GNFC - Georgian National Film Center

დღეს საზოგადოებას შესაძლებლობა ჰქონდა, პირდაპირი ეთერით ენახა ფილმწარმოების დაფინანსების ახალი წესის შესაბამისად წარმართული ჟიურის შერჩევის პროცესი კონკურსისთვის - „სრულმეტრაჟიანი ანიმაციური ფილმების წარმოების დაფინანსება“.

კონკურსის დებულების თანახმად, სავალდებულოა, ჟიურის ხუთი წევრიდან ორი ანიმატორი იყოს.

41-კაციანი სიიდან შემთხვევითობის პრინციპითა და გამჭვირვალობის სრული დაცვით შეირჩა ჟიურის ძირითადი შემადგენლობა:
ანა ჩუბინიძე - ანიმაციის რეჟისორი;
დიმიტრი ბუთლიაშვილი - ანიმატორი;
გიორგი კაკაბაძე - კინორეჟისორი;
გორგასლან ხაინდრავა - კინოოპერატორი;
გიორგი პიპინაშვილი - მსახიობი, რეჟისორი.

ასევე, შეირჩა ჟიურის ორი სათადარიგო წევრი: მსახიობი გიორგი გურგულია და კინორეჟისორი ერეკლე ტრიპოლსკი.

14 მაისს საქართველოს კინემატოგრაფიის ეროვნულმა ცენტრმა გამოაცხადა კონკურსი - „სრულმეტრაჟიანი ანიმაციური ფილმების წარმოების დაფინანსება“. კონკურსში მონაწილეობისთვის ეროვნულ კინოცენტრს სამმა განმცხადებელმა მომართა. ორი განაცხადი განხილვის ეტაპზე გადავიდა, ერთი მათგანი კი, საბუთების ხარვეზის გამო, განხილვის ეტაპზე ვერ მოხვდა.

დღეს, 13 ივნისს, 19:00 საათზე, საქართველოს კულტურისა და სპორტის მინისტრის 2024 წლის 25 მარტის ბრძანებით დამტკიცებული ფილმწარმოების დაფინანსების ახალი წესის შესაბამისად, ამ გვერდზე გექნებათ შესაძლებლობა, პირდაპირი ეთერით ნახოთ კონკურსის - „სრულმეტრაჟიანი ანიმაციური ფილმების წარმოების დაფინანსება“ - ჟიურის შერჩევის პროცესი.

დაფინანსების ახალი წესის თანახმად, ეროვნულმა კინოცენტრმა შეადგინა ჟიურის წევრობის კანდიდატთა 41-კაციანი სია. კინოცენტრი თითოეულ მათგანს მადლობას უხდის თანხმობისათვის.

პირდაპირი ეთერით გადაცემული პროცესის ვიდეოჩანაწერი ხელმისაწვდომი იქნება ნებისმიერი პირისთვის.

მოკლემეტრაჟიანი მხატვრული ფილმების კონკურსის გამარჯვებული პროექტები გამოვლინდა

კინემატოგრაფიის ეროვნული ცენტრის მიერ გამოცხადებული კონკურსის - „მოკლემეტრაჟიანი მხატვრული ფილმების წარმოების დაფინანსება“ - მეორე ეტაპზე გადასული 9 პროექტიდან კომისიის მეორე შემადგენლობამ ერთხმად შეარჩია 3 გამარჯვებული პროექტი.
ესენია:
• „შავი შაშვი ჩიო-ოო-და“ - რეჟისორი გიორგი ჭუმბურიძე, პროდიუსერი ნინო ჩუტკერაშვილი;
• „ტრაგედია უგმიროთ“ - რეჟისორი და პროდიუსერი რევაზ ნასიძე;
• „ობსერვატორია“ - რეჟისორი და პროდიუსერი მარიამ ქარქაშაძე.

კომისიის წევრთა ორი-ორი ხმა მიიღო ორმა პროექტმა, ხოლო ოთხმა პროექტმა ვერცერთი ხმა ვერ მიიღო.

კონკურსის ამ ეტაპზე გადასული პროექტები განიხილა საექსპერტო კომისიის მეორე შემადგენლობამ, რომელიც იქმნება საქართველოს ეროვნული კინოცენტრის დირექტორის ინდივიდუალური ადმინისტრაციულ-სამართლებრივი აქტით. კომისიის მეორე შემადგენლობაში შედის ოთხი წევრი, რომელთაგან ორი პროდიუსერია, ერთი - კინოცენტრის ფინანსისტი, ერთი - მოწვეული ეკონომისტი.
კონკურსი ეროვნულმა კინოცენტრმა მიმდინარე წლის 16 აპრილს გამოაცხადა. კინოცენტრს 22-მა პროდიუსერმა მიმართა. კონკურსისთვის გამოიყო 200 000 ლარი.

