वारे हे राहणार असून साहित्यरत्न लोकशाहीर अण्णाभाऊ साठे विकास महामंडळाचे व्यवस्थापकीय संचालक मनिष सांगळे यांची प्रमुख उपस्थिती राहणार आहे. छत्रपती संभाजीनगर व जालना या जिल्ह्यातील इच्छुक लाभार्थ्यांनी या योजनांची माहिती करुन घेण्यासाठी उपस्थित रहावे,असे आवाहन महामंडळाचे प्रादेशिक व्यवस्थापक किसन पवार यांनी केले आहे.
०००००

जिल्ह्यात कुष्ठ व क्षयरुग्ण शोध मोहिमेस सुरुवात

छत्रपती संभाजीनगर, दि.२०(जिमाका):- जिल्ह्यात कुष्ठरोग व सक्रिय क्षयरुग्ण शोध मोहिमेस आज पासून सुरुवात झाली असून ही मोहिम बुधवार दि.६ डिसेंबर पर्यंत सुरु राहिल,असे सहाय्यक संचालक आरोग्य सेवा (कुष्ठरोग) डॉ.एस.एन.हालकुंडे यांनी कळविले आहे. मोहिमे दरम्यान आपल्या घरी येणाऱ्या प्रशिक्षित स्वयंसेवकाकडून तपासणी करुन घ्यावे व त्यांना सहकार्य करावे असे आवाहन जिल्हा परिषदेचे मुख्य कार्यकारी अधिकारी डॉ. विकास मीना यांनी केले आहे.

या मोहिम कालावधीत जिल्ह्यातील ग्रामीण व शहरी भागातील २९ लक्ष ४१ हजार ५५० लोकसंख्येची तपासणी घरोघरी जाऊन होणार आहे. कुष्ठरोगाची व क्षयरोगाची तपासणी आशा स्वयंसेविका व पुरुष स्वयंसेवक यांच्यामार्फत करण्यात येणार आहे. यामध्ये ग्रामीण भागात दररोज २० घरांची व शहरी भागातील दररोज २५ घरांची तपासणी करण्यात येणार आहे. त्यासाठी एकूण २२५० टीम तयार करण्यात आल्या आहेत. या कामाचे पर्यवेक्षण करण्यासाठी ४५० पर्यवेक्षकांची नियुक्ती करण्यात आली आहे.

कुष्ठरोगाची लक्षणे :-
तेलकट, गुळगुळीत, सुजलेली व लालसर त्वचा, त्वचेवर फिकट लालसर रंगाचा बधीर चट्टा, भुवयांचे केस विरळ होणे, डोळे पूर्ण बंद करता न येणे, हातापायांची बोटे वाकडी असणे, मुंग्या येणे.

क्षयरोगाची लक्षणेः-
दोन आठवड्यापेक्षा अधिक कालावधीचा खोकला, दोन आठवड्यापेक्षा अधिक कालावधीचा ताप, वजनात लक्षणीय घट, भूक मंदावणे, मानेवर गाठी येणे.
जिल्ह्यात अशी लक्षणे असलेल्या लोकांनी मोहिमे दरम्यान आपल्या घरी येणाऱ्या प्रशिक्षित स्वयंसेवकाकडून तपासणी करुन घ्यावे व त्यांना सहकार्य करावे असे आवाहन जिल्हा परिषदेचे मुख्य कार्यकारी अधिकारी डॉ. विकास मीना यांनी केले आहे.
०००००

समृद्धी महामार्गःजालना ते छत्रपती संभाजीनगर उच्चदाब वाहिनीचे काम;

पर्यायी वाहतुकीसाठी महाराष्ट्र राज्य रस्ते विकास महामंडळाने दिले वेळापत्रक

छत्रपती संभाजीनगर, दि.20(जिमाका):- हिंदू हृदयसम्राट बाळासाहेब ठाकरे महाराष्ट्र समृद्धी महामार्गावर पॉवर ग्रिड ट्रान्समीमिशन अती उच्चदाब वाहिनी टॉवरचे काम करण्यात येणार आहे. त्यासाठी जालना ते छत्रपती संभाजीनगर दरम्यान दोन्ही बाजूंची वाहतुक मंगळवार दि.21 नोव्हेंबर, बुधवार दि.22 नोव्हेंबर असे दोन दिवस दुपारी १२ ते 4 यावेळात बंद असेल. उर्वरित कालावधीत वाहतुक सुरळीत सुरु राहील. बंद कालावधीत पर्यायी मार्गावरुन वाहतुक वळविण्यात आली आहे,असे महाराष्ट्र राज्य रस्ते विकास महामंडळाचे अधीक्षक अभियंता व प्रकल्प संचालक रामदास खलसे यांनी कळविले आहे.

यासंदर्भात प्रसिद्धीस दिलेल्या पत्रकात म्हटले आहे की, हिंदू हृदयसम्राट बाळासाहेब ठाकरे महाराष्ट्र समृद्धी महामार्गावर पॉवर ग्रिड ट्रान्समीशन अती उच्चदाब वाहिनी टॉवरचे काम करण्यात येणार आहे. हे काम मंगळवार दि.21 नोव्हेंबर, बुधवार दि.22 नोव्हेंबर, असे दोन दिवस दुपारी १२ ते 4 यावेळात होणार आहे. हे दोनही दिवस काम सुरु असलेल्या कालावधीत (दुपारी १२ ते 4) जालना ते छत्रपती संभाजीनगर दरम्यान समृद्धी महामार्गावरील जालना इंटरचेंज (IC-14) ते सावंगी इंटरचेंज (IC-16) दरम्यान नागपूरकडून मुंबईकडे जाणारी वाहतुक निधोना (जालना) इंटरचेंज IC-14 मधून बाहेर पडून निधोना एमआयडीसी मार्गे- राष्ट्रीय महामार्ग 753 A (जालना-छत्रपती संभाजीनगर) मार्गे केंब्रीज शाळेपर्यंत नंतर ती उजवीकडे वळून सावंगी बायपास मार्गे सावंगी इंटरचेंज क्र. IC-16 (छत्रपती संभाजीनगर) येथे समृद्धी महामार्गावर प्रवेश करुन शिर्डीकडे रवाना होईल. तर समृद्धी महामार्गावरील शिर्डीकडून नागपूरकडे जाणारी वाहतूक, सावंगी इंटरचेंज क्र. IC-16 (छत्रपती संभाजीनगर) येथून बाहेर पडून वर नमूद केलेल्या मार्गावरुन (विरुद्ध दिशेने) निधोना (जालना) इंटरचेंज क्र. IC-14 या ठिकाणी समृद्धी महामार्गावर प्रवेश करुन नागपूरकडे रवाना होईल,असे महाराष्ट्र राज्य रस्ते विकास महामंडळाचे अधीक्षक अभियंता व प्रकल्प संचालक यांनी कळविले आहे. उर्वरीत कालावधीत वाहतुक सुरळीत सुरु राहिल असेही स्पष्ट करण्यात आले आहे.

