Demtsachen Yesema Atlanta Support Group

ዋ! እንዳትሳሳቱ!
-----
ሕዝበ ሙስሊሙ በዛሬው ጁምዓ ተቃውሞውን ያላሰማው ኡስታዞች ፌስቡክ ላይ እንደሚጽፉት የመጅሊስን ጥሪ አክብሮ ነው? ባለፉት ጁምዓዎችስ Protest ሊባል የሚችል ተቃውሞ ተደርጎ ነበር እንዴ? ምንም ዓይነት ተቃውሞ በሌለበት ሁናቴ ነው የጸጥታ ኃይሎች ህዝቡን በዱላና በጥይት የደበደቡት። የተቃውሞ ሰልፍ የሚመስል ዓይነት እንቅስቃሴ ከህዝቡ አልተነሳም። ሕዝቡ ስሜቱንና ንዴቱን እየገለጸ ያለው በሶሻል ሚዲያ ብቻ ነው።
-----
የሆነው እንዲህ ነው!!

በመጀመሪያው ሳምንት የጸጥታ ኃይሎች ለExcuse ይመቻቸው ዘንድ ቅጥረኞቻቸውን በመስጂድ በሮች ላይ አሰማሩ። ነገሩ ያልገባቸው ጥቂቶች በእነርሱ ተወናብደው ድምጻቸውን አሰሙ። ይህንኑ ይጠብቁ የነበሩት የጸጥታ ኃይሎች መስጂድ ድረስ ገብተው ምእመናንን በጥይት ገደሉ። (እዚህ ላይ ልብ በሉ!! ተቃውሞ ቢኖር እንኳ የጸጥታ ኃይሎች የተቃውሞ ሰልፍን ለመበተን ጥይት መጠቀማቸው በህግ የተከለከለ ነው። ይሁን እንጂ ዛሬ "ጸሐይ ወጥቷል፣ ለውጥ መጥቷል" በሚባልበት ዘመን ጭምር ተቃውሞን ለመበተን ውሃ መርጨት፣ የጎማ ጥይት መተኮስ፣ አስለቃሽ ጪስ መጠቀም ቅንጦት ሆኗል)።

በሁለተኛው ሳምንት ደግሞ ቅጥረኞቹ ቢመጡም ሕዝቡ ነቄ በማለቱ ከእነርሱ ጋር አልጮኸም። በመሆኑም የቅጥረኞቹ ድምጽ ታፍኖ ቀርቷል። ሕዝቡም ምንም ዓይነት እንቅስቃሴ ውስጥ አልገባም። በዚያን ጊዜ አንዳንዶች ከበሩ ራቅ ብለው መስጂድ ውስጥ ቆመዋል። አንዳንዶችም ከመስጂድ ወጥተው በሰላም ወደ ቤታቸው እየሄዱ ነበር።

ሆኖም ለኢስላም እና ለሙስሊሞች ጥላቻ ያላቸው ኃይሎች ያሰማሯቸው የጸጥታ ኃይሎች ሌላ ሰበብ አልጠበቁም። የተላኩት ከሰጋጆቹ መካከል ቀረብ ያሉትን ገድለው በሙስሊሙ ሕዝብ ላይ ሽብር እና ፍርሓት ለመፍጠር ነበርና እነርሱ በከፈቱት ተኩስ ብዙ ምእመናን አለቁ። ከዚያ ወዲህ ደግሞ መጅሊስ እና መንግሥት ትርኢታቸውን የሚተውኑበት ሌላ መጋረጃ ተከፈተ።

