طباطوشت للطاقة

في ظل إنتشار المهابل و بني عداس و بني هجرس و الفهايمية و الخبارجية و الكلاشات و التبهدايل .ووووو ...
وش فيها كي تآبوني عند عباد ولاد فاميلية و قاريين و زيد تدي فايدة لاباس بيها.... تدي معلومة ... و أنت مكسل في بلاصتك ... خير من تطلع الشان للخنز هذا لي راه يسركل...
المهم هذا خونا أسامة مهندس خلوي .. يعرف يخدم ... يعرف يفهم ... يعرف يهدر ... و زيد وليد بلادنا ... و هارب في راسو .. ديرلو أبينو... ادعم خوك ...
ملاحظة: كاين واحد يطير اوطوماتيزم من جوايه بومرداس ... هذا اليامات نحطولكم خدمتو
ملاحظة 2 : كاين واحد وسمو هشام ... قام بتطوير جهاز CNC .. قوة ضاربة ... راه يخدم فيه في دزاير...
ملاحظة 3 : لي عندو صفحة تقدم في محتوى تقني يديرها فالتعليقات و شكرا ...
https://www.facebook.com/profile.php?id=100070825390371&mibextid=ZbWKwL

Eng Oussama مرحبا تفضلو منزل الهندسة يرحب بكم
معاكم المهندس اسامة

في البداية يضحكون على أحلامك🤌 ... ثم في النهاية يتسائلون كيف حققتها....👌

موضوع للنقاش :
في رأيك أخي الكهربائي ما هو الثمن المعقول لدورة تكوينية في سلطنة عمان لمدة عشرة أيام يكون فيها البرنامج التالي :
✅️ التحكم في المحركات و مغيرات السرعة .
✅️تصميم الدوائر و لوحات التحكم .
✅️طريقه إنجاز الخزائن الكهربائية بالمواصفات العالمية.
✅️ إنجاز محطات إطفاء الحرائق.
✅️ التحكم في شتى أنواع المضخات.
✅️ الكهرباء الصناعية ولواحقها.

ملاحظة: نقوم بإستشارتكم حتى يتسنى لنا وضع ثمن معقول حسب إمكانيات الطالب .. علما أننا ندفع حقوق تسجيل الشهادة للهيآت الخاصة ...
ملاحظة 2 : البرنامج السياحي إختياري .
ملاحظة 3 : ثمن تذكرة الطيران على عاتق الطالب .
ملاحظة 4 : الإقامة و المبيت في غرف عادية يعني مشي فندق ..

يا موح أنا وليد حي شعبي و راك تعرف العقلية كيفاش ... شغل مع الظروف و التشومير... حبست لقراية ... خدمت دلالة تبزنيز ... بصح شغل مشي حل ... حوست على خدمة ما بان والو ..
يا صحبي راني حاب ندير حاجة في حياتي .. نعمر وقتي .. نخدم
حبيت ندير تجارة ... ما عنديش راس مال ..
شوف صحبي رانا في وقت صعيب علابالي ... بصح سلاكها تتعلم حرفة ... تخدم بيدك ... ما لازم راس مال .. ما لازم حانوت ... كي تكون مولا صنعة ... الناس تجي تديك من الدار ...
يا خو كاين مصاغر راهم قايمين بالواجب ... دايرين عفسة خلوية.. يعلموك صنعة .. و زيد يفهموك في كلش ... و ما تدري صحبي بالاك لتم يبانلك راس خيط شباب .. المهم ما تقعدش فالحومة ... ادخل تشو فهذا الرابط و نهار تتعلم صنعة .. رح تتبدل عقليتك ... تعرف عباد ..
انا تعلمت نخدم كهرباء و راني عايش مستور ... صح ما ترفهتش ... بصح يا خو شغل اموري مفروزة... دير كيما خوك و اتعلم حاجة فيها الصلاح ... و بالرزانة تتباع الصوف ... اطهلا وليد حومتي..

https://m.facebook.com/story.php?story_fbid=304932792408110&id=100086741754681&mibextid=Nif5oz