შეგახსენებთ: მიმდინარე წლის 4 ივნისს საზოგადოებას ეცნობა კონკურსის მეორე ეტაპზე გადასული ცხრა პროექტის შესახებ, რომლებიც საექსპერტო კომისიის პირველმა შემადგენლობამ (ჟიურიმ) შემოსულ 22 პროექტს შორის მეორე ეტაპზე გადასასვლელად შეარჩია.

„მოქალაქე წმინდანმა“ ბულგარეთის საერთაშორისო კინოფესტივალზე საუკეთესო ფილმის ჯილდო მიღო

ბულგარეთის ქალაქ სტარა-ზაგორაში 1 ივნისიდან მიმდინარე საერთაშორისო კინოფესტივალზე „IFF Golden Linden-2024“ საქართველოს, საფრანგეთისა და ბულგარეთის ერთობლივმა პროდუქციამ, რეჟისორ თინათინ ყაჯრიშვილის ფილმმა - „მოქალაქე წმინდანი“ - საუკეთესო ფილმისთვის ფესტივალის ჯილდო დაიმსახურა.

ფილმი გადაღებულია საქართველოს ეროვნული კინოცენტრის მხარდაჭერით და არის არაერთი საერთაშორისო ჯილდოს მფლობელი.

გამარჯვებული ფილმი დასკვნით ღონისძიებაზე გამოვლინდა და მან საერთაშორისო ჟიურის მაღალი შეფასებები მიიღო.

რეჟისორმა თინათინ ყაჯრიშვილმა ვიდეოჩართვის საშუალებით მიმართა აუდიტორიას და მადლობა გადაუხადა ფესტივალის ორგანიზატორებსა და ჟიურის ფილმის მაღალი შეფასებისთვის.

კინოფესტივალის მიზანია ბულგარეთში ევროპული კინოს პოპულარიზაცია და ევროპის სხვადასხვა ქვეყნის უახლესი და საინტერესო ფილმების ჩვენება. ფესტივალს აქვს ორი პროგრამა: საკონკურსო და დამატებითი, რომლებშიც წარმოდგენილია ფილმები ბულგარეთიდან და ევროპის სხვადასხვა კუთხიდან.

აღსანიშნავია, რომ საქართველოს ეროვნულმა კინოცენტრმა მიმდინარე წლის მარტში კანის საერთაშორისო კინოფესტივალის კინობაზრობაზე სრულმეტრაჟიანი მხატვრული ფილმების ჩვენების დაფინანსების მიზნით კონკურსი გამოაცხადა, რის შედეგადაც კანის 77-ე საერთაშორისო კინოფესტივალის ბაზრობაზე რეჟისორ თინათინ ყაჯრიშვილისა და პროდიუსერ ლაშა ხალვაშის ფილმის, „მოქალაქე წმინდანის“, ჩვენება 19 და 20 მაისს ფილმ-მარკეტისთვის განკუთვნილ დარბაზებში გაიმართა.

მოკლემეტრაჟიანი მხატვრული ფილმების დაფინანსების მიზნით გამოცხადებული კონკურსის მეორე ეტაპზე გადასული პროექტები გამოვლინდა

ექსპერტთა კომისიამ (ჟიურიმ) კანონმდებლობით დადგენილი წესით გამოავლინა პროექტები, რომლებიც საქართველოს კინემატოგრაფიის ეროვნული ცენტრის (კინოცენტრის) მიერ გამოცხადებული კონკურსის - „მოკლემეტრაჟიანი მხატვრული ფილმების წარმოების დაფინანსება“ - მეორე ეტაპზე გადავიდა.

კონკურსის შემდეგ საფეხურზე გადავიდა ცხრა პროექტი:

„ობსერვატორია“ - რეჟისორი და პროდიუსერი მარიამ ქარქაშაძე;

„ჯერაიელ“ - რეჟისორი და პროდიუსერი თენგიზ ასიტაშვილი;

,,მე დამხვრიტეს“ - რეჟისორი და პროდიუსერი გიორგი კაჭარავა;

„ლილია“ - რეჟისორი და პროდიუსერი გენადი ცაავა;

„ყვავები“ - რეჟისორი დავით ქვარცხავა, პროდიუსერი თამაზ ორაშვილი;

,„ნიშნობა“ - რეჟისორები გიორგი თავაძე და ლუკა გალდავა, პროდიუსერი ხათუნა დონდოლაძე;

„შავი შაშვი ჩიო-ოო-და“ - რეჟისორი გიორგი ჭუმბურიძე, პროდიუსერი ნინო ჩუტკერაშვილი;

„ოპერაცია 121“ - რეჟისორი და პროდიუსერი მევლუდ საბაშვილი;

„ტრაგედია უგმიროთ“ - რეჟისორი და პროდიუსერი რევაზ ნასიძე.

