Knollwood United Methodist Church

Pulelulu, Nōvema 6: Lau Folofola – Ma’ake 12: 38-40.

Ki’i Ama: Ma’ake 12: 38a, “Pea ‘i he’ene faiakó na’á ne pehē, ‘Mou faka’ehi’ehi mei he kau sikalaipé.”

Pou ‘Ao: Ko e kau sikalaipé ko e kakai ia na’á nau fatongia ‘aki ‘a hono faka’uhinga’i ‘o e Laó mo faiako ‘aki ki he kakaí. ‘Oku nau kau ‘i he kau Taki ‘o e Lotu Temipalé pea ‘oku faka’apa’apa’i kinautolu ‘i he nofo ‘a e sosaietí ‘o tatau pe mo e Lotú. Na’e tala pe ‘e honau teuteú ‘a honau mahu’ingá mo honau tu’unga mā’olunga ‘i he nofo ‘a e sosaietí. Ko e ngaahi Kātoangá, ko kinautolu ia ‘oku nau me’a ‘i he Tepile mu’á pea kapau na ko ha ‘Ilo Kava ‘o hangē ko kitautolu ‘i Tongá, ‘oku mahino pe ko kinautolu ‘e ‘i he Olovahá. ‘Oku hiki ‘e Ma’ake ‘i he’ene Kōsipelí ko e taha eni ‘o e ngaahi Kulupu ‘o e kau Taki ‘i he Lotu Temipalé na’a nau fakafepaki’i lahi ‘a Sīsū. ‘I he vahe ‘uluaki pē ‘oku feinga ai ‘a Ma’ake ke ne fakafaikehekehe’i ‘a e mafai mo e poto ‘o Sīsū mei he kau Sikalaipé. ‘I he vahe ua veesi 6 ‘oku ‘asi ai na’e fehu’ia ‘e he kau Sikalaipé ‘a e ‘uhinga ‘o e kai fakataha ‘a Sīsū mo e kau tānaki tukuhaú mo e kau fai angahalá. ‘I he vahe 11 na’e fehu’ia ai ‘e he kau Sikalaipé ‘a e mafai ‘oku fai ‘aki ‘e Sīsū ‘ene ngāué. ‘Oku mālie ‘a e tu’u ‘a e kau Taki Lotu Temipalé - kau Matu’á, Falesi mo e kau Sikalaipe, he neongo ‘enau kehekehe ‘i he’enau tuí, ‘oku nau taha ‘i hono fakafepaki’i ‘o Sīsū. ‘Oku mahu’inga kia kitautolu he ‘ahó ni ke tau tokanga ‘aupito he ‘oku hoko ‘a e fakafepaki na’e fai ‘e he kau Taki ‘o e Lotu Temipalé ‘o kau ai ‘a e kau Sikalaipe ‘i hotau Ki’i Ama ki he ‘ahó ni, ‘i hono faka’ai’ai ‘i he ta’u eni ‘e 2,000 tupu ‘a hono fehi’anekina’i ‘o e kau Siú (antisemitic). Ko e me’a ke tau mahino’í, ko e fepaki pe eni ‘a e Siu na’e hingoa ko Sīsū mei Nasaleti pea na’e ‘ikai hano tu’unga ‘i he Lotu faka-Siu mo e kau Taki na’á nau fatongia ‘aki ‘a hono malu’i ‘o e Ouau mo e Lotu na’á nau tupu hake aí. Pe ko e hā e ‘uhingá, ka ko e me’a ‘oku fakamahino’i mai ‘e Ma’aké, na’e ‘ikai ke fakatokanga’i ‘e he kau Taki Lotu ‘a hono kātoi ‘e Sīsū pea mo ‘ene fakamu’omu’a mo mo’ui ‘aki ‘a e ‘ofá ‘a é ‘oku nau malanga’i mo ako ‘aki he ‘aho kotoá. Ko e helo ‘o e feinga ki he Totonu ‘a e Tangatá / Fefiné (Civil Rights) ‘i ‘Ameliká ni, Martin Luther King Jr., na’á ne fai e talanoa ki he feinga ‘a e kau ‘Uli’uli ke nau kau fakataha mo e kau palangi ‘i hono ngāue’aki e pasi ki he fefononga’aki (public bus). Na’e pehē ‘e King, na’e ‘ikai ha taha ‘i he kau Pālangí te ne tokoni’i e kau Pālangí ke nau mateuteu ki ha taimi ‘e hoko ai ha liliu ki ha kau mai ‘a e kau ‘uli’uli ki he heka pasí. Na’e tatau pe mo e kau Faifekau mo e kau Taki ‘o e ngaahi Siasi ‘o e kau Pālangi he ‘ikai mateuteú. ‘Oku ako’i kitautolu ‘e he hisitōliá ki he taimi na’a tau tali ai ha ‘ofa pea mo fakasitua’i ai. ‘Oku ako’i kitautolu ke tau fili ‘a e me’a ‘e sai kia kitautolu fakafo’ituitui. Ko Sīsū na’e kehe ia. Ko fē ha tapa ‘i ho’o mo’uí ‘okú ke ongo’i ai ‘oku ui koe ‘e he ‘Otuá ke ke fakato’ongamo’ui’i ai ‘ene ‘ofá neongo ‘ene faingata’á?

‘Ānau, Lotu mo e ‘Aukai: ‘E ‘Otua, tokoni mai ke u mo’ui ‘o taau mo tatau mo Sīsū. ‘Emeni

----------------------------------------------------------------

Happy Election Day

Tūsite, Nōvema 5: Lau Folofola - Lute 4: 13-17.

Ki’i Ama: Lute 4: 14, “Peá na’e pehē ‘a e kau fefiné kia Neomai, ‘Malō mo e ‘Eikí, he ‘ikai te ne tuku koe he ‘ahó ni ta’e ha koeli; pea ‘ofa ke ongoongoa hono hingoá ‘i ‘Isileli.’”

