Tata Sivaiah - Renewed SatyaShodhak Samaj leader

బీసీల కీలక సమస్యలు గత ఏడున్నర దశాబ్దాలుగా అపరిష్కృతంగా ఎందుకు మిగిలి పోతున్నాయి ?

బీసీలు మాత్రమే దామాషా అవకాశాలకు ఎందుకు దూరం అవుతున్నారు ?

నాయకులు అస్తిత్వానికి ప్రమాణం ఏమిటి ?

సొంత ప్రచారమా ?
బీసీ సమస్యల పరిష్కారం కృషిలో సాధించిన మార్కులా ?

బీసీ సమస్యల పరిష్కార కృషి మాత్రమే ప్రమాణం అయితే, గత ఐదు దశాబ్దాలు పైగా జాతీయ స్థాయి, రాష్ట్ర స్థాయి, జిల్లా స్థాయిలో, పెరిగిపోతూ వస్తున్న నాయకులు నిత్యం పనిచేస్తున్నప్పుడు,

నేటికీ అనేక కీలక సమస్యలు పరిష్కారం కాకుండా, ఇంకా అపరిష్కృతంగా మిగిలే ఉన్నాయి ?

సమస్యలు ఇంకా పెరిగిపోతూనే ఉన్నాయి ?

తెలుగు రాష్ట్రాల్లో బీసీలకు నాణ్యమైన, చెప్పుకో దగ్గ ప్రజా విశ్వాసం పొందిన, రాజకీయ వేదికలు ఎందుకు లేకుండా పోయాయి ?

ఏకీలక రంగంలో కూడా,
అది విద్యా రంగం కావచ్చు, ఉద్యోగ రంగం కావచ్చు, చట్టసభలు కావచ్చు,
పంచాయతీ వ్యవస్థ కావచ్చు,
ఆర్ధిక రంగం కావచ్చు,
బీసీలకు దామాషా అవకాశాలు ఎందుకు తక్కకుండా పోతున్నాయి ?

బలమైన ఉద్యమాన్ని బీసీ నాయకత్వం ఎందుకు నిర్మించ లేక పోతుంది ?

దీనికి నాణ్యమైన బీసీ నాయకత్వలేమి
ఒక బలమైన కారణంగా
కనిపించడం లేదా ?

బలమైన, అంకితభావం కలిగిన నాయకత్వం, బీసీలకు ఉండి ఉంటే, ఎందుకు ఏడు దశాబ్దాలుగా వారి కీలక సమస్యలు, కూడా అపరిష్కృతంగానే మిగిలి పోతున్నాయి ?

బీసీలు ఆలోచించుకోవాలి ? అంతర్గతంగా చర్చించుకోవాలి.
నిర్మొహమాటంగా నిగ్గు తేల్చుకోవాలి. సరైన బాట నిర్మించుకోవాలి.

రోగనిర్ధారణ సవ్యంగా జరిగితేనే,
సరైన వైద్యం, ఆరోగ్య సాధన తేలికగా వీలు అవుతుంది.

కొండలరావు
28-8-2023

Inviting ideas from eminent persons to the new dawn of India
Dear Friends,

India is at a crossroads. 76 years since India got independence from the British. India a secular, democratic, socialist republic, the old values are falling apart. A polity based on religiosity is getting entrenched. Farmers are committing su***de in thousands. The environment is degrading fast. The policies of the past and the present governments are taking India into an unchartered territory. India needs a complete revival politically, socially, culturally, economically, ecologically. What do you think will be or must be the future of India 10 years downs the line? Mahatma Jyotirao Phule & Krantijyoti Savitribai Phule Educational Circle would like to start a series inviting ideas from eminent persons. Consider it as a brainstorming session. We welcome each one of your opinion. Let our efforts be the new dawn of India. Drop a mail: [email protected] or Watsapp: to +91-9492826296 hoping each one of you will participate in this effort.

In Solidarity
Dr. Tata Sivaiah
National President
Mahatma Jyotirao Phule & Krantijyoti Savitribai Phule Educational Circle

*బీసీల, అభివృద్ధిలో టీడీపీ ఎక్కడ ?*
----------------------------------------------------------

1. టీడీపీ ప్రారంభ దశ నుండి అధిక సంఖ్యాకులైన బీసీల పునాదుల మీదే ఎదగడం, వారి సహకారంతో నే అధికారం లో కూర్చోవడం, బీసీలు తీవ్ర అసంతృప్తి సందర్భాల్లో అధికారం కోల్పోవడం, ఇదంతా చరిత్ర.

2. టీడీపీ అధికారంలో ఉన్న సందర్భాలలో, అధినేత సామాజిక వర్గానికి చేసిన సేవ, అభివృద్ధి ప్రోత్సాహకాల తో పోలిస్తే, టీడీపీ పునాదులుగా చెప్పబడుతున్న "బీసీల" భాగస్వామ్యం, అభివృద్ధి, సాధికారత కోసం చేసింది ఏపాటి ? బీసీల మౌలిక సమస్యల సందర్భాల్లో, ఆధిపత్య శక్తుల కొమ్ము కాసి, బీసీలను వారి ప్రయోజనాలను పక్కన పెట్టిన సందర్భాలు ఎన్ని లేవు ? బీసీలే "మా" పునాదులు, వారికి అంతచేసాం, ఇంత చేసాం, ఎంతైనా చేస్తాం, అనే ధోరణి లో ప్రచారం చేసుకొని, బీసీల్ని మభ్యపెట్టి మాయచేసి బీసీల ఓట్లతో లబ్ధి పొందడం తప్ప, బీసీల హక్కులు, అవకాశాలు, అభివృద్ధి, సాధికారతకు సంబంధించిన విషయాలలో వారి హక్కులకు గండి కొట్టిన సందర్భాలు అయితే చాలానే ఉన్నాయి తప్ప, వారి నిజమైన సాధికారత కు, భాగస్వామ్యానికి, అభివృద్ధి కి చేసింది కంటి తుడుపు వ్యవహారమే. నిర్ణయాత్మక స్వతంత్ర లోపించిన కొన్ని పదవులు కొందరికి కట్టబెట్టడం బీసీల్ని ఉద్ధరించడం కాబోదు. మొత్తం చరిత్ర అంతా ఇక్కడ చర్చించ లేము. మూడు సందర్భాలను మాత్రమే ప్రస్తుతానికి మీతో పంచుకొంటాను.

3. నాడు 1984 ప్రాంతంలో మురళీధరరావు కమిషన్ నివేదిక అమలుకోసం, బీసీ నాయకులు చేసిన ఒత్తిడి మేరకు, టీడీపీ ప్రభుత్వం 44% కి పెంచిన బీసీ రిజర్వేషన్లను హైకోర్టు, బీసీ జనాభా 52% ఉందని రుజువు చేయడానికి అవసరమైన గణాంకాలు లేవని, కొట్టేసిన సందర్భం లో, టీడీపీ ప్రభుత్వానికి బీసీల మీద ప్రేమ, అభిమానం, కృతజ్ఞత నిజంగా ఉండి ఉంటే, వారి న్యాయ మైన భాగస్వామ్యం మీద నిజమైన చిత్త శుద్దే ఉండి ఉంటే, సరైన గణాంకాలతో, సుప్రీంకోర్టు కు అప్పీలుకి వెళ్ళకుండా ఎందుకు మౌనంగా ఉండిపోయింది ? 44% రిజర్వేషన్లను ఎందుకు నీరు కార్చేసింది ? దీని ఆంతర్యం ఏమిటి ? నటించడం తప్ప టీడీపీకి బీసీల మీద నిజమైన ప్రేమ అభిమానం ఉందని ఎలా అనుకోవాలి ? గణాంకాల‌ ప్రాధాన్యత తెలిసిన టీడీపీ ప్రభుత్వం, నాటినుండి నేటి వరకు 1991, 2001, 2011 లలో జరిగిన దశాబ్ది గణాంకాలు సేకరణ సందర్భాల్లో, సమగ్ర కుల గణన (Caste Census) జరపాలని కేంద్ర ప్రభుత్వం మీద ఏనాడూ ఎందుకు ఒత్తిడి చేయలేక పోయింది ? కేంద్ర ప్రభుత్వాల ఏర్పాటు లో చక్రం తిప్పిన చరిత్ర చంద్రబాబు గారికి ఉంది కదా ?