ზემოხსენებული ცხრა პროექტის კონკურსის შემდეგ ეტაპზე გადასვლის გადაწყვეტილება ჟიურიმ ხმათა უმრავლესობით მიიღო.

ეროვნულმა კინოცენტრმა კონკურსისთვის გამოყო 200 000 ლარი, ცხრა პროექტის ჯამური მოთხოვნა კი 802 438,43 ლარს შეადგენს.

პროექტები განიხილა კონკურსის პირველი საექსპერტო კომისიის (ჟიურის), „სსიპ საქართველოს კინემატოგრაფიის ეროვნული ცენტრის საექსპერტო კომისიის დებულების“ შესაბამისად, 2024 წლის 2 მაისს პირდაპირი ეთერით („ლაივსტრიმით“) შემთხვევითობის პრინციპით გამოვლენილმა შემადგენლობამ: ერეკლე ტრიპოლსკი (კინირეჟისორი), გიორგი პიპინაშვილი (მსახიობი), ქეთევან ტრაპაიძე (კინომცოდნე), კახაბერ მაჭარაშვილი (პროდიუსერი) და ხათუნა ხუნდაძე (კინორეჟისორი, პროდიუსერი).

პროექტებს, რომლებთან დაკავშირებითაც საექსპერტო კომისიის პირველმა შემადგენლობამ (ჟიურიმ) მიიღო დადებითი გადაწყვეტილება, კონკურსის შემდეგ ეტაპზე განიხილავს საექსპერტო კომისიის მეორე შემადგენლობა, რომელიც კონკურსის საბოლოო გამარჯვებულებს გამოავლენს.

საექსპერტო კომისიის მეორე შემადგენლობა იქმნება საქართველოს ეროვნული კინოცენტრის დირექტორის ინდივიდუალური ადმინისტრაციულ-სამართლებრივი აქტით. საექსპერტო კომისიის მეორე შემადგენლობაში შედის ოთხი წევრი, რომელთაგან ორი პროდიუსერია, ორი – ეროვნული კინოცენტრის ფინანსისტი/ფილმის წარმოების სპეციალისტი ან ამავე პროფესიის მოწვეული პირი.

კომისიის მეორე შემადგენლობა მიიღებს საბოლოო გადაწყვეტილებას პროექტის დაფინანსების/დაფინანსებაზე უარის შესახებ.

შედეგები გამოცხადდება არაუგვიანეს 21 ივნისისა.

დღეს საზოგადოებას შესაძლებლობა ჰქონდა, პირდაპირი ეთერით ენახა ფილმწარმოების დაფინანსების ახალი წესის შესაბამისად წარმართული ჟიურის შერჩევის პროცესი კონკურსისთვის - „სრულმეტრაჟიანი მხატვრული ფილმების წარმოების დაფინანსება“.

40-კაციანი სიიდან შემთხვევითობის პრინციპითა და გამჭვირვალობის სრული დაცვით შეირჩა ჟიურის ძირითადი შემადგენლობა:

მაია არჩვაძე - სცენარისტი, კინორეჟისორი;
გიორგი კაჭარავა - სცენარისტი, კინორეჟისორი, პროდიუსერი;
რამაზ იოსელიანი - მსახიობი;
ნათია გოგოჭური - სცენარისტი;
თინათინ ყაჯრიშვილი - კინორეჟისორი.

ასევე, შეირჩა ჟიურის ორი სათადარიგო წევრი: კინომცოდნე ქეთევან ტრაპაიძე და კინოთეორეტიკოსი ზაზა შათირიშვილი.

7 მაისს საქართველოს კინემატოგრაფიის ეროვნულმა ცენტრმა გამოაცხადა კონკურსი - ,,სრულმეტრაჟიანი მხატვრული ფილმების წარმოების დაფინანსება“. კონკურსის ფარგლებში ეროვნულ კინოცენტრს 12-მა (თორმეტი) განმცხადებელმა მომართა. 10 (ათი) საპროექტო განაცხადი განხილვის ეტაპზე გადავიდა, 2 (ორი) დახარვეზდა და ვერ მივიდა განხილვის ეტაპამდე.

3 ივნისს, 11:00 საათზე, საქართველოს კულტურისა და სპორტის მინისტრის 2024 წლის 25 მარტის ბრძანებით დამტკიცებული ფილმწარმოების დაფინანსების ახალი წესის შესაბამისად, ამ გვერდზე გექნებათ შესაძლებლობა, პირდაპირი ეთერით ნახოთ კონკურსის - „სრულმეტრაჟიანი მხატვრული ფილმების წარმოების დაფინანსება“ - ჟიურის შერჩევის პროცესი.

