Mohadisa Sandara /محدثه سندره

هغې خبرې دې زه ووژلم
چې بلا ډېره موده وروسته راته
تا دا خبره وکړه
چې زه ستا نه یمه، ستا نه کېږمه
ویل دې زه بل چاسره ژوند کومه
همدا خبره مې کړاو د عمر
هرڅه کومه، خو هيڅ نه هیريږي
په زړه مې لیک، ذهن کې حک پاتې ده
بیا دې بخښنه په وار وار وغوښته
خو دا متل خو دې په یاد دی کنه!؟
"بدې خبرې عمر سل کاله وي"
ته مې بخښلی يې په مخه ښه
خو نور مې زړه کې هغه ځای نلرې
د ژوند خوږه کیسه همدا وه زما
چې ستا ترخې خبرې ووژلم

م. سندره

ټوله دنیا دې کړه راماته په ځان
پام دې د خدای وي، پام دې ساته په ځان

وي له قسمته یا دستوره مجبور
د چا لورېږي نو میراته په ځان

د شمعې حال بیاباني غوندې شو
اور یې بل کړی دی هوا ته په ځان

ځه ځان به نه وژنم، نشه به وکړم
خو څه ضرور کوم بیګا ته په ځان

ژوند یې راکړی دی د مرګ په وعده
زه هم خواري کوم فنا ته په ځان

ابهام

ښځې که مجبورې شي، د زندان په دېوالونو به نیلي اسمان نقاشی کړي.
که د مرهم ټوکرونه وسوځول شي، دوی به نور ټوکرونه و اوبدي شي.
که بزغلی له منځه یوسئ؛ نور تخمونه به وپاشي.
چیرته چې دروازه نه وي، ښځې به دروازه جوړه کړي او له هغې څخه به بهر ووځي او د نوي ژوند په لور به قدم واخلي.

ژباړه: م. سندره

په یوټیوب یې اوریدلی سئ.
درنښت

غزل : زبیح احساس - ديکلمه : محدثه سندره

راته یې ولیکه!
تل
او څومره دې چې زړه غواړي
ګرانه! یوازې مې مه پرېږده
انسان تل ځواکمن نه وي
هر څومره چې فکر وکړي ؛
ځواکمن دی، خو ښایی
په خپلو ستونز برلاسی نشي
کله چې انسان خپل ځان
تر ټولو کمزوری احساسوي
یوازې د مینې ځواک دی چې هغه ژغورلی شی.

البرکامو
ژباړه: م. سندره

ته نور ماته تودوخه نه راکوې
اې د مینې یخ وهلی لمره
زما سینه د نا امیدۍ صحرا ده
ستړې یم، له مینې هم ستړې یم
د ښیښې تر شا واوره اوري
او زما د سینې په خاموشۍ کې
د غم تخم کري

فروغ فرخزاد

ژباړه: م. سندره

له دې هر څه وروسته
ته اوس هم فکر کوې چې ناپیژانده او پټ یې؟
د جامو له بوی نه مې پوهېږي چې زما محبوب یې،
د وجود له عطرو مې پوهېږي چې له ماسره یې،
په ویده شوي لاس مې
پوهېږي چې تا پرې خوب کړی.
له دې وروسته دې نشم پټولی
د لاس له خط نه مې؛
پوهېږي چې ستا لپاره یې لیکم...

نزار قباني
ژباړه: م. سندره

جو مرد عورت سے فرشتہ بننے کی توقع رکھتا ہے، اسے چاہیے کہ وہ اس کے لیے جنت بنائے، کیونکہ فرشتے جہنم میں نہیں رہتے۔

نزار قبانی
ـــــ
هغه سړی چې د یوې ښځې څخه د فرښتې تمه لري باید د هغې لپاره جنت جوړ کړي، ځکه چې پرښتې په دوزخ کې نه اوسیږي.

نزار قباني
ژباړه

د لویو لویو قدرتونو ربه
یو تمنا ده اوریدی شې که نه
ستا د سکڼي سکڼي ماښام نه لوګی
د چا د زړه لوګی لیدی شې که نه

اجمل خټک

ښکلاوې ...