4. *ప్రమోషన్ లలో రిజర్వేషన్లకు సంబంధించిన* 1995 నాటి రాజ్యాంగ సవరణ చట్టం 77 సందర్భంగా కాని, 2012 నాటి 117 సవరణ బిల్లు సందర్భంగా కాని, వాటిలో ఎక్కడా బీసీల ప్రస్తావన లేని పరిస్థితుల్లో, ఉన్నత పదవుల్లో ఎస్సీ ఎస్టీల కంటే చాలా దారుణమైన దిగువ స్థాయి కే పరిమితం అయిపోతూ వస్తున్న "బీసీలను కూడా" ఈ బిల్లుల్లో చేర్చాలని టీడీపీ ఎందుకు క్రియాశీలక కృషి చేయలేక పోయింది ?

5. *పంచాయతీ రాజ్ వ్యవస్థలో‌*, ఎస్సీ, ఎస్టీలకు, మహిళలకు దామాషా అవకాశాలు తక్కే విధంగా సవరణలు జరిగిన రాజ్యాంగంలో, బీసీ రిజర్వేషన్లకు సంబంధించి, అవసరం అయిన రాజ్యాంగ ప్రతిపత్తి లేకుండా పోయింది. వారి రిజర్వేషన్లను ఆయా రాష్ట్రాల దయా దాక్షిణ్యాల కే విడిచి పెట్టేసారు. ఇది చాలదు అన్నట్లు, గోరు చుట్టు మీద రోకలి పోటు అన్నట్లు, 1995 నుండి అనాటి వరకు బీసీలకు దొరికిన 34% రిజర్వేషన్లకు గండి కొట్టే విధంగా, మొత్తం రిజర్వేషన్లు 50% దాట కూడదు అనే సారాంశం తో 11-5-2010 నాడు, డా.కె కృష్ణ మూర్తి కేసులో, సుప్రీంకోర్టు తీర్పు ఇచ్చింది. ఎస్సీ వర్గాన్నుండి ఎదిగిన, ఆనాటి సుప్రీంకోర్టు ప్రధాన న్యాయమూర్తి జస్టిస్, కే.జీ బాలకృష్ణన్ గారి ధర్మాసనం నుండి ఆయన రిటైర్ మెంటుకు ఒక రోజు ముందు ఈ తీర్పు వెలువడడం బీసీలకు విశేషం. ఆవిధంగా ఆనాటి వరకు 34% రిజర్వేషన్ అనుభవించిన బీసీల రిజర్వేషన్లు, మొత్తం రిజర్వేషన్లు 50% దాటుతున్న కారణంగా, సుమారు 10% పైన కోల్పోవలసి వచ్చింది. ఈ సందర్భానికి సంబంధించిన వివరాలతో, *"పంచాయతీ రాజ్ సంస్థల్లో రిజర్వేషన్లపై రాజ్యాంగ సవరణే బీసీలకు రక్ష"* అనే శీర్షికతో నేను రాసిన వ్యాసం 11-6-2011 నాటి "సాక్షి దినపత్రిక" లో ప్రచురిత మైనది.

6. ఇప్పుడు చెప్పు కోవలసిన కీలక విషయం ఏంటంటే, పంచాయతీ రాజ్ సంస్థల్లో బీసీల రిజర్వేషన్లు 2006 తరువాత గణనీయంగా తగ్గిపోవడానికి, టీడీపీ, కాంగ్రెస్, వైయ్యస్సార్సీపీ లాంటి ఏ రాజకీయ పార్టీ కూడా ప్రత్యక్షంగా కారణం కాదు. దీనికి మూల కారణం, పైన పేర్కొన్న సుప్రీంకోర్టు తీర్పు మాత్రమే. "బీసీలను ఉధ్ధరిస్తున్నది" మేమంటే మేము, అని డబ్బా కొట్టుకునే, టీడీపీ తో సహా ఏ రాజకీయ పార్టీ కూడా సామాజిక న్యాయానికి విఘాతం కలిగిస్తున్న, బీసీల ప్రాతినిధ్యానికి ఎసరు పెడుతున్న ఈ సుప్రీంకోర్టు తీర్పు మీద సమీక్ష కోసం, రివ్యూ కోరుతూ సుప్రీంకోర్టులో పిటిషన్ వేయకపోవడం, బీసీలు ఆలోచించ వలసిన విషయం. ఆధిపత్య కులాల పార్టీ ఏదీ కూడా, బీసీల హక్కుల ను, భాగస్వామ్యాన్ని మనస్పూర్తిగా కోరు కోవు. ఆదిశగా చిత్తశుద్ధి తో పనిచేయవు. ఎందుచేతనంటే, అది వారి ఆధిపత్యానికి గొడ్డలి పెట్టు కనుక. మర్మం అంతా ఇక్కడ ఉంటే, పంచాయతీ వ్యవస్థలో బీసీ రిజర్వేషన్లు తగ్గిపోవడానికి, "ఆ రాజకీయ పార్టీయే కారణం, మేంకాదు" అంటూ, టీడీపీ, వైయ్యస్సార్సీపీ పార్టీలు పరస్పరం, తమ ప్రత్యర్థి పార్టీలను తప్పుపట్టడం, బీసీలను దారి మళ్లించి, తమ పబ్బం గడుపు కోవడానికే. టీడీపీ లోకేష్ బాబు, తన పాదయాత్రలో కూడా తెలిసో తెలియకో ఇదే తప్పు చేస్తున్నారు.

7. *మూడవ ఉదాహరణ గా కాపులను బీసీ జాబితాలో చేర్చడం విషయం మీద, టీడీపీ అభ్యంతరకర వైఖరి.* ఈ విషయం 1960 దశకం నుండి నేటివరకు కొనసాగుతూనే ఉంది. బీసీలు వారి నాయకత్వం, కృత నిశ్చయంతో విజయవంతంగా వ్యతిరేకిస్తూ నే ఉన్నారు. ఈ విషయం 1995 నుండి ఏక బిగిన సుమారు 10 సంవత్సరాలు పాలించిన చంద్రబాబుకు పూర్తిగా తెలుసు. కాపులకు బీసీ హోదాకు నిజం గా అర్హత ఉండి ఉంటే, తన 10 సంవత్సరాల హయాంలో ఎందుకు కాపుల్ని బీసీ‌ జాబితాలో చేర్చే ప్రయత్నం చేయలేక పోయారు అనే ప్రశ్న కు వారి దగ్గర సమాధానం ఉండదు. తన హయాంలో చంద్రబాబు నాయుడు గారు ఇంటింట సర్వే చేయించారు. తద్వారా సేకరించిన సమాచారాన్ని చంద్రబాబు ప్రభుత్వం, సమాజం ముందు ఉంచలేదు. ఆ సమాచారం ప్రకారం కాపులకు బీసీ హోదా అర్హత నిజంగా ఉండి ఉంటే, బీసీలు కో‌రినా ఆ సమాచారం ఎందుకు ఇవ్వడం లేదు ? సమాచార హక్కు చట్టం కింద, ఛైర్మన్ మంజునాథ కమిషన్ నివేదికను కోరినా, కోర్టు ఇవ్వాలని తీర్పు చెప్పినా, దరిమిలా కంటెంప్ట్ కేసు వేసినా, వారి ప్రభుత్వం, బీసీలు కోరుతున్న సమాచారాన్ని రహస్యం గానే ఉంచింది తప్ప కోరిన బీసీలకు ఇవ్వడం లేదు. దీని అర్ధం ఏమిటి ?