დაფინანსების ახალი წესის თანახმად, ეროვნულმა კინოცენტრმა შეადგინა ჟიურის წევრობის კანდიდატთა 40-კაციანი სია. კინოცენტრი თითოეულ მათგანს მადლობას უხდის თანხმობისათვის.

პირდაპირი ეთერით გადაცემული პროცესის ვიდეოჩანაწერი ხელმისაწვდომი იქნება ნებისმიერი პირისთვის.

გილოცავთ საქართველოს დამოუკიდებლობის დღეს!

#ესდღეჩვენია

ქართული დელეგაცია კანის საერთაშორისო კინოფესტივალიდან ნაყოფიერი შედეგებით დაბრუნდა

საქართველოს კინემატოგრაფიის ეროვნული ცენტრის დელეგაცია კანის საერთაშორისო კინოფესტივალიდან დიდი მიღწევებითა და ხელშესახები შედეგებით დაბრუნდა, რაც კიდევ უფრო გაამყარებს ქართული კინოს განვითარების პერსპექტივებსა და პოპულარიზაციას.

ქართული კინო კიდევ ერთხელ გასცდა ქვეყნის ფარგლებს და კანის საერთაშორისო ფესტივალზე ღირსეულად წარსდგა.

აღსანიშნავია, რომ ქართული კინოს განვითარებისა და პოპულარიზაციის მიზნით ეროვნული კინოცენტრის წარმომადგენლებმა, ქართველმა რეჟისორებმა და პროდიუსერებმა, მნიშვნელოვანი შეხვედრები გამართეს სხვადასხვა საერთაშორისო კინოფესტივალის პროგრამის შემდგენლებთან, პროდიუსერებთან, კომპანიების, კინოთეატრების, ონლაინპორტალებისა თუ საერთაშორისო კინოფესტივალების წარმომადგენლებთან.

მნიშვნელოვანია, რომ დაიგეგმა პროექტები, რომლებიც საქართველოში უცხოურ ინვესტიციებს მოიზიდავს, რაც მეტ ქართულ ფილმს გაუხსნის ფართო და წარმატებულ გზას საერთაშორისო კინოინდუსტრიაში.

ინფორმაციისთვის: 14-25 მაისს ქ. კანში მიმდინარე 77-ე საერთაშორისო კინოფესტივალზე საქართველოს ეროვნული კინოცენტრის პავილიონი გაიხსნა. კულტურისა და სპორტის სამინისტროს, სსიპ-ის „აწარმოე საქართველოში“ და ღვინის ეროვნული სააგენტოს მხარდაჭერით წარდგენილმა საქართველოს პავილიონმა წარმოაჩინა ქართული კინოს უმდიდრესი მემკვიდრეობა, წარადგინა ახალი პროექტები, პოპულარიზაცია გაუწია საქართველოს, როგორც აღმოსავლეთ ევროპაში კინოგადაღებებისთვის უმნიშვნელოვანეს ქვეყანას.

აღსანიშნავია, რომ საქართველოს ეროვნულმა კინოცენტრმა მიმდინარე წლის მარტში კანის საერთაშორისო კინოფესტივალის კინობაზრობაზე სრულმეტრაჟიანი მხატვრული ფილმების ჩვენების დაფინანსების მიზნით კონკურსი გამოაცხადა, რის შედეგადაც კინოფესტივალის ბაზრობაზე რეჟისორ თინათინ ყაჯრიშვილისა და პროდიუსერ ლაშა ხალვაშის ფილმის, „მოქალაქე წმინდანის“, ჩვენება 19 და 20 მაისს ფილმ-მარკეტისთვის განკუთვნილ დარბაზებში გაიმართა, რომელსაც დაესწრნენ სადისტრიბუციო კომპანიის წარმომადგენლები და გაყიდვების აგენტები.

ფილმი გადაღებულია საქართველოს ეროვნული კინოცენტრის მხარდაჭერით და არაერთი საერთაშორისო ჯილდოს მფლობელია.

კანის კინოფესტივალზე საქართველოს დელეგაციის წარმატებული შეხვედრები გრძელდება

ქართული დელეგაციის წევრებმა კინოცენტრის დირექტორის მოვალეობის შემსრულებლის, კობა ხუბუნაიას, ხელმძღვანელობით კანის 77-ე საერთაშორისო კინოფესტივალის მიმდინარეობისას კინოს სფეროს წარმომადგენლებთან წარმატებული შეხვედრები გამართეს.
შეხვედრა გაიმართა ევროპის ერთ-ერთ უმსხვილეს საპროდიუსერო ასოციაციასთან „Ace Producers“, რომლის წარმომადგენლებმაც, ნატალი შოლტენმა და მეიჯინ ფაბიასმა, კინოცენტრის დელეგაციასთან განიხილეს ქართველი პროდიუსერებისათვის საქართველოში სამუშაო შეხვედრის გამართვის შესაძლებლობა და სამომავლო თანამშრომლობის სხვადასხვა საკითხი.