०००००

‘आयुष्यमान भारत’ मोफत नोंदणी, केवायसी सुविधा उपलब्ध;
नागरिकांनी लाभ घ्यावा-केंद्रीय अर्थ राज्यमंत्री डॉ.भागवत कराड

छत्रपती संभाजीनगर, दि.१७(जिमाका):- केंद्राच्या विविध योजना नागरिकांपर्यंत पोहोचविण्यासाठी ‘विकसित भारत यात्रा’ सुरु करण्यात आली आहे. लवकरच ही यात्रा छत्रपती संभाजीनगर जिल्ह्यातही सुरु होईल. यानिमित्ताने विविध योजनांचा लाभ जनतेपर्यंत पोहोचविण्यासाठी सर्व यंत्रणांनी प्रयत्न करावयाचे आहेत. जिल्ह्यात आयुष्यमान भारत ही आरोग्य सुविधा पुरविणारी योजना आहे. या योजनेचा लाभ घेण्यासाठी मोफत नोंदणी, केवायसी सुविधा उपोलब्ध आहे. त्याचा नागरिकांनी लाभ घ्यावा,असे आवाहनही केंद्रीय अर्थराज्यमंत्री डॉ. भागवत कराड यांनी केले.

विकसित भारत संकल्प यात्रेच्या अनुषंगाने विविध योजनांचा आढावा आज डॉ. कराड यांच्या अध्यक्षतेखाली घेण्यात आला. जिल्हा नियोजन समिती सभागृहात पार पडलेल्या बैठकीस अपर जिल्हाधिकारी डॉ.अरविंद लोखंडे, जिल्हा कृषी अधीक्षक कृषी अधिकारी प्रकाश देशमुख, जिल्हा नियोजन अधिकारी भारत वायळ, जिल्हा परिषदेचे उपमुख्यकार्यकारी अधिकारी ओमप्रकाश रामावत, उपविभागीय अधिकारी रामेश्वर रोडगे, मनपा उपायुक्त अपर्णा थेटे, जिल्हा अग्रणी बँकेचे व्यवस्थापक मंगेश केदार, जिल्हा शिक्षण अधिकारी एम.के.देशमुख, नगरपालिकेचे मुख्य अधिकारी, तहसिलदार यांच्यासह जिल्हा ग्रामीण विकास यंत्रणा अदिवासी विभाग, नगरपालिका महिला बालकल्याण मुख्यअधिकारी, खादी ग्रामोद्योग महामंडळ यांच्यासह संबधित विभागाचे विभागप्रमुख उपस्थित होते.

आयुष्यमान भारत योजनेचा लाभ अधिकाधिक लोकांपर्यंत पोहोचवा

डॉ. कराड म्हणाले की,आयुष्यमान भारत योजनेची नोंदणी करण्यासाठी जवळच्या आपले सरकार सेवा केंद्र, सीएससी (सेवा केंद्र), येथे मोफत नोंदणी करावी. तसेच केवायसी करावयाची असल्यास ती ही मोफत करावी. त्यानंतर हे कार्ड मोफत घरपोच पोहोचवले जाईल. तरी नागरिकांनी लाभ घ्यावा. या योजनेद्वारे लोकांना आरोग्य विम्याचा लाभ मिळतो, असेही डॉ. कराड यांनी सांगितले. त्यासाठी ग्राम पातळीपासून ते शहरी भागातही आशा स्वयंसेविका, स्वस्तधान्य दुकाने यांच्यामार्फत लोकांपर्यंत माहिती पोहोचवून अधिकाधिक लोकांना या योजनेचा लाभ मिळवून द्यावा, असे त्यांनी निर्देशित केले. कृषी, ग्रामविकास, अदिवासी विकास विभाग, शिक्षण, आरोग्य विभाग यांच्या समन्वयाने आयुष्यमान भारत योजनेच्या लाभासाठी मोफत नोंदणी करुन घेण्यात यावी. जेणेकरुन सर्वसामान्यांना आरोग्य सुविधा विमा कवच प्राप्त होईल. तसेच ही नोंदणी करण्यासाठी आशा अंगणवाडी सेविका, विद्यार्थी, नागरी सुविधा केंद्र याची मदत घेऊन उद्ष्टि पूर्ण करण्याचे निर्देश डॉ.कराड यांनी दिले. प्रत्येक योजनेची प्रभावी अंमलबजावणी करण्यासाठी समन्वय असणे गरजेचे आहे. योजनांच्या प्रचारासाठी जिल्ह्यात ७ प्रचार रथ येणार आहेत. प्रत्येक ग्रामपंचायतस्तरावर नोडल अधिकारी नेमले जाणार आहेत.

विविध योजनांचा आढावा

बैठकीत प्रधानमंत्री गरीब कल्याण योजना, दीनदयाळ अंत्योदय योजना, प्रधानमंत्री जीवन ज्योती विमा, सुरक्षा विमा योजना, अटल पेन्शन योजना, प्रधानमंत्री जनधन योजना, प्रधानमंत्री आवास योजना, प्रधानमंत्री उज्ज्वला योजना, प्रधानमंत्री विश्वकर्मा योजना, किसान क्रेडीट कार्ड, प्रधानमंत्री किसान सन्मान योजना, प्रधानमंत्री पोषण योजना, हर घल जल योजना, स्वामित्व योजना, अशा विविध योजनांचा आढावा डॉ. कराड यांनी घेतला.

कार्यशाळा घेऊन योजनेची माहिती पोहोचविणार

किसान क्रेडीट कार्ड, जनधन योजना, महिला बचत गटांना अर्थसहाय्य देणे यासाठी आपण योजना निहाय शेतकरी, महिला, नव उद्योजक यांची कार्यशाळा घेऊन त्यांच्या पर्यंत माहिती पोहोचवू, त्याचे नियोजन करावे,असे निर्देशही डॉ. कराड यांनी यंत्रणेला दिले. तसेच याबाबत प्रचार प्रसिद्धी करुन विविध माध्यमांद्वारे लोकांपर्यंत माहिती पोहोचवा,असे निर्देशही डॉ. कराड यांनी दिले. नोव्हेंबर महिन्याच्या शेवटच्या आठवड्यात जिल्ह्यात या यात्रेस प्रारंभ होईल अशी माहितीही यावेळी देण्यात आली.
०००००

दिवाणी न्यायाधीश कनिष्ठस्तर व न्यायदंडधिकारी प्रथम वर्ग
पूर्व परीक्षा-२०२३; आज (शनिवार दि.१८)

नऊ परीक्षा केंद्र;३०९६ उमेदवार; ३८८ कर्मचारी

छत्रपती संभाजीनगर, दि.१७(जिमाका):- महाराष्ट्र लोकसेवा आयोगामार्फत शनिवार दि.१८ रोजी दिवाणी न्यायाधीश कनिष्ठ स्तर व न्यायदंडधिकारी प्रथम वर्ग पूर्व परीक्षा २०२३ परीक्षेचे आयोजन करण्यात आले आहे. जिल्ह्यासाठी नऊ परीक्षा केंद्रांवर ३०९६ उमेदवारांची परीक्षा देण्याची व्यवस्था करण्यात आली आहे. परीक्षा सुरळीत पार पाडण्यासाठी जिल्हा प्रशासनाने ३८८अधिकारी- कर्मचारी नियुक्त केले आहेत, अशी माहिती उपजिल्हाधिकारी प्रभोदय मुळे यांनी दिली आहे.