8. ఈ పరిస్థితుల్లో కూడా నేడు 2024 ఎలక్షన్లకు ముందు, బీసీలతో సభ పెట్టి, "మిమ్మల్ని ఉద్ధరించేస్తాం" అనే ధోరణిలో టీడీపీలో ఇరుక్కున్న, అచ్చెం నాయుడు గారు, యనమల రామకృష్ణుడు గారు, కొల్లు రవీంద్ర గారు లాంటి బీసీ నాయకుల ద్వారా నమ్మ బలక బూనడం, బీసీల చెవుల్లో మరోసారి పువ్వులు పెట్టడం కాదా ? 2019 లో టీడీపీ అధికారం కోల్పో డానికి బీసీల ఆగ్రహం కూడా ఒక ముఖ్య కారణం కాదా ?

2016 లో కాపుల్ని బీసీ జాబితాలో చేర్చడానికి ఏర్పాటు చేసిన మంజునాథ కమిషన్ సందర్భంగా, పైన ఉటంకించిన బీసీల పాత్ర, అధి నాయకుడి భజన చేయడానికి మించి, బీసీలకు ఏమాత్రం అయినా అనుకూలంగా ఉండిందా ? ఈ విషయం మీద చట్టం చేసినపుడు, అసెంబ్లీలో మన బీసీ ప్రతినిధుల వైఖరిని బీసీలు మరచి పోతారా ? మరి ఈ బీసీ నాయకులకు బీసీల అవసరాలు, హక్కుల విషయంలో ఉన్న నిబద్ధత ఏపాటిది అనే ప్రశ్న రాదా ? బహుశా దువ్వూరపు రామారావు గారి ఒత్తిడి కారణంగా కావచ్చు, పంచాయతీ రిజర్వేషన్ కు సంబంధించి, బీసీ జాబితా వర్గీకరణ ప్రస్తావన, పదేపదే బలంగా ముందుకు తీసుకొని వచ్చారు, దొంతా సురేష్ గారు. బీసీలు ఎవరూ వర్గీకరణను వ్యతిరేకించడం లేదు. టీడీపీ కి చిత్తశుద్ధే ఉంటే 1995, 2001, 2006, 2012 పంచాయతీ ఎలక్షన్ల సందర్భంగా, ఈ వర్గీకరణ టీడీపీ భుజాన వేసుకుని ఉంటే ఎవరు అడ్డు పడేవారు ?

9. సారాంశం లో చెప్పదలచు కున్నది ఒకటే. ఎలక్షన్లకు ముందు బీసీలతో సభలు పెట్టి మద్దతు కోరడం టీడీపీకి కొత్తేమీ కాదు. పరిపాటే. 2014 ఎలక్షన్ కు ముందు దేవేంద్ర గౌడ్ గారి ఆధ్వర్యంలో ఇదేవిధంగా హైదరాబాద్ లో బీసీ సభ పెట్టారు. అయితే బీసీల్ని దగా చేసే ధోరణి లో మాత్రం టీడీపీ లో మార్పు రాలేదు. కాపుల చేర్పు విషయం లో టీడీపీ వ్యవహరించిన, బీసీ వ్యతిరేక, రాజ్యాంగ వ్యతిరేక తీరుని బీసీలు మరిచిపోలేరు. వైఖరి మార్పు విషయం లో నమ్మదగిన మార్పు గమనిస్తే తప్ప బీసీలు టీడీపీని గతంలో నమ్మిన స్థాయిలో నమ్మడం ఆదరించడం కష్టం. నేను ఏ ఆధిపత్య కుల పార్టీ అభిమానిని కాదు. బీసీలు సొంత రాజకీయ వేదిక నిర్మాణం చేసు కోవడం ద్వారా మాత్రమే, వారి దామాషా అవకాశాలు వారు సాధించు కోవడానికి వీలు అవుతుంది అని నమ్మి ప్రచారం చేస్తున్న వాడిని.

కొండలరావు
23-5-2023

*ఈ వ్యాసాన్ని బీసీలు జాగ్రత్తగా చదవాలి.*

దేశ రాజకీయాల్లో మార్పు మొదలవుతున్నట్లు కనబడుతోంది. పేదలు కాంగ్రెస్ వైపు, ధనికులు బీజేపీ వైపు మొగ్గు చూపడం స్పష్టంగా కనబడుతుంది.

మధ్యతరగతి, పేదరికం, అవిద్య పుష్కలంగా ఉన్న ఈదేశంలో స్వయం కృతంగా, కాంగ్రెస్ పోగొట్టుకున్న స్థాయిని, తిరిగి సాధించే దిశగా సూచనలు కనిపిస్తున్నాయి.

నియంతృత్వ ధోరణులు నిత్యం విజృంభించి ప్రజా కంటకంగా దిగజారుతున్న, సామాన్యుల్ని పీడించి, పిప్పి చేస్తూ, దేశ సంపదను, వనరులను, కార్పోరేట్లకు గంపగుత్తగా కుదువ పెడుతున్న నేటి వాతావరణంలో కూడా, అమాయకత్వం పుష్కలంగా ఉన్న ఈ దేశంలో, మార్పు అంత తేలిక కాకపోయినా, దినదినం దిగజారుతున్న ప్రజాజీవితంలో నెలకొంటున్న, ప్రమాదకరమైన, అనారోగ్యకరమైన వాతావరణం దృష్ట్యా, జనాలు గాఢంగా మార్పును కోరుకుంటున్నట్లు స్పష్టంగా కనిపిస్తుంది.

ఈ ధోరణి నిలిచి బలపడుతుందా, లేదా అని ఇపుడే చెప్పడం అంత తేలిక కాదు. ప్రజా కంటకుల నటనా సామర్ధ్యాన్ని తక్కువగా అంచనా వేయలేం.

అల్లూరి , సుభాష్ చంద్రబోస్ స్థాయి స్వాతంత్ర్య సమరయోధులు..

పూలే , అంబెడ్కర్ స్థాయి సంఘ సంస్కర్త..

పెరియార్ , నారాయణ గురు స్థాయి సామాజిక విప్లవకారులు

గీతకులాల హక్కుల కోసం, ఐక్యత కోసం జీవితాంతం శ్రమించిన గీతకుల పితామహులు..

ఆచార్య ,DR. సర్దార్ గౌతులచ్చన్న గారి 17 వర్ధంతి సందర్భంగా ఘన నివాళులు అర్పిస్తూ.

లచ్చన్నగారి జీవితంలోని కొన్ని ఘట్టాలను నెమరువేడుకుంటూ...