გარდა ამისა, მსოფლიოს ერთ-ერთი წამყვანი კინოლინზების მწარმოებელი კომპანიის „Leitz Cine“-ს (ლეიკას) წარმომადგენლებმა კინოცენტრთან თანამშრომლობის სურვილი გამოხატეს და საქართველოში კინოოპერატორების, გამნათებლებისა და კინოს სხვა სპეციალისტებისთვის საგანმანათლებლო აქტივობები, ცნობილი და კინოსამყაროში აღიარებული ოპერატორების ჩამოყვანა და მათი მასტერკლასების გამართვა იგეგმება.

შეხვედრა გაიმართა ტოკიოს საერთაშორისო კინოფესტივალის პროგრამების კურატორ ოუ შიმიზუსთან, ფესტივალზე სრულმეტრაჟიანი ქართული ფილმების შესაძლო წარდგენასთან დაკავშირებით.

ქართველ-ფრანგ პროდიუსერთან, ანა ტარასაშვილთან, „LaCinetek“-ის ონლაინ პლატფორმასთან დაკავშირებით ისაუბრეს; პლატფორმაზე გაერთიანებულია სხვადასხვა ქვეყნის ფილმები.

ინდოელ პროდიუსერ ნარეშ მაკერლასთან შეხვედრისას მხარეებმა განიხილეს საქართველოში შესაძლო გადაღებები.

ხოლო საფრანგეთის კინოცენტრის, CNC-ის, დირექტორმა დომინიკ ბუტონამ კინოცენტრის დელეგაციის წარმომადგენლებთან შეხვედრაზე ისაუბრა თუ რა თანამშრომლობის საშუალებაა ორი ქვეყნის ინსტიტუტებს შორის.

ნაყოფიერი შეხვედრა გაიმართა ქვინსი ქიუსთან (ვესთ ლეიქის საერთაშორისო დოკუმენტური კინოფესტივალის (IDF) კონკურსის გენერალური დირექტორი) ქართული დოკუმენტური ფილმების ფესტივალზე წარდგენასთან დაკავშირებით.

ქართულმა მხარემ ასევე შეხვედრა გამართა ონლაინპლატფორმა Gocreator.world-ის თანადამფუძნებელთან - ლარა მარია ჯერდანთან. განიხილეს ონლაინპლატფორმაზე ქართული ფილმების (ტრეილერების) განთავსებასთან, შესაფერისი ადგილებისა და ფინანსური შეღავათების საძიებო სისტემის შექმნასთან დაკავშირებული საკითხები.

ასევე, წარმატებული შეხვედრა გაიმართა ესკე ივენთან „ნანტის ფრანკო-გერმანული კულტურის ცენტრის“ დირექტორთან, რომელთანაც ისაუბრეს ქართული ფილმების ფესტივალზე წარდგენასთან დაკავშირებით.

გარდა ამისა, ვენეციის ფესტივალის პროგრამერ პაოლო ბერტოლინისთან შეხვედრისას იმსჯელეს ფესტივალზე ქართული ფილმების წარდგენასთან დაკავშირებით.


საქართველოს კინემატოგრაფიის ეროვნული ცენტრის დელეგაცია ფესტივალის მიმდინარეობისას კინოსფეროს კიდევ არაერთ წარმომადგენელს შეხვდება.

აღსანიშნავია, რომ კანში კინოცენტრის დაფინანსებით 19 და 20 მაისს ფილმ-მარკეტისთვის განკუთვნილ დარბაზებში გაიმართა რეჟისორ თინათინ ყაჯრიშვილისა და პროდიუსერ ლაშა ხალვაშის არაერთი ჯილდოს მფლობელი ფილმის „მოქალაქე წმინდანის“ ჩვენება, რომელსაც დაესწრნენ სადისტრიბუციო კომპანიის წარმომადგენლები და გაყიდვის აგენტები.
როგორც ცნობილია, 14-25 მაისს ქ. კანი მასპინძლობს 77-ე საერთაშორისო კინოფესტივალს, რომელშიც საქართველოს ეროვნული კინოცენტრი პავილიონით მონაწილეობს. კულტურისა და სპორტის სამინისტროს, სსიპ-ის „აწარმოე საქართველოში“ და ღვინის ეროვნული სააგენტოს მხარდაჭერით წარმოდგენილი საქართველოს პავილიონი წარმოაჩენს ქართული კინოს უმდიდრეს მემკვიდრეობას, წარადგენს ახალ პროექტებს, პოპულარიზაციას უწევს საქართველოს, როგორც აღმოსავლეთ ევროპაში კინოგადაღებებისთვის უმნიშვნელოვანეს ქვეყანას.
ქართული კინოს სათანადოდ წარდგენისა და პოპულარიზაციის მიზნით კინოცენტრის დელეგაციაში არაერთი ქართველი რეჟისორი და პროდიუსერია, რომლებიც შეძლებენ სხვადასხვა საპროდიუსერო კომპანიის წარმომადგენლების გაცნობას და დასახავენ გეგმებს, როგორც ერთობლივი პროდუქციის შესაქმნელად, ასევე ქვეყნის კინოწარმოების განსავითარებლად. ეს ხელს შეუწყობს ქართველი კინოხელოვანების საერთაშორისო კავშირების განმტკიცებასა და მათი მიმდინარე პროექტების წარმატებას.