Pou ‘Ao: Ko e hokoatu pe eni he Lēsoni na’a tau fakalaulauloto ai ‘aneafi. Neongo ‘oku ui e Tohí ni kia Lute ka ko e talanoa ‘oku tau fakalaulauloto aí, ‘oku fai ia kia Neomai. Na’e fā’ele’i ‘e Lute ‘a ‘Opeti ka na’e lau ia ‘e he kau fefine ‘o e koló ‘i hotau Ki’i Ama ki he ‘ahó ni, ko e “tama ‘a Neomai.” Ko e tāpuaki eni ‘o Neomai ko hono ‘omai ‘e Sihova ‘a hono “koeli” ‘ia ‘Opeti. Ko e mo’ui ‘a Neomaí na’e kamata mohu mo fonu he ‘i ai hono ongo foha mo hono husepaniti pea toe ma’u mai mo hono ongo ‘ofefine ‘i he fono. Pea mālōlō kotoa ‘a e kau tangatá kae uitou ‘o ‘ikai ha taha ke ne tokoni’i kinautolu. Foki a ‘O’opa ki hono fāmilí kae hokoatu pe a Neomai mo Lute. Ko e Lēsoni ‘oku tau fakalaulauloto aí ‘okú ne ‘omai ‘a e ola lelei ‘o e fa’ufa’u na’e fai ‘e Neomaí ‘o na a’usia ai mo Lute ha kaha’u ‘oku malu pea mo e taha ke na falala ki ai ‘i he kaha’u ‘o ‘ena fonongá. Na’e kamata fonu mo mohu pea a’u ki he mahá mo e li’ekiná pea ko eni kuo toe fakafonu mai ‘e Sihova e mo’ui ‘a Neomaí ‘o hulu ange ia he ‘uluakí. ‘Oku tau ‘ilo mei hotau Ki’i Amá, ko ‘Opeti ‘a e “koeli” ‘o Neomaí, pea ko e kui ia ‘a Tevita, ‘a e Tu’i laulōtaha ‘o ‘Isilelí. ‘Oku mālie ‘a e talanoa ‘o e “koeli” he ‘oku hanga ‘e he hoko ‘a Poasi ko e koeli kia Neomaí ‘o fakasino mai ‘a e fatongia ‘e fai ‘e he “Koeli” ‘o māmani, ‘a SīsūKalaisi. Ko Sīsū ko e hako ia ‘o Siuta ‘o fou mai ‘ia Poasi (fa’ē ko Lehapi) mali mo Lute ko e fefine Moape. Pea hangē na’e fokotu’utu’u pe ke pehē mei he kamata’angá ke foki ‘a Neomai ki Siuta pea muimui atu ai a Lute ki he fonua ‘oku tauhingoa ki he’ene kuí ke ne hoko ai ko e meteliake ki he Koelí, ka ko e Fakamo’ui ‘o māmaní. Ko ia na’e kikite’i ‘e he kau Palōfitá te ne hoko mai ko e Misaiá, ko e Taha kuo pani, ko e Fakamo’ui ‘o māmani. Pea hangē ko hono fakatau ‘e Poasi ‘a e tofi’a ‘o e pekiá (koeli) fakataha mo Luté, na’e pehē ‘a hono fakatau ‘e Sīsū ‘a e tofi’a ‘i hono Pule’angá mo’otautolu kotoa pe ‘oku ‘ofa, tui mo falala ki ai, ‘aki ‘ene mo’uí. ‘Oku ‘ikai ke tau toe fu’u kehekehe mo e mo’ui ‘a Neomaí. Na’e ‘i ai ‘a e taimi na’a tau ongo’i fonu mo mohu he fiefia mo e nonga ‘o e mo’ui ni pea na’e ‘i ai mo e taimi ne tau fononga ai he tele’a fonu faingata’a ‘o hange ko e mole ‘a e ngāué, māvae mo’ui mo pekia mo e ‘ofa’anga, tala fakalelea loto ki he faingata’a fakaesino ‘oku tau fekuki mo ia pe ko ha taha ko hotau ‘ofa’anga. Fakafeta’i he ‘oku ‘ikai ha taimi ‘e situ’a pe tukuange ai ‘e he ‘Otuá ke tau fononga toko taha he lotolotonga ‘o ‘ene langi melie mo e langi tamaki ‘a e halafonongá. ‘Okú ne kau mo kitautolu ma’u ai pē, he taimi kotoa pē!

‘Ānau, Lotu mo e ‘Aukai: Hiva e ‘a e ‘ofa lahi, Hota Koeli ‘i mu’a; Na’á ne hifo ki māmani, Ke huhu’i ‘a e popula. ‘Ofa é ka ko ha ‘ofa, Ne ne fai ‘i he ‘Akau, Sīsū na’á ne mate noa, Ke huhu’i ‘a koe mo au.

-----------------------------------------------------------------

Mōnite, Nōvema 4: Lau Folofola – Lute 3: 1-5.
Ki’i Ama: Lute 3: 5, “Peá ne tali ki ai, ‘Te u fai ‘o hangē tofu pē ko ho’o lea maí.’”
Pou ‘Ao: ‘Oku ou fa’a fakakaukau he taimi ni’ihi hangē ‘oku lahi ‘aupito ange ‘a e putu he taimí ni ‘i ha toe taimi. ‘Oku meimei ko e ‘aho kotoa pe kuó u ma’u ai ha tala pe ‘oku ou tokanga’i hake ai he Fofonga’i Tohi (FB) kuo mālōlō e taha he fāmilí, kāingá mo e mahení. Ko e me’a mu’omu’a ‘oku ha’u ki he’eku fakakaukaú: Ko e hā si’ono mate’angá pea muimui atu ai pe mo e fakakaukau pe ‘e fēfē si’i toenga ‘o e fāmilí. ‘Oku toe vivili ange ‘a e faingata’á ni ‘o kapau ‘oku uitou kei si’i pe hoá pea kei iiki mo e fānaú. ‘Oku tau ‘osi fetaulaki kotoa pe mo e faingata’a peheni ‘i hotau ngaahi fāmilí pea ‘oku tau lotu pe ma’a kinautolu ‘oku nau lolotonga foua ‘a e “tele’a ‘oku malu’aki ai ‘a Mate” ke tokoni mai ‘a e ‘Otua ‘o fai si’onau fakamanavahaké. Ko e talanoa ‘o e ‘ahó ni ‘okú ne fakaulo e maama ‘i he loto ‘oku lolotonga po’ulia koe’uhi ko ha faingata’a ‘oku lolotonga fekuki mo ia. Tokanga’i ‘a e kamata ‘a e Lēsoní pea mo hono ui ‘e Neomai ‘a Lute ko hono ‘ofefine neongo ko e mali ia ‘o hono foha kuo maté. Kuo mole ‘a hona ongo husepanití pea ko hona kaha’u ‘e fakafalala pe ‘iate kinaua. Ko e fatongia faka-fa’ē ia na’e fai ‘e Neomai ‘i he’ene talatalaifale kia Lute ‘i hotau Lēsoní. Kuo ‘ikai ke na toe hoko ko e fa’ē mo e ‘ofefine ‘i he Lao (daughter in law) ka ko e fa’ē pe mo ‘ene tama. Na’e hanga ‘e he’ena “uitoú” ‘o fakavāofi’i kinaua. ‘Ikai ko ia pe, kae lava ai ke fonosi ‘e Neomai a Lute ki he ngāue ke fai ke fakamanava hake ai kinaua mei he tu’unga “li’ekina” na’á na ‘i aí. Ko hotau Ki’i Ama ki he ‘ahó ni ko e tali ia na’e fai ‘e Lute ki he fakahinohino na’e fai ‘e Neomaí. Fakafeta’i he na’e muimui pau ki ai a Lute pea ola lelei ‘ena feinga ‘o mali ai a Poasi mo Lute. Kuo tolona atu ‘a e faingata’a na’á na fekuki mo iá pea kuō na fononga hao ki he kaha’ú koe’uhí ko Poasi. Ko hai ‘oku fanafana me’a lelei ma’au ki ho kaha’ú? Ko hai ‘okú ke fanongo, talangofua mo muimui ki ai ‘i ha taimi kuo fihi tu’u ai ‘a e ngaahi “ma’unga tala” mo e “mo’oní?” ‘Oku faka’osi ki ‘apongipongi ‘a e Fili Palesiteni (Falealea) ‘a hotau fonuá ni pea kuo felemofafo ‘a e ngaahi “le’ó”, fakatou mo’oni pe mo loi, kuó ne kāpui e ngaluopé mo e ngalu’eá, ko hono feinga’i ke tau tui mo falala pea fili ki he fakafofonga ‘oku nau tu’uakí. ‘Oku mahu’inga ke tau fanongo ki he le’o (talatalaifale) te ne fakamanava hake kitautolu ‘i he kaha’ú. ‘E tokoni ‘o kapau ‘oku hanga ‘e he “le’o” ‘oku tau fanongo ki aí ‘o poupou’i e lelei fakalūkufua ‘a e fonuá kae ‘ikai “siokita.” ‘Oku mahu’inga ke tau feohi mo fengāue’aki mo e kakai ‘oku tau fefalala’aki ke nau tokoni’i kitautolu ke tau hoko ko e kau kalisitiane ‘oku tu’u kalikali he tui mo e ‘ofa ‘Otua mo ‘ofa kaunga’api ‘i ha taimi ‘o hangē ko e ngaahi ‘ahó ni.
‘Ānau, Lotu mo e ʻAukai: ‘E ‘Otua, tokoni mai ke u fanongo ki he “le’o” ‘oku mo’oni mo totonú peá u muimui ki ai ‘i he taimi kotoa pe. ‘Emeni.
------------------------------