భారతదేశంలో సర్ధార్ వల్లభాయ్ పటేల్ తరువాత సర్దార్ అనే గౌరవం పొందిన ఏకైక వ్యక్తి . గౌడ కుల వీరుడు లచ్చన్న సాహసానికి, కార్యదక్షతకు మెచ్చి ప్రజలిచ్చిన కితాబే సర్దార్. సర్దార్ గౌతు లచ్చన్న, వి.వి.గిరి, నేతాజి సుభాష్ చంద్రబోస్ జయంతి ధర్మతేజ, మొదలగు అనేకమంది జాతీయ నాయకులతో కలిసి భారత దేశ స్వాతంత్ర్య పోరాటాలలో పాల్గొని, అనేక పర్యాయాలు జైలుకు వెళ్ళారు. ప్రకాశం పంతులు మరియు బెజవాడ గొపాలరెడ్డి మంత్రివర్గంలో మంత్రి పదవి నిర్వహించిన లచ్చన్నగారూ, మద్యపాన నిషేధం విషయంలో ప్రకాశం పంతులుతో విభేదించి, అవిశ్వాస తీర్మానం ప్రవేశపెట్టి, ప్రకాశం ప్రభుత్వ పతనానికి కారణభూతుడయ్యారు. . తెలంగాణా రాష్ట్ర అవసరాన్ని, ఔచిత్యాన్ని వివరిస్తూ పుస్తకం వ్రాశారు. ఇందిరాగాంధి అత్యవసర పరిస్థితి విధించినప్పుడు వ్యతిరేకించి, స్వేచ్ఛ కోసం పోరాడారు. చౌదరి చరణ్ సింగ్, జయప్రకాష్ నారాయణ, మసాని లతో కలిసి పనిచేశారు.

తెలుగు వారి రాజకీయ జీవనములో స్వాతంత్ర్యానికి ముందు, తరువాత ప్రభావితము చేసిన నాయకుడు లచ్చన్నగారు ఒక్కరే. కేవలము స్కూల్ విద్యకే పరిమితమైనా, ఆచార్య రంగా ప్రథమ అనుచరుడుగా, తెలుగులో మంచి ఉపన్యాసకుడుగా, రాజాజి ఉపన్యాసాల అనువాదకుడిగా, చరిత్ర ముద్ర వేయించుకున్న బడుగువర్గ పోరాట జీవి లచ్చన్నగారు.

సర్దార్ గౌతు లచ్చన్న: ఉత్తర కోస్తా కళింగసీమలో ఉద్ధానం ప్రాంతాన (నాటి గంజాం జిల్లా) సోంపేట తాలూకాలో , బారువా అనే గ్రామంలో ,1909 ఆగష్టు 16 వ తేదీన ఒక సాధారణ బీద గౌడ కుటుంబములో గౌతు చిట్టయ్య, రాజమ్మ దంపతులకు 8 వ సంతానంగా పుట్టాడు. లచ్చన్న తాత, తండ్రులు గౌడ కులవృత్తే వారికి కూడుబెట్టేది. ఈతచెట్లను కోత వేసి కల్లు నుత్పత్తి చేయడం, అమ్మడం చుట్టు ప్రక్క గ్రామాల్లో గల కల్లు దుకాణాలకు కల్లు సరఫరా చేయడం వారి వృత్తి. కుల వృత్తిలోకి తమ పిల్లలన్ని దించకుండా చదువులను చెప్పించాలని బారువాలో గల ప్రాథమిక పాఠశాలలో ,1916లో వాళ్ళ నాన్న చిట్టయ్యగారు బడిలో చేరిపించారు. లచ్చన్న బారువా ప్రాథమికోన్నత పాఠశాలలో 8 వ తరగతి వరకు చదివి, ప్రక్కనే ఉన్న మందసా రాజావారి హైస్కూల్లో 9 వ తరగతిలో చేరాడు. అక్కడ లచ్చన్న చదువు కొనసాగలేదు. దురలవాట్లు, చెడుసహవాసాలు కొనసాగాయి. ఫలితంగా 9వ తరగతి తప్పాడు. శ్రీకాకుళంలో లచ్చన్నను ఉన్నత పాఠశాలలో చేర్పించారు. అక్కడ జగన్నాధం పంతులుగారి ఇంటిలో ఉండి చదువుసాగించాడు. ఆ స్కూల్లో డ్రిల్ మాష్టారు నేమాని నరసింహమూర్తి శిక్షణలో జాతీయ భావాల్ని అలవర్చుకున్నాడు. విద్యార్థి జీవితంలో మార్పు జీవన విధానంలో మార్పు. ఆలోచన ధోరణిలో మార్పు, జాతి, జాతీయత అనే ప్రాథమిక రాజకీయ పాఠాల్ని నరసింహమూర్తి వద్దనే నేర్చుకోవడం జరిగింది. లచ్చన్నకు ఆనాటికి 21 సవంత్సరాలు. 1929-30 విద్యా సంవత్సరం స్కూల్ పైనల్ పరీక్షకు ఎంపికై హాజరయ్యాడు.

మెట్రిక్యులేషన్ చదువుతుండగానే 21వ ఏట గాంధీజీ పిలుపువిని , విద్యకు స్వస్తి చెప్పి స్వాతంత్ర్యోద్యమంలో దూకాడు. 1930 లో మహాత్మాగాంధీ ఉప్పు సత్యాగ్రహానికి పిలుపినిచ్చాడు. దీనికి ప్రభావితుడైన లచ్చన్న బారువా సమీపంలో ఉన్న సముద్రపు నీరుతో ఉప్పు తయారుచేసి ,ఆ డబ్బుతో ఆ ఉద్యమాన్ని నడిపాడు. విదేశీ వస్తు బహిష్కరణోద్యమంలో పాల్గొని అందరూ చూస్తుండగానే తన విలువైన దుస్తులను అగ్నికి అహుతి చేశాడు. ఉప్పు సత్యాగ్రహంలో పాల్గొంటున్నప్పుడు లచ్చన్నను అరెస్టు చేసి టెక్కలి, నరసన్నపేట సబ్ జైళ్లల్లో నలభై రోజులు ఉంచారు. కోర్టు తీర్పు మేరకు మరో నెల రోజుల శిక్షను అతను బరంపురం జైల్లో అనుభవించవలసి వచ్చింది.

1932 వ సంవత్సరంలో శాసనోల్లంఘన ఉద్యమంలో పాల్గొంటున్న లచ్చన్నను బంధించి రాజమండ్రి జైల్లో ఐదు మాసాలు ఉంచారు. రాజకీయాలకూ, సంఘసంస్కరణలకు సంబంధమేర్పరచి గాంధీజీ స్వాతంత్ర్యోద్యమాలు నడిపాడు. అందులోని భాగమే అంటరానితనం నిర్మూలన. అంటరానితనం మీద కత్తి ఝుళిపించాడు లచ్చన్న.అతను నడిపిన హరిజన సేవా సంఘాలు, చేపట్టిన హరిజన రక్షణ యాత్రలు ప్రజలను బాగా ప్రభావితం చేశాయి. బారువా గ్రామ వీధుల్లో యువజనులను వెంట వేసుకొని భజన గీతాలు పాడుతూ వెళుతుంటే గ్రామమంతా దద్దరిల్లుతున్నట్లు కనిపించేది. సవర్ణులలో ఆశ్చర్యం, హరిజనులలో ఆశలు రేకెత్తించేవి. రాత్రి పాఠశాలలు నిర్వహించి బడుగు వర్గాల విద్యాభివృద్ధికి అతనెంతో కృషి చేశాడు. హరిజనులకు దేవాలయాలలో ప్రవేశం కలిగించాడు. లచ్చన్న చేసిన ఆర్థిక సహాయంతో కుశాగ్రబుద్ధులైన ఎందరో హరిజన విద్యార్థులు ఉన్నత స్థానాల నలంకరించారు.