კინორეჟისორებითა და პროდიუსერებით დაკომპლექტებულ დელეგაციას აქვს შესაძლებლობა, საკუთარი შემოქმედებით თუ სამომავლო პროექტებით დააინტერესოს ევროპული ბაზარი და ხელი შეუწყოს ქართული კინოს წარმოჩენას. ფესტივალის მსვლელობისას დაგეგმილია საქართველოს, როგორც კინოწარმოებისთვის მიმზიდველი ქვეყნის, რეკლამირება, რისთვისაც საქართველოს პავილიონში ეროვნული კინოცენტრის გუნდთან ერთად მუშაობენ პროგრამის - „გადაიღე საქართველოში“ - წარმომადგენლები.

ინფორმაციისთვის: 15-25 თებერვალს ბერლინის საერთაშორისო კინოფესტივალზე ეროვნული კინოცენტრის წარმომადგენლებმა, ქართველმა რეჟისორებმა და პროდიუსერებმა მნიშვნელოვანი და წარმატებული შეხვედრები გამართეს სხვადასხვა ქვეყნის კინოკომპანიებთან, პროდიუსერებთან, საერთაშორისო კინოფესტივალების პროგრამების შემდგენლებთან და არაერთი ერთობლივი პროექტი დაგეგმეს.

კანის კინოფესტივალის ფარგლებში, ეროვნული კინოცენტრის ორგანიზებით ფესტივალის სტუმრებისთვის მიღება გაიმართა

საქართველოს დელეგაცია კანის კინოფესტივალზე წარმატებულ შეხვედრებს განაგრძობს

ქართული დელეგაციის წევრებმა კინოცენტრის დირექტორის მოვალეობის შემსრულებლის, კობა ხუბუნაიას, ხელმძღვანელობით კანის 77-ე საერთაშორისო კინოფესტივალის მიმდინარეობისას კინოს სფეროს წარმომადგენლებთან წარმატებული შეხვედრები გამართეს.

დელეგაციის წევრები შეხვდნენ ჰარშად ბჰაგვატს
(IIFTC-ის დირექტორი, CinePort Magazine-ის რედაქტორი და გამომცემელი). მასთან საუბარი შეეხებოდა ქართული ფილმების უცხოურ პლატფორმებზე წარდგენასა და პოპულარიზაციას. იგი ასევე გაეცნო Film in Georgia-ს პირობებს.

შეხვედრა გაიმართა ფატიმა მუშარბეკთან (ორგანიზაცია FANN-ი), რომელიც დაინტერესდა Sarja international film festival for youth-პანელზე ქართველი ფილმმწარმოებლების შეთავაზებებით. იგი ფესტივალზე წარსადგენად ქართულ პროექტებს გაეცნო.

ქართულ პროექტებს გაეცნო შერი რამაჟიც (Asia pacific screen awards).
კიტ რივერსთან შეხვედრისას განიხილეს ამერიკული მძაფრსიუჟეტიანი ფილმების საქართველოში გადაღების შესაძლებლობები.

ანა-კატრინა გერსონთან
(B3 Festival
of the Moving Image 2024
Storytelling in Film, Art, Games, VR & Al) საუბარი შეეხებოდა ქართული ფილმების ფესტივალზე წარდგენას. იგი გაეცნო საქართველოს კატალოგსაც.
ვინსენტ ჩაბრილატისთან (ONE Country ONE Film) ქართული დელეგაციის წევრებმა განიხილეს ფესტივალზე ქართული ფილმების წარდგენის საკითხი. ვინსენტ ჩაბრილატიმ ქართულ კინოთეატრებთან თანამშრომლობისადმი ინტერესი გამოხატა.

დელეგაციის შეხვედრა პიტერ მეტსონთან (nordic film institute) კოპროდუქციის წარმოებას შეეხებოდა.