Tokonaki, Novema 2: Lau Folofola – Ma’ake 12: 28-34.
Ki’i Ama: Ma’ake 12: 34, “Na’e fakatokanga’i ‘e Sīsū ‘a e fakapotopoto e tali ‘a e tangatá, peá ne pehē ange, ‛‘Oku ‘ikai te ke mama’o koe mei he Pule’anga ‘o e ‘Otuá.’ Pea talu pē mei ai mo e ‘ikai ha toe taha te ne lava ‘o fai ha fehu’ia kia Sīsū.”
Pou ‘Ao: Ko e hokoatu pe eni he talanoa na’a tau fakalaulauloto ai ‘aneafí. ‘Oku tau tokanga ki he sikalaipe na’e ha’u kia Sīsū mo e fehu’i na’a tau lave ki ai ‘aneafí. Ko e fehu’i ‘a e sikalaipe, ko e matāpule na’e ohi hake ‘aki ‘a e Laó peá ne mahino’i ‘a hono tupu’angá mo hono ‘uhingá. Ko hotau Ki’i Ama ki he ‘ahó ni ko e tali ia na’e fai ‘e Sīsūú. Ko e fehu’í: Ko e hā na’e talaange ai ‘e Sīsū “’Oku ‘ikai te ke mama’o koe mei he Pule’anga ‘o e ‘Otuá” kae ‘ikai ke ne folofola ange, “‛Okú ke ‘i he Pule’anga ‘o e ‘Otuá.” ‘E tonu nai ke tau pehē na’e hanga ‘e Sīsū ‘o “tohoaki’i” mai ‘ene tokangá ke ne fakatokanga’i ko e Ongo Fekau Mahu’inga Taha ‘i he Laó ‘okú na lolotonga fefolofolaí (talanoa). Kapau na’e lava ke fakatokanga’i ‘e he sikalaipē ‘a e ‘uhinga ‘o e folofola ‘a Sīsū ‘i hotau Ki’i Ama ki he ‘ahó ni, ‘oku ou mahalo pe ‘e kehe ‘a e talanoá ni. Ko e hā e me’a na’e mei hoko ‘o kapau na’e ‘ikai ke kei tu’u ai pe sikalaipé mei he “mama’o ‘o hona vā” kae a’u tonu atu kia Sīsū ‘o na fekita. ‘Oku ou tui na’e mei liliu e folofola ‘a Sīsū mei he “’ikai te ke mama’o mei he Pule’anga ‘o e ‘Otua” ki ho’o “ma’u ‘a e Pule’anga ‘o e ‘Otuá?” Ko e taha ‘o e me’a ‘oku fai ki ai e fifilí: ‘I he’ene sio takai holo kiate kinautolu na’e ‘i ai mo Sīsū, me’á ni na’á ne lau kinautolu ko hano “kaungā’api”, pe ‘ikai? Na’e kau ‘i he kakai ko eni ‘a e kau Satusí, na’á nau kehekehe ‘i he tuí. Na’e kau heni pea mo e fine’eiki uitou na’á ne li ‘ene peni kapá pea tala ai ‘e Sīsū ki he’ene kau Akó ‘oku mahulu hake ‘ene foakí ‘i ha toe taha he kau lī me’a’ofa he ‘aho ko iá ‘i he Temipalé, he na’á ne foaki hono kotoá. ‘Io, na’e kau heni mo e kau tu’umālie na’e fakangangana ‘enau pa’anga maká he tanaki’anga pa’angá ke fanongo ki ai mo ‘ilo’i ‘enautolu na’e ‘i ai ‘a e lahi ‘o ‘enau foakí. Pea na’e ‘i honau lotolotongá mo e kau Taki ‘o e Temipalé na’á nau fakafepaki’i ‘a Sīsū. Ka ko kinautolu ia ‘a e kakai na’e lau ‘e Sīsū ko hono kaungā’apí. Ko kinautolu pea mo kitautolu ‘i hotau kuongá ni, na’e ‘uhinga ai ‘a e ‘ikai ke lau ‘e Sīsū ‘etau fakafepaki’i ia mo fakafe’atungia’i ‘aki ‘etau angahala kehekehé, ka ne feilaulau’i ‘ene mo’uí he Kolosí ke tau ma’u mo’ui ai, pea ma’u ke lahi ‘aupito. Fakafeta’i he ko e feilaulau tā tu’o taha ko iá ‘okú ne fakaava ai ‘a e Matapā ki he Mo’ui Ta’engatá. Ko e Matapā na’e songo talu mei he hinga ‘a e ‘Uluaki matu’á kuó ne tupangi ia ‘o ava ‘aki hono Ta’ata’á. Ko e a’usia ‘a e Toketā he Himi 562: 4, “Kuo mole ‘a e tofi’a, Hota ‘api ‘i he langi: Toe fakatau ‘e ia, ‘O ne ‘ofa’aki mai. ‘Ofa é ka ko ha ‘ofa Ne ne fai ‘i he ‘Akau, Sīsū na’á ne mate noa Ke huhu’i ‘a koe mo au.” ‘Ofa ke tau ‘inasi kotoa pe ‘i he tala fakalotolahi mo fakatu’amelie, ko ‘etau ma’u ‘a Kalaisí ko e ma’u kotoá ia, pea ko ‘etau a’usia ia ‘a Hono Pule’angá mo e Mo’ui Ta’engatá. Fakafeta’i!
‘Ānau, Lotu mo e ‘Aukai: Ke u ‘i he ‘Eiki pe! Si’i tala’ofa ia, Te te kaveinga’aki pe Kae’oua ke a’usia. He mo’ufongonga au! Kau hangahanga fai! ‘O hikihiki teniti, ‘O fai ki Hevani.
---------------------------------------------------
Sāpate, Novema 3: Sāpate hono 24 Hili ‘a e Penitekosi. (Lanumata). {Liliu mo e taimi}
Lesoni: Lute 1:1-8; Saame 146; Hepelu 9:11-14; Ma’ake 12:28-34. (‘Aho ‘o e kau Sangato).
--------------------------------------------------

