Holistic Pilot - 整全導航員

上一次同大家講過心理健康嘅問題，大環境令大家不其然地產生壓力。對於大眾對心理同精神健康多左了解，逐漸將「倦怠」帶入視角。倦怠係一種感覺，覺得自己經常疲累、煩惱、總係感覺不完整同不被欣賞。李白果種懷才不遇然後躺平，可以係其中一種表現。

原因係咩呢？有好幾個。可以係長期受到高強度工作影響，當你長時間返24/7嘅工每接一個電話總有大事發生，而你又走唔到，因為要養妻活兒、卡數未找、供車供樓，逼住你去面對。當交感神經長期需要活躍去應付，身體自然會發出警號叫你停，但你知唔停得，所以繼續。最後大腦同身體其他部位因負荷過度而「冧偈」。伴隨著情緒低落，抑鬱症狀等，就會一蹶不振。

另一個原因就係環境不受控。呢度指嘅係所有野似乎都唔能照你意思去做，好似家庭唔順意、工作唔順利、拍拖又比人飛，跟住叫個外賣又被人倒瀉左。當「所有野」似乎都不能控制時，人就會決定放棄。可以點改變？又諗唔到方法，久而久之人就會慢慢地放棄控制，令原本可以控制到嘅野都由得佢，從而所有都失控。得唔到任何滿足感時，人就會向壞果方面諗，諗諗下就會轉牛角尖。

當有呢d情況時，最好盡快轉會想法，因為有研究指出，當人處於後期階段嘅倦怠，人係唔可以自己走到出嘅。可以點諗？想想係咩真係好似你咁諗，有d人會覺得我無得揀，其實又係唔係呢？你可以選擇轉工、可以選擇食過第二間餐廳、可以去打拳發洩。人總有得揀，只係你願唔願意同埋可能要放棄一d原有嘅野。

疫情問題令好多人都感到受壓同埋有好多無奈，從而對生活產生倦怠。近排終於放寬旅遊限制，飛一飛放鬆一下自己都係唔錯嘅選擇。飛唔飛係可以自己控制架😉，係時候改變一下思維啦！

P.S. 我無鼓勵你去飛呀🤫不過真係飛嘅麻煩比手信我
#認知行為治療

心理健康係一個近期多左好多人關注嘅議題，無論大環境、戰爭、定疫情都令大家身心俱疲（又無得去旅行😞）。我身邊有好多人都有不同程度嘅事情，有自殺、有離開香港、有離職，亦有情緒低落無興趣做平時鍾意做嘅嘢（burnout - 倦怠，之後我會專門講解）。

面對心理健康狀況，多數人會選擇唔理、睇精神科醫生，或者識我嘅會搵我傾下。千言萬語，始於足下。實際行動比吹水重要，當有人情緒低落，（輕輕）拍下佢膊頭，攬下佢（同性好啦，唔係人地嗌非禮），已經給予到佢地動力。

支持心理健康，由give a hug開始😁

#世界心理健康日 10/10

英女皇係2001年就911恐襲發表言論，”Grief is the price we pay for love”。取自英國著名文學作家C.S. Lewis嘅 The Four Loves，我會翻譯為「人，因愛而悲傷」。當尋日得知英女皇離世，相信好多香港人都會好傷心。

人，因愛而悲傷係希望大家能夠明白，愛與悲傷係共存嘅，正如生與死都係一樣。引用英女皇嘅說話，希望大家知道愛要好好表達，悲傷亦可以好好表達。傷心並不是弱者專利，任何有血有肉的人都有權利悲傷。

記住，回望過去係因為借鑒，而唔係要活在過去。明天比過去重要，我地應該要係悲傷過後放眼未來，先係對離世者嘅最大尊重。


PS 我翻譯得唔好嘅話請多多指教

作為輔導員，終身學習同自我增值都係專業道德規範之一。只有透過不斷訓練、實踐，先可以磨利自己果把助人嘅「劍」，幫助更多有需要嘅人。日後仍然有更多嘅實習進行，亦歡迎各位可以搵我。