ჯერომ პლაზი (კომპანია Cinecroisette) ფესტივალზე წარსადგენად ქართულ პროექტებს გაეცნო.
ფრანგ პროდიუსერ ფრანსუა დარტემართან შეხვედრაზე
საქართველოში სამუშაო შეხვედრების ან ფესტივალის ჩატარების შესაძლებლობები განიხილეს.

ფესტივალის დირექტორი ალბერტო ლა
მონიკა (Festival Del Cinema Europeo) გაეცნო თანამედროვე ქართულ პროექტებს ფესტივალზე წარსადგენად.

უკრაინის წარმომადგენელი კატერინა გაიდუკი (Up Hub) გაეცნო ქართულ პროექტებს შესაძლო დისტრიბუციისთვის.

შეხვედრა სანდენსის დოკუმენტური ფილმების ფესტივალის წარმომადგენელ სტეფანი ოუენსთან ქართული პროექტების ფესტივალზე წარდგენის საკითხს შეეხებოდა.

შეხვედრა გაიმართა პროდიუსერსა და „ალპინ ფილმ ფესტივალის" დირექტორთან, მესტიის საერთაშორისო კინოფესტივალის ჟიურის წევრ დენ ბურლაკთან.
ტრიესტის კინოფესტივალის სამხატვრო ხელმძღვანელი ნიკოლეტა რომეო გაეცნო ქართულ პროექტებს ფესტივალზე წარსადგენად.

ქართული დელეგაციის წარმომადგენლებმა რეჟისორსა და პროდიუსერ ფლავიო ერმარიოსთან (კომპანია Poetika) საქართველოში შესაძლო საახალწლო/საოჯახო ფილმის გადაღებასთან დაკავშირებით იმსჯელეს.

სცენარისტსა და რეჟისორ ვიქტორ რიბეიროსთან შეხვედრაზე საუბარი გაიმართა საქართველოში შესაძლო გადაღებების შესახებ.
საქართველოს კინემატოგრაფიის ეროვნული ცენტრის დელეგაცია ფესტივალის მიმდინარეობისას კინოსფეროს კიდევ არაერთ წარმომადგენელს შეხვდება.

როგორც ცნობილია, 14-25 მაისს ქ. კანი მასპინძლობს 77-ე საერთაშორისო კინოფესტივალს, რომელშიც საქართველოს ეროვნული კინოცენტრი პავილიონით მონაწილეობს. კულტურისა და სპორტის სამინისტროს, სსიპ-ის „აწარმოე საქართველოში“ და ღვინის ეროვნული სააგენტოს მხარდაჭერით წარდგენილი საქართველოს პავილიონი წარმოაჩენს ქართული კინოს უმდიდრეს მემკვიდრეობას, წარადგენს ახალ პროექტებს, პოპულარიზაციას გაუწევს საქართველოს, როგორც აღმოსავლეთ ევროპაში კინოგადაღებებისთვის უმნიშვნელოვანეს ქვეყანას.

ქართული კინოს სათანადოდ წარდგენისა და პოპულარიზაციის მიზნით კინოცენტრის დელეგაციაში არაერთი ქართველი რეჟისორი და პროდიუსერია, რომლებიც შეძლებენ სხვადასხვა საპროდიუსერო კომპანიის წარმომადგენლების გაცნობას და დასახავენ გეგმებს, როგორც ერთობლივი პროდუქციის შესაქმნელად, ასევე, ქვეყნის კინოწარმოების განსავითარებლად. ეს ხელს შეუწყობს ქართველი კინოხელოვანების საერთაშორისო კავშირების განმტკიცებასა და მათი მიმდინარე პროექტების წარმატებას.

კინორეჟისორებითა და პროდიუსერებით დაკომპლექტებულ დელეგაციას აქვს შესაძლებლობა, საკუთარი შემოქმედებით თუ სამომავლო პროექტებით დააინტერესოს ევროპული ბაზარი და ხელი შეუწყოს ქართული კინოს პოპულარიზაციას. ფესტივალის მსვლელობისას დაგეგმილია საქართველოს, როგორც კინოწარმოებისთვის მიმზიდველი ქვეყნის, რეკლამირება/პოპულარიზაცია. ამ მიზნით საქართველოს პავილიონში ეროვნული კინოცენტრის გუნდთან ერთად მუშაობენ პროგრამის - „გადაიღე საქართველოში“ - წარმომადგენლები.