परीक्षा केंद्रनिहाय उमेदवार संख्या याप्रमाणे-
१. डॉ.बाबासाहेब आंबेडकर महाविद्यालय कला व वाणिज्य, नागसेनवन-३१२,
२. मिलिंद महाविद्यालय विज्ञान, नागसेनवन- ३१२,
३. सरस्वती भूवन महाविद्यालय विज्ञान औरंगपुरा- २८८
४. सरस्वती भूवन मुलांची शाळा,औरंगपुरा- ३८४,
५. सरस्वती भूवन महाविद्यालय आर्टस व कॉमर्स- ४३२,
६. शिवाजी हायस्कूल, खोकडपुरा-२४०
७. मौलाना आझाद महाविद्यालय आर्टस, विज्ञान आणि वाणिज्य, रोजा बाग पार्ट - I -३१२,
८. मौलाना आझाद महाविद्यालय आर्टस, विज्ञान आणि वाणिज्य, रोजा बाग पार्ट -II-४५६,
९. शासकीय महाविद्यालय, कला व विज्ञान सुभेदार विश्रामगृहजवळ विश्वास नगर-३६०.
अशा एकूण ३०९६ परीक्षार्थींच्या परीक्षेची व्यवस्था करण्यात आली आहे. परीक्षा सुरळीत पार पाडण्यासाठी ३८८ अधिकारी कर्मचारी नियुक्त करण्यात आले आहेत.

परीक्षार्थींसाठी सुचनाः-

परीक्षार्थींनी परीक्षेस येतांना ओळखीचा पुरावा (स्वतःचे आधार कार्ड, निवडणूक आयोगाचे ओळखपत्र, पासपोर्ट, पॅन कार्ड, स्मार्टकार्ड प्रकारचे ड्रायव्हींग लायसन्स यापैकी कोणतेही एक) परीक्षा कक्षात उमेदवारास प्रवेश प्रमाणपत्र, काळ्या शाईचे बॉलपेन, ओळखपत्र, ओळखपत्राची छायांकीत प्रत या व्यतिरिक्त अन्य कोणतेही साहित्य अथवा वस्तू घेऊन जाण्यास परवानगी नाही. तसेच डिजीटल डायरी, मायक्रोफोन, मोबाईल, ब्लू टूथ, कॅमेरा फोन अन्य तत्सम संदेशवाहक उपकरण, इलेक्र्ट्रॉनिक साहित्य परीक्षा कक्षात नेण्यास मनाई आहे,असेही उपजिल्हाधिकारी प्रभोदय मुळे यांनी कळविले आहे.
०००००

लाभर्थ्यांना नजिकच्या ठिकाणी धान्य उपलब्ध

“एक देश एक शिधापत्रिका” योजनेचा लाभ घेण्याचे आवाहन

छत्रपती संभाजीनगर,दि.13 (जिमाका)- एक देश एक शिधापत्रिका (ONORC) योजना पासून 1 जानेवारी 2020 राज्यात लागू करण्यात आली आहे. केंद्र शासनाच्या या योजनेतंर्गत संबंधित रास्तभाव दुकानात आधार Authentication करुन लाभार्थ्याला पोर्टेबिजिटीद्वारे कोणत्याही राज्यातील कोणत्याही रास्तभाव दुकानातुन धान्य उचलण्याची सोय उपलब्ध आहे.

राज्यातील रास्तभाव दुकानातून स्थलांतरित कामगार, ऊसतोड मजूर, आदिवासी ई. स्थलांतरण करणाऱ्या लाभर्थ्यांना त्यांच्या स्थलातंरणाऱ्या ठिकाणी कोणत्याही रास्तभाव भाव दुकानात अनुज्ञेय असलेले धान्य घेण्याची सुविधा पोर्टेबिलीटीद्वारे ई-पॉस उपकरणांवर उपलब्ध करुन देण्यात आली आहे.

अन्न सुरक्षा कायद्याचे सर्व लाभार्थी,विशेषत: स्थलांतरीत, कामगार त्यांच्या सध्या राहत असलेल्या ठिकाणी धान्या उपलब्ध होणार आहे. लाभार्थी- अन्न सुरक्षेबाबत देशाच्या कोणत्याही भागात स्वावलंबी व्हावेत, हा “एक देश एक शिधापत्रिका” योजनेचा हेतु आहे. योजनेच्या प्रभावी अंमलबजावणी साठी छत्रपती संभाजीनगर जिल्ह्यात वास्तव्यास असलेल्या व शिधापत्रिका असलेल्या इतर राज्यातील नागरिकांना वास्तव्याजवळील रास्त भाव दुकानात बायोमेट्रिक प्रणालीद्वारे धान्य प्राप्त करुन घ्यावे. लाभर्थ्यांनी निकषानुसार सार्वजनिक वितरण व्यवस्थेअंतर्गत धान्याचा लाभ घ्यावा, तसेच या योजनेतंर्गत कोणतीही अडचण असल्यास संबधित तालुक्यातील तहसील कार्यालयातील पुरवठा शाखेत अथवा जिल्हा पुरवठा अधिकारी कार्यालयाशी संपर्क साधवा. असे आवाहन जिल्हा पुरवठा अधिकारी वर्षाराणी भोसले यांनी प्रसिद्धीपत्रकाद्वारे केले आहे.
०००००

पशुसंवर्धन विभागाच्या वैयक्तिक लाभाच्या योजना;अर्ज करण्याचे आवाहन

छत्रपती संभाजीनगर,दि.९(जिमाका)- पशुसंवर्धन विभागाच्या वतीने वैयक्तिक लाभाच्या योजना राबविल्या जातात. या योजनांचा लाभ घेण्यासाठी ऑनलाईन पद्धतीने (संकेतस्थळ व मोबाईल ॲपद्वारे) अर्ज करावा. त्यासाठी दि.९ डिसेंबर पर्यंत मुदत आहे,असे जिल्हा पशुसंवर्धन उपायुक्त डॉ. पी.डी. झोड यांनी कळविले आहे.