Tu’apulelulu, ‘Okatopa 31: Lau Folofola – Hepelu 9: 11-14.

Ki’i Ama: Hepelu 9: 13b-14, “Kapau naʻe lava ʻe ia ke fakamaʻa ʻa e kakanó; huanoa ʻa e taʻataʻa ʻo Kalaisí, ʻa ia naʻá ne ʻoatu ʻe ia ia taʻe hano mele ki he ʻOtuá, fai ʻe ha laumālie laui itaniti - huanoa ʻene fakamaʻa ʻe he taʻatāʻa ko iá hotau konisenisí mei he ngaahi ngaūe mate, ke tau tauhi ʻa e ʻOtua ʻoku Moʻui.”

Pou ‘Ao: ‘Oku ‘ikai mo ha toe angahala ‘e lahi ange ‘i he lotu ‘a e kau Amish ka ko hono “takuanoa ‘a e Huafa ‘o Sihova.” ‘Oku ‘ikai ko ha palopalema ia kiate kitautolu he ‘oku tau kau he tui tokua, ‘oku lau ai hotau kaí, ‘oku fakamatala’i’aki ‘a e kakai ‘oku nau talanoa’i ma’u pe ‘a e ‘Otuá mo Sīsū Kalaisí, ko e kau lotu mo’oni. Ko e fakakaukau ia na’e fai ‘aki ‘a hono faka’evangelio’i ‘o māmaní. Pango pe, he kuo hoko e fakakaukau “lelei” ko iá ke tu’u fehangahangai ai ‘a e ngaahi Lotu lalahi ‘e Tolu ‘oku tui pe ki he ‘Otua tatau – Lotu faka-Siu, Lotu Faka-Kalisitiane mo e Islam (Lotu Mosilemi), he ngaahi ‘ahó ni. ‘Oku lolotonga fai e tau he Hahake Lotoloto ‘i he vā ‘o ‘Isileli mo e kau Palesitainé, ko hono kei fakamanatu mai pe ‘a e vāvākovi na’e ohi hake ‘aki kinautolu ‘i honau hisitōliá. ‘Oku lolotonga fakaehaua ‘e he kau lotu Mosilemí e kau kalisitiané ‘i he ngaahi fonua ‘oku taki ‘e he kau Lotu Mosilemí. Kuo fepakipaki ‘a e ngaahi “mo’oni” fakalotú koe’uhi ko e kehekehe ‘a e tala’otuá pea ko hono iku’anga pē ko e feinga ‘a e kau “Tui Mo’oní” ke faka’auha ‘a e kakai ‘oku nau mateaki’i ‘a e “Tui Loi.” ‘Oku fakamo’oni mai ‘a e hisitolia ‘o e Lotu Faka-Kalisitiane ki he Tau Kaluseti mo e ngaahi feinga tau he hisitolia na’e fai ke malu’i e “Tui Mo’oni.” ‘Oku toki tuai mai ‘a e Tu’i Fakamaaú he ‘Aho Faka’osí ke fakamāu ‘a māmaní, ka kuo tau ‘osi fetongi ‘etautolu e ‘Otuá ‘i hono fakamāu’i hotau kaungā fonongá. ‘Oku lau ‘e he kalisitiane ni’ihi, ko e konga ia honau fatongia he Lotu lelei ‘a e ‘Eiki ko hono malu’i ‘a e “tui totonú”. Kuo hoko pe ‘a e malu’i ko iá he ‘ahó ni ke ne fakamovetevete’i e kau kalisitiané ‘o kau ai pe kitautolu na’e lotofale taha ‘i he UMC. Kuo hoko e Tohitapú, ‘a e folofola mo’ui ‘a e ‘Otuá, ko e heletā fakatoumata mo e pā ke fai ‘aki ‘etau tau’i ‘a e “tala’otua ‘oku tonú” ‘i he’etau fehangahangai mo hotau kaungā kalisitiané. ‘Oku tau toki fakatokanga’i hake pe kuo tau hoko kotoa pe ko e kau kalisitiane ‘oku tokanga ange ki hono “talanoa’i ‘o e ‘Otuá” ‘i hono mo’ui ‘akí. Kuo hoko ‘a e kolosí ko e me’a teuteu pe mo e faka’ilonga ki he kalisitiané. Ko e taimi ‘oku talamai ai ‘e he ‘Otuá, ‘o hangē ko hotau Ki’i Ama ki he ‘ahó ni, ‘oku ‘ikai ko e feilaulau tutú ‘oku laú, ka ko e feilaulau tātu’otaha na’e fai ‘e Kalaisi he kolosí, ‘oku tau kei tauhi pe ko e talifaki, ‘a e ngaahi me’a ‘auha na’e fai ‘aki hotau luluku kimu’a ‘ia Kalaisí. Kuo lahi ‘a e ngaahi ‘elemeniti ‘o e feilaulau tutú kuo tau fakakau mai ki he’etau tauhi vā ki he ‘Otuá mo e kaungā’apí ‘i he fakakaukau, tokua ‘oku tokoni ki hotau fakahaofí mo fakatau’atāina mei he angahalá. Ko hotau fakamo’uí mo hotau fakahaofí na’e fai ‘aki pe ‘a e lea ‘o e ‘ofa mo e mo’ui na’e feilaulau’i he kolosi. Ko e ‘ofa pe ‘a Kalaisí, ko e Kelesi pe! Kuo ‘osi lahi fe’unga pe ‘a e ta’ata’a ko iá ki hotau fakama’á mo hotau fakahaohaoá.