ఆచార్య రంగాతో లచ్చన్న స్నేహం రాష్ట్ర రాజకీయాలలో ఒక నూతన శకాన్ని ఆరంభించింది. మహాత్మాగాంధీ, పండిట్ నెహ్రూ గురు శిష్య సంబంధం లాంటిదే రంగా- లచ్చన్నల సంబంధం. నిడుబ్రోలులో రంగా స్థాపించిన రైతాంగ విద్యాలయంలో తొలిజట్టు విద్యార్థులలో లచ్చన్న ఒకడు. ఆ విశ్వవిద్యాలయంలో పొందిన శిక్షణ అతని భావి జీవితానికెంతో ఉపకరించింది. జమీందారీ వ్యతిరేక పోరాటానికి ఆయనను నడుము బిగించేటట్లు చేసింది. 1935లో రాష్ట్రంలో కాంగ్రెస్ సోషలిస్టు పార్టీ శాఖ ఏర్పడినప్పుడు దానికి అతను సభ్యుడుగా ఎన్నికయ్యాడు. ఆ రోజుల్లో రైతు సంఘాలు కాంగ్రెస్ పార్టీలోని అంగాలే. 1939లో త్రిపురలో జరిగిన అఖిలభారత కాంగ్రెస్ మహాసభ, కిసాన్ సభలను ఆంధ్రలోని పలాసాలో జరపాలని తీర్మానించారు. రాహుల్ సాంకృత్యాయన్ ఈ సభలకు అధ్యక్షత వహించాడు. ఈ సభలు జయప్రదం కావడానికి ప్రధానకారకుడు లచ్చన్నే. దీనితో ఆయన పేరూ, ఆయన కార్యదీక్ష దేశమంతటా తెలిసింది. లచ్చన్న అనేక కిసాన్ ఉద్యమాలు నడిపి ఆ రోజుల్లో జమీందార్ల పక్కల్లో బల్లెంగా తయరైనాడు.

స్వాతంత్ర్యోద్యమంలో చివరి పోరాటం క్విట్ ఇండియా ఉద్యమం. 1942లో జరిగిన ఈ ఉద్యమంలో పాల్గొన్న లచ్చన్నను ప్రభుత్వం అతి ప్రమాదకరమైన వ్యక్తిగా గుర్తించి, ఆయనను పట్టి యిచ్చిన వారికి పదివేల రూపాయల బహుమతిని ప్రకటించింది. చివరకు ప్రభుత్వమే అతనిని బంధించి మూడేళ్ళు జైల్లో ఉంచి 1945 అక్టోబరులో విడుదల చేసింది. ఆనాటి నుంచి లచ్చన్న ఆంధ్ర అగ్రనాయకులలో ఒకరైనాడు. 1947లో లచ్చన్న ఇండియన్ నేషనల్ ట్రేడ్ యూనియన్ కాంగ్రెస్ కు రాష్ట్ర శాఖ అధ్యక్షుడయ్యాడు.

1950లో ఆచార్య రంగా కృషి కార్ లోక్ పార్టీని స్థాపించినప్పుడు అందులో లచ్చన్న ప్రధాన పాత్ర పోషించాడు. 1953 అక్టోబరు 1 న ప్రత్యేక ఆంధ్ర రాష్ట్రం ఏర్పడింది. మద్రాసు ప్రభుత్వం నుంచి ఆంధ్రులకు రావలసిన ఆస్తుల విభజనను పరిశీలించడానికై ఏర్పడిన ఆంధ్రసంఘంలో కాంగ్రెస్ నుంచి నీలం సంజీవరెడ్డి, ప్రజా పార్టీ నుంచి తెన్నేటి విశ్వనాధం, కృషి కార్ లోక్ పార్టీనుంచి లచ్చన్న సభ్యులు. ప్రకాశం పంతులు మంత్రివర్గంలోనూ, బెజవాడ గోపాలరెడ్డి మంత్రివర్గంలోనూ, లచ్చన్న మంత్రిగా పనిచేశాడు.

1961లో రాజాజీ స్వతంత్ర పార్టీ ఏర్పాటు చేశాడు. ఆ పార్టీకి ఆంధ్రప్రదేశ్ రాష్ట్రశాఖకు సర్దార్ గౌతు లచ్చన్న అధ్యక్షుడు. 1978లో లచ్చన్న ఆంధ్రప్రదేశ్ శాసనసభలో అధికార ప్రతిపక్ష నాయకుడుగా ఉన్నాడు. పభ్లిక్ అక్కౌంట్స్ ఛైర్మన్ గా ఆ రోజుల్లో పనిచేశాడు. కొంతకాలం బహుజన పార్టీలో పనిచేసిన లచ్చన్న ఆ తరువాత అన్ని రాజకీయ పార్టీలతో తెగతెంపులు చేసుకుని, పార్టీలకు అతీతంగా బడుగు వర్గాల సంక్షేమానికి కృషి చేస్తూ వచ్చాడు.

మన దేశంలో సర్దార్లంటే ఇద్దరే. ఒకరు సర్దార్ వల్లభభాయి పటేల్. మరొకరు సర్దార్ గౌతు లచ్చన్న. సర్దార్ అంటే సేనాని. స్వాతంత్ర్యోద్యమ పోరాట వీరునిగా ఎన్నో ఉద్యమాలు నడిపిన కురువృద్ధుడు సర్దార్ గౌతు లచ్చన్న. జమీందారీ వర్గాల వ్యతిరేక పోరాట వీరునిగా ప్రజాహృదయాలలో ఆయన స్థానం చెక్కు చెదరనది

జోహార్ సర్దార్ గౌతు లచ్చన్న గారూ..
సాధిస్తాం సర్దార్ గౌతు లచ్చన్న ఆశయాలను..

సామాజిక స్పృహ , చైతన్యం ,పోరాటం సన్నగిల్లిన సమాజాన్ని కదిలించేందుకు మహాత్మా...మళ్ళీ పుట్టు..🙏🙏🙏🙏🙏🙏

*బీసీలకు కూడా "అట్రాసిటీ" చట్టం కావాలి*
---------------------------------------------------------------

1 దీన్ని ఎలా, ఏ రూపంలో అడగడం బాగుంటుంది అని ఆలోచించడం కంటే కూడా, ఎంత బలంగా అడుగుతున్నాం, దానికి ఏ ఆధారాలు చూపుతూ అడుగుతున్నాం అనేది ముఖ్యం.

2. బీసీల మీద, ఎస్సీ ఎస్టీ అట్రాసిటీ చట్ట ప్రయోగ ప్రభావం ఎలా, ఏవిధంగా దుర్వినియోగం తో నడుస్తుంది అనేది, ప్రధాన మైన కోణం. ఈ చట్టం పలు విధాల బీసీల మీద, చాలా వరకు దుర్వినియోగం అవుతోంది, బీసీలను అన్యాయంగా రకరకాలుగా హింసించి, అణగదొక్కడానికే వాడుతున్నారు, అనేది దశాబ్దాలుగా బీసీల అనుభవం. ఈ పరిస్థితిలో ఖచ్చిత మైన మార్పు రావడం ఎంతైనా అవసరం. *"ఎంకి పెళ్ళి సుబ్బి చావుకి కారణం కాకూడదు."*

3. అయితే బలమైన ఉద్యమం జరగ కుండా ఈ పరిస్థితిలో మార్పు వచ్చే అవకాశం అంతగా లేదు. ఎందుచేతనంటే ఎస్సీలు నేడు ఒక బలమైన శక్తిగా మార్పు చెందారు. బీసీలు మంది ఎక్కువ అయినా, అంతర్గత ఐక్యత, పరస్పర అవగాహన, వీరిమధ్య ఇంచుమించు నామమాత్రం. ఎస్సీల పరిస్థితి దీనికి పూర్తి భిన్నమైనది. బీసీలతో పోలిస్తే, మంది తక్కువే అయినా, వారి మధ్య అవగాహన, ఐక్యత మెండు. రాజ్యాంగం, చట్టాలు, సమాజంలో ఉన్న సానుభూతి, బీసీల కంటే ఎస్సీ ఎస్టీలకే ఎక్కువ అనుకూలంగా ఉంటాయి. ఈ వాస్తవాల్ని మనం విస్మరించలేము. ఉన్న సదుపాయం పలుచన కావడం కాని, లేకుండా పోవడానికి కాని ఎవరూ అంత తేలిగ్గా ఒప్పుకోరు.