समाविष्ट योजना

या राज्यस्तरीय व जिल्हास्तरीय नाविन्यपूर्ण योजनेअंतर्गत दुधाळ गाई-म्हशीचे गट वाटप करणे, शेळी-मेंढी गट वाटप करणे, शेळी-मेंढी गट वाटप करणे, १००० मांसल कुक्कुट पक्षांच्या संगोपनासाठी निवारा शेड उभारणीस अर्थसहाय्य देणे, १०० कुक्कुट पिलांचे वाटप व २५ + ३ तलंगा गटवाटप इ. साठी सन २०२३-२४ मध्ये ऑनलाईन पद्धतीने लाभार्थी निवड प्रक्रिया राबविली जाणार आहे. तसेच डेअरी, पोल्ट्री किंवा शेळीपालन यासाठीही अर्ज करता येणार आहे.

पाच वर्षांपर्यंत प्रतिक्षा यादी लागू

लाभार्थी निवडीची ही प्रक्रिया अधिकाधिक पारदर्शक करण्यासाठी गेली चार वर्ष ऑनलाईन पद्धतीने अर्ज मागविणे व लाभार्थी निवड करण्याची पद्धत सुरु करण्यात आली आहे. हीच पद्धत सन २०२१-२२ पासून जिल्हास्तरीय विविध योजनांसाठी लागू करण्यात आली आहे. एखाद्या योजनेकरीता अर्ज केल्यानंतर अर्जदारास दरवर्षी पुन्हा अर्ज करावे लागू नये यासाठी तयार केलेली प्रतिक्षा यादी सन २०२१-२२ पासून पुढील पाच वर्षापर्यंत म्हणजे सन २०२५-२६ पर्यंत सुरु ठेवण्याची सोय केली आहे. त्यामुळे अर्ज केलेल्या पशुपालकांना लाभ मिळण्याची शक्यता वाढली आहे. शिवाय प्रतिक्षा यादीतील त्यांच्या क्रमांकानुसार केव्हा लाभ मिळेल हे सुद्धा कळू शकते. त्यामुळे लाभार्थी हिस्सा भरणे किंवा इतर बाबींकरीता नियोजन करणे शक्य होते.

संकेतस्थळ व मोबाईल ॲपद्वारे अर्ज करण्याची सुविधा

पशुपालकांनी ऑनलाईन अर्ज भरण्यासाठी संकेतस्थळ https://ah.mahabms.com , ॲण्ड्रॉईड मोबाईल ॲप्लिकेशन AH.MAHABMS (Google प्ले स्टोअरवर उपलब्ध) वर नाव नोंदवावे. योजनेची संपूर्ण माहिती,अर्ज करण्याची पद्धती याबाबत संपूर्ण तपशील संकेतस्थळावर तसेच मोबाईल ॲपवर उपलब्ध आहे. अर्ज फक्त ऑनलाईन पद्धतीनेच स्विकारले जाणार आहेत. या प्रणालीत अर्ज भरणे अत्यंत सुलभ असुन, अर्जामधील माहिती कमीत कमी टाईप करावी लागेल. तसेच बहुतांशी माहितीबाबत पर्याय निवडण्याची सुविधा उपलब्ध आहे. त्यामुळे पशुपालकांनी अर्ज भरण्याकरीता स्वत:च्या मोबाईलचा वापर करावा. अर्ज भरताना अर्जदाराने नोंदविलेल्या मोबाईल क्रमांकावर अर्जाच्या स्थितीबाबत संदेश पाठविण्यात येणार असल्याने अर्जदाराने आपला मोबाईल क्रमांक बदलू नये. मागील वर्षी अर्ज केलेल्या अर्जदारांनी पुन्हा अर्ज करण्याची आवश्यकता नाही.अर्ज दि. ९ नोव्हेंबर ते ८ डिसेंबर या कालावधीत करता येणार आहे.

अधिक माहितीसाठी टोल फ्री क्रमांक १९६२ किंवा १८००२३३०४१८ किंवा तालुक्याचे पशुधन विकास अधिकारी (विस्तार), पंचायत समिती, जिल्हा पशुसंवर्धन अधिकारी अथवा उपआयुक्त कार्यालय, तालुका लघुपशुवैद्यकीय सर्वचिकित्सालय अथवा नजीकच्या पशुवैद्यकीय केंद्रावर संपर्क साधावा, असे आवाहन पुशसंवर्धन विभागातर्फे करण्यात आले आहे.
०००००

विशेष अर्थसहाय्य योजना;लाभार्थ्यांना हयात प्रमाणपत्र सादर करण्याचे आवाहन

छत्रपती संभाजीनगर,दि.९(जिमाका)- विशेष अर्थसहाय्य योजना (संजय गांधी निराधार योजना, श्रावणबाळ योजना, इंदिरा गांधी वृद्धापकाळ योजना इ.) लाभार्थ्यांसाठी अनुदान प्रदान करण्यात आले आहे. ज्या लाभार्थ्यांना अनुदान मिळाले नसेल त्यांनी आपले हयात प्रमाणपत्र सादर करावे,असे आवाहन तहसिलदार संगायो शहरविभाग, छत्रपती संभाजीनगर यांनी केले आहे.

शहर विभागासाठी संजय गांधी निराधार योजनेअंतर्गत १ कोटी ५७ लाख ७८ हजार १०० रुपये इतके अनुदान वाटप झाले आहे. तसेच श्रावणबाळ निराधार योजनेअंतर्गत १ कोटी ६० लाख ७१ हजार ५०० रुपये अनुदान वाटप झाले आहे. तथापि, ज्या लाभार्थ्यांना अनुदान मिळाले नसेल त्यांनी आपले हयात प्रमाणपत्र तहसिलदार संगायो शहर विभाग, छत्रपती संभाजीनगर येथे सादर करावे,असे आवाहन करण्यात आले आहे.
०००००

प्रधानमंत्री विश्वकर्मा कौशल्य सन्मान योजना;
पारंपारिक व्यवसाय प्रशिक्षकांकडून अर्ज मागविले

छत्रपती संभाजीनगर,दि.९(जिमाका)- केंद्र शासनाने देशातील हस्तकारागिरांना प्रोत्साहन देण्यासाठी प्रधानमंत्री विश्वकर्मा कौशल्य सन्मान योजना सुरु केली आहे. या योजनेच्या पहिल्या टप्प्यामध्ये १८ व्यवसायांचा (ट्रेड) समावेश केला असून या विविध १८ व्यवसायांचे प्रशिक्षण देण्यासाठी मास्टर ट्रेनर्सची नेमणूक करण्यात येणार आहे. त्यासाठी इच्छुकांकडून अर्ज मागविण्यात आली आहे.