‘Ānau, Lotu mo e ‘Aukai: Lahi ‘a e fanga manu na’e tāmate’i ‘i mu’a, ‘O ‘atu ko e feilaulau ke fakahoifua. Ka ko e ta’ata’a ‘o Sīsū na’e tafea, ‘E ma’a ai ‘a e angahalá ‘o mole ‘a e tautea. ‘Emeni.

-----------------------------------------------------------------

Pulelulu, `Okatopa 30: Lau Folofola - Saame 146.

Ki’i Ama: Saame 146: 1 & 5, “HALELU‘IA! Hoku laumālie, ke ke fakafeta‘i kia Sihova ... Monū‘ia ā ka ko ia ‘oku ne ma‘u ‘a e ‘Otua ‘o Sēkope mōno pāletu‘a, ‘Oku tu‘u ‘ene falala kia Sihova ko Sihova ko hono ‘Otua.”

Pou ‘Ao: Ko e ‘aho ko ‘eni ‘oku tau koloa’ia he fakafeta’i ‘a e tokotaha kuo falala kakato ‘ene mo’ui kia Sihova ko hono ‘Otua mo fakamo’ui. ‘Oku fenāpasi foki ‘a e Saame ‘o e ‘ahó ni pea mo e talanoa ‘o Lute mo Naomí he lēsoni mei he Fuakava Motu’á. Kuo fakamo’oni mai ‘a e monū’ia ‘onautolu ‘oku hoko ‘a e ‘Otua ‘o Sekopé ko honau pāletu’á, peá nau falala kia Sihova ko honau ‘Otuá. ‘I he kuonga mu’á, na’e takitaha pe ‘a e fonua honau ngaahi ‘otua, kau ai foki kitautolu mei Tongá mo e ngaahi fonua ‘o e Pasifikí.

Na’e ‘i ai e ‘otua ‘o e kau Mōapé ko Sēmosi, pea ko e kau ‘Amoní na’á nau ‘otua kia Moleki. Na’e ‘i ai foki e ‘otua ‘i Tonga ko e fu’u ‘anga na’e ui ko Taufa Tahi, Palepalengakau, kau Tangaloá mo e kau Mauí. Ka ko e ngaahi ‘otua ko ‘ení, ko e ngaohi pe ‘e he nima ‘o e efu mo e kelemutu pe ko e fakakaukau’i faka-e-tangata pē. ‘I he’ene pehē, ‘oku malava ke maumau’i pe faka’auha kotoa e ngaahi ‘otua ko ‘ení. Ko e ‘Otua ia ‘o Sekope ‘oku ‘ikai lava ia ke faka’auha ‘e ha me’a ‘e taha he ‘univeesi ko ‘ení. Ko e ‘Otua Ta’emahakulea pea ko ia na’á ne fakatupu e me’a kotoa pe he fu’u ‘univeesi ‘oku mafolá ni. ‘I hotau kuongá, ‘oku hulu atu ‘a e ngaahi ‘otua ‘oku tau tauhí ‘o hangē ko e kuonga mu’á. Koe’uhi ko ha’atau ta’etokanga pe ko ‘etau tuku e taimi lahi ki ha fa’ahinga me’a, ngāue, ako, koloa, pa’anga, mafai mo e hā fua kuo nau hoko kinautolu ko hotau ngaahi ‘otua. Kuo nau pule’i hotau taimí, koloá mo ‘etau mo’ui he kuo tuku ki ai ‘etau falalá. Ko e me’a ‘oku mahino he tauhi ‘o e ngaahi me’a ko ‘ení, he’ikai ke nau lava ‘o ‘omai ‘a e nongá pe lava ‘o fakamo’ui kitautolu, ngata pe he ‘Otua ‘o Sekopé ‘a e Makatu’u, Fakamo’ui, Fakalaloa, Tokaima’ananga, ko e Hau Ta’eliua, ko e ‘Alifa mo e ‘Omeka, ko Na’e ‘i ai, mo ‘Oku ‘i ai mo Kaha’u te ne mafeia ‘etau me’a kotua he mo’ui. Ko e uki ia ‘oku fai ma’atautolu he ‘aho ko ‘eni. Tau tokanga pe ko e hā e ngaahi me’a he mo’uí kuo tuku ki ai e lahi hotau taimí mo ‘etau tokangá mo e falalá, na’a kuo nau hoko ko e ‘otua ia kiate kitautolu. ‘Oku fakamanatu mai ‘e he Palōfita ko Selemia 18:15, “Kuo li’aki au ‘e hoku kakaí he kuo nau tutu ‘inisenisi ki he ngaahi ‘aitoli ta’ahamahu’ingá.” Ko hotau akonaki ia he ‘aho ko ‘eni, lolotonga ‘etau feinga he ngaahi fonua muli ‘oku tau nofo ai ke tau lava ‘o mo’ui aí ‘oku mahino ‘aupito ‘a e hulu e ngaahi me’a ke tau fai mo tokanga ki aí. ‘Oku na’ina’i mai ‘etau lēsoni mo e okooko ‘o e ‘aho ko ‘eni, ‘oua na’a tuku ha me’a he māmani ko ‘ení ke ne fakauoua’i ‘etau tauhi mo falala ki he ‘Otua ‘o Sēkopé. Ko e ‘Otua tatau pe ia mei kamata’angá ko ia pe ne hulu ‘ene ‘ofa ‘o ‘ai kakano ‘ia Sīsū Kalaisi ‘o pekia kae fai hotau fakatau’atāina mo fakamo’ui.

‘Ānau, Lotu mo e ‘Aukai: Fakamolemole’i au he’eku tuku ke ‘otua ‘a e ngaahi me’a ‘osi mo mole ‘o e mo’uí. Tuku ke u lea mo tukupā he ‘aho ko ‘eni, ‘Ko hoku ‘Eiki mo hoku ‘Otua pe’ ‘a e ‘Afiona. ‘Emeni.

-----------------------------------------------------------------

Tūsite, ‘Okatopa 29: Lau Folofola – Lute 1: 6-18.

Ki’i Ama: Lute 1: 15b-16, “Pea pehē ʻe he finemotuʻá, ‘Vakai, kuo foki ho tokouá ki hono kakaí, pea ki hono ʻotuá: muimui koe ki ho tokouá. Ka ka pehē ʻe Lute, ‘ʻOua te ke oʻi au ke liʻaki koé, pea ke tuku ʻeku muimui ʻiate koé: he ko e potu ʻokú ke ʻalu ki aí, te u ʻalu ki ai au; pea ko e potu ʻokú ke mohe aí, te u mohe ai: ko ho kakaí ko hoku kakai, pea ko ho ʻOtuá ko hoku ʻOtua: ko e potu te ke pekia aí, te u pekia ai, pea ʻe tanu ai au.”

