IQBAL LIBRARY,Thazhathangady

'ഇഖ്‌ബാൽ ലൈബ്രറി വസ്ത്ര നിധി പദ്ധതി (Dress Bank)' കോട്ടയം പട്ടണത്തിൽ ആദ്യത്തേത് ആണെന്നും, ഇത്തരം ഒരു സഹായ പദ്ധതിയുമായി മുന്നോട്ട് വന്ന ഇഖ്‌ബാൽ ലൈബ്രറി ഏറെ അഭിനന്ദനങ്ങൾ അർഹിക്കുന്നുവെന്നും, കൂടുതൽ ആളുകൾ ഇതിൽ പങ്കാളികളാവണമെന്നും *ബഹു. തിരുവഞ്ചൂർ രാധാകൃഷ്ണൻ MLA* യോഗം ഉത്ഘാടനം ചെയ്തു കൊണ്ട് അഭിപ്രായപ്പെട്ടു....

'ഉടുതുണി' ഇല്ലാത്ത കാലത്തിൽ നിന്നും സമൂഹം ഉടുതുണി അണിയാൻ പ്രാപ്തരായപ്പോൾ അതിൽ ഒരു വിഭാഗത്തിന് 'ഉടുതുണിക്ക് മറുതുണി' ഇല്ലാത്ത ഒരു കാലവും നമ്മിലൂടെ കടന്നുപോയി.....

ഇന്ന് സമൂഹത്തിൽ എല്ലാവരും വസ്ത്രം ധരിക്കാൻ കഴിയുന്ന കാലത്തിലാണ് നാമുള്ളത്,എന്നാൽ വിവാഹങ്ങൾ, ആഘോഷങ്ങൾ പോലുള്ള മനുഷ്യർ ഒത്തുചേരുന്ന ഇടങ്ങളെല്ലാം ഇന്ന് ഒരു വിഭാഗത്തിന് അണിയുന്ന വസ്ത്രങ്ങൾ ഉൾപ്പെടെ ആർഭാടവും,ധൂർത്തും ആകുമ്പോൾ മറ്റൊരു വിഭാഗത്തിന് ഇത്തരം വിവാഹങ്ങൾ, ആഘോഷങ്ങൾ, ഒത്തുച്ചേരലുകൾ ഭാരിച്ച സാമ്പത്തിക ബാധ്യതകൾ ഉണ്ടാക്കുന്നു.

ഇത്തരം അവസ്ഥകൾ നേരിടുന്നവർക്ക് ഒരു സ്വാന്തനം ആവുകയാണ് 'ഇഖ്‌ബാൽ ലൈബ്രറി വസ്ത്ര നിധി (Dress Bank) പദ്ധതി.

ഉപയോഗിക്കാത്ത പുതിയ വസ്ത്രങ്ങൾ ഒരിക്കൽ മാത്രം നിങ്ങൾ അണിഞ്ഞ വിവാഹവസ്ത്രങ്ങൾ, മറ്റ് വസ്ത്രങ്ങൾ (കുട്ടികൾ / മുതിർന്നവർ) ഇഖ്‌ബാൽ ലൈബ്രറിയിൽ എത്തിച്ചാൽ വസ്ത്രങ്ങൾ വാങ്ങാൻ ബുദ്ധിമുട്ടുള്ള നിർധനരായവർക്ക് കൊടുക്കുന്ന പദ്ധതിയാണ് 'വസ്ത്രനിധി (Dress Bank).

നിങ്ങൾ ഈ സഹായ പദ്ധതിയിൽ പങ്കാളിയാവാൻ ആഗ്രഹിക്കുന്നുവങ്കിൽ ഇഖ്‌ബാൽ ലൈബ്രറിയുമായി ബന്ധപ്പെടുക...
(എല്ലാ ദിവസവും വൈകുന്നേരം 5മണി മുതൽ 6മണി വരെ)

ചടങ്ങിൽ പങ്കെടുത്തവർ :

ഡോ. തോമസ് എബ്രഹാം (വികാരി, കോട്ടയം വലിയ പള്ളി)
ബഹു. ജയസൂര്യ തിരുമേനി (സൂര്യ കാലടി മന)
ബഹു. ഫാ. മോഹൻ ജോസഫ് (വികാരി, കോട്ടയം ചെറിയപള്ളി).
ബഹു. ഷഫീഖ് ഫാളിൽ മന്നാനി (ഇമാം, താഴത്തങ്ങാടി ജുമുഅ മസ്ജിദ്)
ഡോ. പി. ആർ. സോന (വാർഡ് പ്രതിനിധി, കോട്ടയം നഗരസഭ മുൻ അധ്യക്ഷ)
ശ്രീമതി. ജിഷ ജോഷി (വാർഡ് പ്രതിനിധി, കോട്ടയം നഗരസഭ)
അഡ്വ. ടോം കോര അഞ്ചേരിൽ (വാർഡ് പ്രതിനിധി, കോട്ടയം നഗരസഭ)
ശ്രീമതി. പൂജ ശിവൻ (ഇഖ്ബാൽ ലൈബ്രറി ഭാരവാഹി, ആശാ വർക്കർ)

തിരുവാർപ്പ് പഞ്ചായത്ത് വാർഡ് 7 പ്രതിനിധി ശ്രീമതി. ബുഷ്റ തൽഹത്തും,ജയസൂര്യ തിരുമേനിയുടെ (സൂര്യകാലടി മന) പത്നി ശ്രീമതി.ശ്രീകല ഭട്ടതിരിപ്പാടും വസ്ത്ര നിധിയിലേക്ക് നൽകിയ വസ്ത്രങ്ങൾ ഇഖ്ബാൽ ലൈബ്രറിക്ക് വേണ്ടി ബഹു,തിരുവഞ്ചൂർ രാധാകൃഷ്ണൻ MLA ഏറ്റുവാങ്ങുന്നു.

പ്രൊഫ. ഷാവാസ് ഷരീഫ് (പ്രസിഡന്റ്, ഇഖ്ബാൽ ലൈബ്രറി)
ശ്രീ. സച്ചിദാനന്ദ നായ്ക്.
ശ്രീ. ബാലചന്ദ്രൻ. എൻ (സെക്രട്ടറി.ശ്രീനാരായണ ധർമ്മ പരിപാലന യോഗം, താഴത്തങ്ങാടി). എൻ (സെക്രട്ടറി.ശ്രീനാരായണ ധർമ്മ പരിപാലന യോഗം, താഴത്തങ്ങാടി)
ശ്രീ. പി. കെ. മാത്യു കൊല്ലപറമ്പിൽ (വൈസ്. പ്രസിഡന്റ് ഇഖ്ബാൽ ലൈബ്രറി)
ശ്രീ. കെ.ജെ. ജേക്കബ് കൊച്ചേട്ട് (സാരഥി, abtec)
ശ്രീ.മുഹമ്മദ് സാലി കൊച്ചുവീട് (പ്രസിഡന്റ്,താഴത്തങ്ങാടി ജുമുഅ മസ്ജിദ് പരിപാലന സമിതി)
ശ്രീ. വിനോദ്. എൻ. കെ (അനശ്വര സാഹിത്യകാരൻ യശ:ശരീരനായ വെളൂർ കൃഷ്ണൻകുട്ടിയുടെ പുത്രൻ)
ശ്രീ. രത്നം (സാരഥി, ബാവൻസ് സ്റ്റുഡിയോ)

ശ്രീമതി സമീമ (വാർഡ് പ്രതിനിധി, തിരുവാർപ്പ് പഞ്ചായത്ത്)
ശ്രീ. ബുഷ്റ തൽഹത്ത് (വാർഡ് പ്രതിനിധി, തിരുവാർപ്പ് പഞ്ചായത്ത്)
ശ്രീമതി.ശ്രീകല ഭട്ടതിരിപ്പാട് (കുമാരനല്ലൂർ ഗവ. സ്കൂൾ അധ്യാപികയും,സൂര്യകാലടി ജയസൂര്യ തിരുമേനിയുടെ പത്നിയും)
ശ്രീമതി. സുഹ്റ ഷാജി (ADS, കുടുംബശ്രീ താഴത്തങ്ങാടി )
ശ്രീമതി. മായ ദേവി (ADS, കുടുംബശ്രീ താഴത്തങ്ങാടി )
ശ്രീമതി. ഷെമി നസീർ (CDS, കുടുംബശ്രീ താഴത്തങ്ങാടി )

ശ്രീ. ഇസ്മയിൽ (പ്രധാന അദ്ധ്യാപകൻ, GMUP സ്കൂൾ, താഴത്തങ്ങാടി)
ശ്രീ. എ. ടി. തോമസ് (ഭാരവാഹി, ആശ്രയ റെസിഡൻസ് അസോസിയേഷൻ, താഴത്തെങ്ങാടി)
ശ്രീ. അബ്ദുൽ സലാം.
ശ്രീ. കെ. ആർ. സതീശൻ (പ്രസിഡന്റ്, തളിയിൽ മഹാദേവക്ഷേത്രം)

അനശ്വര സാഹിത്യകാരൻ യശ:ശരീരനായ വെളൂർ കൃഷ്‌ണൻകുട്ടിയുടെ കുടുംബത്തിൽ നിന്നും ഒരു കൊച്ചു കലാകാരി 'കുമാരി. ലക്ഷ്യ കിരൺ.