निवड झालेले मास्टर ट्रेनर ज्या दिवशी प्रशिक्षणार्थीना प्रशिक्षण देतील त्या प्रत्येक दिवसासाठी मानधन व प्रवास भत्ता राष्ट्रीय कौशल्य विकास प्राधिकरण (NSDC) मार्फत अदा करण्यात येईल. जिल्ह्यातील जेष्ठ व साधारणत: २० वर्षे अनुभव असलेल्या मास्टर ट्रेनर्सनी जिल्हा कौशल्य विकास, रोजगार व उद्योजकता मार्गदर्शन केंद्र, छत्रपती संभाजीनगर कार्यालयात आवश्यक माहिती व कागदपत्रे शुक्रवार दि.१७ नोव्हेंबर पर्यंत सादर करावीत, असे आवाहन जिल्हा कौशल्य विकास रोजगार व उद्योजकता मार्गदर्शन केंद्राचे सहायक आयुक्त एस.आर.वराडे यांनी केले आहे.

समाविष्ट पारंपारिक व्यवसाय- बांधकाम करणे, शिवणकाम, सुतारकाम, केशकर्तन, लोहारकाम, चपला शिवणे, बुट बनविणे,मातीची भांडी बनविणे, मूर्तीकार,शिळा कारागीर, कपडे धुलाई- इस्त्री, सोनारकाम, अवजार बनविणे, टोपली, चटई बनविणे, माळाकार, खेळणी बनविणे, जाळे बनविणे, बोट बनविणे इ.
०००००

जिल्हास्तरीय युवा महोत्सव २६ व २७ रोजी

छत्रपती संभाजीनगर,दि.९(जिमाका)- क्रीडा व युवक सेवा संचालनालय व राज्य कृषी आयुक्तालय पुणे यांच्या संयुक्त विद्यमाने जिल्हा, विभाग व राज्यस्तरीय युवा महोत्सवाचे आयोजन करण्यात येते. छत्रपती संभाजीनगरचा जिल्हास्तरीय युवा महोत्सव रविवार दि.२६ व सोमवार दि.२७ रोजी आयोजित करण्यात येणार असून या महोत्सवात जिल्ह्यातील युवक युवतींनी सहभागी व्हावे असे आवाहन जिल्हाप्रशासनातर्फे करण्यात आले आहे.

जिल्हास्तरीय युवा महोत्सवाच्या आयोजनाबाबत आज जिल्हाधिकारी कार्यालयात बैठकीचे आयोजन करण्यात आले. अपर जिल्हाधिकारी डॉ. अरविंद लोखंडे, जिल्हा क्रीडा अधिकारी बाजीराव देसाई, कृषी विभागाचे दिवटे, डॉ. बाबासाहेब आंबेडकर मराठवाडा विद्यापीठ विद्यार्थी कल्याण मंडळाचे डॉ. मुन्तजीब शेख, राष्ट्रीय सेवा योजनेचे हनुमान गाडे तसेच अन्य विभागप्रमुख आदी उपस्थित होते.

युवा महोत्सवात महाविद्यालयीन विद्यार्थ्यांचे संघ सहभागी होऊन कलागुणांचे सादरीकरण करतील. त्यात समुह लोकनृत्य, वैयक्तिक नृत्य, लोकगीत, कथालेखन, पोस्टर स्पर्धा, वक्तृत्व स्पर्धा, फोटोग्राफी, हस्तकला, वस्त्रोद्योग, कृषी उत्पादने इ. प्रकारांचा समावेश आहे. सर्व कला प्रकारांचे सादरीकरणासाठी तृणधान्य उत्पन्नवाढीसाठी विज्ञानाचा वापर, सामाजिक विकासात विज्ञानाचे योगदान ई संकल्पना देण्यात आली आहे,अशी माहिती जिल्हा क्रीडा अधिकारी देसाई यांनी दिली.

स्पर्धेत सहभागासाठी १५ ते २९ हा वयोगट असून कृषी महाविद्यालय, कनिष्ठ व वरिष्ठ महाविद्यालय, महिला मंडळातील युवक युवतींना या महोत्सवात सहभागी होता येईल. अधिक माहितीसाठीजिल्हा क्रीडा अधिकारी कार्यालयाशी संपर्क साधावा,असे आवाहन करण्यात आले आहे.
०००००

पैठण व फुलंब्री तालुक्यातील निराधारांच्या
बँक खात्यात अनुदान जमा

छत्रपती संभाजीनगर,दि.8 (जिमाका)- अनुदानाच्या प्रतीक्षेत असणाऱ्या निराधारांसाठी दिवाळी प्रकशमय होणार आहे. दिवाळीच्या पार्श्वभूमीवर पैठण व फुलंब्री तालुक्यातील निराधारांना दिलास मिळाला आहे.
पैठण तालुक्यात संजय गांधी निराधार योजनेसह, इंदिरा गांधी राष्ट्रीय वृद्धपकाळ, विधवा, दिव्यांग योजना व श्रावणबाळ सेवा राज्य निवृत्तीवेतन योजनेचे सप्टेंबर पर्यंत 11 हजार 922 लाभार्थी असुन त्यांची रक्क्म रु.4 कोटी 97 लक्ष 35 हजार 800 व ऑक्टोंबर पर्यंत 12 हजार 957 लाभार्थी असुन त्यांची रक्कम रु.2 कोटी 49 लक्ष 36 हजार 600 इतकी आहे.
तसेच फुलंब्री तालुक्यातील संजय गांधी निराधार योजनेसह श्रावणबाळ सेवा राज्य निवृत्तीवेतन योजनेचे सप्टेंबर पर्यंत 11 हजार 488 लाभार्थी असुन त्यांची जून 2023 पासूनची रक्क्म रु.5 कोटी 57 लक्ष 70 हजार 700 इतकी आहे.
पैठण – फुलंब्री तालुक्यातील संजय गांधी निराधार अनुदान योजना लाभार्थी संख्या 5 हजार 103 अनुदान वाटप 75 लक्ष 93 हजार, श्रावणबाळ सेवा राज्य निवृत्तीवेतन योजना लाभार्थी 5 हजार 774 अनुदान वाटप 86 लक्ष 61 हजार, इंदिरा गांधी राष्ट्रीय वृद्धापकाळ निवृत्तीवेतन योजना (राज्याचा हिस्सा) लाभार्थी 1 हजार 628 अनुदान वाटप 81 लक्ष 40 हजार 200, इंदिरा गांधी राष्ट्रीय विधवा निवृत्तीवेतन योजना लाभार्थी 311 अनुदान वाटप 3 लक्ष 73 हजार 200, इंदिर गांधी राष्ट्रीय दिव्यांग निवृत्तीवेतन योजना लाभार्थी 141 अनुदान वाटप 1 लक्ष 69 हजार 200 रुपये अनुदान जमा झाले आहेत.
पैठण व फुलंब्री तालुक्यातील लाभार्थ्यांच्या बँक खात्यामध्ये एकूण रु.13 कोटी 04 लक्ष 43 हजार 100 एवढी रक्कम जमा केली असल्याची माहिती उपविभागीय अधिकारी पैठण-फुलंब्री सोहम वायाळ यांनी प्रसिद्धीपत्रकाद्वारे दिली आहे.
00000

लोकशाही दिनात २० तक्रारी प्राप्त

औरंगाबाद, दि.७ (जिमाका) – दर महिन्याच्या पहिल्या सोमवारी जिल्हाधिकारी कार्यालयात लोकशाही दिन आयोजित करण्यात येतो. सोमवारी (दि.६) झालेल्या लोकशाही दिनी एकूण विविध विभागांशी संबंधित २० अर्ज दाखल झाले. त्यामध्ये महसूल विभाग- ९, जिल्हा परिषद- १ इतर निवेदन - १० यांचा समावेश आहे, अशी माहिती जिल्हाधिकारी कार्यालयातून देण्यात आली.