الجديد و بدون إطالة💪👌
عرض خاص بالطلبة الجزائريين🇩🇿 و المغاربة🇲🇦 و التونسيون🇹🇳.. دورة تكوينية خاصة بالكلاسيك كونترول يتحصل فيها الطالب على شهادة معتمدة دوليا🌏 . مصادق عليها من الجهات الحكومية الوصية ...
برنامج ثري لتعلم:
✅️ التحكم في المحركات و مغيرات السرعة .
✅️تصميم الدوائر و لوحات التحكم .
✅️طريقه إنجاز الخزائن الكهربائية بالمواصفات العالمية.
✅️ إنجاز محطات إطفاء الحرائق.
✅️ التحكم في شتى أنواع المضخات.
✅️ الكهرباء الصناعية ولواحقها.
مدة التكوين : خمسة عشرة يوما يتخللها :
🔴جولات سياحية لأهم معالم و متاحف سلطنة عمان 🇴🇲
🔴جولات سياحية لأهم المناطق الطبيعية في السلطنة 🏞
🔴 فيزا دراسية✈️.🌍
🔴 زيارات ميدانية لأهم المصانع الغذائية و التحويلية🏭
🔴 الإقامة و المبيت🏠
🔴النقل من الإقامة إلى المعهد خلال مدة التربص🚗
سوف نوافيكم بتفاصيل أخرى تتعلق بثمن الدورة و تاريخ إنطلاقها و كيفية و شروط التسجيل ..لاحقا ... كونو في الموعد .⏳️..
معا لنرتقي بعالم الكهرباء 👌 و شكرا

يا موح لبارح دخلت للنفق تع وادوشايح ..من بعد حسيت تريسيتي تضرب فالطونوبيل تاعي و شغل سمعت الحس تع لاماص ... والطابولو طفا و عاود شعل تمتم ..ما فهمتش وش صرا ....
شريكي هذي فيها gصرى عند مول لاتاي .... كثر الصرف و أيا نجيبوها عندو .... يا خو أرا واحد آتاي كثر النعناع و مغرفة عسل ..
المهم خو : هذي الضاهرة تسمى décharge statique ... بالعربية وسمها التفريغ الساكن ... و قادر ولاد حومتك ياكلو الطعام صحا يسلمك ...
أاااااو ... كنت قادر نموت موح؟ ... باينة شريكي ...
و سلاكها؟ ... صحبي التفريغ الكهربائي الساكن هو انتقال الشحنة الكهربائية، المفاجئة واللحظية بين جسمين، لهما فارق في الجهد الكهربائي. وهذا المصطلح يستعمل لتعريف حدوث تيار كهربائي مفاجئ وغير مرغوب فيه، في أحد الأجهزة الإلكترونية او ذات الجسم الحديدي (الطولة تع الماروتي ديالك) ... يصرى شغل تقوس كهربي وهذا يرجع إلى هبوط حاد بمقاومة العازل ويؤدي إلى شرارة تتحرك حول أو خلال العازل.قد تكون للحظة(كما عند فقد الشحنة الكتروستاتيك) أو بما تؤدي إلى انحناء فقد للشحنة متواصل إذا كانت أداة الحماية فشلت في قطع الكهرباء في الدوائر الكبيرة.

والقوس الكهربي كما فهمنا هو التعطيل الكهربي وبالغازات يسبب بما يسمى التفريغ البلازمي ويشبه الشرارة وينتج من تيار يسبح خلال مجال غير موصل كالهواء, وهذه الظاهرة وصفت أول مرة عن طريق العالم الروسي بيتروف الذي اكتشفها عام 1802. المصطلح التقوس الفولتي ....
تلفتلك خو.... شغل دوكا الهوا راه فيه الماء يتسمى يولي شبه ناقل ... يتسمى كي تدخل تحت نفق بالماروتي راك عاونت الشحنات بش تسركل تم تم ...
و الحل خو؟
شريكي اربط سلك تع نحاس في الشاطمة تع الماروتي و خليه طايح و يقيس فالأرض باش هذوك الشحنات يفرغو فالأرض. و أنت ما يصرالك والو ... و هذي العفسة شايعة فالبلدان لي فيهم الضباب بزاف كيما إنجلترا ... بصح كي يدخل الصيف نحي السلك تع النحاس ... ما تبهدلناش ...
أيا نروحو شريكي راهي تع لوبيا فالدار ... سلامت راسك خو و دير وش وصيتك ...

الأشياء الجميلة😍👌... هذا هو وقودنا... و الله كي نشوف هذو لعفايس ... نلقى روحي نبكي وحدي... و نحس بلي التعب ما راحش خسارة... و الله يا خاوتي في بعض الأحيان ... يلحقو رسائل ... نولي نحمد في ربي ... و ننسى كامل همي ... ربي يدومها نعمة .... و ان شاء الله جميع واحد ناوي الخير ربي يكملو ... شكرا لدعمكم... كل المودة و الحب لخاوتي لعزاز ... صح ما عنديش خاوتي ... بصح ربي رزقني بستة و ثمنيين ألف أخ ... ربي يخليكم في كتافي ... العائلة الكهربائية..
بإذن الله مزال خير كبير راه جاي فالطريق ...
إيكاندويس.