ഫ്ലവഴ്‌സ് ചാനൽ ടോപ് സിംഗർ സീസൺ 3 സെമിഫൈനൽ വരെയെത്തി മികച്ച പ്രകടനം കാഴ്ച വെച്ച കൊച്ചുഗായിക ലക്ഷ്യ കിരണ് 'ഇഖ്‌ബാൽ ലൈബ്രറി'യുടെ ആദരം ശ്രീ. തിരുവഞ്ചൂർ രാധാകൃഷ്ണൻ MLA കൈമാറുന്നു

ജാർഖണ്ഡിൽ നടന്ന അഖിലേന്ത്യാ അന്തർ സംസ്ഥാന സീനിയർ ത്രോബോൾ മത്സരത്തിൽ പങ്കെടുത്ത കേരള ടീം താരങ്ങളായ 'ഫർദീൻ അഹമ്മദ്‌'(ഇഖ്‌ബാൽ ലൈബ്രറി ഭാരവാഹി മുഹമ്മദ്‌ സാലി ചക്രപ്പുരയുടെ പുത്രൻ), ആസിഫ് നവാസ് കുമ്മനം എന്നിവർക്കുള്ള 'ഇഖ്‌ബാൽ ലൈബ്രറി'യുടെ ആദരം ശ്രീ. തിരുവഞ്ചൂർ രാധാകൃഷ്ണൻ MLA കൈമാറുന്നു

കോട്ടയം ജില്ലയിലെ മികച്ച ക്ഷീരകർഷകനുള്ള 2023 ലെ അവാർഡ് നേടിയ 'ശ്രീ. സഞ്ജുമോൻ പി. എസ്' ന് 'ഇഖ്‌ബാൽ ലൈബ്രറി'യുടെ ആദരം ശ്രീ. തിരുവഞ്ചൂർ രാധാകൃഷ്ണൻ MLA കൈമാറുന്നു.

കുമാരനല്ലൂർ ഗവ. സ്കൂൾ അധ്യാപികയും,സൂര്യകാലടി ജയസൂര്യ തിരുമേനിയുടെ പത്നിയുമായ 'ശ്രീമതി.ശ്രീകല ഭട്ടതിരിപ്പാട്' രചിച്ച 'പെൺമരം' കവിതാ സമാഹാരം ഇഖ്‌ബാൽ ലൈബ്രറിക്ക് കൈമാറുന്നു.

ശ്രീ. കുഞ്ഞുമോൻ മേത്തർ (മുൻ കൗൺസിലർ കോട്ടയം നഗരസഭ), ശ്രീമതി. എലിസബേത്ത് ജോമോൻ (മുൻ കൗൺസിലർ കോട്ടയം നഗരസഭ), (ശ്രീ. തൽഹത്ത് അയ്യൻകോയിക്കൽ (മുൻ വാർഡ് മെമ്പർ തിരുവാർപ്പ് പഞ്ചായത്ത്‌), ശ്രീ. നവാസ് മുഹമ്മദ്‌, ശ്രീ. ഹരീഷ് ഗോപി, ശ്രീ. മുഹമ്മദ്‌ സാലി ചക്രപ്പുര (ഇഖ്‌ബാൽ ലൈബ്രറി ഭാരവാഹികൾ) എന്നിവർ ചടങ്ങിൽ സംബന്ധിച്ചു.

മഹനീയ സാന്നിധ്യം അറിയിച്ച MDLP സ്കൂൾ പ്രധാന അധ്യാപിക ശ്രീമതി. ഷീല ഉമ്മൻ, ശ്രീമതി.ജാസ്മിൻ സിയാദ്,ശ്രീമതി. സിൽവി. പി. വർഗീസ്, താഴത്തങ്ങാടി ഈസ്റ്റ്‌ റെസിഡൻസ് അസോസിയേഷൻ പ്രസിഡന്റ്‌ ശ്രീ. രാജേഷ്.

സ്നേഹം മണ്ണിൽ പ്രവാചകനായി പിറന്നതിന്‍റെ ഓർമ്മക്കായ്‌......

ഈ ക്രിസ്തുമസ് പുലരിയിൽ പെയ്യുന്ന മഞ്ഞ്, ജനമനസുകളിൽ സ്നേഹത്തിന്റെ കുളിര് വർഷിക്കട്ടെ....

വിണ്ണിൽ നിന്നും മണ്ണിലേക്കിറങ്ങുന്ന താരകങ്ങൾ, ജനമനസുകളിൽ സ്നേഹമായി മിന്നട്ടെ.....

ആഘോഷങ്ങളിലൂടെ ജനമനസുകൾ ഒന്നാവട്ടെ.....
മാനവികസ്നേഹം ഉയരട്ടെ........

നാടെങ്ങും ആഘോഷതിരികൾ തെളിയുന്ന ഈ വേളയിൽ, താഴത്തങ്ങാടി ഇഖ്‌ബാൽ ലൈബ്രറിയുടെ ഹൃദയം നിറഞ്ഞ കൃസ്‌തുമസ് ആശംസകൾ..............

(മുഗൾ കൊട്ടാരങ്ങളിൽ ഉണ്ടായിരുന്ന ഉണ്ണി യേശുവിന്റെയും,മാതാവിന്റെയും ചിത്രങ്ങൾ)

താഴത്തങ്ങാടിയിലെ സാമൂഹിക -സാംസ്കാരിക രംഗത്ത് നിറഞ്ഞുനിന്ന വ്യക്തിത്വം,ഇഖ്‌ബാൽ ലൈബ്രറി മുൻ പ്രസിഡന്റ്‌ അഡ്വ. ജോസ് ഫിലിപ്പ് ചെങ്ങളവന്റെ വിയോഗത്തിൽ ഇഖ്‌ബാൽ ലൈബ്രറി അനുശോചനം രേഖപ്പെടുത്തി.

ഇഖ്ബാൽ ലൈബ്രറി പ്രസിഡന്റ് പ്രൊഫ. ഷാവാസ് ഷരീഫിന്റെ അധ്യക്ഷതയിൽ ചേർന്ന അനുശോചനയോഗത്തിൽ സെക്രട്ടറി ഉനൈസ് പാലപ്പറമ്പിൽ,ലൈബ്രറി ഭാരവാഹികളായ പി. കെ. മാത്യു കൊല്ലപ്പറമ്പിൽ,നവാസ് താഴത്തങ്ങാടി,ഹഫീസ് മുഹമ്മദ്‌ എന്നിവർ പങ്കെടുത്തു....

അഡ്വ. ജോസ് ഫിലിപ്പിന്റെ പൊതുപ്രവർത്തനത്തിലുള്ള ആത്മാർത്ഥ, പ്രവർത്തിച്ച പ്രസ്ഥാനങ്ങളിൽ കാണിച്ച സംഘാടക മികവ്, അഭിഭാഷകവൃത്തിയിൽ കാണിച്ച മാന്യത,ഏതൊരു താഴത്തങ്ങാടിക്കാരനോടും പുലർത്തിയ സുഹൃദ്ബന്ധം,അദ്ദേഹവും,ചെങ്ങളവൻ കുടുംബവും,അദ്ദേഹത്തിന്റെ അധ്യാപകരായ മാതാപിതാക്കളും ഈ നാടിന് എത്രത്തോളം പ്രിയമുള്ളവരായിരുന്നു എന്ന് അനുസ്മരിച്ചു കൊണ്ട് ലൈബ്രറി മുൻ സെക്രട്ടറി പി. പി. മുഹമ്മദ്‌ കുട്ടി,മാധ്യമ പ്രവർത്തകൻ ശ്രീ. രാധാകൃഷ്ണൻ. ആർ,താഴത്തങ്ങാടി ജുമുഅ മസ്ജിദ് പരിപാലന സമിതി പ്രസിഡന്റ്‌ മുഹമ്മദ്‌ സാലി കൊച്ചുവീട്,ശ്രീ. സച്ചിദാനന്ദ നായിക്,കോട്ടയം നാട്ടുകൂട്ടം സെക്രട്ടറി ശ്രീ. രാജീവ്‌ പള്ളിക്കോണം, എന്റെ താഴത്തങ്ങാടി അഡ്മിൻ ശ്രീ. ദിലീപ്. ടി. കൊച്ചുണ്ണി,താഴത്തങ്ങാടി പൗരസമിതി ചെയർമാൻ ശ്രീ.അസീസ് വാദ്യാർപറമ്പിൽ, ശ്രീ. ഗഫൂർ അങ്കാളംപറമ്പിൽ, ശ്രീ. ബാബു അങ്കാളംപറമ്പിൽ, ശ്രീ. ഷുക്കൂർ പാഴൂർ എന്നിവർ സംസാരിച്ചു.....

അഡ്വ. ജോസ് ഫിലിപ്പിന് ഈ നാട് നൽകിയ ആദരവിനും, അദ്ദേഹത്തിന്റെ വിയോഗത്തിൽ അനുശോചനം രേഖപ്പെടുത്തിയ ഇഖ്‌ബാൽ ലൈബ്രറിക്കും,പങ്കെടുത്തവർക്കും സഹോദരനും, ഡൽഹി ജാമിഅഃ മില്ലിയ യൂണിവേഴ്സിറ്റി പ്രൊഫസറുമായ ഡോ. മാത്യു ജോസഫ് ചെങ്ങളവൻ നന്ദി അറിയിച്ചു......