निवृत्ती वेतनधारकांच्या जीवनप्रमाण दाखल्यांसाठी
प्रत्यक्ष उपस्थिती सह ऑनलाईन पद्धतीचाही पर्याय

छत्रपती संभाजीनगर,दि.७ (जिमाका)- जिल्हा कोषागारामार्फत निवृत्ती वेतन व कुटुंब निवृत्तीवेतन धारकांच्या जीवन प्रमाणपत्राबाबत प्रत्यक्ष उपस्थिती द्यावी लागते. तथापि, प्रत्यक्ष उपस्थितीशिवाय बायोमेट्रिक पद्धतीनेही जीवन प्रमाण दाखला देण्याची सुविधा कोषागार विभागाने उपलब्ध करुन दिली आहे. निवृत्तीवेतनधारकांनी आपले जीवनप्रमाणपत्र वेळेत (दि.३० नोव्हेंबर पर्यंत) दाखल करावे, असे आवाहन उपसंचालक (वित्त) तथा वरिष्ठ कोषागार अधिकारी शेखर कुलकर्णी यांनी केले आहे.

प्रत्यक्ष उपस्थित राहून जीवनप्रमाण दाखला

निवृत्तीवेतन, कुटुंबनिवृत्तीवेतनधारकांचे खाते असलेल्या बँकेत कोषागार कार्यालयाकडून आद्याक्षरनिहाय यादी पाठविण्यात आली आहे. निवृत्तीवेतन धारकांनी दि. ३० नोव्हेंबर पर्यंत आपले खाते असलेल्या बँकेत प्रत्यक्ष हजर राहून यादीतील आपल्या नावासमोर स्वाक्षरीच्या रकान्यात शाखा व्यवस्थापकासमोर स्वाक्षरी करावी किंवा अंगठ्याच्या ठसा उमटवावा. तसेच पुन:र्नियुक्तीबाबत माहिती लागू असल्यास ती ही नोंदवावी. तसेच संबंधिताचा आधार नंबर, पॅन नंबर व मोबाईल नंबर याचीही नोंद करावी.

बायोमेट्रिक पद्धतीने जीवनप्रमाण दाखला

प्रत्यक्ष हजर राहून स्वाक्षरी करण्याच्या पद्धतीशिवाय बायोमॅट्रीक पद्धतीनेही जीवन प्रमाण दाखला सादर करता येणार आहे. त्यासाठी http://Jeevanpranam.gov.in या संकेत स्थळावर दि ३० नोव्हेंबर पर्यंत आपली माहिती अपडेट करावी. ज्यांनी स्वाक्षरी अथवा अंगठा उमटविलेला नसेल अथवा ऑनलाईन जीवन प्रमाण दाखला सादर केला नसेल त्यांचे डिसेंबर महिन्यातील निवृत्तीवेतन अदा केले जाणार नाही.

८० वर्षे पूर्ण केलेल्या निवृत्तीवेतनधारकांनाही कागदपत्रे सादर करण्याचे आवाहन

त्याचप्रमाणे ज्या कुटुंब निवृत्तीवेतनधारकांनी त्यांच्या वयाची ८० वर्ष किंवा त्यापेक्षा अधिक वर्ष पूर्ण केली आहेत अशा कुटुंबनिवृत्तीवेतनधारकांनी आपले आधारकार्ड, पॅन कार्ड तसेच आधार कार्ड, पॅनकार्ड उपलब्ध नसेल तर जिल्हा शल्य चिकित्सकाचे वयाबाबतचे अतिरिक्त निवृत्तीवेतन अदा करण्यासाठी वरिष्ठ कोषागार कार्यालय, छत्रपती संभाजीनगर येथे दि.१५ डिसेंबर २०२३ पूर्वी सादर करावे.

आयकर पात्र निवृत्तीवेतनधारकांकडूनही माहिती मागविली

ज्या निवृत्तीवेतनधारकांचे, कुटुंबनिवृत्तीवेतनधारकांचे वार्षिक निवृत्तीवेतन ७ लक्ष रुपयांपेक्षा अधिक असेल त्यांनी आयकर कपातीबाबत जुनी, नवीन आयकर कपात प्रणाली लागु करण्याबाबतचे घोषणापत्र दि.३१ डिसेंबर २०२३ पूर्वी सादर करावे. जुनी आयकर कपात प्रणालीचा विकल्प दिल्यास बचतीबाबतचे कागदपत्रे घोषणापत्रासोबत जमा करावे. विहित मुदतीत घोषणापत्र, बचतीचे कागदपत्रे या कार्यालयास प्राप्त होणार नाहीत, त्यांचे नियमाप्रमाणे लागू होणारे आयकर माहे नोव्हेंबर २०२३ पासून कपात करण्यात येईल,असे उपसंचालक (वित्त) तथा वरिष्ठ कोषागार अधिकारी शेखर कुलकर्णी यांनी कळविले आहे.
०००००

jeevanpranam.gov.in

जिल्हा बालसंरक्षण कक्षाने वर्षभरात रोखले २७ बालविवाह

बालविवाह प्रतिबंधक मोहिम गावनिहाय राबवा- डॉ. विकास मीना

छत्रपती संभाजीनगर,दि.७ (जिमाका)- महिला व बाल विकास विभाग अंतर्गत बालविवाह प्रतिबंधक कृती दलाची स्थापना करण्यात आली आहे. जिल्ह्यामध्ये वर्षभरात जिल्हा बालसंरक्षण कक्षामार्फत करण्यात आलेल्या कारवाईत २७ बालविवाह थांबविण्यात प्रशासनाला यश आले आहे. दरम्यान, सर्व विभागाच्या समन्वयाने बालविवाह प्रतिबंध मोहीम गावागावात राबवावी, असे निर्देश जिल्हा परिषदचे मुख्य कार्यकारी अधिकारी डॉ. विकास मीना यांनी आज झालेल्या आढावा बैठकीत दिले.