#香港心理學院
#認知行為治療

心身症（Psychosomatic Disorders）

曾幾何時，我地都感覺到壓力，跟住身體就唔舒服，大家有印象嗎？我地真係病左？可能係心身症嘅邊緣。

身體有個「飛行模式」會想早走早著，相反亦有個「戰神模式」，即所謂嘅Flight or Fight mode。期間大家交感神經變得活躍、血流得更快、荷爾蒙加速分泌、感覺會變得麻木，幫助你應付一切問題，包括走佬快d，又或者被人打都唔覺得痛。但你可以諗下如果長期都係咁，而你又唔係Iron man，點會頂得住，自然身體就會發出警號，係時候要處理下啦。

一般嘅心身症狀有緊張帶嚟嘅腸胃問題、憤怒等高能量情緒帶嚟嘅心血管問題，同埋因解決唔到問題而引發起頭痛問題。不過有呢d症狀不等於有心身症，正如流鼻水唔等於傷風感冒，流鼻血唔等於睇得鹹野多一樣。

壓力可以由好多野引起，大改變例如轉工、生離死別、甚至好似我咁玩機動遊戲都會感到壓力。又可以係要做一d你唔想接受嘅野，例如面對群眾演講等等。重要嘅係意識到自己嘅壓力來源然後化解佢。當你感覺有困難或者唔知點解好，搵返d專業人士同你傾傾有助你搵到適合你嘅解決方法。

#認知行為治療
#心身症

學會「放下」

最近參加左個聚會，飲大兩杯，有幾個開始訴說各種人事不滿（唔係我）。當中講到某某唔識做野，同樣果個某某有錯唔認，又有爭執等等。發哂脾氣又話要打X佢，有個有少少理性嘅朋友同佢地講要放低呢d思想，反正佢都走囉，但佢地話係佢錯，點解要原諒佢，種越講越氣。

既然關係終結，我地就要學識「放下」，放下唔代表要原諒或者忘記曾經嘅痛，只係代表你唔再將佢放係眼前重覆「回味」，或者繼續在乎。衝突嘅發生，難免或多或少雙方都有責任，就好似你鎖住我，我又鎖返你。總想著對方低聲下氣道歉邊有咁容易？人總會做自己認為啱嘅事，呢種相對持續穩定嘅行為模式，就係阿寶句meme「人類總要重覆犯同樣的錯誤」。

當你被人鎖住條頸，你不斷歇斯底里咁大叫，叫佢解鎖，好似幅圖咁樣其實並不實際。與其嬲人點解唔幫你解鎖，想辦法自己解開更好。方法總比困難多，一粒石仔慢慢敲都有辦法解開，當你放下枷鎖，先真正實現「自由」。

發洩情緒係一個必然嘅過程，但亦要學懂接受、解決，然後放開。人生係自己嘅，情緒嘅副作用亦係自己去承受嘅。你想單純喊，定笑住喊由你話事。你又會點決定？

#認知行為治療
#許冠文
#人類總要重覆同樣的錯誤
#辦法總比困難多

大家有無認識到媽媽有情緒或者壓力，好想舒緩但又搵唔到咩方法？

經過由專業輔導員帶領嘅小組同個人輔導，同埋有類似經歷嘅媽媽同行，一定可以幫到大家。有興趣可以問下我或者直接聯絡 #香港心理學院 睇睇。

❤️ ❤️

👉 只需$999.00 就可以參與
👉 4️⃣次專題小組課程
👉 4️⃣次單獨專業面談

專題小組：每次45分鐘
單獨面談：每次55分鐘以內

💝 機會難得 💝
普通一次的專業輔導面談，也要$1000元以上。現在只需999元就可以享有 4️⃣次面談，並再加上 4️⃣個專題課程 及 小組成員活動的參與機會。

報名資格：
所有媽媽，包括準備做媽媽的也可以！（不限年齡）

❤️教授導師❤️
蘇穎文 (Jessie) 及 許樂怡 (Flora)
心理輔導學碩士生

收生人數： 8人以內

活動日期： 2022年 7月12, 19, 26日及 8月2日

時間 ： 星期二晚上8：00-8：45

活動地點：
九龍油麻地彌敦道469-471號新光商業大廈11樓1102室
（油麻地港鐵站 C 出口，向右行 59秒。）

👉課程內容： 每週一課

第1️⃣課： 認識情緒 & 壓力管理之放鬆練習
第2️⃣課： 建立同理心 & 促進良好溝通技巧
第3️⃣課： 了解自我 & 學懂如何愛自己
第4️⃣課： 經營關係，婚姻 & 幸福家庭秘笈