അഡ്വ. ജോസ് ഫിലിപ്പിന്റെ പുത്രൻ നിതിൻ ജോസ് ഫിലിപ്പും,മറ്റ് ബന്ധുമിത്രാധികളും യോഗത്തിൽ സന്നിഹതരായിരുന്നു.....

ഇഖ്‌ബാൽ ലൈബ്രറി
താഴത്തങ്ങാടി.

ആദരാഞ്ജലികൾ.....

താഴത്തങ്ങാടിയിലെ സാമൂഹിക -സാംസ്‌കാരിക മേഖലകളിൽ നിറസാന്നിധ്യമായിരുന്ന വ്യക്തിത്വം....

ഇഖ്‌ബാൽ ലൈബ്രറിയുടെ മുൻപ്രസിഡന്റ്‌ കൂടിയായിരുന്ന അഡ്വ. ജോസ് ഫിലിപ്പിന്റെ നിര്യാണത്തിൽ ഇഖ്‌ബാൽ ലൈബ്രറിയുടെ അനുശോചനം രേഖപ്പെടുത്തുന്നു.......

താഴത്തങ്ങാടി ഇഖ്ബാൽ പബ്ലിക് ലൈബ്രറി കേരള ചിത്രകലാ പരിഷത് കോട്ടയം ജില്ലയുടെ സഹകരണത്തോടെ നടത്തിയ വരയോരം - വരകളിൽ താഴത്തങ്ങാടി ചിത്രകലാ ക്യാമ്പ് ശ്രീ. തിരുവഞ്ചൂർ രാധാകൃഷ്ണൻ എം.എൽ. എ. ഉദ്ഘാടനം ചെയ്തു.

ഏകദേശം മുപ്പതോളം ചിത്രകാരന്മാർ താഴത്തങ്ങാടിയുടെ മനോഹര ദൃശ്യങ്ങൾ നിറങ്ങൾ ചാലിച്ച്‌ ക്യാൻവാസിലേക്ക് പകർത്തി....

കോട്ടയം ചെറിയപള്ളി വികാരി ഫാ.മോഹൻ ജോസഫ്,താഴത്തങ്ങാടി ജുമുഅ മസ്ജിദ് പ്രസിഡന്റ്‌ മുഹമ്മദ്‌ സാലി കൊച്ചുവീട്,കോട്ടയം വലിയപ്പള്ളി വികാരി ഡോ. തോമസ് എബ്രഹാം, ചലച്ചിത്ര സംവിധായകൻ എം. എ. നിഷാദ്, സി. എൻ. സത്യനേശൻ, താഴത്തങ്ങാടി മാർബസേലിയോസ്‌ പള്ളി വികാരി ഫാ.ഗീവർഗീസ് വെട്ടിക്കുന്നേൽ,ശ്രീ. സച്ചിദാനന്ദ നായിക്, കുഞ്ഞുമോൻ. കെ. മേത്തർ എന്നിവർ സംബന്ധിച്ചു...

ലൈബ്രറി പ്രസിഡന്റ്‌ പ്രൊഫ. ഷാവാസ് ഷരീഫ്,വൈസ്.പ്രസിഡന്റ്‌ പി. കെ. മാത്യു കൊല്ലപറമ്പിൽ,സെക്രട്ടറി ഉനൈസ് പാലപ്പറമ്പിൽ,ട്രഷറർ നവാസ് താഴത്തങ്ങാടി,കേരള ചിത്രകലാ പരിഷത് കോട്ടയം ജില്ലാ പ്രസിഡന്റ്‌ ഫാ. റോയി തോമസ് തോട്ടം,സെക്രട്ടറി,ശ്രീമതി.പുഷ്പപിള്ള,ജോ. സെക്രട്ടറി ശ്രീ. രാജീവ് എന്നിവർ ക്യാമ്പിന് നേതൃത്വം നൽകി....

ക്യാമ്പിൽ സന്നിഹതരായിരുന്ന കൊട്ടാരത്തിൽ ശങ്കുണ്ണി സ്മാരക സ്കൂൾ ഓഫ് ആർട്സിലെ അദ്ധ്യാപകനും,ക്യാമ്പ് നടത്തുന്നതിന് എല്ലാ സഹകരണവും നൽകിയ ശ്രീ. കെ. എസ്. മധു, ശ്രീ. ശങ്കർ എന്നിവരോട് പ്രത്യേകം നന്ദി അറിയിക്കുന്നു...

ക്യാമ്പിന് 'വരയോരം' എന്ന പേര് നിർദ്ദേശിച്ചത് ലൈബ്രറി ഭാരവാഹിയും, ചിത്രകാരനുമായ ശ്രീ. എം. എം. സാബുവാണ്,ക്യാമ്പിന് പോസ്റ്റർ ഡിസൈൻ ചെയ്തു തന്നത് ലൈബ്രറി ഭാരവാഹി ശ്രീ. ഹരീഷ് ഗോപി സാരഥിയായ "Penta offset Printing press'....

ശിശുദിനം

ശിശുദിനത്തോട് അനുബന്ധിച്ച് 'ഇഖ്‌ബാൽ ലൈബ്രറി' ബാലപ്രതിഭകളെ ആദരിച്ചു

ഇഖ്‌ബാൽ ലൈബ്രറിയിൽ നടന്ന ചടങ്ങിൽ വിവിധ മേഖലകളിൽ പ്രതിഭ തെളിയിച്ച അമൽദേവ്. ജെ. ഷേണായ്, ഷൈന ഷരീഫ്, അമീന മെഹതാബ് എന്നിവരെ ആദരിച്ചു.....

താഴത്തങ്ങാടിയിൽ പുതുതായി രൂപീകരിച്ച 'താഴത്തങ്ങാടി ഫുട്ബോൾ ക്ലബ്‌ (TFC)' താരങ്ങൾക്ക് ജേഴ്സി കൈമാറുന്ന ചടങ്ങും നടന്നു.....

ലൈബ്രറി സെക്രട്ടറി ശ്രീ. ഉനൈസ് പാലപ്പറമ്പിൽ ശ്രീ.അബ്ദുൽ ഖാദർ വാരിശ്ശേരിൽ(Retd.Executive engineer Water Authority), ശ്രീ.ഹസൻകുട്ടി പെരാട്ടുതറ, ഇഖ്‌ബാൽ ലൈബ്രറി ഭാരവാഹി ശ്രീമതി. പൂജാ ശിവകുമാർ, ഇഖ്‌ബാൽ ലൈബ്രറി മുൻ സെക്രട്ടറി ശ്രീ. ഷരീഫ് പി. പി, ലൈബ്രേറിയൻ സെറീന നിസാം എന്നിവർ പങ്കെടുത്തു.

കഥാകൃത്ത് ശ്രീ. എസ്. ഹരീഷ് ഇഖ്‌ബാൽ ലൈബ്രറി സന്ദർശിച്ചു.

നിരവധി കൃതികളിലൂടെ മലയാള സാഹിത്യ രംഗത്ത് ശ്രദ്ധേയമായ സ്ഥാനമുള്ള ഹരീഷിന്റെ ഏറ്റവും പ്രശസ്തമായ നോവലാണ് "മീശ".

കേരള സാഹിത്യ അക്കാദമിയുടെ മികച്ച കഥാസമാഹാരത്തിനുള്ള 2018 ലെ പുരസ്‌കാരം.കേരള സാഹിത്യ അക്കാദമിയുടെ മികച്ച നോവലിനുള്ള 2019 ലെ പുരസ്‌കാരം - മീശ എന്ന കൃതിക്ക്.2022 ലെ വയലാർ അവാർഡ് മീശ എന്ന നോവലിന്.ഹരീഷിന്റെ മാവോയിസ്റ്റ് എന്ന ചെറുകഥയെ ആസ്പദമാക്കിയാണ് ലിജോ ജോസ് പെല്ലിശ്ശേരി ജല്ലിക്കട്ട് എന്ന ചലച്ചിത്രം സംവിധാനം ചെയ്തിട്ടുള്ളത്.

ഇഖ്‌ബാൽ ലൈബ്രറി പ്രസിഡന്റ്‌ പ്രൊഫ. ഷാവാസ് ഷരീഫ്, സെക്രട്ടറി ഉനൈസ് പാലപ്പറമ്പിൽ, ഭാരവാഹികളായ ശ്രീ. ഹരീഷ് ഗോപി, ശ്രീ. മുഹമ്മദ്‌ സാലി ചക്രപ്പുര, ശ്രീ. ഹഫീസ് മുഹമ്മദ്‌ കരോട്ട്, ലൈബ്രറിയൻ സെറീന നിസാം എന്നിവർ ചേർന്ന് ശ്രീ. എസ്. ഹരീഷിനെ സ്വീകരിച്ചു.

ശ്രീ. സച്ചിദാനന്ദ നായിക്, ശ്രീ. ദിലീപ്. ടി. കൊച്ചുണ്ണി എന്നിവർ സംബന്ധിച്ചു.