شوف شريكي ... زعما شحال رح تعيش بالتقريب ؟ .... نقولو سبعين ثمانيين سنة؟ .... معليش يا سيدي تسعين سنة ...
ايا تشو نديرو شوية حسابات .... ترقد ثمن سوايع فالنهار ياك ؟
يتسمى ثلث حياتك راه في مخدة و مطرح ... هاي ثلاثين سنة راحت .. بقات ستين .... نحيلها لعوام تع الصغر .. كي كنت ما تتحاسبش... نقولو يا سيدي عشرة سنين ... بقات خمسين ...
زيد نحيلها يامات لقراية و اللعب و التمهبيل.. كاش عشرة سنوات .. تبقى ربعين سنة ... زيد نحيلها شوية تع السركالة و لمهاوشة و ليامات لي كنت ما دير فيهم والو ....يتسمى بقات ثلاثين سنة .... صحا خو ... زيد نحيلها عشرين سنة تع خدمة و دراهم و تامارا و زواج و ذراري و تشومير و ترفاه و روح و أرواح ... يتسمى تبقى غير عشرة سنين برك ... مشي حاجة ...
علاه راك تدير فالفرشة؟ ... علاه راك تدير فلعفايس تع بلايسة.؟ علاه راك تضارب و تربح فالعيب للناس؟ علاه راك تدي في حق الناس ؟ ... معليش انت ناس ملاح و خاطيك دعاوي الشر ... متفاهمين ... علاه ما تعاونش جارك ؟ علاه ما تخدمش سيريو؟ علاه راك تعمر في راسك بلحكايات الفارغين؟ ... علاه مزالك لاتي بالعباد ؟ ....
شريكي تعيش مرة وحدة ... يعني خلي بلاصتك نقية و دير الخير قد ما تقدر .. صلي صلاتك ... نقي حومتك ... أوقف مع لمصاغر ... اضحك ... عيش ... و خليها على ربي ... خاطر مهما تطير و تجنح و الله غير لحكاية تخلاص بميترة تع تراب و اذا صحلك كفن راك شباب ... و ما تنساش حاجة ... النعش يرفدوه الرجال ... يتسمى عيش فيها راجل .. و لي جات مرحبا بيها ...
أيا اطهلا شريكي ...

تحت رعاية صاحبة السمو السيدة حجيجة بنت جيفر آل سعيد تم الإفتتاح الرسمي للمعهد العالمي " اوطومايشن فيجن" برئاسة الدكتور طباطوشت محمد و حضور مختلف ممثلي المجتمع المدني في سلطنة عمان على غرار رئيس معهد الهندسة الكهربائية بجامعة السلطان قابوس ، مسؤول الموارد البشرية لشركة seimens ، وكذا مدراء تنفيذين لكل من شركةABB و شركة Shneider, مدير القرية الهندسية ، و باقي ممثلي شركات نفط عمان ، و شركة نماء للكهرباء و هذا لدعم و تبني فكرة الجيل الجديد لشباب العرب و كذا إعطاء إشارة الإنطلاق لمعهدنا العالمي لتدريب تقنيات التحكم الآلي .. راجين من المولى عز و جل أن يوفقنا في طموحنا للنهوض بعالم الكهرباء في الوطن العربي ..

و بدون إطالة ...
شفت هذاك صحبك لي ما يحبوش باباك .... و الله يجوزو ليامات و تلقى باباك عندو الحق ... شفت هذيك لي رحت تخطبها و يماك ما عجبتهاش ... و الله ما تتهنى معاها .. شفت نهار تكذب على باباك و تدير في بالك بلي جوزتو كافي .. أقسم بالله غير فاقلك ما حبش يحشمك برك ... شفت نهار تدخل في حكاية .. و يماك ما يعجهاش الحال ... و الله غير تصيبها حكاية فارغة ...
شفت نهار تبدى تحس في روحك كبرت و تعلي صوتك على والديك .... أقسم بالله غير تدخل فالحيط نيشان ...
شفت نهار تشري تيليفون بعشرة ملاين و يماك ما تتفكرههاش يا لوكان بحاجة خفيفة ... و الله ما تفرح بيه ....
شفت نهار تدي ولادك يحوسو و تنسى تعيط ليماك ... و الله يا صحبي ما رجلة...
شفت نهار تطيح بيك ... تلقى غير والديك .. ..
سقسي لمصاغر لي تقدر عليهم الحبس ... يجاوبوك ... شكون يتفكرهم بالقفة... مكاااااااش ... الأم و فقط ....
شفت قيمة والديك .... و الله ما تقدر تعرفها حتى تدير الذراري ... و لا نقولك حاجة خو ... روح سقسي لي والديه تغمضو عينهم ... يجاوبك كون مهني ...
الله يسمح لينا من الوالدين ...