課程形式：
講課、工作坊或活動、成員／小組分享、討論及個人面談等。

👉單獨面談可以在課程完結後後兩星期內完成，過期無效。
👉課程前後時間，可約個人面談。

證書：
凡準時並100% 出席四課學員，皆可獲取由香港心理學院頒發 ”進步媽媽” 證書乙張。

💟 報名方法：💟
名額有限，先到先得！

1️⃣ 經過電話或Whatsapp (9717 9817) 查詢確認接受報名後，參與者必須在7月11日（一）中午前，把全期費用$999.00 存入 “香港心理學院有限公司 (Hong Kong Institute of Psychology Limited) ”之......

中國銀行戶口 012-688-1-020519-9。

2️⃣ 繳費後，連同銀行收據WhatsApp到 9717 9817 。

截止報名日期： 2022年07月11日（星期一）

課程查詢： 請致電或Whatsapp 9717 9817 與周先生聯絡。

>> 備註：
1. 因應社會情況及其他因素，上課地點、時間或形式等有可能隨時調整，一切變動以學院最後通知為準。

2. 香港心理學院擁有對整個活動內容、導師、上課日期及場地等安排最後的決定權利。

活動舉辦機構：香港心理學院
www.hkiop.hk

＃FloraHui & ＃JessieSo
＃媽媽心事台
＃小組輔導 ＃心理輔導

＃認識情緒 ＃壓力管理之放鬆練習
＃建立同理心 ＃促進良好溝通技巧

＃了解自我 ＃學懂如何愛自己
＃經營關係，＃婚姻幸福家庭秘笈

＃香港心理學院
www.hkiop.hk

＃HKIOP心理治療師專業證書課程

你地當中有無人好鍾意買野？尤其是online shopping 咁方便，成日比人話你買埋d唔等使嘅野？

購物狂現象（shopaholism）或者「強迫性購物」（Compulsive Buying）係一種心理狀態指只有係購物期間先會感到心情愉悅同放鬆，而其他空閒時間就感到壓力，或者每當負面情緒出現，就會用購物嚟舒緩壓力嘅情況。

其中原因可以有好多種，可以係強迫症症狀（OCD），但唔一定等於強迫症，就好似其他人會用不斷洗手一樣嚟面對生活上嘅壓力同焦慮感覺。佢可以係過度補償（overcompensation) ，即係之前嘅慾望一直得唔到滿足，而係而家作出補償，類似「有咁耐風流、有咁耐折墮」嘅概念，一次過爆出嚟。又或者可能有錯誤嘅認知概念，買得越多好野代表我社會地位越高，呢樣係認知扭曲（cognitive distortion）嘅一種。

最可怕嘅係社會觀念嘅扭曲，認為「人靠衣裝」買唔起車、Chanel包包、唔用最新iPhone 、住公屋或者要租樓就係窮L、無用、會被人睇唔起。

物慾呢樣野，就好似哲學家笛卡兒所講「我思故我在」，而唔係「他思故我在」。現世太多人在意並活係別人嘅目光下，我地係咪應該反思一下，到底咩野係你需要，而唔係「想要」又或者人地覺得你要有呢？

真係有壓力？搵我傾下啦，與其花大筆錢去買完野都解決唔到任何野，不如請我飲杯Starbucks順便傾下計可能重可以幫到你。

#認知行為治療
#強迫症

幸福與滿足

尋日聽左一個好有意思嘅talk，係講關係幸福嘅，好想係度同大家分享一下。

你點樣定義幸福同滿足呀？人人嘅定義同有所不同。我嘅好簡單，幸福就係諗起一件事會令人會心微笑，而滿足就係當我完成左我嘅需求。感覺上滿足比較容易喎，當你食好野食到飽咪滿足囉，都係嘅。