ശ്രീ. ഹരീഷിന്റെ ലൈബ്രറി സന്ദർശനത്തിന് അവസരം ഒരുക്കിത്തന്ന ശ്രീ. റസാഖ് താഴത്തങ്ങാടിക്ക്(പ്രെസ്സ് ഫോട്ടോഗ്രാഫർ) നന്ദി അറിയിക്കുന്നു.....

ഇഖ്‌ബാൽ ലൈബ്രറി
താഴത്തങ്ങാടി.

IQBAL LIBRARY BOOK BANK

നിങ്ങളുടെ കുട്ടികളുടെ കഴിഞ്ഞ അധ്യയന വർഷത്തെ പാഠപുസ്തകങ്ങൾ കൂടാതെ ഗൈഡുകൾ, എൻട്രൻസ് പരീക്ഷ സഹായികൾ (NEET) എന്നിവ കൈവശമുണ്ടെങ്കിൽ 'ഇഖ്‌ബാൽ ലൈബ്രറി' യുടെ 'BOOK BANK' ൽ ഏൽപ്പിക്കുക.

പാഠപുസ്തകങ്ങൾ,ഗൈഡുകൾ, പരീക്ഷ സഹായികൾ വാങ്ങുവാൻ സാമ്പത്തിക ബുദ്ധിമുട്ട് അനുഭവപ്പെടുന്ന കുട്ടികൾക്കും,ആവശ്യമുള്ള അല്ലാത്തവർക്കും നൽകി സഹായിക്കാൻ കഴിയുന്ന പദ്ധതിയാണ് IQBAL LIBRARY BOOK BANK

നിങ്ങൾ ചെയ്യേണ്ടത് ഇത്രമാത്രം :

നിങ്ങളുടെ കൈവശമുള്ള പാഠപുസ്തകങ്ങൾ ഗൈഡുകൾ, പരീക്ഷ സഹായികൾ അത് ഏതു ക്ലാസ്സ്‌, ഏതു സിലബസ്, ഏത് സ്കൂൾ എന്നീ വിവരങ്ങൾ ഉൾപ്പെടെ ഇഖ്‌ബാൽ ലൈബ്രറിയിൽ ഏൽപ്പിക്കുക.

ഈ ബുക്കുകൾ ലൈബ്രറിയൽ എത്തുന്ന മുറക്ക് ആവശ്യക്കാർക്ക് അവ ലഭ്യമാക്കുന്നതുമാണ്.

ലൈബ്രറി സമയം :
എല്ലാ ദിവസവും വൈകുന്നേരം 5 മണി മുതൽ 7 മണി വരെ.

(പാഠപുസ്തകങ്ങൾ വൃത്തിയായി സൂക്ഷിക്കാൻ കുട്ടികളെ മാതാപിതാക്കൾ, അധ്യാപകർ പരിശീലിപ്പിക്കുക, ധാരാളം കുട്ടികൾക്ക് നിങ്ങളുടെ പുസ്തകങ്ങൾ ഉപകാരപ്പെടും)

കൂടുതൽ വിവരങ്ങൾക്ക് ബന്ധപ്പെടാൻ :
8129148097
(Whatsapp)

അധ്യാപക ദിനാശംസകൾ.....

സമൂഹത്തിന്റെ വളർച്ചക്ക് അധ്യാപകർ ചെയ്യുന്ന മഹത്തായ കർമ്മം, എന്നും ആദരിക്കപ്പെടും......

ഇന്നത്തെ അധ്യാപകദിനത്തിൽ ആയിരക്കണക്കിന് ആളുകൾക്ക് അറിവ് പകർന്നുനൽകിയ, ദീർഘകാലം 'താഴത്തങ്ങാടി എം.ഡി.എൽ. പി.സ്കൂളിൽ' അധ്യാപകനായി സേവനം ചെയ്ത പ്രിയ അധ്യാപകൻ താഴത്തങ്ങാടി നട്ടാശ്ശേരിയിടത്ത് [വേലംപറമ്പിൽ ] 'ബഹു.എൻ. യു. കുര്യൻ' എന്ന പ്രിയപ്പെട്ട 'രാജു സാറിനെ' ഇഖ്‌ബാൽ ലൈബ്രറി ആദരിച്ചു.

നിരവധി കഥാസമാഹാരങ്ങൾ ഉൾപ്പെടെ രചനകൾ നിർവഹിച്ചിട്ടുള്ള,ഒരു എഴുത്തുകാരനും കൂടിയായ അദ്ദേഹം 1995 ൽ ഔദ്യോഗിക അധ്യാപന ജീവിതത്തിൽ നിന്നും വിരമിച്ച ശേഷം ഈ അടുത്ത കാലത്തുണ്ടായ ചില ശാരീരിക അസ്വാസ്ഥ്യങ്ങളെ തുടർന്ന് വിശ്രമജീവിതം നയിക്കുകയാണ്.

ഇഖ്‌ബാൽ ലൈബ്രറി ഭാരവാഹികളും, അദ്ദേഹത്തിന്റെ ശിഷ്യൻമാരുമായിരുന്ന ശ്രീ. ഉനൈസ് പാലപ്പറമ്പിൽ, ശ്രീ.മുഹമ്മദ്‌ സാലി ചക്രപ്പുര എന്നിവരും, മറ്റ് ലൈബ്രറി ഭാരവാഹികളായ ശ്രീ.പി.കെ.മാത്യു കൊല്ലപ്പറമ്പിൽ,ശ്രീ.ഹഫീസ് മുഹമ്മദ്‌ കരോട്ട് എന്നിവർ ചേർന്ന് അദ്ദേഹത്തെ ആദരിച്ചു.

അദ്ദേഹത്തിന്റെ പുത്രിയും,വേളൂർ സെന്റ്. ജോൺസ്.യു.പി. സ്കൂൾ അധ്യാപികയുമായ ശ്രീമതി.ഷീമോൾ ചടങ്ങിൽ സന്നിഹതയായിരുന്നു.

പ്രിയ ഗുരുനാഥന് ആയുരാരോഗ്യ സൗഖ്യം നേരുന്നു........

ഇഖ്‌ബാൽ ലൈബ്രറി
താഴത്തങ്ങാടി.

MEENACHIL RIVER FEST 2023

പത്തു വയസുകാരി മുതൽ എഴുപത് വയസുകാരൻ വരെ, ഒൻപതു മണിക്കൂർ നീണ്ട പരിശ്രമം......

അവിടെ പഴയ തലമുറയും, പുതിയ തലമുറയും തമ്മിലുള്ള അന്തരം മീനച്ചിലാറ്റിൽ അലിഞ്ഞില്ലാതായി....

നാടും, പുഴയും അനുഭവിച്ചറിഞ്ഞ പഴയ തലമുറയിൽ നിന്നും ഇതൊന്നും അറിയാനും, അനുഭവിക്കാനും പുതിയ തലമുറക്ക് കഴിയില്ല എന്നുള്ളതിനുള്ള ഉത്തരമായിരുന്നു പതിനഞ്ചോളം വരുന്ന JR Swimming Academy യുടെ കുട്ടികൾ മീനച്ചിലാറിലെ ശുചീകരണ പ്രവർത്തനങ്ങളിലൂടെ നൽകിയത്......

മീനച്ചിലാറ്റിൽ താഴത്തങ്ങാടി -കുമ്മനം പാലത്തിനടിയിൽ അടിഞ്ഞു കൂടിയിരുന്ന മാലിന്യം "താഴത്തങ്ങാടി ഇഖ്‌ബാൽ ലൈബ്രറിയുടെ നേതൃത്വത്തിൽ "കുമ്മനം JR Swimming Academy"യുടെ സഹകരണത്തോടെ നീക്കം ചെയ്തു,മീനച്ചിലാറിന്റെ നീരോഴുക്ക് സുഗമമാക്കി.

JR Swimming Academy യുടെ പരിശീലകൻ അബ്ദുൽ കലാം ആസാദ്, 'ഇഖ്‌ബാൽ ലൈബ്രറി വൈസ് പ്രസിഡന്റ്‌ പി. കെ. മാത്യു കൊല്ലപറമ്പിൽ,സെക്രട്ടറി ഉനൈസ് പാലപ്പറമ്പിൽ,ഹാഷിം പുളിംങ്കുന്നേൽ,വള്ളവുമായി എത്തിയ കബീർ ആലുംമൂട് എന്നിവർ ശുചീകരണ പ്രവർത്തനങ്ങൾക്ക് നേതൃത്വം നൽകി.

രാവിലെ 7.30 ന് ആരംഭിച്ച ശുചീകരണ പ്രവർത്തനങ്ങൾക്ക് ജീവൻ രക്ഷാ സ്വിമ്മിംഗ് അക്കാഡമിയുടെ ജൂനിയർ പരിശീലകരായ അഫ്താബ് അഹ്‌മദ്‌ , അമീന മെഹതാബ് & ടീം ലീഡേഴ്‌സ് ജെറോം ആംബ്രോസ്,PA ഡേവിസ്, കാർത്തിക്, ശരത്, രാഹുൽ മോഹൻ, രോഹിത് പദ്മകുമാർ ,ഋഷി മോഹൻ ,അനസ്, ജെസ്വിൻ,ആൻ മരിയ,അസിൻ,ആൻലിൻ... തുടങ്ങിയവർ സേഫ്റ്റി ചെക്ക് കോർഡിനേറ്റ് ചെയ്തു സുരക്ഷ ഉറപ്പാക്കി...