اليمن ... المعنى الحقيقي لكلمة زوالي و فحل .. نموت و ما نحملش الذل... و شكرا

صورةْ لأولْ جَزائريْ تحَصّل علىٰ شَهادةٰ الدُكتوراه"،
هو مُحمّد بن شنب (1869- 1929) كان يتكلم 8 لغات إلى جانب العربية والفرنسية، كالفارسية، الألمانية، الإيطالية، الإسبانية، التركية، اللاتينية والعبرية.
▪كان يحاضر في جامعة "السربون"
وهو يعتمر عمامته الصفراء، دون أَن يجد حرجا في ذلك.
▪شهد له أنه كان يخطب في مؤتمر المستشرقين في "أكسفورد"، وهو في لباسه الوطني،
ينحدر من عائلة من حي تاكبو بالمدية ولاية جزائرية
L'intellectuel Mohamed Bencheneb (1869-1929) est considéré comme un des plus éminents penseurs algériens du XXe siècle pour avoir été le premier docteur dans l'histoire de l'Algérie et un des plus importants chercheurs de sa génération, versé dans les domaines des langues, de la traduction et de la littérature comparée.

في الأول من نوفمبر، يتجدد الفخر والاعتزاز باليوم الوطني للجزائر. هذا اليوم يمثل رمزاً للحرية والاستقلال الذي تحقق بفضل تضحيات الشعب الجزائري العظيم وصموده ضد الاستعمار.

إن اليوم الوطني هو فرصة للاحتفال بتاريخ البلاد وتقدير التضحيات التي قدمها الأبطال من أجل تحرير الوطن. في هذا اليوم، يجب علينا أيضاً التفكير في مستقبل الجزائر والعمل معاً من أجل بناء مستقبل أفضل للأجيال القادمة.

لنتذكر دائماً قوة وإرادة الشعب الجزائري، ولنعمل معاً من أجل تعزيز وحدتنا وتطوير بلدنا نحو مستقبل مشرق وازدهار. عيد وطني سعيد للجزائر!

موضوع للنقاش:
أخي الكهربائي .. كيف تتعامل مع إقتناء أدوات العمل ؟
كيف تدعم أسطولك بأسلحة الشونطي؟ .
هل أنت ممن يضيعون الأغراض في كل مناسبة؟
ما رأيك في إستلاف الأدوات؟
المهم نحن الرجال أيضا لدينا طواقم الذهب خاصة بنا... و نشعر بسعادة قصوى عند إمتلاك حقيبة الأدوات..
و إذا بغيت زعما قولنا فالتعليقات آخر حاجة شريتها ...
ملاحظة: كهربائي بدون عدة عمل مثل طبيب بدون سماعة أذن و شكرا..

ما رأيك في طريقة إنجاز الإنارة ؟ هل انت من محبي الأضواء الباردة أو الإنارة الدافئة؟.. أعطينا رايك على عالم الإنارة بشكل عام
ملاحظة1 : الصور حصرية لإدارة المدرسة العالمية لتدريب أنظمة التحكم الآلي في الشرق الأوسط.. Automation vision
ملاحظة 2: كونو في الموعد هذا المساء .. نتكلم عن دفاتر الشروط في الكهرباء المعمارية ... وشكرا
فاصل و نواصل ...

عالم الكهرباء الصناعية:
تتعامل الكهرباء الصناعية مع نقل وتحويل الطاقة الكهربائية في البيئات الصناعية والمصانع. يشمل هذا المجال تصميم وصيانة أنظمة الكهرباء والأتمتة التي تستخدم في مجموعة متنوعة من الصناعات مثل الصناعة الثقيلة، والتصنيع، والنفط والغاز، والتعدين.

أهمية الكهرباء الصناعية:
- زيادة الإنتاجية: تسهم تقنيات الكهرباء الصناعية في تحسين عمليات الإنتاج وزيادة الكفاءة، مما يؤدي إلى زيادة الإنتاجية وتقليل التكاليف.

- الأمان والسلامة: الحفاظ على أنظمة الكهرباء الصناعية بشكل صحيح يلعب دورًا مهمًا في توفير بيئة عمل آمنة للعمال والمعدات.

- التحكم والأتمتة: تمكن أنظمة التحكم والأتمتة الصناعية من التحكم في العمليات الصناعية بدقة وفعالية، مما يزيد من مرونة الإنتاج ويساعد في تلبية احتياجات السوق.

- توفير الطاقة: الكهرباء الصناعية تساهم في تحسين استهلاك الطاقة وتحقيق التوازن بين الإنتاج والاستهلاك.

- الاستدامة: تساهم تقنيات الكهرباء الصناعية في تقليل الأثر البيئي للصناعة من خلال استخدام مصادر طاقة متجددة وتقنيات صديقة للبيئة.

التحديات والابتكارات:
عالم الكهرباء الصناعية يواجه تحديات مستمرة مثل تحسين الأمان، وتطوير تقنيات الأتمتة، وتوفير مصادر طاقة مستدامة. ومع ذلك، هذا المجال يشهد أيضًا تقدمًا مذهلاً في مجال التكنولوجيا، بما في ذلك الشبكات الذكية والذكاء الصناعي، والتحكم بالطاقة عن بُعد.