በዚህ ደረጃ በቁጥር የበዙ ሙስሊሞች በአንዋር መስጂድ የተገደሉት በ1987 እና በቀይ ሽብር ዘመን ብቻ ነው። ከዚህ ውጪ ያለፈው የኢህአዴግ መንግሥት በዱላ ብዙዎችን ቢፈነክትም ምእመናኑን እንደዚህ በጭካኔ አልገደለም። በተለይም በድምጻችን ይሰማ ዘመን በየሳምንቱ ተቃውሞ ይደረግ የነበረ ሲሆን ፖሊሶች ከመስጂዱ አጥር አልፈው ወደ ውስጥ አልገቡም።
------
ዛሬም እንደ ባለፈው ሳምንት ከሙስሊሙ ሕዝብ የተነሳ ተቃውሞ አልተነሳም። ተቃውሞ ማድረጉም አስፈላጊ አልነበረም። ሕዝቡ ቢያንስ የመንግሥት የልብ ትርታ ምን ያህል እንደሚመታ በትንሹም ቢሆን አውቋልና ለጊዜው ተቃውሞውን ውጦታል።

አሁን እንደምናየው ከሆነ ሕዝቡ እርስ በራሱ እየተነጋገረ ነው። የመንግሥትንም መግለጫ እየገመገመው ነው። ሁሉም በየጀመዓው "የመንግሥት ባለስልጣናት ትናንት የገቡት ቃል ተአማኒነት ያለው ነው? የሕዝቡን attention ለማስቀየስ ያስወሩት ቢሆንስ? ለወደፊቱ መስጂዶች እንዳይፈርሱ ማድረግ የሚቻለው እንዴት ነው?" እየተባባለ ነው። ከዚህ ውጪ ማሕተሙን እንኳ አስተካክሎ ማሰራት ያልቻለ እና ከውስጣዊ ውዝግብ እና ንትርክ ራሱን ያላጸዳ መጅሊስ የለቀቀው መግለጫ በሕዝቡ ዘንድ ተቀባይነት አግኝቷል ብሎ መዘብዘብ ውሃ የማይቋጥር ወሬ ነው።
------
መፍትሔው!!

የኢትዮጵያ መንግሥት ከአሁኑ crisis ለመውጣት ከፈለገ መፍትሔው ቀላል ነው።

1. የሕዝብን ድምጽ መስማት

2. መስጂዶች ከተገነቡ በኋላ "ህገ ወጥ ናቸው" እያሉ ማፍረስን ማቆም

3. መስጂዶችን ከከተሞች ዘመናዊ ማስተር ፕላን ጋር እንዲጣጣሙ አድርጎ ለማሰራት ከተፈለገ መንግሥት መሸፋፈኑን ትቶ ከሕዝበ ሙስሊሙ ጋር በቀጥታ ተነጋግሮ የሕዝቡን ይሁንታ ማግኘት፣ መስጂዶቹ ከፈረሱ በኋላ በድጋሚ ተገንብተው እስኪያልቁ ድረስ ደግሞ ሕዝቡን ማሳተፍ

4. እስከ ዛሬ ለተፈጸሙት ጥፋቶች ኃላፊነቱን መውሰድ፣ ለሞቱትና አካላቸው ለገደለው ሁሉ ካሳ መክፈል፣ አላግባብ የታሰሩትን በአስቸኳይ መፍታት፣ ከመጠን በላይ የሆነ ኃይል የተጠቀሙ የጸጥታ አካላትን ለፍርድ ማቅረብ፣

5. ለወደፊቱ ከተለመደው የክፍለ ከተማ ደንብ አስከባሪዎች ውጪ የታጠቁ የጸጥታ ኃይሎችን በመስጂድም ሆነ በሌሎች ቤተ እምነቶች አቅራቢያ አለማሰማራት
-----
ይህ በኔ እይታና ግምገማ የደረስኩበት አስተያየት ነው። በርካታ ሰዎችም የኔ ዓይነት አስተያየት አላቸው። መንግሥት ሁሉንም ማድመጥ አለበት።
-----
ድል ለሰፊው ሕዝብ!
አላሁ አክበር!!

10 አመት በፊት የሙስሊሙ ትግል ትውስታ
http://sndup.net/n9v4