یوې داسې خاموشۍ ته اړتیا لرم
چې یواځې د خپلې
ساه اواز پکې واورم
دومره خاموشي چې حتی
د خپلو اوښکو
غږ پکې واورم
هو داسې یوې ژورې خاموشۍ ته اړتیا لرم

ژباړه: م. سندره

انتخاب

څه په هنر مې کړه بدله څه په چل بدله
د زړه کیسه مې کړه اخیر هم مکمل بدله

نه په منزل یم بی یقینه، نه لویدلی یمه
له مجبورۍ مې کړله لاره د مزل بدله

شیخه زما په ګناه رنګ د ثواب کله خیژي!؟
ماته غږیږه مه، خبره دې په ګل بدله

یه ته او خدای، که به د ژوند نامه په ژبه اخلې
د هوښ دونيا دې کړله بېرته په ځنګل بدله

ځار دې له سترګو نه؛ خو ځان مې پکې ونه لیدو
نن خو کیسه ښکاري اشنا داسې بدل بدله

wasi ibham

تاسې ته د ارواښاد صاحب شاه صابر صیب کوم بیت یا غزل یاد دی؟

چا چې د کلي مازيګر سندره کړی نه وي
هغه د بام د اشارو په ژبه نه پوهېږي

زما د زړه دردونه دومره بې دليله نه دي
چې ستا د سترګو د بڼو په ژبه نه پوهېږي

هغه د خپل ظالم نظر د زوره نه دي خبر
هغه زما د اسويلو په ژبه نه پوهيږي

هغه بې لوظه، بې پښتو، هغه بې خوږو سړی
هغه د مينې د پښتو ژبه نه پوهېږي

ارواښاد ډاکټرصاحب شاه صابر

جانان له غمه امان غواړي
زه د جانان په غم کې ډوبه ناسته یمه

#ټپه

ما نۀ دي لیدلي
چې یوه ښځه دې مئینه وي
او له مینې لرلو پرته دې
بل څه ووایي!
قول درکوم چې:
له "مینه درسره لرم" پرته به،
له هغې بل څه وا نۀ‌ورئ!
کله چې وائي:
نن دې وېښته ډېر ښۀ ښکاري!
یا دا لباس دې له چهرې سره ډېر ښه جوړ دی!
یا مثلاً څو ځل مې درته ویلي چې سهارنۍ دې نه وي کړي له کوره به نه ځې!
یا چای دې سوړ شوی، مه ئې څښه!
یا ماښام کې له فلاني ځایه دا بېخونده سانډویچ مه اخله!
یا مثلاً نن ستړی ئې راشه کېنه چې لږ کتاب درته ولولم!
یا زعفراني کېک مې درته پخ کړی، راشه چای سره ئې وخوره!
یا کله چې درته وائي: تا ستړې کړې یم! نور نغواړم چې حتی' مخ دې ووینم... ایییییی... نور دې نو نشم زغملی!
یا تا نه مې زړه موړ ده، وایم چې کااش تۀ هیییڅ نه وې راسره!
یا دا ډېره محسوسوم چې نور مې هییڅ نۀ خوښېږې!
او یا تۀ مې بد راځې!
باور وکړئ دا ټووول د ښځو په ژبه کې،
"مینه درسره لرم" مانا کېږي!
ښځې بلدېدل غواړي!
ژباړن غواړي!
باید مئین اوسې چې په هغوی پوه شې!
باید غوږونه دې مئین وي!
باید د هغوی خوړلي کلمات پخپل ذهن کې،
د مینې په ژبه وژباړې!
باید له سترګو دې مینه وورېږي!
د ښځینه‌و کار:
مینه کول دي!
ډارېږئ مۀ!
ورسره بلد شئ!
بیا وګورئ چې له حنجرې نه ئې،
د مینې لرلو پرته،
بل څه نه راوځي...!!!
ــــــــــــــــــــــــــــــــــــــ
ژباړنه: ژمنه ژوند

يا خو دې ما لېدلی نه وای
یا دې د بل کلي سړی نه وای مینه

#فولکلور

انتخاب

که پکې زر ځله د هيڅ ګټې امکان نشته
بياهم د زړه په سوداګانو کې تاوان نشته

خدايه په څه د سترګو خړې اينې ووينځم
په زړه وريځې ګرځوم پکې باران نشته

هر څوک يو بل ته ګوري هيڅوک چاته هيڅ نه وايي
هر څوک په ځای ولاړ دی هيڅوک هم روان نشته

داسې څه نشته چې هغه په پېښور کې نشته
زه زړه له درد اخلم د درد پکې دوکان نشته

را به شم ستا د سترګو هر سوال له به راوړم جواب
اوس خو ما ځان ورک کړی اوس خو زما ځان نشته

سایل‌صیب

يوه نجلۍ

زه په سړه خونه کې
غم کې ډوبه ناسته يم
نيمکښې کړکۍ څخه
باد راځي نمجن غوندې
تا را يادوي بيا بيا
اور پورې کوي په ما
هم مې تخنوي بدن
کشکې چې وزر مې واى
تاته در الوتې واى
تا مې تن ښکل کړى واى
کاش چې زه هم باد واى
ته مې ښکل، راغلې واى
زه د رواجونو د
اوسپنې د تور زندان
ټول عمر بندۍ يمه
زه يوه نجلۍ يمه
ــــــ
شاعره: پروين شاکر
ژباړه: م سندره