അൻവർ പാഴൂർ, നൗഷാദ് കുമ്മനം,എം. എം. അക്ബർ (താഴത്തങ്ങാടി ജനകീയ സമിതി), അൻസാരി, റാഷിദ്‌, ജുനൈദ് കുമ്മനം, വാഹനം ഒരുക്കി തന്ന ഷിഹാബ് കുമ്മനം എന്നിവർ ശുചീകരണ പ്രവർത്തനങ്ങളിൽ സജീവ പങ്കാളികളായി...

ശുചീകരണ പ്രവർത്തങ്ങളിലേർപ്പെട്ടവർക്ക് പ്രഭാത ഭക്ഷണത്തിനു സഹായവുമായി എത്തിയ 'ശ്രീ. നാസർ ചാത്തംകോട്ട്മാലി', ഉച്ചഭക്ഷണത്തിന് ചിക്കൻ ബിരിയാണി ഒരുക്കി തന്ന് സഹായിച്ച 'Perattuthara Rcade താഴത്തങ്ങാടി' ന്റെ സാരഥി 'ശ്രീ. നിഷാദ് പേരാട്ടുതറ' എന്നിവരുടെ സഹായ സഹകരണത്തിന് പ്രത്യേകം നന്ദി അറിയിക്കുന്നു......

കോട്ടയം ജില്ലയുടെ പടിഞ്ഞാറു ഭാഗത്തു സ്ഥിതി ചെയ്യുന്ന താഴത്തങ്ങാടി -കുമ്മനം പ്രദേശങ്ങൾ ഒന്നര കിലോമീറ്റർ മീനച്ചിലാറിന്റെ തീരദേശമാണ്. കിഴക്ക് മലനിരകളിൽ നിന്ന് ആരംഭിച്ച് കേരളത്തിലെ ഏറ്റവും വലിയ കായലായ വേമ്പനാട്ടു കായലിലേക്ക് ഒഴുകിയെത്തുന്ന മീനച്ചിലാർ ഇരുകരകളായ താഴത്തങ്ങാടിയുടെയും -കുമ്മനത്തിന്റെയും പ്രാചീന സംസ്കൃതിയെ രൂപപ്പെടുത്തുന്നതിൽ നിർണായക പങ്കു വഹിച്ച ഘടകമാണ്.

ആ മീനച്ചിലാർ ഇരുകരകളെയും മനോഹരമാക്കുന്നു എന്നുള്ളതും,അതിനാൽ തന്നെ മീനച്ചിലാറിനെ സംരക്ഷിക്കാനുള്ള ബാധ്യതയുടെ ഭാഗമായി താഴത്തങ്ങാടിയുടെയും, കുമ്മനത്തേയും ഇരുകരക്കാർ ഒരുമിച്ച ഈ മഹത്തായ ദൗത്യം എന്തുകൊണ്ടും നമ്മുടെ അഭിമാനമുയർത്തുന്നു ......

ഇഖ്‌ബാൽ ലൈബ്രറി
താഴത്തങ്ങാടി

താഴത്തങ്ങാടി ഇഖ്ബാൽ ലൈബ്രറിയുടെ നേതൃത്വത്തിൽ തളിയിൽ മഹാദേവ ക്ഷേത്രം, കോട്ടയം വലിയപള്ളി,കോട്ടയം ചെറിയ പള്ളി,താഴത്തങ്ങാടി ജുമുഅ മസ്ജിദ്,തിരുമല ശ്രീ വെങ്കിടെശ്വര ക്ഷേത്രം, ഇടക്കാട്ട്പള്ളി. കോട്ടയം നാട്ടുകൂട്ടം, എന്റെ താഴത്തങ്ങാടി കൂട്ടായ്മ എന്നിവരുടെ സഹകരണത്തോടെ "പഴയ കോട്ടയം പൈതൃക കേന്ദ്രങ്ങളിലൂടെയുള്ള "മാനസ തീർത്ഥാടനം" എന്ന പൈതൃക യാത്ര സംഘടിപ്പിച്ചു.....
*03 ജൂൺ 2023 രാവിലെ തളിയിൽ മഹാദേവക്ഷേത്ര അങ്കണത്തിൽ വെച്ച്‌ "ഒഡിഷയിലെ ബാലോസറിൽ ട്രെയിൻ ദുരന്തത്തിൽ ജീവൻ പൊലിഞ്ഞവർക്ക് ആദരാഞ്ജലിയായി മൗന പ്രാർത്ഥനയോടെ ചടങ്ങുകൾ ആരംഭിച്ചു....

അഞ്ചു ആരാധനാലയങ്ങൾക്ക് പ്രതീകമായി,നിലവിളക്കിൽ അഞ്ചു തിരികളിലായി മതസൗഹാർദ്ധ ദീപം തെളിയിച്ചു....

ബഹു. ശ്രീ. തിരുവഞ്ചൂർ രാധാകൃഷ്ണൻ MLA ഉത്ഘാടന കർമ്മം നിർവഹിച്ചു....

തളിയിൽ മഹാദേവ ക്ഷേത്രത്തിൽ സന്ദർശനം നടത്തികൊണ്ട് "മാനസ തീർത്ഥാടനം" യാത്രക്ക് തുടക്കം കുറിച്ചു....

തുടർന്ന് തിരുമല ശ്രീ വെങ്കിടെശ്വര ക്ഷേത്രം,താഴത്തങ്ങാടി ജുമുഅ മസ്ജിദ്,ഇടക്കാട്ട്പള്ളി,കോട്ടയം വലിയപള്ളി എന്നിവ സന്ദർശിച്ച ശേഷം കോട്ടയം ചെറിയ പള്ളിയിൽ യാത്ര പൂർത്തിയാക്കി....

ഏറ്റവും സൗഹാർദപരവും, ഹൃദ്യവും, ഊഷ്മളവുമായ സ്വീകരണം നൽകിയ ഓരോ ദേവാലയങ്ങളും ഈ യാത്രയിൽ പങ്കെടുത്തവരുടെ മനസ്സ് നിറച്ച "മാനസ തീർത്ഥാടന" മായി.......

പ്രഭാത ലഖുഭക്ഷണം ഒരുക്കി തളിയിൽ മഹാദേവ ക്ഷേത്ര ഭാരവഹികളും,ഗൗഢസാരസ്യത സമൂഹത്തിന്റെ പരമ്പരാഗതഭക്ഷണം ഒരുക്കി തിരുമല ശ്രീ വെങ്കിടെശ്വര ക്ഷേത്രഭാരവാഹികൾ,പഴങ്ങളും,പഴച്ചാറുകളും ഒരുക്കി താഴത്തങ്ങാടി ജുമുഅ മസ്ജിദ് ഭാരവഹികളും,കോട്ടയം വലിയപള്ളിയും,കോട്ടയം ചെറിയ പള്ളിയും സംയുക്തമായി ഒരുക്കിയ വിഭവസമൃദ്ധമായ ഉച്ചഭക്ഷണവും യാത്രയിൽ പങ്കെടുത്തവരുടെ "മനസ്സ്" നിറച്ചത് പോലെ "വയറും" നിറച്ചു.....

ഇഖ്‌ബാൽ ലൈബ്രറി പ്രസിഡന്റ്‌ ബഹു :പ്രൊഫ. ഷാവാസ് ഷരീഫ് അധ്യക്ഷത വഹിച്ച യോഗത്തിൽ ശ്രീ.തിരുവഞ്ചൂർ രാധാകൃഷ്ണൻ MLA മുഖ്യപ്രഭാഷണം നടത്തി...

യാത്രയെ നയിച്ച ആത്മീയ ചൈതന്യങ്ങളായ കോട്ടയം ചെറിയപള്ളി വികാരി ബഹു. ഫാ. മോഹൻ ജോസഫ്,താഴത്തങ്ങാടി ജുമുഅ മസ്ജിദ് ഇമാം,ബഹു. അൽ ഹാഫിള് അബുഷമ്മാസ് അലി മൗലവി,കോട്ടയം വലിയ പള്ളി വികാരി ബഹു. ഫാ. ഡോ. തോമസ് എബ്രഹാം ഈ യാത്രക്ക് "മാനസ തീർത്ഥാടനം" എന്ന നാമം നൽകിയ തളിയിൽ മഹാദേവക്ഷേത്ര ഉപദേശക സമിതി പ്രസിഡന്റ്‌.ശ്രീ. സതീശൻ കെ. ആർ,തിരുമല ശ്രീ വെങ്കിടെശ്വര ക്ഷേത്ര അധികാരി ശ്രീ. ദിലീപ്. ആർ. കമ്മത്ത് എന്നിവർ അനുഗ്രഹപ്രഭാഷണങ്ങൾ നടത്തി.....

ശ്രീ.അഡ്വ.ടോം കോര അഞ്ചേരിൽ (വാർഡ് കൗൺസിലർ),യാത്രയിൽ പങ്കെടുത്തവർക്ക് സന്ദർശനം നടത്തിയ കേന്ദ്രങ്ങളിലെ പൈതൃകസ്വഭാവത്തെ കുറിച്ച് വിശദീകരണങ്ങൾ നൽകിയ ശ്രീ. പള്ളിക്കോണം രാജീവ്‌ (സെക്രട്ടറി, കോട്ടയം നാട്ടുകൂട്ടം),എന്നിവർ ആശംസകൾ നേർന്നു....