4. ఎస్సీ ఎస్టీ అట్రాసిటీ చట్టం, ఏవిధంగా దుర్వినియోగం అవుతోంది, ఏమేరకు దుర్వినియోగం అవుతోంది అనే దాన్ని రుజువు చేయడానికి అవసరమైన గణాంకాలను, ప్రాంతాల వారీగా, వీలైతే జిల్లాల వారీగా సేకరించడం మొదట జరగాలి. ఈ వాస్తవాల పునాది లేకుండా, బీసీలు సఫలీ కృతం కాలేరు. బీసీల ఈ ప్రయత్నానికి ఓసీల సహకారం కూడా కొంతమేర దొరికే అవకాశం ఉంది. ప్రతీ దుర్వినియోగ సందర్భానికి సంబంధించిన వివరాలను కూడా క్లుప్తంగానైనా సేకరించాలి. ఈ సమాచారంతో అధికారులకు నివేదిక లు ఇస్తూ, దీనికి పరిష్కారం అర్ధించాలి. తరువాత అడుగులో ప్రభుత్వాన్ని కోరాలి. ఒత్తిడి చేయాలి. అవసరం అయితే వీధి పోరాటాలకు దిగాలి.

5. ఈ చట్టం దుర్వినియోగానికి పరిష్కారంగా, అనేక విధాలుగా అభ్యర్ధించవచ్చు. ముఖ్యంగా

*I*. అమలు చేయడానికి వాడుకలో ఉన్న పద్ధతిలో, బీసీలను వేధింపులకు గురికాకుండా, అవసరం అయిన మార్పులు తీసుకు రావడం.

*II*. బీసీలు కూడా "కుల వ్యవస్థ" బాధితులే కాబట్టి, ఈ చట్టం నుండి వారికి పూర్తి మినహాయింపు కాని, అవసరం అయినంత మేర మినహాయింపు కాని జరగాలి.

*III*. ఎస్సీ, ఎస్టీ అట్రాసిటీ చట్టం లాంటి చట్టాన్నే బీసీల రక్షణ కోసం మరో చట్టం తేవాలి. ఈ రెండు చట్టాల మధ్య ఇరు వర్గాలకు న్యాయం జరిగేలా, ఎవరికీ అన్యాయం జరగని విధంగా అనుసంధానం, సమన్వయం ఉండాలి.

6. ఏ వర్గానికైనా ఈ చట్టాలు, రక్షణ కవచాలుగా మాత్రమే ఉండాలి కాని, ఇతర వర్గాలను, వేధించి సాధించే విధంగా ఇవి దిగజారడానికి సావకాశం ఉండకూడదు.

K. KondalaRao
16 - 04 - 2023

*అతి ముఖ్యమైన బీసీ తక్షణ అవసరాలు*
--------------------------------------------------------------

ఈ దేశంలో వేలాది బీసీ కులాలకు పరిష్కారం కావలసిన కొన్ని కీలక సమస్యలు ఉన్నాయి. వాటిలో కొన్ని:

1. *Caste Census*
1931 తర్వాత కులాల వారి జనాభా లెక్కలు అధికారికంగా అందుబాటులో లేని కారణం చేత, దేశ జనాభాలో సగం పైనున్న బీసీలు, సామాజిక ఆర్థిక రాజకీయ రంగాల్లో, దామాషా అవకాశాలకు చాలా దూరం అవుతున్నారు. అందుచేత జరగబోయే జనాభా లెక్కల సేకరణ సందర్భంగా, "కుల గణన" లేక, "Caste Census" తప్పక చేబట్టాలి. ఈ మేరకు తమ ఎలక్షన్ మేనిఫెస్టో లలో "వాగ్దానం" చేయని పార్టీలకు బీసీలు ఓటు వేయకుండా తగిన గుణపాఠం చెప్పి తీరుతారు.

2. *Justice Rohini Commission Report to be published at the earliest.*

2017 లో రోహిణి కమిషన్ (మోడీ ప్రభుత్వం నిర్ణయం) నియామకం జరిగి, 5 సంవత్సరాలు దాటినా ఈ నాటికీ వారు రిపోర్ట్ సమర్పించ లేదు. దేశ జనాభాలో సగం పైనున్న బీసీలు, తమకు ఇంతవరకు జరగని "సమ న్యాయం" లేక పంపిణీ న్యాయం, (Distributive Justice) కొంతైనా జరుగుతుందని ఆశించిన బీసీలకు తీవ్ర నిరాశే మిగులుతుంది. దీనికి అవసరం అయిన గణాంకాలు అందుబాటులో లేక పోతే, రోహిణి కమిషన్ వారు సూచించినట్లే, జాతీయ స్థాయిలో, గతంలో మండల్ జరిపిన సర్వేలాంటిదే, ఇంకా మెరుగైన, విస్తృతమైన స్థాయి సర్వే, తక్షణం మరోసారి జరిపించి, ఏ కులం పరిస్థితి ఏంటో గుర్తించి, "రోహిణి కమిషన్ నివేదిక సమర్పణ" జరిగేలా, ప్రభుత్వం తక్షణం చర్యలు తీసుకోవాలి. "జాతీయ బీసీ జాబితా వర్గీకరణ జరగని కారణంచేత" 1993 నుండి, 30 సంవత్సరాలుగా, దేశ వ్యాప్తంగా, సుమారు, 2000 బీసీ కులాలు, ఎటువంటి అవకాశాలు దొరక్క, దొరికిన అనేక కులాల, నామ మాత్ర అవకాశాలకే పరిమితం అయి పోయి, తీవ్రంగా అన్యాయం అయిపోతున్నారు. దీనికి తక్షణ పరిష్కారం కావాలి. లేని పక్షంలో దశాబ్దాలుగా గూడు కట్టుకుంటున్న అసంతృప్తి తీవ్ర పరిణామాలకు దారి తీయవచ్చు.

3. *Political Reservations in Legislature to OBCs, on par with SC and STs is an immediate and imminent need.*

చట్టసభల్లో రిజర్వేషన్లు లేని కారణం చేత, గత ఏడు దశాబ్దాలుగా బీసీలు రాజకీయ రంగంతో సహా అన్ని రంగాల్లో దారుణంగా నష్టపోయారు. దీనికి తక్షణ పరిష్కారం కావాలి.

4. *Reservation in Promotion to OBCs with immediate effect is a must.*

బీసీలకు ప్రమోషన్లలో రిజర్వేషన్లు లేని కారణం చేత, గత మూడు దశాబ్దాలుగా, ఉన్నత ఉద్యోగాల్లో బీసీల ప్రాతినిధ్యం అంతంత మాత్రం గానే ఉండగా, తీవ్ర అసమ తుల్యతతో, బీసీలు, పాలనా వ్యవస్థలో, ఆధిపత్య కులాలకు దళితులకు మధ్య బాగా బాగా నలిగిపోతున్నారు.

5. *Special Budgetary Allocation of not less than 25% to OBCs for ensuring their Economic Empowerment is much needed.*

గ్రామీణ ప్రాంతాల్లో, కుల వృత్తులు నాశనం అయిపోతున్న కారణం చేత, ప్రత్యామ్నాయ ఉపాధి అవకాశాలు మృగ్యం అయి బీసీలు, ఆర్థిక సాధికారతకు దూరం అవుతున్నారు. దీనికి పరిష్కారంగా, కేంద్ర ప్రభుత్వ బడ్జెట్ లో, కనీసం 25% బీసీల ప్రత్యేక అవసరాలకు కేటాయించాలి.

6. *Seperate Ministry for OBCs in the central Cabinet is essential to ensure OBC all round development.*

కేంద్ర మంత్రి వర్గం నిర్మాణంలో బీసీల కోసం ప్రత్యేక శాఖను తక్షణం ఏర్పాటు చేయాలి.