Pou ‘Ao: ‘Oku tau toe hokoatu pe he talanoa na’a tau fakalaulauloto ai ‘aneafí pea mo e fai tu’utu’uni ‘a Naomi ke foki ki Petelihemá. Matamata kuo toe hoko pe a Petelihema ko e “fale ‘o mā” kia Naomi pea ko eni ‘e kau atu ki ai mo Lute he kuó ne fili ke na “kaungā fononga” ‘o hangē ko e ‘uhinga hono hingoá. Na’e mo’oni pe ‘a e ‘uhinga ‘o e hingoa ‘O’opá ki ai, he’ene fokí. Ko Naomi mo Lute, na’á na felotoi ke na fehangahangai mo e faingata’a ‘o ‘ena fefiné mo uitoú ‘aki ‘ena hoko pe ko e Taha. Ko e ongo fuofua fefine eni ‘i he hisitōlia ‘o e Tohitapú kuó na fokotu’u ha kulupu ke fetokoni’aki ai ‘a e kau uitou fefiné. Na’á na fononga fakataha atu he hala fononga na’e hake he mo’unga pea hifo he tele’a pea fepaki mo e ngaahi ha’aha’a ‘o natulá, ka na’e faifai pē pea na a’u ki Petelihema. Ko e taimi tatau ai pe ia ‘o ‘ene mole atu ‘a e faingata’a ‘o e hongé na’á na fetaulaki mo ia ‘i Moapé. Ko e kelesi pe ‘a e ‘Eikí na’á ne fai hona tauhi’í he vaa’ihala faingata’a na’e fai ai ‘ena fonongá. Fakafeta’i, he neongo ko e fononga ‘a e ongo uitou, ka na’á na kaungā fononga mo e ‘Otua Ta’emahakuleá. ‘Oku ‘i ai e fepale ‘a e kau ‘Afilika ‘oku pehē. Na’e ‘i ai e kakai na’á nau feinga ke ‘ilo’i ‘a e kehekehe ‘o heli mo hēvaní. Na’e pau leva ke fai ‘a honau taki mamata ke nau sio ki hona kehekehé. ‘I helí, na’á nau sio ki he kakai ‘oku nau ta’utu fehangahangai he fu’u tepile kai lōloa pea ‘oku fonu mahuohua e tepilé he me’atokoni ifo kehekehe. Ka nau fakatokanga’i atu e fofonga ‘o e kau nofo helí ‘oku nau fofonga fiekaia pea kuo faka’au’ausino ‘o hangē ka pekiá. ‘Oku nau tokanga’i atu honau tui’i nimá ‘oku sima’i lo ua ‘o ‘ikai ke lava ha taha ke peluki hono nimá ‘o feinga’i hake ‘aki e me’atokoní ki honau ngutú. ‘Oku ‘ange’ange ‘a e folofolou’a mai ‘a e tafa’aki ‘e tahá, ki he folofolou’a atu ‘a e tafa’aki ko é. Ko ‘enau a’u atu ki hēvaní, ‘oku nau fakatokanga’i e tepile kai lahi tatau, pea ‘oku nau fehangahangai pe ‘o tatau mo heli, pea sima’i kotoa pe mo honau nimá. Ko honau kehekehé, he ‘oku fofonga fiefia e kakai mo makona. Ko e me’a na’á nau fakatokanga’í, ‘oku hanga ‘e he kakai ‘i he tafa’aki tepile ‘e tahá ‘o fafanga e kakai ‘oku nau ta’utu fehangahangaí. Ko e fakamāfana atu ‘enau kātoanga kaí ‘o hangē pe ‘oku ‘ikai ha nima ia ‘e sima’í. Ko e talanoa ia ‘o Lute mo Naomi, ko e ongo uitou na’e fekoekoe’i mo fengāue’aki fakataha ma’á ‘ena lelei pea fakafeta’i he na’á na ikuna’i ‘aki ia ‘a e fu’u honge toho na’e ‘uhinga ai ‘ena mavahe mei Moapé. Ko e kelesí pe, ko e ‘ofa pe ‘a e ‘Otuá te tau lava ‘aki ke fakavetevete ‘a e ngaahi fakapona ‘oku tau fa’a faingata’a’ia mo mo’ua ai he mo’uí ni. ‘E ‘ikai ha me’a he mo’uí ni ‘e faingata’a kiate kinautolu ‘oku ngāue fakatahá, feongoongoi mo fekoekoe’i he me’a kotoa pē. Ko e mālohinga ia ‘o e fāmilí, Siasí pea mo e fonuá. Fakafeta’i!

‘Ānau, Lotu mo e ‘Aukai: Ngaohi kimautolu ‘Eiki ke mau hoko pe ‘o taha ‘i ho Laumalie. ‘Emeni.