في الختام، عالم الكهرباء الصناعية يمثل قلب الصناعة الحديثة ويساهم بشكل كبير في تحسين حياتنا اليومية. تقنياته المستدامة والذكية تعد رافعة أساسية للتنمية الصناعية والاقتصادية.
بقلم : طباطوشت محمد .... و شكرا

يبدو أن صفحتنا أصبح لها أثر إيجابي في المجتمع🥹 .. الحمد لله 🙏...
تم التكفل بقضية التقني الذي قمنا بنقل إنشغاله عبر صفحتنا ...
هكذا الواحد يحس روحو مليح و ينسى التعب و المرض ...
ربي يكون في عون الرجال... و لي خلق ما يضيع ...
ربي يحفظكم خاوتي ... و شكرا.

رسائلكم:
السلام عليكم خويا محمد، ربي يرضى عليك ، فوتلي هذي الرسالة فالصفحة تاعك، عندي مشكل في خدمتي و راني حاب المتابعين تاوعك يعطوني رأيهم، خاطراكش ما عرفتش وش ندير ،
ضوك أنا نخدم فالوزين عندي خمسطاش عام حاكم الصيانة مع ثلاثة خدامين وحدوخرين اللخر فيهم عندو سبعة سنين خدمة ، نعرفو المواشن مليح و رفدنا خبرة كبيرة فالديباناج ، الوزين كامل حنا لي نمشيوه، و تقدر تقول كلش يمشي على الشعرة ، انا كي دخلت للوزين كنت نخدم فالمخزن نستفو السلعة و منين ذاك نشارجيو الكوامن ، من بعد تعلمت التريسيتي بالخبرة و ضوك راني نعرف السيتام أوطوماتيك تاعهم كامل ، و كي مول الشي يجيب ماشينات جدد، أنا و ليكيب تاعي نسطاليوهم عادي ، المشكل جابولنا مهندس جديد يخدم مدير تقني ، راه داير فينا الباطل ، هو و الله و الله و الله يا خويا محمد ما يعرف حاجة ، بصح راه حاقرنا و دورة زوج يقول يعايرنا و حنا كبار عليه ، و يقول انتوما ما عندكمش دبلوم و ما قريتوش، و يزيد يديرلنا مشاكل مع مول الشي ، كي يدير كاش كارثة يحصلها فينا ، و يقولو ، خدامين تاوعك ما يعرفوش تريسيتي ، المهم راه حاب يجيبنا برا ، و يحكم هو كلش ،
و خطرة سطالينا اينيتي جديدة تع الوزين وحدنا، مول الشي كان فالطاليان ، كي دخل قالو هذا المهندس أنا وريتهم الخدمة ، و هو أقسم بالله غير كان يجي غير يصور و يبعث لي رابور،
حبيت نبطل و نروح نخدم في جيهة خلاف ، المشكل ما عنديش ديبلوم، و زيد عند زوج ذراري يقراو ، واحد فالسيام و الطفلة تقرى السنة الثانية فالإبتدائي ، على جالهم راني حامل الذل و الضغط، ما تحطش إسمي خويا محمد ربي يسترك

يا موح ما راكش تبان؟ وش كاين ؟
راني غارق مع الخدمة يا صحبي ... و راني مريض شويا حمى و تاعب جسديا
ما راكش تحطلنا فيديوهات خو؟
صراحة راهي سامطة هذي اليامات و المورال مديواسي ...
علاش ؟ يا خو شغل الناس تموت و انت تنشر في الفيديوهات تع الخدمة ما جاياش ....
و دك كيفاش يتسمى رح تحبس ؟ لالا خو ... كي تسلك هذي المحنة يديرلها ربي طريق ....
إيه وش كاين جديد جيهتك ؟ رانا مع برنامج شباب تع plc راه قريب يطيب ..
ووالتطبيق وش درنا ؟ و الله يا شريكي ما بقى بزاف... زيد ساعف الحالة و خلاص..
و هذاك الكتاب كيفاش حكايتو؟ يا خو راهي حابسة في دار النشر ... يامات برك و يطبعوه ...
يتباع في دزاير؟ إيه باينة خو خمسين ألف برك...
يتسمى رح تترفه موح ؟ يا ودي أنا مرفه بدعوة الخير ..
الجماعة بعثولك سيفي و ما رجعتلهمش؟ راك طايح خشين؟
الله يهديك يا صحبي وش ادانا لهاذي الهدرة ... بصح نقولك حاجة ... بإذن الله كي نجيب شهادة الدكتوراه ندخل للبلاد .. و نفتح مدرسة محترفة تع ترسيسي و نعلم كامل الناس ...و نوقف مع الشبيبة .... و اذا كتب ربي و طوالت لعمار ممكن نولي وزير للطاقة و لتم صح تتبدل العقلية فالقصبة ....
المهم شريكي .... مال أنا نروح.... أتهلا