ശ്രീമതി.ഷേബ സുനിൽ (വാർഡ് കൗൺസിലർ)ശ്രീമതി. ഡോ. പി. ആർ. സോന,ശ്രീ. ദിലീപ്. ടി. കൊച്ചുണ്ണി(എന്റെ താഴത്തങ്ങാടി കൂട്ടായ്മ)
ശ്രീ. ബെന്നി (ഇടക്കാട്ടൂപള്ളി )ശ്രീ, സച്ചിദാനന്ദ നായിക് എന്നിവർ യാത്രയെ അനുഗമിച്ചു.....

മാനസ തീർത്ഥാടനം ഇവിടെ അവസാനിക്കുന്നില്ല..... തുടരും......

താഴത്തങ്ങാടി ഇഖ്‌ബാൽ ലൈബ്രറിയുടെ നേതൃത്വത്തിൽ തളിയിൽ മഹാദേവ ക്ഷേത്രം, സെന്റ് മേരിസ് സിറിയൻ ക്നാനായ ചർച്ച് (കോട്ടയം വലിയപള്ളി), കോട്ടയം സെന്റ.മേരിസ് ഓർത്തഡോൿസ്‌ ഇടവക (കോട്ടയം ചെറിയ പള്ളി),താഴത്തങ്ങാടി ജുമുഅ മസ്ജിദ്,തിരുമല ക്ഷേത്രം, കോട്ടയം നാട്ടുകൂട്ടം, എന്റെ താഴത്തങ്ങാടി കൂട്ടായ്മ എന്നിവരുടെ സഹകരണത്തോടെ "പഴയ കോട്ടയം പൈതൃക പദവി"യുമായി ബന്ധപ്പെട്ട "മാനസ തീർത്ഥാടനം" പൈതൃക യാത്ര 03 ജൂൺ 2023 ന് നടത്തപ്പെടുന്നു.......

പ്രസ്തുത യാത്ര ബഹു. ശ്രീ. തിരുവഞ്ചൂർ രാധാകൃഷ്ണൻ MLA ഉത്ഘാടനം ചെയ്തു കൊണ്ട് നയിക്കുന്നു.....

യാത്രയിൽ പഴയ കോട്ടയത്തെ പൈതൃക കേന്ദ്രങ്ങളായ തളിയിൽ മഹാദേവ ക്ഷേത്രം, സെന്റ് മേരിസ് സിറിയൻ ക്നാനായ ചർച്ച് (കോട്ടയം വലിയപള്ളി), കോട്ടയം സെന്റ്.മേരിസ് ഓർത്തഡോൿസ്‌ ഇടവക (കോട്ടയം ചെറിയ പള്ളി),താഴത്തങ്ങാടി ജുമുഅ മസ്ജിദ്,തിരുമല ക്ഷേത്രം എന്നിവ സന്ദർശിക്കുന്നു......

(പങ്കെടുക്കാൻ താല്പര്യമുള്ളവർ മുൻകൂട്ടി അറിയിക്കുക, സമയം പിന്നീട് അറിയിക്കുന്നതാണ്.)

ഇഖ്‌ബാൽ ലൈബ്രറി സംഘടിപ്പിച്ച "എസ്. എസ്. എൽ. സി, പ്ലസ് ടു പരീക്ഷയിൽ വിജയിച്ച കുട്ടികൾക്കുള്ള അനുമോദനവും, ശ്രീ. സുദീപ് ചെറിയാൻ നയിച്ച ഓറിയന്റേഷൻ ക്ലാസും".....

താഴത്തങ്ങാടി ഗവ :മുഹമ്മദൻസ് യു. പി. സ്കൂളിൽ വെച്ച് നടന്ന പരിപാടി ലൈബ്രറി പ്രസിഡന്റ്‌ പ്രൊഫ. ഷാവാസ് ഷരീഫ് (അസിസ്റ്റന്റ് പ്രൊഫസർ,സി. എം. എസ്, കോളേജ് കോട്ടയം)ഉത്ഘാടനം നിർവഹിച്ചു. ചടങ്ങിൽ ബഹു. ഇസ്മായിൽ (പ്രധാന അധ്യാപകൻ, GMUP സ്കൂൾ, താഴത്തങ്ങാടി) അധ്യക്ഷനായിരുന്നു.....

SSLC, PLUS TWO പരീക്ഷയിൽ വിജയിച്ച ഇരുപത് വിദ്യാർത്ഥികളെ ആദരിക്കുകയും,ഇഖ്‌ബാൽ ലൈബ്രറി അംഗത്വം നൽകുകയും ചെയ്തു.........

ചടങ്ങിൽ ലൈബ്രറി ഭാരവാഹികളായ ഉനൈസ് പാലപ്പറമ്പിൽ,പി. കെ. മാത്യു കൊല്ലപറമ്പിൽ,മുഹമ്മദ്‌ സാലി ചക്രപ്പുര,ഹഫീസ് മുഹമ്മദ്‌ ശ്രീമതി.പൂജ ശിവൻ എന്നിവർ സംബന്ധിച്ചു.......

മനോരമ

ഇഖ്‌ബാൽ ലൈബ്രറി, താഴത്തങ്ങാടി.

വാഹനാപകടത്തെ തുടർന്ന് മരണപ്പെടുകയും, ശാരീരിക അവയവങ്ങൾ ദാനം നൽകിയതിലൂടെ ഏഴു പേർക്ക് പുതുജീവൻ നൽകുകയും ചെയ്ത കൈലാസ് നാഥിന്റെ നിരാശ്രരായ കുടുംബത്തിനെ സഹായിക്കുന്നതിനുമായി "കൈലാസ് നാഥിന്റെ കുടുംബത്തിന് കൈത്താങ് " കൂട്ടായ്മ രൂപീകരിച്ചു.

അച്ഛനും, അമ്മയും, സഹോദരിയും,പിതൃമാതാവുമടങ്ങുന്ന ഒരു കുടുംബത്തിന്റെ ആശ്രയമായിരുന്നു കൈലാസ് നാദ്.

കൈലാസ് നാഥിന്റെ ആകസ്മികമായ വേർപാടിൽ ആശ്രയം നഷ്ടപ്പെട്ട ഈ കുടുംബത്തെ സഹായിക്കാൻ നാട് മുഴുവൻ ഒന്നിക്കുകയാണ്.

കൈലാസ് നാഥിന്റെ സുഹൃത്തുക്കളുടെ നേതൃത്വത്തിൽ ഇന്നലെ പള്ളിക്കോണത്ത് നടന്ന യോഗത്തിൽ "താഴത്തങ്ങാടി ഇഖ്‌ബാൽ പബ്ലിക് ലൈബ്രറിയെയും" ക്ഷണിച്ചിരുന്നു. പ്രസ്തുത യോഗത്തിലാണ് കൂട്ടായ്മ രൂപീകരിച്ചത്.

കൈലാസ് നാഥിന്റെ കുടുംബത്തിന് കൈത്താങ്" എന്ന സഹായ പദ്ധതിക്ക് "ഇഖ്‌ബാൽ ലൈബ്രറി" യുടെ എല്ലാ സഹായവും, പിന്തുണയും അറിയിക്കുന്നു.

ഇഖ്‌ബാൽ ലൈബ്രറിയിലെ എല്ലാ അംഗങ്ങളും ഈ കുടുംബത്തെ സഹായിക്കാൻ സന്മനസ്സ് കാണിക്കണമെന്ന് അഭ്യർത്ഥിക്കുന്നു.....

Gpay,phonepay,paytm/ number-9526480183
Bank account number:67242359852
IFSC code:SBIN0070223
Account name: Manoj ps
Branch:THIRUVARPU,KOTTAYAM
Bank:State Bank of india

മലയാള മനോരമ.

താഴത്തങ്ങാടി പൈതൃക മേഖല പദവിയിലേക്ക്......

07 ജൂലൈ 2021 നാണ് 'ഇഖ്‌ബാൽ പബ്ലിക് ലൈബ്രറി & റീഡിങ് റൂം' നേതൃത്വം നൽകിയ സംസ്ഥാന തുറമുഖം,മ്യൂസിയം, പുരാവസ്തു, പുരാരേഖ വകുപ്പ് മന്ത്രി 'ബഹു. ശ്രീ:അഹമദ് ദേവർകോവിലിന്റെ' താഴത്തങ്ങാടി പൈതൃക കേന്ദ്രങ്ങളുടെ സന്ദർശനം നടന്നത്.

താഴത്തങ്ങാടിക്ക് "പൈതൃക പദവി" നൽകണമെന്നു ആവശ്യപ്പെട്ടുകൊണ്ടുള്ള അപേക്ഷയും,നാടിന്റെ പൈതൃക ടൂറിസം വികസനവുമായി ബന്ധപ്പെട്ട നിർദ്ദേശങ്ങൾ അടങ്ങിയ പദ്ധതി രേഖ പ്രസ്തുത സന്ദർശന വേളയിൽ ബഹു. മന്ത്രിക്ക് ഇഖ്‌ബാൽ ലൈബ്രറി സമർപ്പിച്ചിരുന്നു.