აღსანიშნავია, რომ საქართველოს ეროვნულმა კინოცენტრმა მიმდინარე წლის მარტში კანის საერთაშორისო კინოფესტივალის კინობაზრობაზე სრულმეტრაჟიანი მხატვრული ფილმების ჩვენების დაფინანსების მიზნით კონკურსი გამოაცხადა, რომლის შედეგადაც კინოფესტივალის ბაზრობაზე რეჟისორ თინათინ ყაჯრიშვილისა და პროდიუსერ ლაშა ხალვაშის ფილმის, ,,მოქალაქე წმინდანის“, ჩვენება გაიმართება. ფილმი გადაღებულია საქართველოს ეროვნული კინოცენტრის მხარდაჭერით და არის არაერთი საერთაშორისო ჯილდოს მფლობელი.

ინფორმაციისთვის: 15-25 თებერვალს ბერლინის საერთაშორისო კინოფესტივალზე ეროვნული კინოცენტრის წარმომადგენლებმა, ქართველმა რეჟისორებმა და პროდიუსერებმა მნიშვნელოვანი და წარმატებული შეხვედრები გამართეს სხვადასხვა ქვეყნის კინოკომპანიებთან, პროდიუსერებთან, საერთაშორისო კინოფესტივალების პროგრამების შემდგენლებთან და არაერთი ერთობლივი პროექტი დაგეგმეს.

საქართველოსა და ყაზახეთის კინოცენტრებს შორის თანამშრომლობის მემორანდუმი გაფორმდა

საქართველოსა და ყაზახეთს შორის კინოინდუსტრიის სფეროში თანამშრომლობის განვითარების შესახებ მემორანდუმს ხელი საქართველოს კულტურისა და სპორტის მინისტრის მოადგილემ, ეროვნული კინოცენტრის დირექტორის მოვალეობის შემსრულებელმა კობა ხუბუნაიამ და ყაზახური არასაჯარო ს/ს „ეროვნული კინოს მხარდაჭერის ცენტრის“ გამგეობის თავმჯდომარე კურმანბეკ ჯუმაგალიმ კანის კინობაზრობის ქართულ პავილიონში მოაწერეს. აღნიშნული მემორანდუმის ხელმოწერისთვის მზადყოფნა ყაზახეთმა 2022 წელს გამოხატა.

მემორანდუმის გაფორმების შემდგომ, კინოინდუსტრიის მიმართულებით თანამშრომლობის წახალისების მიზნით, კინოცენტრს დაგეგმილი აქვს ორმხრივი თანამშრომლობის შეთანხმების გაფორმება, რომელიც საშუალებას მისცემს ქართველ პროდიუსერებს, მონაწილეობა მიიღონ ყაზახური კინოფონდების კოპროდუქციის კონკურსებში. ასევე, ყაზახ რეჟისორებსა თუ პროდიუსერებს შესაძლებლობა ექნებათ, იპოვონ ქართველი პარტნიორები და მონაწილეობა მიიღონ ეროვნული კინოცენტრის კონკურსებში. შეთანხმების თანახმად, შესაძლებელია გამოცხადდეს კონკურსები, რომელთა მიზანი მხოლოდ საქართველო-ყაზახეთის კოპროდუქციის წახალისება იქნება. ასევე, ეს შეთანხმება წაახალისებს საგანმანათლებლო პროგრამების შექმნას; გამოცდილების გაზიარების მიზნით შესაძლებელი იქნება სხვადასხვა ღონისძიების გამართვა; ხელი შეეწყობა ფილმების დისტრიბუციას.

საგულისხმოა, რომ ორი ქვეყნის წარმატებული თანამშრომლობის მაგალითია რეჟისორ გიორგი ოვაშვილის ფილმი „სიმინდის კუნძული“, რომელიც 2014 წელს ყაზახეთთან პარტნიორობით შეიქმნა და ყაზახებთან თანამშრომლობით გადაღებული რეჟისორ ლევან კოღუაშვილის ფილმი „მეოთხე ბრაიტონი“. განსაკუთრებით აღსანიშნავია ალმათის კინოფესტივალზე ქართული ფილმების წარმატება.

ეროვნული კინოცენტრი მიესალმება ნებისმიერ ინიციატივას, რომელიც ხელს შეუწყობს შუა აზიის ქვეყნებში ქართული ფილმების პოპულარიზაციას და ერთობლივი კინოფილმების შექმნას.

შეგახსენებთ: 14-25 მაისს ქ. კანი მასპინძლობს 77-ე საერთაშორისო კინოფესტივალს, რომელშიც საქართველოს ეროვნული კინოცენტრი პავილიონით მონაწილეობს. ეროვნული კინოცენტრის დელეგაციას კინოცენტრის დირექტორის მოვალეობის შემსრულებელი კობა ხუბუნაია ხელმძღვანელობს.

დელეგაციის წევრებს შორის არაერთი ქართველი რეჟისორი და პროდიუსერია, რომლებიც კინოსფეროს წარმომადგენლებთან ინტენსიურ შეხვედრებს მართავენ.