जिल्हाधिकारी कार्यालयात पार पडलेल्या या बैठकीस अपर जिल्हाधिकारी डॉ.अरविंद लोखंडे, जिल्हा महिला बालविकास अधिकारी सुवर्णा जाधव, जिल्हा शिक्षणाधिकारी (माध्य) मधुकर देशमुख, पोलीस निरीक्षक गुरमे, आरोग्य विभाग समन्वयक डॉ लड्डा, जिल्हा बाल संरक्षण अधिकारी महादेव डोंगरे, जिल्ह्यातील सर्व बालविकास प्रकल्प अधिकारी,समितीचे संबंधित सर्व सदस्य उपस्थित होते.

बैठकीत माहिती देण्यात आली की, एप्रिल २०२३ ते ऑक्टोंबर २०२३ दरम्यान जिल्हा बालसंरक्षण कक्षाने कारवाई करुन २७ बालविवाह रोखले आहेत. त्यात छत्रपती संभाजीनगर तालुक्यात ८, पैठण ८, गंगापूर ५, वैजापूर, कन्नड, फुलंब्री आणि सिल्लोड येथे प्रत्येकी एक असे एकूण २७ बालविवाह रोखले आहेत. या कारवाईतील बालिकांचे शिक्षण, पुनर्वसन या साठी उपाययोजना करण्यात आल्याचेही बैठकीत सांगण्यात आले.

जिल्हा परिषदचे मुख्य कार्यकारी अधिकारी डॉ. विकास मीना म्हणाले की, कमी वयात बालविवाह केल्यामुळे बालकांच्या आरोग्यावर तसेच भावी पिढीवर दूरगामी परिणाम होतात. हे दुष्परिणाम टाळण्यासाठी शाळा व ग्रामपंचायत पातळीवर बालविवाह रोखण्यासाठी पालकांचे समुपदेशन आणि जाणीव जागृतीसाठी विविध उपक्रम राबविले जावे. पंचायत समितीमध्ये पथनाट्य,चित्रफिती, माहितीपटाच्या माध्यमातून जागृती करावी, असे निर्देश त्यांनी दिले. त्यांनी सांगितले की, शिक्षण विभाग, महिला व बालविकास, आरोग्य व पोलीस अशा सर्व विभागांनी समन्वय राखून बालविवाह प्रतिबंधात्मक कारवाई करावी. बालविवाह प्रतिबंध करुन बालिकांना मोफत निवारागृह, संरक्षण इ. सुविधा देण्यात याव्या.

तालुकास्तरावर बाल संरक्षण अधिकारी , बाल विकास प्रकल्प अधिकारी यांनी आढावा घ्यावा. या सर्व प्रक्रियेत पोलीस पाटील यांचा सहभाग महत्त्वाचा आहे. पोलीस विभागामार्फत समाज माध्यमाद्वारे, दामिनी पथकाच्या साह्याने तसेच विविध शाळा महाविद्यालयातून जाणीव जागृती करावी. त्यासाठी पोलीस विभागाच्या अधिकारी व कर्मचारी यांची नेमणूक करण्यात आल्याचे गुरमे यांनी सांगितले. ‘बेटी बचाव बेटी पढाव’ संदर्भात गृहहभेटी वाढवून याबाबतचा अहवाल संबंधित विभाग प्रमुखांनी एकत्रितपणे सादर करावा असे निर्देश डॉ.मीना यांनी दिले. बालविवाहासंदर्भात वा बालकांच्या हक्कांचे हनन होत असल्यास टोल फ्री क्रमांक १०९८ व ११२ वर तक्रार द्यावी,असे आवाहन डॉ. मीना यांनी केले.
०००००

मराठा कुणबी जात प्रमाणपत्र तपासणी व वाटपासाठी विशेष कक्ष स्थापन

छत्रपती संभाजीनगर,दि. 6 (जिमाका) –मराठा- कुणबी, कुणबी- मराठा जात प्रमाणपत्र देण्यासाठी जिल्ह्यात विषेश कक्ष जिल्हाधिकारी कार्यालयात सुरु झाला असून जात प्रमाणपत्र देण्याचे काम सुरु झाले आहे. आतापर्यंत 50 दाखले वाटप झाले आहेत, अशी माहिती नोडल अधिकारी तथा निवासी उपजिल्हाधिकारी जनार्धन विधाते यांनी सांगितले.

हे जात प्रमाणपत्र देण्याच्या प्रक्रियेमध्ये आवश्यक व अनिवार्य पुराव्याची तपासणी करण्यासाठी न्या.शिंदे समितीची स्थापना करण्यात आली आहे. या समितीने पुराव्याची वंशावळी, शैक्षणिक पुरावे, महसूल पुरावे. निजामकाळात झालेले करार, निजामकालीन संस्थानिकांनी दिलेल्या सनदी, राष्ट्रीय दस्तावेज पुराव्यांची वैधानिक व प्रशासकीय तपासणी करणे आणि पात्र व्यक्तींना मराठा- कुणबी, कुणबी – मराठा जात प्रमाणपत्र देण्याची प्रक्रिया सुरु आहे. यासाठी समितीच्या निर्देशाने विशेष कक्षाची स्थापना जिल्हाधिकारी कार्यालयात करण्यात आली आहे. यासंदर्भात मुख्यमंत्री एकनाथ शिंदे यांनी आढावा घेऊन सर्व जिल्ह्यांमध्ये विशेष कक्ष स्थापन करण्याचे आदेश दिले आहेत. या कक्षामार्फत छत्रपती संभाजीनगर जिल्ह्यात आजपर्यंत 50 कुणबी- मराठा जात प्रमाणपत्र वाटप करण्यात आले आहे, असे विधाते यांनी सांगितले.

जिल्हा कक्ष कार्यकारणी समितीत ओमप्रकाश रामावत, उपमुख्य कार्यकारी अधिकारी (पंचायत),पी.एच.चौगुले, पोलीस उप अधिक्षक (गृह), श्री.वीर, जिल्हाअधिक्षक, भूमि अभिलेख, जयश्री चव्हाण, शिक्षणाधिकारी (प्राथमिक), मधुकर देशमुख, शिक्षणाधिकारी (माध्यमिक), संतोष झगडे, अधिक्षक, राज्य अबकारीकर, किशोर कुलकर्णी , जिल्हा जात पडताळणी समितीचे सदस्य सचिव, श्री. राजमोडे, सहाय्यक आयुक्त समाजकल्याण, अशोक कायंदे, नगर पालिका प्रशासन अधिकारी, जि.अ.कार्यालय, जयवंत नाईक, अधिक्षक कारागृह, सय्यदा फीरासत, जिल्हा सैनिक कल्याण अधिकारी, सय्यद शाकीर अली, अधिक्षक, वक्फ बोर्ड, डॉ. भगवान साखळे, कुलसचिव, डॉ.बाबासाहेब आंबेडकर मराठवाडा विद्यापीठ, अशोक गोटे, सहायक संचालक, राज्य पुरातत्व विभाग,भाऊसाहेब जगताप, विभागीय सहायक संचालक, भाषा संचालनालय इत्यादी विभागातील अधिकाऱ्यांचा समावेश आहे.