7. *Immediate Constitution Amendment to ensure proportional representation of OBCs in all Panchayat Raj positions across the Nation, is needed.*

పంచాయతీ రాజ్ వ్యవస్థ లో, అన్ని స్థాయిల్లో దామాషా అవకాశాలు, బీసీలకు దొరికే లా తక్షణం రాజ్యాంగ సవరణ జరగాలి.

*న్యాయ మైన ఈ డిమాండ్ లలో దేన్ని ప్రభుత్వం పట్టించు కోకపోయినా, నీరు కార్చే ప్రయత్నం కొనసాగించినా, రాబోయే ఎన్నికల్లో పాలక పక్షానికి సరైన గుణపాఠం చెబుతానని ప్రతీ బీసీ తక్షణం శపధం చేయాలి.*

ఈ సందేశం ప్రతీ బీసీకి అందేలా ఒక్కొక్కరూ కనీసం 10 మందితో పంచుకోవాలి. ఐదారు గౄపులకు ఫార్వర్డ్ చేయాలి.

కొండలరావు
10-3-2023

*అన్నివిధాల, గందరగోళంలో చిక్కుకొని, దామాషా హక్కులకు దూరమై, ఆధిపత్య కులాలకు ఊడిగం కొనసాగిస్తున్న బీసీల తక్షణ కర్తవ్యం ఏంటి ?*
------------------------------------------------------------

నిజమే. ఈ ధోరణి సుస్పష్టం. బీసీల దామాషా హక్కుల విషయంలో ఆధిపత్య కులాల ఆధ్వర్యంలో నడుస్తున్న ప్రభుత్వాల విధానాలు, వైఖరులు, గత ఏడు దశాబ్దాల పైనుండి ఇలానే ఉంటున్నాయి.

ఇదే కాకుండా దొంగ సర్టిఫికెట్ ల సహాయంతో, బీసీల అవకాశాలను కొల్లగొడుతున్న ఓసీ కులాల విషయంలో ప్రభుత్వాల ఉదాసీనత కూడా బీసీల అవకాశాలకు నిత్యం గండి కొడుతూనే ఉన్నాయి.

ఇటువంటి వాతావరణంలో బీసీలు తమ హక్కుల విషయంలో ఇంతకాలం నష్టపోతూనే ఉన్నారు. మోస పోతూనే ఉన్నారు. ఈ పరిస్థితి నుండి బయట పడడానికి, బీసీలు తమ దామాషా అవకాశాలు సాధించుకోడానికి, ఒకే మార్గం కనబడుతుంది.

ఆ మార్గం, బీసీల నాయకత్వంలో రాజ్యాధికార సాధన. దీనికి, బీసీల మధ్య అంతర్గత ఐక్యత చిక్కబడ వలసిన అవసరంతో బాటు, తమ కులం విషయంలో మాత్రమే కాక, మొత్తం బీసీ వర్గం విషయంలో కూడా, అవగాహనతో, నిజాయితీ తో వ్యవహరించ గలిగిన నిస్వార్థ నాయకత్వ నిర్మాణం కూడా అవసరం.

ఈ ఆలోచనలు బీసీ జనాల మధ్య, ముఖ్యంగా గ్రామీణ ప్రాంత బీసీల మధ్య విస్తృతంగా ప్రచారం జరిగాలి. ఆధిపత్య కులాల పార్టీల పక్కన చేరి ఒకరిద్దరికి పదవులు సంపాదించుకొనే ధోరణిని పక్కన పెట్టి, జాతి ప్రయోజనాల సాధనకు వీలు కల్పించే, సొంత రాజకీయ వేదిక నిర్మాణం వైపు, ఎదిగిన రాజకీయ బీసీ నాయకులతో బాటు, ఎదగాలని, ఆరాట పడుతున్న బీసీ యువ నాయకులు కూడా దృష్టి కేంద్రీకరించి శ్రమించవలసిన అవసరం కూడా ఉంది. అటువంటి ప్రయత్నానికి, నాయకత్వానికి, బీసీ జాతి ఖచ్చితంగా బ్రహ్మ రధం పడుతుంది. మద్దత్తుగా నిలుస్తుంది. ఈ దిశగా బీసీ జాతిని, ప్రణాలికా బధ్ధంగా చైతన్యం చేయాలి. సమాయత్తం చేయాలి. ముందుకు కదలాలి.

కొండలరావు
22-12-2022

If the world's population is 900 crores, only 120 crore Indians are affected by eclipses! Another strange thing.. God is protected from eclipse only in India!!

Regards
Tata Sivaiah

1. ఆంధ్రప్రదేశ్ వెనుకబడిన తరగతుల కమిషన్ వారు, తమ ప్రకటన నం. 02/2021 తేదీ 12-10-2021 ద్వారా ఒక బహిరంగ విచారణ కార్యక్రమాన్ని ప్రకటించారు. ఈ ప్రకటన ప్రకారం, 25-10-2021 నుండి 29-10-2021 వరకు, ఆయా తేదీలలో నిర్దిష్ట సమయాల్లో, శ్రీకాకుళం, విజయనగరం, విశాఖపట్నం మూడు చోట్ల ఈ విచారణ కార్యక్రమం జరుగనుంది. ఏయే అంశాల మీద ఈ బహిరంగ విచారణ జరగనుంది, అనే వివరాలు ఈ ప్రకటనలో పొందు పరచడం జరిగింది. వాటిలో బహు కొద్ది కులాలను నూతనంగా జాబితాలో చేర్చే అంశం, గౄపు మార్పిడి ఆంశం ఉన్నాయి. వీటితో బాటు, తమను అత్యంత వెనుకబడిన తరగతులుగా గుర్తించి, ప్రత్యేక గౄపులో ఉంచాలని, జాబితాలో ఉన్న 23 కులాల నుండి అందిన అభ్యర్దనల పరిశీలన అంశం కూడా ఉంది. ఈ 23 కులాల్లో, 11 కులాలు, గౄపు "ఏ" నుండి, 6 కులాలు, "బీ" నుండి, 4 కులాలు "డీ" నుండి, 2 కులాలు "ఈ" నుండి ఉన్నాయి. అత్యంత వెనుకబడిన తరగతులుగా గుర్తించి ప్రత్యేక గౄపులో ఉంచాలని కోరుతున్న 23 కులాల అభ్యర్ధనల విషయంలో, రాష్ట్ర వ్యాప్తంగా అనేకమంది బీసీల్లో చాలా గందరగోళం ఉన్నట్లుగా, వారు ఆందోళన పడుతున్నట్లుగా, మమ్మల్ని సంప్రదిస్తున్న అనేక మంది నుండి అర్ధం అవుతుంది.

2. అటువంటి వారి ఉపకరణ కోసం విషయాన్ని లోతుగా పరిశీలించిన తర్వాత, తమ అభ్యంతరాలను కమిషన్ ముందు ఉంచడానికి పనికి వచ్చే ఒక నమూనా అభ్యంతర పత్రాన్ని, తెలుగులోను, ఇంగ్లీషులో కూడా, రూపొందించడం జరిగింది. అవసరం అనుకొన్న వారు వీటిని ఉపయోగించు కొని కమిషన్ ముందు తమతమ వాదనలను వినిపించు కోవచ్చు. కమిషన్ ప్రకటనతో బాటు, నమోనా అభ్యంతర పత్రాలను కూడా ఇక్కడ జత చేస్తున్నాం.