幸福呢？當我感覺被需要、能夠做自己？大家自定義啦！但點解香港人嘅幸福指數咁低嘅？根據香港家福會公佈，2022年的家庭幸福指數以10分為滿分，平均分為6.1，屬於「一般」的偏低水平，較2019年的6.31分，跌0.21分。

係呢幅圖，我地係咪應該反思一下，我地係咪過份吸收左太多外來嘅負能量同埋不屬於自己嘅負擔呢？「你讀唔書就等乞食啦」、「你咁嘅造型邊有人鍾意架」、「你做大嘅就讓下個細啦」、「你男人嚟架，喊咩呀」等等。呢d種種都成為你嘅枷鎖，令你一直處於唔開心嘅狀態。所以我地所有人，包括輔導員自己，都需要隻匙羹幫你將吸收左嘅負能量放走。

P.S. 你隻匙羹又搵到未呀？

#認知行為治療
#接納與承諾治療
香港心理學院 Hong Kong Institute of Psychology

身邊有無朋友係咁「都係唔得啦」或者總講一d負面、否定自己嘅說話？佢地可能經歷過好多挫折，好多解決唔到嘅問題而變成咁樣，有可能因此養成所謂嘅「習得無助感」。

佢地相信或已經預期痛苦一定會來到，所以放棄治療，當佢地開始相信呢種情況就係佢嘅「命運」，就會咁樣諗。一般情況，同佢嘅成長有著莫大關係，即係被教育「嘗試是無用」嘅暗示，管教過嚴、過度溺愛、或者一直無法自行學習解決問題等都造成呢種情況。

面對呢個問題，可以先問自己兩個問題，「係咪無任何方法解決/完成？」同埋「如果有日問題消失左，你係點解決？」，多鼓勵思考，問題總有方法處理，只係有d選項係你無留意或者唔想選擇。就好似我之前接嘅一個家庭問題個案，因為身體問題無法離開屋企，無計只有忍受對方嘅語言暴力，事實係咪咁？唔一定架，對方因為情緒而經常發脾氣，係咪可以關心多d對方感受，一齊回顧下開心嘅過往，或者做一d對方會開心嘅野？事實上，心情輕鬆左之後就明顯好轉啦，唔係咩？

#認知行為治療
#問題解決問題
#習得無助感

Exercise is Medicine 「運動是良藥」是由美國運動醫學學院(ACSM)發起，倡議將運動鍛練融入患者治療方案。香港亦有參與這全球性倡議項目，請參考這網絡平台: http://www.eim.hk/

面對壓力同情緒，雖然不理不理還需理，但多花時間做運動，從簡單嘅步行或者辦公室運動開始養成運動習慣，對身心都有幫助。運動對整體健康，和預防與治療各種慢性疾病(如心藏病、高血壓、糖尿病、中風、痴肥、抑鬱症、 焦慮、和骨質疏鬆症等)十分重要的。廢話少講，動起來啦！


#運動是良藥

疫情給予大家好大壓力，而稍為放緩令大家終於唔使好似吊頸咁可以抖一抖。最近卻聽到有人因染疫後壓力爆表選擇輕生。佢嘅想法令我深思後想分享一下。

家人中有老有嫩，作為「中層」嘅中年人自然唔希望老嫩唔開心，想當然地會承擔下所有，從去殮房到舉行都盡量避免佢地參與，將傷害減到最低，希望佢地可以慢慢釋懷。咁做唔好咩？

小朋友到7歲開始已經有對死亡嘅概念，知道死亡係不可逆轉，而4歲左右都已基本概念。所以要幫助佢地明白死亡係點嘅一回事，佢或者唔識表達，但佢地會感受到你地嘅難過，而唔識發洩所以有可能會誤會係因為佢地「唔聽話」造成等等，影響日後可能其他人離開佢地視線為死亡，產生無謂嘅焦慮。長者可能會擔心佢地承受唔到，所以唔想佢參與，但作為成年人，唔會感受唔到大家嘅「愁雲慘霧」，佢可能會因無法陪佢走最後一步成為遺憾，或者因同佢有unfinished business而感覺缺失，例如應承左同佢去旅行、同佢講對唔住等等。