കഴിഞ്ഞ രണ്ടു വർഷമായി ലൈബ്രറിയുടെ അപേക്ഷയുടെയും,നിരന്തര ശ്രമങ്ങളുടെയും ഭാഗമായി ബഹു. മന്ത്രിയുടെ നിർദ്ദേശ പ്രകാരം "കേരള പുരാവസ്തു വകുപ്പിന്റെ ഉദ്യോഗസ്ഥരായ ബഹു.രാജേഷ് കുമാർ,ബെന്നി" എന്നിവർ ഇഖ്‌ബാൽ ലൈബ്രറി സന്ദർശിക്കുകയും, ലൈബ്രറിയുടെ നിർദ്ദേശ പ്രകാരം മറ്റ് പൈതൃക കേന്ദ്രങ്ങൾ സന്ദർശിക്കുകയും ചെയ്തു.

താഴത്തങ്ങാടിക്ക് അധികം വൈകാതെ പൈതൃക മേഖല പദവി ലഭിക്കുന്ന ശുപാർശ ടൂറിസം വകുപ്പിന് നൽകുമെന്ന് അവർ അറിയിച്ചു....

സെക്രട്ടറി,
ഉനൈസ് പാലപ്പറമ്പിൽ
ഇഖ്‌ബാൽ പബ്ലിക് ലൈബ്രറി &
റീഡിങ് റൂം, താഴത്തങ്ങാടി.

നിങ്ങള്,.. താഴത്തങ്ങാടി ലൈബ്രറിയുടെ ആളല്ലേ?

അതെ! എങ്ങനെ മനസിലായി?'

"ഞാൻ, അവിടെ വന്നിട്ടുണ്ട്, ലൈബ്രറിയുടെ എല്ലാ പരിപാടികളെ കുറിച്ചും അറിയുന്നുണ്ട്¡

ഇത് മുരളി(മുരളീധരൻ).....

കോട്ടയം പട്ടണത്തിൽ, പ്രത്യേകിച്ച് താഴത്തങ്ങാടി കുമ്മനം, വാരിശ്ശേരി ഭാഗത്തെ പാതയോരങ്ങളിൽ ഒരിക്കലെങ്കിലും മുരളിയെ കാണാത്തവർ ഉണ്ടാവില്ല, പക്ഷെ അദ്ദേഹം എന്താണെന്ന് ആരും തിരിച്ചറിയുന്നില്ല എന്നു മാത്രം.....

പാതയോരങ്ങളിൽ ഉപേക്ഷിക്കപ്പെടുന്ന പ്ലാസിക് മാലിന്യങ്ങൾ ശേഖരിച്ച്,വൃത്തിയാക്കി റീസൈക്കിൾ ചെയ്യുന്ന രൂപത്തിലേക്ക് മാറ്റുകയും, അതിൽ നിന്നും ലഭിക്കുന്ന വരുമാനത്തിൽ കുടുംബം പോറ്റുകയും ചെയ്യുന്ന മുരളി, ഇത് ശേഖരിക്കാൻ ഒരു ദിവസം നടക്കുന്ന ദൂരം ഏകദേശം ഇരുപത് കിലോമീറ്റർ.

"എന്ത് കൊണ്ട് പ്ലാസ്റ്റിക് മാലിന്യം മാത്രം"?

മുരളിക്ക് ഒരൊറ്റ ഉത്തരം മാത്രമേയുള്ളൂ! സമൂഹത്തിന് വിപത്തും പരിസ്ഥിതിക്ക് ഏറ്റവും ദോഷവും ഉണ്ടാക്കുന്ന ഇവയെ നിർമാർജനം ചെയ്യുക, അതൊരു സേവനമായി ഉത്തരവാദിത്വമുള്ള ഒരു ഇന്ത്യൻ പൗരനെന്ന നിലയിൽ ഞാൻ ചെയ്യുന്നു....

കഴിഞ്ഞ വർഷം താഴത്തങ്ങാടി, കുമ്മനം തീരത്തു നിന്നും മീനച്ചിലാറിൽ പതിക്കാതെ മുരളി ശേഖരിച്ച പ്ലാസിക് ബാഗുകൾ 430 കിലോ.

വിവാഹസൽക്കാര വേദികളിൽ നിന്നും ലഭിക്കുന്ന പ്ലാസ്റ്റിക് വെള്ളകുപ്പികളിൽ നിന്ന് വെള്ളം,പാഴാക്കാതെ പാതയോരങ്ങളിലെ ചെടികളിൽ ഒഴിച്ചതിനു ശേഷം മാത്രം ഒഴിഞ്ഞ കുപ്പികൾ ശേഖരിക്കുന്നു...

ബ്രഹ്മപുരം.....

മാലിന്യ നിർമാർജനത്തിന് വ്യക്തമായ കാഴ്ചപ്പാടുകളുള്ള മുരളി 2018 ൽ "ബ്രഹ്മപുരത്തു' പോയി, അവിടെ നടക്കുന്ന മാലിന്യ നിർമാർജ്ജന പ്രക്രിയകൾ നേരിട്ട് മനസിലാക്കിയിരുന്നു.

ഏഴു കൊല്ലം പാലക്കാട്‌ തന്റെ ഗ്രാമമായ കൂടല്ലൂരിലെ ഒരു വായനശാലയിൽ ലൈബ്രറിയൻ പദവി വഹിച്ചിരുന്ന മുരളി നല്ലൊരു വായനക്കാരനാണ്,... അങ്ങെനെയെ വരാൻ വഴിയുള്ളൂ, കാരണം മലയാളത്തിന്റെ സ്വകാര്യ അഹങ്കാരം, പ്രിയ എഴുത്തുകാരൻ ശ്രീ. എം. ടി. വാസുദേവൻ നായരുടെ നാട്ടുകാരനല്ലേ.....!

പാലക്കാടിന്റെ ഒരു ഗ്രാമത്തിൽ നിന്നും വന്ന ഒരാൾ നമ്മുടെ നാടും,മീനച്ചിലാറും സംരക്ഷിക്കാൻ കാട്ടുന്ന മാതൃകക്ക്...... ശ്രീ.മുരളിക്ക് "ഇഖ്‌ബാൽ ലൈബ്രറി" യുടെ ആദരം.......

നമ്മെ തിരിച്ചറിയുന്നവരേക്കാൾ, നാം തിരിച്ചറിയാതെ പോകുന്നവരിൽ ഒരാൾ ........

ഇഖ്‌ബാൽ പബ്ലിക് ലൈബ്രറി & റീഡിങ്ങ് റൂം, താഴത്തങ്ങാടി, കോട്ടയം

ഇഖ്‌ബാൽ പബ്ലിക് ലൈബ്രറിയും,കുമ്മനം കേന്ദ്രമായി പ്രവർത്തിക്കുന്ന "ZAM ZAM Carry Bags"പേപ്പർ ബാഗ് നിർമാണ കമ്പനിയും" ചേർന്ന് വനിതകൾക്കുള്ള പേപ്പർ നിർമാണ പരിശീലന ക്ലാസ്സ്‌ നടക്കുന്നു

ഇഖ്‌ബാൽ ലൈബ്രറിയിൽ വെച്ച് നടക്കുന്ന പരിശീലന ക്ലാസ്സ്‌ പേപ്പർ ബാഗ് നിർമാണത്തിൽ Kerala institute of technical consultancy organization (KITCO) വനിതാ വിഭാഗം പരിശീലക ആയിരുന്ന ശ്രീമതി.ബിൻസി. കെ. എം, കോയിപ്പുറം
(ZamZam Carry bag proprietor)നയിക്കുന്നു.

പരിശീലനത്തിൽ യോഗ്യത നേടുന്ന 10 വനിതകൾക്ക്(നിലവിൽ 10 പേർക്ക് മാത്രം) വരുമാനമാർഗമായി പേപ്പർ ബാഗ് നിർമിക്കാൻ "ഇഖ്‌ബാൽ ലൈബ്രറി" അവസരം ഒരുക്കിയിട്ടുണ്ട്.

ഒരു നാടിന്റെ മനോഹാരിത, ആ നാടിന്റെ പ്രകൃതി രമണീയത കൊണ്ടു മാത്രമല്ല ഉണ്ടാവുന്നത്, ആ നാട്ടിൽ വസിക്കുന്ന ജനതയുടെ സാംസ്കാരിക ഔന്നത്യം പ്രകടമാക്കുന്ന കേന്ദ്രങ്ങൾ കൂടി ഉണ്ടാവുമ്പോഴാണ്. വിദ്യാലയങ്ങൾ, വായനശാലകൾ, മതമൈത്രി,സഹിഷ്ണുത ഇതെല്ലാം കൂടി ചേരുമ്പോൾ......

മീനച്ചിലാറിന്റെ മനോഹര തീരത്തുള്ള താഴത്തങ്ങാടിക്ക് കൂടുതൽ മനോഹാരിത നൽകുന്നത് താഴത്തങ്ങാടിയുടെ ചരിത്രപരവും,സവിശേഷവുമായ സാംസ്‌കാരിക പൈതൃകമാണ്......