"కుల గణన కాదు, వర్గ గణన కావాలి" అనే శీర్షికతో 20-10-2021 నాటి ఆంధ్ర జ్యోతి దినపత్రిక లో ప్రచురితమైన రంగనాయకమ్మ గారి వ్యాసం పై స్పందన
-----------------------------------------------------------------

*చరిత్ర తెలిసిన మీరు, కుల గణనను కాదనకండి. కాదంటే, కుల బాధితులకు ద్రోహం అవుతుంది.*

"కుల గణన కాదు" అనడం, జాతి జీవనం మీద కుల ప్రభావాన్ని స్పష్టంగా అంచనా వేయ గలిగిన, రంగనాయకమ్మ గారి లాంటి పరిణితి గల ప్రముఖులు మాట్లాడ్డం, చాలా వింతగా ఉంది. అది సరికాదు.

అసమానంగా సమాజం నిర్మాణం కావడానికి, ప్రధాన కారణం కులం అనే వాస్తవానికి ఈ కోవ మేధావులు, వర్గ వాదంతో ముసుగు వేయగలరా ? వర్గ వాదంతో కుల ప్రభావాన్ని అప్రధానం చేయి గలరా ? అటువంటి ప్రయత్నాలు కొనసాగించడం ఎవరి లబ్ధి కోసం ? ఆధిపత్య శక్తుల లబ్ధికోసం కాదా ?

అది కాదు అన తలచుకొంటే, ఇప్పటికే తమ దామాషాకు మించి, నాలుగైదు రెట్లు అవకాశాలను సొంత చేసుకొంటున్న ఆధిపత్య శక్తులకు, హాస్యాస్పదంగా ధ్వనించే వారిలోని "ఆర్ధిక వెనక బాటు తనం" సాకుతో, రిజర్వేషన్ల పేరుతో, అదనంగా మరో 10% అవకాశాలు కల్పించడాన్ని, రంగనాయకమ్మ గారు ఏమేరకు వ్యతిరేకించారో సమాజం చూసింది.

వారికి కులం గురించి ప్రస్తావించడం ఇష్టం లేకపోవచ్చు. నచ్చక పోవచ్చు. వారు నమ్మిన సిద్ధాంతానికి పొంతన కుదరదు అని భావిస్తే భావించి కూడా ఉండ వచ్చు.

అయితే, ఈదేశ జీవనాన్ని సర్వ విధాల ప్రభావితం చేస్తున్నది, కులాన్ని మించిన మరో నిజం లేదు అనే వాస్తవం తెలియని మేధావులు ఈ స్థాయిలో మరెవరైనా ఉంటారా ? ఉండ కూడదు. అయితే, అది కుల బాధితులకు అర్ధమైనంతగా కులవ్యవస్థ లోని లబ్ధి దారులకు అర్థం కాదు అనేదే వాస్తవంలా కనపడుతుంది. ఈ దేశ జీవనాన్ని, "కులం" ప్రమాణంలో మాత్రమే వివరించడానికి, అర్థం చేసుకోవడానికి వీలైనంతగా, వర్గం ప్రమాణంలో అర్థం చేసుకోవడం కుదరదు. కులంలో ఉన్న వర్గం, వర్గవాదులకు కనబడదా ? లేక అది సరిపోదా ?

దేశ జీవనాన్ని అన్నివిధాలా, అన్నిరంగాల్లో, నిత్యం నిర్ణయాత్మక గా ప్రభావితం చేస్తున్న "కులం" నిజాన్ని చూసి కులవ్యవస్థ లబ్ధిదారులు తొమ్మిది దశాబ్దాలుగా భయపడుతున్నారు. అందుచేతే కుల గణన ను, తొమ్మిది దశాబ్దాలుగా, ముఖ్యంగా, స్వాతంత్ర్యానంతరం ఏడు దశాబ్దాలుగా, ప్రత్యక్షంగానూ పరోక్షంగా నూ వ్యతిరేకిస్తూ వస్తున్నారు. రంగనాయకమ్మ గారు కూడా దీనికి అతీతం కాలేక పోతున్నారు. ఈ వాస్తవం చాలు, సమ సమాజ నిర్మాణానికి, కుల గణన అవసరాన్ని నొక్కి చెప్పడానికి.

సమ సమాజ నిర్మాణం జరగాలన్నా, కులవ్యవస్థ నిర్మూలన కావాలన్నా, కొనసాగుతున్న, అసమాన విలువలకు, అవకాశాలకు అద్దం కావాలన్నా, కుల గణన జరిగి తీరాల్సిందే. కుల గణన కేవలం, బీసీ కులాలకే పరిమితం కావాలనడం, సమస్య స్వరూపం పూర్తిగా అర్ధం కాకే, కొందరు బీసీ నాయకులు అమాయకంగా కోరుతున్నారు. కులం కలిగిన ప్రతీ పౌరుణ్ఢి, ఆధిపత్య కులాలనుండి అంటరాని కులాలుగా ఉండిన అన్ని కులాలు, కుల గణన చట్రంలో ఉండితీరాలి. ఎవరి పరిస్థితి ఏంటో సమాజానికి తెలియ వలసిన నిజం. అది సర్వ కుల గణన ద్వారా మాత్రమే వీలవుతుంది. అసమానతల సమాజం, రాజ్యాంగ లక్ష్యం అయిన సమసమాజం గా రూపాంతరం చెందాలంటే, కుల గణన తప్పని సరి. పుండుని కప్పి పెట్టి చికిత్స చేయలేం.

కుల గణన ను వ్యతిరేకిస్తుంది, అంతర్గతంగా సమన్యాయం కిట్టని, సామాజిక న్యాయం ఇష్టం లేని, సమ సమాజ నిర్మాణం తట్టుకో లేని, ఆధిపత్యానికి ఆరాటపడే శక్తులే తప్ప నిజమైన అభ్యుదయ వాదులు, మానవీయత ను నిజంగా జీర్ణించు కున్న వారు ఆ తప్పు చేయలేరు.

కొండలరావు,
న్యాయ వాది, సామాజిక న్యాయవాది
22-10-2021

*బీసీల్లారా 2023 లో మీ రాజకీయం ఏంటీ ?*
---------------------------------------------------------------

కమ్మలకు చంద్రబాబు నాయుడు
రెడ్లకు జగన్మోహన్ రెడ్డి
కాపులకు పవన్ కళ్యాణ్
మరి మీకు ? ఇంకా ఏ, దిక్కూ లేదా ?

ఈ పరిస్థితికి కారణం,
మీరా, మీ నాయకత్వమా ?
సవ్యమైన నాయకత్వం నిర్మాణం
కాక పోవడానికి కారణం మీరు కూడా కాదా ?

సిగ్గు పడండి
ఇప్పటికైనా బుధ్ధి తెచ్చుకోండి
సరైన నాయకత్వాన్ని నిర్మించు కోండి.
మీ ఓట్లు మీకే వేసుకోవడం నేర్చుకోండి.

ఆధిపత్య కులపార్టీలకు, దళితులకు
నిత్యం మీరు కరివేపాకులేనా ?
ఏడు దశాబ్దాల అనుభవం కూడా
సొంత రాజకీయ వేదిక నిర్మాణం మీకు నేర్పలేదా ?

సొంత అవకాశాల వెంపర్లాటే తప్ప,
జాతి అవకాశాలు మంటకలుస్తున్నా మీకు పట్టదా ?
ఫూలే, అంబేద్కర్, పెరియార్, కన్షీరాం
వీరి నుండి మీరు నేర్చుకుంది ఏమీ లేదా ?

కులంలోనే అంతర్గత కుమ్ములాటలు,
బీసీ కులాల మధ్య కనబడని కనీస అవగాహన
ఇంకెంత కాలం కావాలి మీరు ఏకం కావడానికి ?
ఒకటిగా ఏకమై బలమైన శక్తిగా ఎదగడానికి ?

కొండలరావు
15-10-2021