------------------------------------------------------------------

Mōnite, ‘Okatopa 28: Lau Folofola – Lute 1: 1-5.
Ki’i Ama: Lute 1: 5, “Pea pekia ʻa Māloni mo Kilioni fakatouʻosi; pea tuku ʻa e finemotuʻa taʻe haʻane ongo tama mo hano husepāniti.”
Pou ‘Ao: ‘Oku kau ‘a e Tohi ‘a Luté he ngaahi talanoa mālie ‘i māmani ‘o felāve’i mo ha mo’ui ‘oku tu’u kalikali ‘i he taimi ‘o e faingata’á. Ko eni pe mo e Tohi ‘a ‘Esetá he Tohitapú ‘oku fakahingoa ki ha fefine pea ‘oku ‘ikai fai ha ofo ia ‘i he hoko ‘a Naomi mo Lute ko e ongo fefine mahu’inga ‘i he talanoá. Ko ‘ena tu’u ta’emauea ‘i he taimi na’á na fehangahangai ai mo e faingata’á ‘oku hoko ia ko e fakalotolahi mo e fu’ufu’unga tāpuaki ma’á e kau kalisitiane kotoa pe ‘i he ngaahi kuongá. ‘Oku mahu’inga ‘a e ngaahi hingoá ki he talanoa ‘o Naomi mo Luté. ‘E fifili ‘a e ni’ihi ki he honge ‘a Petelihemá, he ko hono ‘uhingá he lea faka-Hepelú, “Ko e fale ‘o e mā.” Kapau ‘oku ‘i ai ha kolo ‘oku ‘ikai totonu ke kau he hongé, pea ko Petelihema, ka ‘oku mahino mei he talanoá ‘oku ‘ikai ha taha pe ko ha feitu’u ‘e hao mei he faingata’á. Na’á nau ‘amanaki ‘e hoko ‘enau kumi fonuá ke nau hao ai mei he faingata’á ka ko e me’a tatau pe ia na’a ne talitali kinautolu ‘i Moapé, he na’e taimi si’i pe ‘enau ‘i aí kuo pekia ‘a ‘Elimeleki. Ko e hingoa ‘o e ongo uaifí ko ‘O’opa, pea ‘oku ‘uhinga ia ‘i he lea faka-Hepelú, “Ko e taha kuo foki” (she who turns back). Ko e Luté, ‘oku ‘uhinga ia “Ko e kaungā fononga” (companion). Ko e fakahingoa ‘o e kau Hepelu na’e toki fai pe ‘i he taimi ‘oku fanau’i mai ai. Ngalingali na’e ‘uhinga pehē ‘a hono fakahingoa ‘o e ongo foha ‘o Naomí. Ko e Māloní ‘oku ‘uhinga ia “Ko e taha ‘oku mahamahaki” (the sickly one) pea ko e Kilioni, “ko e ‘auhia atu pe ko e ‘au’aufoe” (wasting away). Na’e mo’oni hona hingoá he na’e ‘ikai fuoloa ‘enau nofo atú kuo na fakatou mate. Kuo taulōfu’u mai e faingata’á kia Naomi, Lute pea mo ‘O’opa. ‘Oku ‘ikai ke ngata pe he’enau fefiné, ka kuo nau toe uitou. Pea ‘ikai ko ia pē, ka na’e ‘ikai ke ‘i ai ha’anau fānau pe ko ha kāinga ke nau falala ki ai pe tokoni’i kinautolu. Neongo ‘ene laulau senitulí, ka ‘oku kei mo’oni pe ‘a e faingata’á ni ki he kakai fefine tokolahi ‘i hotau kuongá ni pea mo kinautolu kotoa pe ‘a e kakai ‘oku ‘ikai ke lau ‘e he sosaietí, ko ha kakaí. Ko e fehu’í: Ko e hā ‘enau me’a na‘e fai ‘i he lotolotonga ‘o e faingata’a kāfakafa na’á nau mo’ua aí? Tokanga’i, na’e kimu’a pea nau fai ha toe me’á, kuo a’u mai e tala fakafiefia, “Pea nau tutu‘u, ‘e ia mo e ongo uaifi ‘o ‘ene ongo tamá, ke ne foki mei he tuku‘uta ‘o Moapé: he kuó ne fanongo ‘i he tuku‘uta ‘o Moapé kuo ‘a‘ahi ‘a e ‘Eikí ki hono kakaí, he‘ene tuku ke nau ma‘u me‘akai.” ‘Oku ‘ikai ke tau ‘ilo ‘a e founga na’e a’u mai ai e talafungani ko eni mei Petelihemá, ka ko e me’a pe ‘oku tau ‘iló, ko e folofola ‘a e ‘Otuá ‘oku mo’ui, ‘oku fakatupu fo’ou, ‘oku fakatau’atāina ‘okú ne fakalotolahi’í e lotosi’í pea mo fakamaama ‘a e po’uliá. Ko hotau fatongiá ke fili ke fanongo ki he folofola ‘a e ‘Otuá pea tau fai ki ai ‘o hangē ko ia na’e fai ‘e Naomí.
‘Ānau, Lotu mo e ‘Aukai: Tokoni’i au ke u fanongo ki ho’o folofolá pea u fai ki ai. ‘Emeni.
-----------------------------------

Tokonaki, ‘Okatopa 26: Lau Folofola – Ma’ake 10: 46-52.
Ki’i Ama: Ma`ake 10: 49-50, “Pea tu‘u ai ‘a Sīsū, ‘o ne tu‘utu‘uni, ‘Ui atu ki ai ke ha‘u!’ Pea nau ui leva ke ha‘u. Pea nau tala ange, ‘Fiemālie koe! Tu‘u ki ‘olunga! Ko ē ‘oku ui mai!” Pea lī ai pē ‘e Pātimiosi hono pulupulú, peá ne puna ki ‘olunga ‘o lele kia Sīsū.”
Pou ‘Ao: Kuo fuoloa mai ‘eni ‘etau fononga mo Ma’ake he ngaahi uike kuo hili. Kuo tau a’u mai ki he vahe faka’osi pea ‘omi e talanoa ia ‘o e tangata kui ketau vakai ki ai. Ko u fakakaukau au mo fifili, ne tau kui kotoa pe he ngaahi vahe kimu’a pea tau kau fakataha mo Patimosi he kole ke u ‘a pe mu’a he vahe ko ‘eni? ‘Eke ‘s Sisu, koeha teu fai ma’au? Ko e tali ‘a Patimiosi, ‘Keu ‘a pe mu’a!!’Ko ‘etau fehu’i, koeha e me’a ne tau kui mo ‘ikai fakatokanga’i he hala fononga? ‘Oku ou ‘ilo’i ko e talanoa maheni ‘eni, ka ‘oku hange kiate au kuo tali ‘e Patimiosi, ke u ‘a pe mu’a. ‘Ikai ke solova kotoa ‘eku palopalema pe tuli ke mama’o ‘a e ngaahi faingata’a pe ko e kakai faikovi mai he hala fononga. Hange ha kole faingamalie ‘o ha mo’ui ‘oku fo’ou. Ke u to e muimui atu, ke tuku ho’oku ka e fai ho’ou finangalo. ‘Omi ke u ‘a ke u lava sio ki hono faka’a ha kakai kehe ke nau lava sio atu ki he ‘Afiona. Hange tofu ‘eni kia au ko e kole ‘a e punake, ke afe mai hono ‘elelo, ke u hiva ‘aki mu’a, mo fakaongo ki mamani ‘o si’o fu’u huafa’. to e faka’a atu au ke u lava ‘ilo koe he taimi kotoa kuo fiema’u ai koe. Oku mahino na’e lahi e kakai mo ‘enau lea na’e fai ki he tangata kui. Ko e fehu’i, ‘oku tau kau he teketeke’i e kakai hange ko Patimiosi, pe ‘oku tau fakahinohino mo fakafaingamalie ia ke a’u kia Sisu?`Oku tala `e hotau Ki`i Amá `a e me`a na`e fai `e Sīsū `i he `ene ongona `a e kalanga `a e tangata kuí. Mahalo pe `e pehē ‘e ha ni`ihi, “me`á ni na`e `ikai ke malava pe `e Sīsū `o fakamo`ui ia tu`unga pe `i he `ene kolé, ka e fekau atu ke ha`u; ke ha`u fēfē `oku kuí?” Pea mahalo ko e taha ia `o e ki`i akonaki `oku veloaki mai `e Ma`ake `i hotau Lesoni: ka tau kole ha me`a ki he `Otuá, kuo pau ke tau kau mo kitautolu `i hono ngāue`í. Kuo pau ke tau “tu`u ki `olunga” `o ha`u kiate ia. Pea neongo ko e “ha`u” ko iá `oku fou atu ‘i he fāfā he po`uli lahi, he ko e “ha`u” `a e kui, ka ko e laka atu `a e tui mo e falala`Otua `okú ne fakapapau`i `oku taumu`a ki he `Otuá, neongo `oku kei fakapo`uli tu`u `a e halá. Na`e `ikai ke fakamo`ui `a Patimioso tu`unga pe `i he `ene kolé, ka `i he `ene ta`etoka`i `a hono fakangatangatá, ko e kui ia, kae tu`u `o laka atu kia Sīsū. `Oku tau fononga `i he kuonga `oku tokolahi ai `a e kakai `oku kuí, `o puli ai ‘iate kinautolu ‘a e fu’u ivi mo e mafai ‘e lava ‘e he ‘Otua ‘o foaki koe’uhi ko ‘enau tui. `Oua `e tuku `etau tautapa ki he `Otuá, `o fou `i he tangilaulau mo e kole humaki, pea ‘oua ‘e ngata pē aí. ‘E fiema’u ke tau tu`u `o laka atu, neongo `a e `ikai ke tau `ilo `a e me`a ke tu`u ai hotau topuva`é, he `oku mo`oni `a e siate folau `o e mahina, `e ala mai `a `ene kelesí fo’ou `o fai hotau fakatonua mo ho tau fakatau`atāina.