عندما يطوّر أعضاء الفريق ثقافة مبنية على التواضع، العمل الجماعي الجادّ، التميّز والتعلّم، سيصبح بوسعهم ترجمة نجاحاتهم وفشلهم إلى أدوات للتطوّر المستمرّ. ليس هذا وحسب، سيبدأ كلّ عضو في تطوير مهارات خاصّة تسهم في التقدّم بالفريق أجمع للأمام. وجميع هذه العوامل مجتمعة ستقود الفريق لتحقيق أهداف مميّزة وكبيرة تجعل منه فريقًا مميزًا ذا كفاءة عالية...
و بدون إطالة ... إلتحاق علي الباتني و حسام المحارب .. حب يقول نديرولها الروض في عمان ...
هدفنا أن نزرع إنطباعا حسنا عن كهربائيّي الجزائر في الخليج العربي ... و نترك بصمتنا ... المغاربة معروفين بالجبس عالميا ..
الجزائريون على قول إسلام سليماني شواكر الكهرباء ...
في ضل كل هذا السواد السائد هذه الأيام... أردنا أن نعطي جرعة أمل و ننشر بعضا من الإيجابية ....
في الإتحاد قوة ... و شكرا

مساء الخير ... ما كاين والو خاوتي الدنيا هانيا ... الحمد لله....حبيت برك نقولكم.... شكرا .. يعطيكم الصحة ... لجميع واحد شارك فيديو .. شكرا لجميع واحد دعمنا بكلمة حلوة ....تعليق محفز... شكرا للرجال ...هذا ما كان .. و لي غلطنا معاه يسامحنا و خلاص ... أتهلاو في بعضاكم... نحبكم❤️

قواطع كهربائية رقمية ستغير من طريقتنا في إدارة المنظومة الكهربائية.
أُدرج هذا القاطع ضمن المعيار العالميّ لحماية المستهلك.
يتميّز هذا القاطع بسهولة تحكّمه في الكهرباء، ويُعتبر أسرع ب 3000 مرّة من أفضل قاطع ميكانيكيّ معروف حتّى اليوم. وبهذا يُعدّ هذا الابتكار أحد أكثر التطوّرات الجذريّة في نظم توزيع القدرة الكهربائية منذ عهد العالم “توماس إديسون”.
لإدراك أهميّة هذا الابتكار، تخيّل لوحة التوزيع الكهربائيّة الموجودة في الطابق السفليّ من منزلك. كلّ مفتاح مخصّص لأحمالٍ كهربائيّة مختلفة في منزلك. صُمِّمَت هذه المفاتيح لفصل الدائرة الكهربائيّة، وذلك لمنع الأسلاك الكهربائيّة من التأثّر بالحمل الزائد، والذي يؤدّي إلى رفع درجة الحرارة والتسبّب في نشوب حريق. عندما يحدث هذا، تذهب إلى لوحة التوزيع الكهربائيّة وتضغط على المفاتيح مرّة أخرى حتّى يعود التيّار الكهربائيّ.

الآن، قم بتكبير هذا النظام البسيط في منزلك إلى المباني الشاهقة في المدينة والمباني الصناعيّة، والتي قد تحتوي على 250 قاطع كهربائيّ في أيّ طابق تتراوح سعة كلّ منها من 15 إلى 4000 أمبير، وتعمل على جهد عالٍ. في هذا النطاق، تصبح حدود ومخاطر نظام القدرة الكهربائيّة المُتحكّم فيه يدويّاً أكثر وضوحاً وتكلفةً.

وش حب يقول : القاطع الحطبة لي نعرفوه يولي عندو مخ يخمم بيه .. عندو شاشة رقمية و تمشي كيما التليفون ديجيطال... يبعثلك ميصاج في واتساب يقولك وش كاين وش ماكاش ...

هذا القاطع آخر عيطة اخترعو مهندس وسمو كينيدي و عندو شركة وسمها Atom Power..

الشركات الكبار كاين ثلاثة شراو عليه الإختراع .. و بداو يخدمو فيه .. Abb و seimens و aeton...

في رايك زعما يجي نهار تشوف TABATOUCHT مكتوبة في كاش VFD تع ABB! ؟
راهي جاية وحدة وحدة بإذن الله...

