Señor Sto. Niño de Mandaluyong

Panalangin sa Araw-Araw

Señor Sto. Niño de Mandaluyong, alam namin ang kagandahan Mo ay nakakahalina sa puso ng mga tao na nakakamalas sa Iyo. Hinihiling namin sa Iyo na pag-alabin yaring puso upang ibigin ka naming nang walang pagmamaliw; at sa gayo’y maging marapat kami sa kaluwalhatian ng langit.

Amen.

Señor Sto. Niño de Mandaluyong, gabayan Mo nawa ang aming araw at pamilya

Panalangin sa Mahal na Señor Sto. Niño de Mandaluyong sa ika-122 Taong Pagkakatatag ng Iglesia Filipina Independiente

O Señor Sto. Niño de Mandaluyong, kami’y lumalapit sa iyo sa pagdiriwang ng ika-122 anibersaryo ng Iglesia Filipina Independiente. Gabayan Mo po ang aming simbahan sa paglalakbay nito patungo sa kapayapaan at pagkakaisa. Ipinagpapakumbaba naming hinihiling ang Iyong patnubay sa lahat ng mga lider at miyembro ng aming komunidad. Palakasin Mo kami sa pananampalataya at pagmamahal, at bigyan ng liwanag ang aming mga desisyon at hakbang. Sa Iyong banal na pangangalaga, nawa’y magpatuloy ang aming misyon na maglingkod sa Iyo at sa aming kapwa.

Mahal na Señor Sto. Niño de Mandaluyong, maawa Ka nawa sa Iyong Iglesia

PAGDEDEBOSYON SA MAHAL NA SEÑOR SANTO NIÑO DE MANDALUYONG
Unang Biyernes sa Buwan

Panginoong Hesus, Señor Santo Niño de Mandaluyong, aming Diyos at Tagapagligtas, pinili Mong magpakumbaba at magkatawang-tao upang kami'y bigyan ng kaligtasan.

Turuan Mo po kaming maging katulad mo sa lahat ng bagay upang kami nawa ay humantong sa pangako Mong paraiso.

Gawin Mo po na ang aming mga puso ay mapuspos ng Iyong espiritu, upang gaya ng mga batang kinalugdan Mo sa Ebanghelyo, kami ay maging payak, mapayapa, mapagpatawad, makatarungan, mapagmahal sa bayan, matulungin, mapagkumbaba, at masunurin sa kalooban ng Ama sa langit.

Isinusuko po namin sa Iyo ang aming buhay at pagkatao. Patawarin Mo po kami sa aming mga kahinaan at pagkukulang. Gamitin Mo po kaming mga instrumento Mo sa pagpapalaganap ng iyong kaharian dito sa lupa. Amen.

Señor Santo Niño de Mandaluyong, Maawa Ka sa amin.