തളിയിൽ മഹാദേവക്ഷേത്രവും, താഴത്തങ്ങാടി ജുമുഅ മസ്ജിദും,വലിയ പള്ളിയും, ചെറിയപള്ളിയുമടങ്ങിയ പൗരാണിക ആരാധനാലയങ്ങൾ,ഗൗഡസാരസ്വത ബ്രാഹ്മണ സമൂഹവും, വിവിധ മത വിഭാഗങ്ങൾ സഹജരെ പോലെ ഒന്നായി കഴിയുന്ന, നാടിന്റെ അക്ഷരവെളിച്ചമായ ഇഖ്‌ബാൽ വായനശാലയും, വള്ളംകളിയും ഒപ്പം തലമുറകൾ ആദ്യാക്ഷരങ്ങൾ കുറിച്ച മുഹമ്മദൻസ് വിദ്യാലയവും,എം. ഡി. എൽ. പി. സ്കൂളും.....

താഴത്തങ്ങാടി മുഹമ്മദൻസ് യു. പി. സ്കൂൾ.....

താഴത്തങ്ങാടി മുഹമ്മദൻസ് വിദ്യാലയം അതിന്റെ 109 -)മത് വാർഷികം ഇന്ന് ആഘോഷിക്കുകയുണ്ടായി, ആഘോഷ ചടങ്ങിൽ ഇഖ്‌ബാൽ ലൈബ്രറിയെ ക്ഷണിക്കുകയും,താഴത്തങ്ങാടിയിൽ ഇഖ്‌ബാൽ ലൈബ്രറി നേതൃത്വം നൽകിയ ഖത്തർ ലോകകപ്പ് ആവേശത്തിന്റെ സ്മരണാർത്ഥം, മുഹമ്മദൻസ് സ്കൂളിന് നൽകാൻ "പേരാട്ടുതറ അപാർട്മെന്റ് " സാരഥി ഇഖ്‌ബാൽ ലൈബ്രറി അംഗം ശ്രീ. നിഷാദ് ഇഖ്‌ബാൽ ലൈബ്രറിയെ ഏൽപ്പിച്ച ലോകകപ്പിലെ "അൽ റിഹ്‌ല" എന്ന ഫുട്ബോൾ മുഹമ്മദൻസ് സ്കൂളിലെ വിദ്യാർത്ഥികൾക്ക് കൈമാറി.

സ്കൂളിനെ കൂടുതൽ ഉയരങ്ങളിൽ എത്തിക്കാൻ പരിശ്രമിക്കുന്ന പ്രധാന അധ്യാപകൻ ശ്രീ. ഇസ്മയിൽ, സഹ അധ്യാപകർ എന്നിവർക്ക് എല്ലാ അഭിനന്ദനങ്ങളും, ആശംസകളും നേരുന്നു....

എം. ഡി. എൽ. പി. സ്കൂൾ, താഴത്തങ്ങാടി.....

എം. ഡി. എൽ. പി. സ്കൂൾ, താഴത്തങ്ങാടി അതിന്റെ 148 -)മത് വാർഷികം ഇന്ന് ആഘോഷിക്കുകയുണ്ടായി,ആഘോഷ ചടങ്ങിൽ ഇഖ്‌ബാൽ ലൈബ്രറിയെ ക്ഷണിക്കുകയും,35 വർഷത്തെ അധ്യാപകസേവനത്തിൽ നിന്നും വിരമിക്കുന്ന അധ്യാപിക ശ്രീമതി. മോളി ടീച്ചറിന് സഹപ്രവർത്തകരും, വിദ്യാർത്ഥികളും, പൂർവവിദ്യാർത്ഥികളും ചേർന്ന് നൽകിയ യാത്രയയപ്പ് ചടങ്ങിൽ ആശംസകൾ നേരുകയും ചെയ്തു.....

ഈ രണ്ടു വിദ്യാലയങ്ങളും,താഴത്തങ്ങാടിയുടെ അഭിമാനസ്തംഭങ്ങളായി ദീർഘകാലം നിലനിൽക്കട്ടെയെന്നു ആശംസിക്കുന്നു.......

ഇഖ്‌ബാൽ പബ്ലിക് ലൈബ്രറി ജൂബിലി ആഘോഷവും, ജൂബിലി സ്മരണിക പ്രകാശനവും.

കരിവളയിട്ട കൈയ്യിൽ,
കുടമുല്ല പൂക്കളുമായ്....
കരിമിഴിയാളെ നീ വരുമോ.......

ഗാനഗന്ധർവ്വൻ യേശുദാസിന്റെ ശബ്ദത്തിൽ മലയാളികൾ കേട്ട പ്രശസ്തമായ ഈ ഗാനത്തിന്റെ രചയിതാവ്.....

ശ്രീ. എം. എസ്. വാസുദേവ്

വാസുവാശാൻ എന്ന് ഏവരും വിളിച്ചിരുന്ന താഴത്തങ്ങാടി തളിയിൽ സ്വദേശിയായ ഈ അനുഗ്രഹീത കലാകാരൻ 14 ഓഗസ്റ്റ് 2021 ൽ വിടപറഞ്ഞു.....

വാസുവാശാന്റെ ഓർമകൾക്ക് ഇഖ്‌ബാൽ ലൈബ്രറിയുടെ ആദരം......

ഇന്ന് (04-മാർച്ച്‌ 2023, ശനിയാഴ്ച) വൈകുന്നേരം 7 മണിക്ക് "താഴത്തങ്ങാടി കുളപ്പുരക്കടവ് സായാഹ്നകേന്ദ്രത്തിൽ" നടക്കുന്ന ചടങ്ങിൽ ആദരവ് ഏറ്റുവാങ്ങും.....

ചടങ്ങിൽ "കരിവളയിട്ട കൈയ്യിൽ..."എന്ന ഗാനം ഗായകൻ ശ്രീ. ഷമീൽ താഴത്തങ്ങാടി ആലപിക്കും.......

ഇഖ്‌ബാൽ പബ്ലിക് ലൈബ്രറി ജൂബിലി ആഘോഷവും, ജൂബിലി സ്മരണിക പ്രകാശനവും*

വെളൂർ കൃഷ്ണൻകുട്ടി

ഹാസ്യസാഹിത്യലോകത്ത് മലയാളിയ ചിരിപ്പിക്കാനും, ചിന്തിപ്പിക്കാനും മികച്ച സൃഷ്ടികൾ നൽകിയ കഥാകാരൻ.....*

"പാലം അപകടത്തിൽ" എന്ന അദ്ദേഹത്തിന്റെ പ്രശസ്ത കൃതിയാണ് എക്കാലവും പ്രസക്തമായ കഥയും, കഥാപാത്രങ്ങളുമുള്ള കെ. ജി. ജോർജ് സംവിധാനം ചെയ്ത "പഞ്ചവടിപ്പാലം" എന്ന ചലച്ചിത്രം....

ഇന്ന് (04-മാർച്ച്‌ 2023, ശനിയാഴ്ച) വൈകുന്നേരം 7 മണിക്ക് "താഴത്തങ്ങാടി കുളപ്പുരക്കടവ് സായാഹ്നകേന്ദ്രത്തിൽ" നടക്കുന്ന ചടങ്ങിൽ അനശ്വര കലാകാരൻ വെളൂർ കൃഷ്ണൻകുട്ടിയുടെ ഓർമകൾക്ക് ഇഖ്‌ബാൽ പബ്ലിക് ലൈബ്രറിയുടെ ആദരവ് അദ്ദേഹത്തിന്റെ നിഴലായി എന്നും കൂടെയുണ്ടായിരുന്ന പ്രിയപത്നി "ശാന്തമ്മ കെ. ജി.ഏറ്റുവാങ്ങുന്നു.....

ഇഖ്‌ബാൽ പബ്ലിക് ലൈബ്രറി ജൂബിലി ആഘോഷവും, ജൂബിലി സ്മരണിക പ്രകാശനവും.

വൈക്കം മുഹമ്മദ്‌ ബഷീറിന്റെ "പാത്തുമ്മയുടെ ആട്".....

ബഷീറിന്റെ അക്ഷരങ്ങളിലൂടെ സൃഷ്ടിക്കപ്പെട്ട കഥാപാത്രങ്ങൾ പാത്തുമ്മ, പാത്തുകുട്ടി, ആരിഫ, ഹനീഫ........

താഴത്തങ്ങാടിയുടെ സമീപ പ്രദേശമായ ചെങ്ങളത്ത് താമസിക്കുന്ന പാത്തുകുട്ടിയും, ആരിഫയും നമ്മളോടൊപ്പം.....

ഇന്ന് (04-മാർച്ച്‌ 2023, ശനിയാഴ്ച) വൈകുന്നേരം 7 മണിക്ക് "താഴത്തങ്ങാടി കുളപ്പുരക്കടവ് സായാഹ്നകേന്ദ്രത്തിൽ" നടക്കുന്ന ചടങ്ങിൽ പാത്തുകുട്ടിയും, ആരിഫയും ഇഖ്‌ബാൽ പബ്ലിക് ലൈബ്രറിയുടെ ആദരവ് ഏറ്റുവാങ്ങും.....

04 മാർച്ച്‌ 2023
വൈകുന്നേരം 7 മണി
താഴത്തങ്ങാടി കുളപ്പുരക്കടവ് വിശ്രമകേന്ദ്രം