غاستي بغونشي مو فخاخ .. ميخسي 👌

يعيش الإنسان في كل العالم بقلب واحد ...
و يعيش الجزائري بقلبين.. قلب ينبض للجزائر و قلب ينبض لفلسطين ...(سليمان بخليلي ) رحمه الله

14/10/2023 وش كاين فما ؟
كونو في الموعد ..
منا و جاي رح تتبدل العقلية فالقصبة... وشكرا

توماس إيديسون كان قاعد ما بيه ما عليه .. مخلوي.. شابع دراهم ،.. خاطر باع براءة الإختراع تع التيار المستمر و دار مع الدولة سوق شباب .. شغل انتوما بيعو الطاقة اخدمو البوطوات بالكابل الخشين تع النحاس ... اصرفو حتى تشبعو ... و انا عندي بورصونطاج معاكم في بيع الطاقة للشعب ... فيها .... المهم السيد كان عايش غاية .. و ترفه و اسكت برك ... من بعد جاء يخدم عندو الزوالي نيكولا تيسلا ... الزواولة من بكري نوايا مساكن .. أيا قالو كاين فكرة تع التيار المتناوب... توماس قال لتيسلا ... أحكي تشو وش هذا الخرطي تاعك؟! تيسلا فرشها و حكالو ..يا ودي التيار المتناوب هو التيار الكهربائي الذي يغير اتجاهه بشكلٍ دوري مترواحاً في مكانه لعشرات المرات، أي بشكلٍ مغاير للتيار المستمر، ويُسمى التيار المتناوب أحياناً بالتيار المتردد...
أيا توماس توسوس ... ما حلبوش ... دك هذا راه حابني نفقر و الإختراع ديالي نغليه و نشرب الماء تاعو ... المهم دار الهدة تع المقاولين تاوعنا... ما خلصوش كرهلو حياتو ...
أيا من بعد استحوذ نظام تسلا المتناوب في نهاية المطاف على اهتمام المهندس الأمريكي ورجل الأعمال جورج ويستنغهاوس، الذي كان يسعى إلى إيجاد حل لتزويد البلاد بطاقة بعيدة المدى. كان على قناعة أن اختراعات تسلا ستساعده في تحقيق ذلك، فاشترى في عام 1888 براءات اختراعه بمبلغ 60 ألف دولار وأسهم في شركة ويستنغهاوس.

ومع زيادة الاهتمام في نظام التيار المتناوب وضع تسلا وستنغهاوس في منافسة مباشرة مع توماس إديسون، الذي كان يعتزم بيع نظامه للدولة. سرعان ما شن إديسون حملة صحفية لتكسير منافسه في محاولة لتقويض الاهتمام بقوة التيار المتناوب. واصل تسلا عمله خلال تلك الفترة وأنجز العديد من الاختراعات، بما في ذلك “ملف تسلا”، الذي وضع الأساس للتكنولوجيات اللاسلكية المستمر استخدمها في تكنولوجيا الراديو حتى اليوم.

لسوء حظ توماس إديسون(يا ودي مشي زهر هو فرشة )، تم اختيار شركة وستنغهاوس لتتكفل بإضاءة المعرض الكولومبي العالمي في شيكاغو عام 1893، وأجرى تسلا عروض وشروحات لنظامه هناك...

بعد عامين، وفي عام 1895، صمم تسلا ما كان من بين أول محطات توليد الطاقة الكهرومائية في الولايات المتحدة في شلالات نياجارا. والذي استخدم لتشغيل مدينة بافالو...

المهم يا صحبي ... ما يدوم غير الصح ... و مول النية يربح ...
أطهلاو خاوتي...

القاعدة تقول : عندما يضنون أنك انتهيت... سوف يختلقون قصصا من نسج خيالهم ... سوف يبتسمون كثيرا... ربما يضحكون أيضا... لكن يا صديق هناك شعار جميل جدا ... ابدأ دوما بالخطة ب ... الخطة أ اتركها للأخير... أو كما قال الشاعر .. لازم خرجة من القصب 👌
المدير التنفيذي لمدرسة أوطومايشن فيجن السيد محمد طباطوشت يعلمكم بالإفتتاح الرسمي للمدرسة العالمية لتدريب أنظمة التحكم الآلي بعد الحصول على الإعتماد من وزارة التعليم العالي و البحث العلمي و وزارة العمل في دولة سلطنة عمان .
تتموقع المدرسة بالعاصمة مسقط مبنى أكتوبر شارع البركات بجانب بنك الصيرفة الإسلامي.
للتسجيل و الإستفسار يرجي التواصل عن طريق الواتساب في الرقم المدون في الأسفل..
تفاصيل أخرى نتحدث عنها لاحقا في الأيام القليلة القادمة ..
كونو في الموعد ... وشكرا
فيها خير شريكي😉

نهاركم زين الشبيبة ... تخيل معي ... حياتك كامل و انت مركز في مجال الكهرباء ... حياتك كامل و انت غير مع الخيوط و الكوابل و المحركات ... من بعد يعيطولك في واتساب ... من الجزائر... خويا محمد وش رايك تكون معانا في فريق كتابة السيناريو لمسلسل درامي فكاهي يجوز في هذا رمضان ...
يا خويا راك عارف بلي أنا نخدم تريسيتي؟
ايه ايه علابالي .... بصح كاين واحد بعثلي الصفحة ديالك و شفتك عندك أسلوب مميز في الكتابة .. خاصة انك تهدر بالدارجة ... يا ودي انا خاطيني يا خويا لعزيز ههههه
المهم في هذا رمضان كي تشوف فالجينيريك .. كاتب السيناريو طباطوشت محمد .... كوف روحك و خلاص هههههه
فوضى يا شريكي فوضى كبيرة ...