कक्षाची कार्यपद्धती

या जिल्हास्तरीय अधिकारी यांनी विशेष कक्ष,जिल्हाधिकारी कार्यालय, येथे उपस्थित राहुन विविध विभागांशी समन्वय साधणे, अभिलेखे उपलब्ध करुन घेऊन त्यांची छाननी करणे, कुणबी जातीच्या नोंदी असलेले अभिलेखे वेगळे करुन त्याबाबत विहित नमुन्यातील अहवाल कार्यालयास व समितीस सादर करणे इ.कामे विहित कालमर्यादेत करण्यात येत आहेत.

या शिवाय मा.न्यायालयातील जुन्या अभिलेख्यांमध्ये देखील कुणबी-मराठा / मराठा-कुणबी /कुणबी असे जातीवाचक उल्लेख असलेले (सन 1967 पुर्वीचे) अभिलेखे उपलब्ध करुन देणे बाबत संबंधित न्यायालयाकडे विनंती करुन अभिलेखे उपलब्ध करुन घेण्यात येत आहेत. आजपर्यंत जिल्ह्यात एकूण 50 कुणबी - मराठा, मराठा - कुणबी जात प्रमाणपत्र वाटप करण्यात आले आहे असे निवासी उपजिल्हाधिकारी यांनी सांगितले.

00000

न्या. शिंदे समितीची व्याप्ती आता संपूर्ण राज्यभर...

पालकमंत्र्यांच्या नेतृत्वाखालील शिष्टमंडळाने मनोज जरांगे पाटील यांना
दिली शासन निर्णयाची प्रत; प्रकृतीची केली विचारपूस

छत्रपती संभाजीनगर,दि.४ (जिमाका)- मराठवाड्यातील मराठा समाजास मराठा कुणबी, कुणबी मराठा जात प्रमाणपत्र देण्यासाठी कार्यपद्धती विहित करण्यासाठी निवृत्त न्यायमुर्ती शिंदे यांच्या अध्यक्षतेखाली स्थापन झालेल्या समितीची व्याप्ती आता संपूर्ण राज्यभरासाठी करण्यात आली आहे. तसा शासन निर्णय दि.३ नोव्हेंबर रोजी निर्गमित झाला आहे. या निर्णयाची प्रत आज शासनाच्या शिष्टमंडळाने मनोज जरांगे पाटील यांना प्रत्यक्ष भेटून दिली. तसेच त्यांच्या प्रकृतीची विचारपूसही केली. जरांगे पाटील यांनी या शासन निर्णयाबाबत समाधान व्यक्त केले आहे. उपोषण संपल्यानंतर श्री. जरांगे पाटील हे येथील गॅलक्सी रुग्णालयात उपचार घेत आहेत.

मुख्यमंत्री एकनाथ शिंदे यांच्या निर्देशानुसार रोजगार हमी योजना व फलोत्पादन मंत्री तथा जिल्ह्याचे पालकमंत्री संदिपान भुमरे, गृहनिर्माण मंत्री तथा जालना जिल्ह्याचे पालकमंत्री अतुल सावे, आ. नारायण कुचे, मुख्यमंत्र्यांचे विशेष कार्य अधिकारी मंगेश चिवटे यांच्या शिष्टमंडळाने आज मराठा आरक्षणाच्या मागणीसाठी उपोषण करणारे मनोज जरांगे पाटील यांची आज
घेतली. गॅलक्सी रुग्णालयात हे शिष्टमंडळ जरांगे पाटील यांना भेटले. शासनाने दि.३ रोजी जारी केलेल्या समितीची व्याप्ती राज्यभर वाढविण्यासंदर्भातील शासन निर्णयाची प्रत जरांगे पाटील यांना दिली.

जरांगे पाटील यांनी या शासन निर्णयाबाबत समाधान व्यक्त केले. शासन आमच्या मागणीसंदर्भात गांभिर्याने काम करीत आहे. समितीची व्याप्ती संपूर्ण राज्यासाठी झाल्याने राज्यभरातील समाज बांधवांना न्याय मिळेल, अशी अपेक्षाही त्यांनी व्यक्त केली. आपली प्रकृती आता चांगली असून मी लवकरच बरा होईन,असेही त्यांनी सांगितले.

पालकमंत्री संदिपान भुमरे म्हणाले की, ‘ मुख्यमंत्री एकनाथ शिंदे यांच्या नेतृत्वाखाली शासनाने तातडीने या समितीची व्याप्ती राज्यभर करण्याचा शासन निर्णय निर्गमित केल्याने विश्वास वाढला आहे. न्यायमूर्ती शिंदे यांच्या अध्यक्षतेखालील समितीचे कामकाज सुरु आहे. मराठा समाजाला लवकरात लवकर न्याय देण्याचा शासनाचा प्रयत्न आहे. त्यादृष्टीने समितीही कामकाज करीत आहे. शासनाच्या निर्णयाबाबत मनोज जरांगे पाटील हे सुद्धा समाधानी आहेत. त्यांनी आता आपल्या प्रकृतीची काळजी घ्यावी’, असे आवाहन भुमरे यांनी केले.

शासन निर्णयाबद्दल

सामान्य प्रशासन विभागाच्या या शासन निर्णयानुसार, मराठवाड्यातील मराठा समाजास मराठा-कुणबी, कुणबी-मराठा जात प्रमाणपत्र देण्याच्या प्रक्रियेमध्ये आवश्यक ते अनिवार्य दस्ताऐवज, पुराव्यांची वैधानिक व प्रशासकीय तपासणी करण्याबाबत तसेच तपासणीअंती पात्र व्यक्तिंना तसे जात प्रमाणपत्र देण्याची कार्यपद्धतीविहित करण्यासाठी निवृत्त न्यायमूर्तींच्या अध्यक्षतेखाली समिती स्थापन करण्यात आली होती. त्या समितीची व्याप्ती संपूर्ण राज्यासाठी वाढविण्यात आली आहे. तसेच या समितीने आपला अहवाल दि.२४ डिसेंबर २०२३ पर्यंत शासनास सादर करावा असे नमूद केले आहे.

समितीची रचना

शासन निर्णयानुसार समितीचे अध्यक्ष न्यायमुर्ती संदीप शिंदे (निवृत्त) असून अपर मुख्य सचिव (महसूल), प्रधान सचिव विधी व न्याय विभाग, सर्व विभागीय आयुक्त, सर्व जिल्ह्याचे जिल्हाधिकारी हे सदस्य असून सह सचिव सामान्य प्रशासन विभाग हे या समितीचे सदस्य सचिव आहेत.

०००००