‘Ānau, Lotu mo e ‘Aukai: ‘Oku ou fakafeta’i ho’o fanongoa ‘eku tauto’e, pea ke ‘alo’ofa ‘o afe mai. Tokoni’i au ke u fai pehe foki he toenga ‘o e mo’ui fo’ou kuo u lave ai. ‘Emeni.
-----------------------------

Tu’apulelulu, ‘Okatopa 24: Lau Folofola- Saame 34: 1-8.
Ki’i Ama: Saame 34: 3-4, “Mou kau mo au ke viki ‘a Sihova, pea hakeaki’i hono huafa fakataha. Na’aku ha’ao ki he ‘Eiki, pea ne talia, Pe ne hamusi au mei he’eku ‘u ilifia.”
Pou ‘Ao: `Oku fakakoloa kitautolu he Saame 34, ‘e he talanoa ‘o Tevita ‘o tau foki ki he’ene tupu hake ko e tamasi’i tauhi sipi ‘o a’u ki he’ene hoko ko e tu’i ‘o ‘Isileli, ka ko e ‘ofa’anga ‘o e ‘Otua Mafimafi. Na`e `atamai`ia mo pōtopoto`i `i hono kalofi `o e filí, pea na`á ne `ilo `a e feitu`u na`e ha`u mei ai hono tokoní. `Oku mālie pea meimei fakaoli `a e me`a na`e hoko `o fakatatau ki he `Uluaki Tohi ‘a Samiuelá ‘a e me’a na’e hokó. `Oku lolotonga hola `a Tevita meia Saula, kae fetaulaki tonu ai mo hono toe fili pe `e taha, ko e Tu‘i Katí ko ‘Ākisi. Me`apango ko hono fakatokanga`i lelei ia `e he taha `o e kau sevāniti `a e tu`í, `o ne talaki ki he tu`í `a Tevita ke tautea mo fakapoongi. Kae vave `a e lele `o e `atamai `o Tēvitá `o ne liliu hono ‘ulungaangá mo ‘ene tō’onga ke hangē ha tokotaha `oku seselé, `o a`u ki he`ene tuku ke tafe hifo hono fāvaí ki hono kavá. Talu ai `a hono tukuange ia `e ‘Ākisi, pea hoko atu `a e fononga `a Tēvitá. `Oku mālie `a e tō`onga `a Tēvitá, kae mahulu hake `a e mālie `a e a`usia `oku fakaa`u mai `e Tēvitá `i he Saamé ni. Na`e `ikai ke lau `e Tēvitá ia kuo tonu `a `ene laká, pe kuo tō `a e Tu`i Katí `i he `ene kākā fakapoto na’e faí. Ko e me’a na’e tu’u ‘i he loto ‘o e Tu’í, ko e ngaahi me’a kotoa na’á ne faí ko e taha pe ia ‘o e founga na’e fai ‘aki ‘e he ‘Otuá hono hamusi ia mei he nima ‘o hono filí. Na’e ‘ikai ko Tēvitá ka ko Sihova na’á ne fai hono fakahofí. Ko e `Otuá na`á ne `omi `a e fakakaukau vave mo tonu kiate ia ke ne fakatataa`i ha tokotaha kuo mole `a `ene fakakaukaú, pea ko e `Otuá, na`á ne fakamōlú `a e loto `o ‘Akisi pea liliu ai `a `ene fakakaukau ‘o tukuange ‘a Tēvitá ke ‘alu. `Oku lahi pe `a e ngaahi faingata`a `oku tau fetaulaki mo ia; ko e ngaahi Tu`i Kati `i he `etau mo`ui. Pea `oku tau mohu faiva ke tau kalofi `a e faingata`á `o hangē ko ia na`e fai `e Tēvitá. Me`apango pē he `oku tau mo`unofoa ai `o vikia ai hotau kitá mo `etau lava me`á pea ngalo ai ‘iate kitautolu ko Sihova na’á ne fai hotau fakahaofí. Ko hono mo’oni, ko ‘etau mo’ui, “Ko e mafana pe he penu kehe”. Ko e ‘aho ni, ‘oku a`u mai ai `a e fakamanatu `a Tēvitá ke fakamahino mai ko e `Otuá `oku ne mafeia ‘a e me’a kotoa pe, ‘o a’u ai pe ki he tu’unga faingata’a na’e ‘i ai, na’e kei lava pe ‘e he ‘Otua ‘o fakatau’ataina’i ia mei ai. Ko e taimi ‘oku ‘osi ai hotau ivi mo hotau poto pea ‘ikai ha’atau toe founga, ko e toki fakahaa’i ia ‘e he ‘Otua hono mafai ta’efakangatangata ‘i hotau lotolotonga. Ko e uki ia ‘oku fai ‘e hotau Ki’i Ama ki he ‘ahó ni. Tauaange ke tau kau fakataha mo e kapasa folau ‘o e mahina ko ‘eni, Ke Fai ‘aki ‘a e Kelesi ‘oku Fo’ou ‘etau Hū Tōtōakí Ka ne Fai ‘e ia hotau Fakatau’atāiná.
‘Ānau, Lotu mo e ‘Aukai: “Tau kau ke fakamalo’ia, ‘a e Tamai, ‘Alo, Laumalie, Kau ‘a e kakai ‘o Langi na, kau mo mamani fulipe, ‘Emeni”
---------------------------------------------