صديقي شفت هذوك لي تشوفهم في انستاغرام و فاييسبوك... زعما عايشين غاية ... لبسة ماركة ... كرارس خشان... غير الآيفون يخبط ... و معاهم نساء شابين ... و ديارهم كبار بزاف ... المهم الدنيا مدنيا ... من بعد تشوف حالتك باسكات مدرحة.. تطبع فالكار ... تيليفون حطبة ... وحدة ما تشوف فيك لا الشابة لا المزعوقة ... ترقد مع خاوتك في شمبرة وحدة ... و ممكن الدار تكون دار الكرى .. شغل تغيضك عمرك ... قادر حتى تبدى تبكي كي تخمم فيها مليح ... و قادر تاني تلوم والديك كي جابوك للدنيا... و يحكمك إكتئاب حاد بلا ما جيب خبر ... المهم تدخل في زنقة المقارنات ... هذاك عندو انا لالا... المهم يتخلط عليك كلش ... عندك غير 18 سنة و تشوف الناس راهي تطير ... و انت حاصل كيفاش تفليكسي ... كيفاش تدير حل لعمرك.... تحب تدير تجارة مكاش راس المال ... حاب تخدم واحد ما حلبك ... لافامي مشي سامعين بيك أصلا حي ولا ميت ...
المهم الحاجة اللولا رد بالك يهفوك هذوك تع المواقع ... نصهم مشي رجال ... و ياخو و الله ما رجال ... ما تتمسخرش بينا .. تشطح !! تتبهلل!! تطلق حلاوتك... خلينا منها صحبي.. فرشة .. غدوة تكبر و يديروك تحريشة ..
سلاكها كيفاش؟؟ يا خو إذا ما لقيتش حل اتعلم صنعة .. الكهرباء...
دك نفهمك وش فيها عفايس شابين ...
الحاجة اللولة و الله ما صعيبة تحط راسك فيها تولي تطير ...
علابالي حبست القراية و الضروف و التشومير ووو نعرفها لحكاية..
اتعلم تخدم تريسيتي تع الديار... هي بش نكون صريح معاك فيها شوية تمرميد ... بصح و الله العلي العظيم غير فيه حلاوة .. تعرف عباد ... تديبلاصي .. تخالط عباد جدد... تدخل لديار الناس ... طيح و نوض ... المهم جيبها من فم السبع ...
مع اللول تخدم لومبة.. من بعد سبوت ... من بعد حانوت .. برطمة .. فيلا ... و اذا كنت سيريو قادر تخدم حومة كامل ... و تولي تعاون فالمصاغر تع حومتك ... اديهم معاك يخدمو ...
اشري فيلو ... لايم جيب موطو .. زيد شوية جيب كش فيات باندا تع بكري نهار فوقها نهار تحتها ... و الدنيا راهي تمشي و انت راك تافونصي في حياتك ... راك تتطور وحدة وحدة ... و الله يا خو غير يفتح عليك ربي بيبان الخير انت تحير ... تولي تلبس غير الحر ... عايش خلوي في راسك و الحاجة الشابة فيهم كي تروح تخطب .. يقول فلان راجل و زعيم و خدام ... باينة تجيب بنت الرجال .. اذا كنت مليح فيها أخبط تيليفون ماركة ... و قادر تشري مورصو تراب و تبنيه وحدة وحدة ....
شفت خو راك وليت خيرمن لي حكينا عليهم مع اللول ... برك انت طلعت بالحلال ... و هوما طلعو ب.....
مشي كيف كيف صديقي .... خمم مع راسك مليح ... و ما تخليهمش يدمروك .... و شكرا ....

نقطة نظام...
أخي صاحب العمل .. هذاك العامل ...
لازم تفهم بلي يخدم معاك ... حسن ألفاظك... مشي يخدم عندك ...
الفايدة و الحاصول:
طباطوشت محمد يلتحق بفريق المستشارين التقني على مستوى الخليج العربي لشركة ABB و هذا لبحث سبل تطوير الجودة التقنية للشركة على غرار زيارة رسمية لمصنع إنتاج الدرافيرز بوحدته المتواجده في مدينة نيلامانقالا كارناتاكا الهندية و هذا لمناقشة الإصدار الأخير لدرايفات acs ...
جاري الآن ... تحميل فيلم جانيتو... هذي هيا صحبي لازم تتعلم شوية تيواواطي ....
فاصل و نواصل ...