事情無話絕對，但如果可以，建議比佢地參與一d佢地可以做到嘅部份，例如收拾物件，或者打點有無遺留，又或者摺紙做裝飾。對所有人，無論老少，「儀式」都好重要，幫助佢地有方法釋放情緒， 剝奪佢地嘅權利不能令佢地變好。當然如果場面太過嚇人，就唔好啦。

如果太細個，唔知點做，可以同佢講寫張心意卡，然後綁係氣球🎈放上天，對佢嚟講都可以係一個唔錯嘅儀式，或者幫身故者用佢嘅相做一本紀錄冊，即使佢地未必可以到現場，但可以承諾帶紀錄冊去現場。最重要係講清楚死亡嘅意思比小朋友聽，同埋適當時候要安撫佢地，即使佢地情緒激動，但發洩對任何人都會有一定幫助。

如果情緒一發不可收拾，又或者已經感覺佢情緒低落又或者好似抑鬱，身邊人嘅陪伴好重要，另外如果有需要，尋找專業輔導員或具喪親專業嘅社工或心理學家協助會對佢有莫大幫忙。

人，之所以會害怕，好大程度係因為未知（uncertainty ），升學之後唔知會唔會識到新朋友所以驚返學、裸辭之後生活唔知點去平衡所以卻步、移民之後唔知適唔適應所以好驚，種種情況嘅未知同逼到你唔做又唔得嘅內在感受就會形成壓力，有機會令你想去拖延。

情緒問題都係一樣，當你知道自己感受到有一種喘不過氣嘅感覺時，你可能會搵Google 大神，睇完胸悶原來有可能係心臟病即刻嚇到跳，「無事嘅，邊有可能呀？」，否定之餘害怕係咪真係有問題。同樣地，知道應該要處理情緒問題但又唔知咩事，害怕最壞情況而選擇「避而不談」，總覺得情緒就等如「精神病」。

好多時遇到嘅情況，係唔去到最後都唔處理，結果去到真正要處理就變得好痛苦，何必呢？香港有好多合資格嘅輔導員同心理學家都可以幫你釐清你心中嘅疑慮。真係有需要，就搵人協助啦。

#認知行為治療
#國際健康日

鄭子誠係邊個相信大家都知道，細個果陣我都有聽過佢嘅電台節目，當中磁性嘅聲音真係好有感覺。但大家有無聽過聲音都可以療癒人心？聲音治療又係咩？有無用架？

從一次培訓中，首次聽到有香港聲學學會，專門收集城市中嘅聲音。過程好有趣，可以合埋眼放鬆心情，亦係我第一次聽「聲景」呢個詞語。大家不妨試試聽下然後話我知有咩感覺？https://soundprojectblog.wordpress.com
至於應用上嚟係點？比兩個例子大家。

頌鉢治療係利用聲音同音頻令大家進入放鬆狀態，但當中為人做調頻嘅概念存在爭議，但我唔會討論。當人聽到森林聲音、鳥鳴等會感到舒服一樣，幼兒係父母親懷中聆聽其心跳聲亦會變得平靜（所以點解未訓著你想放低佢係無可能嘅😆）。

當聲音同某種情感有連結，重新聽返嘅時候就會不其然地產生相同嘅情感。所以得閒擁抱下家人，聽聽佢地嘅心跳聲啦！

各位追隨者或朋友，我老師嘅一個新「社會運動」- 心理熱線出爐啦。如果大家或身邊朋友有需要，可以聯絡 #香港心理學院，當中已經有30名義工支持大家嘅心理同情緒。

我亦係當中一員，麻煩代為轉發，支持大家攜手走出疫（逆）情。

#香港心理學院
#認知行為治療

＜HKIOP心理熱線員＞

2022年3月的今天，香港仍然受到Covid-19 和並變種病毒影響，大多數香港人身心都受到不同程度的影響。

有見及此，我們一群來自香港心理學院的心理治療師將祝福送上每一位香港人外，更加希望可以直接為情緒和精神上有需要協助的朋友。

如你或你的親友有需要享用此免費的服務，請先WhatsApp到 5313 2125， 簡單留下以下資料，我們隨即有專人／輔導員聯絡大家。

WhatsApp上所需資料：

聯絡名稱：
性別：
年齡：
回電號碼：
希望處理的問題：
交談語言：粵語／普通話

輔導形式：

是次活動是以電話進行輔導（不設視像），可之前選定粵語／普通話，每次45分鐘，最多使用3次，如有特別需要雙方再作安排。

支援範圍：

優先：因疫情所引致個人的心理、情緒、精神和行為問題等──例如：焦慮、煩燥、不安、憂鬱、集中力下降，失眠等問題。

其次：疫情以外因其他因素而出現的心理、情緒、精神和行為問題等。

輔導員資歷：

我們＜HKIOP心理熱線＞現有30位熱線輔導員，而且還在不斷增加中，他們都曾修畢或正在修讀香港心理學院＜HKIOP心理治療師＞專業證書課程的心理治療師。他們分別都懂得情緒管理、認知行為治療、催眠治療、敍事治療和焦點解決短期治療及電話輔導等技巧。

備註：

＜HKIOP心理熱線＞不作病理上的診斷及發出任何書寫報告給求助者。

私隱保密：所有收集之訊息和談話內容（除了內容波及個人或他人人生安全或違法行為等外）皆會受到保密。

開始和終止：在輔導過程中，求助者可以隨時選擇終止。

如遇特別情況，輔導員需要終止已經開展中的輔導時，學院或輔導員會盡快通知有關求助者，有關輔導並會被安排給其他輔導員接手，求助者可選擇繼續或終止之後的輔導。

建議機制：如對＜HKIOP心理熱線＞輔導服務有任何建議（包括讚賞或投訴），歡迎透過WhatsApp (5313-2125)或電郵 hkiop＠hkiop.hk 以文字形式向學院溝通。

聲明：＜HKIOP心理熱線＞輔導服務之形式和一切的安排皆以香港心理學院最後公佈為準及擁有最終的決定權。＜HKIOP心理熱線輔導員＞

最近最hit嘅話題明顯係疫情同埋俄烏戰爭，身邊好多人都會覺得係世界末日嘅先兆，對現狀感到好驚恐同焦慮。我地可以點樣處理呢？

我地可以首先問自己當自己咁諗時，對自己有咩影響呢？好多時我地不停咁諗時，自己唔再做自己想做嘅野，例如工作或者令自己提唔起興趣做自己鍾意嘅事，呢樣係咪想要呢？

而家好輕易就利用手機或社交媒體超過8小時以上，不自覺地產生科技依賴，令人深陷其中。當你意識到自己對相關新聞有負面情緒，最直接應該減少接觸新聞或者訊息嘅時間。因為當我地接觸太多資訊同太長時間都會令我地產生無形嘅壓力。

我地亦要增加疏導情緒嘅方法。疫情其間好多事情都唔能夠做，所以更要尋持方法去釋放。打電話比朋友吹下水、沖涼時大聲唱下歌，或者做一d手工藝都係一個好好嘅選擇。

#香港人幫返香港人，身邊有好多人都有不同程度嘅情緒唔知點算？同佢地多多溝通，甚至簡單嘅陪伴都已經好好。我已經加入兩個社區組織幫助不同群體處理情緒困擾，希望可以幫到大家，之後會再公佈，但如果需要可以直接WhatsApp 我，置頂post希更詳細介紹。

歡迎大家搵我，互相支持哦🥰

祝各位女性38婦女節快樂。講起婦女節，而家好多都唔知慶祝d咩，總之又係一個使錢節日，甚至有d人覺得只係「婦女」節。

其實當中有段悲慘故事，照慣例無人犧牲唔會有人關注。大概就係總終係1909年3月8日，美國芝加哥萬名女工舉行街頭示威遊行，要求縮短工時、增加工資、獲得選舉權，並喊出了象徵經濟保障和生活質量的「麵包加玫瑰」的口號。所以3月8日係紀念一個女性平權嘅日子。

無論係以前定而家，女性都係處於一個尷尬嘅處境，以前女性被睇低，不受重視；現在似乎比較好，但仍然存在過度限制及保護。

環境及遺傳共同決定個性或人格，social learning 係一個好重要嘅因素，當中我地通常透過觀察學習行為。另外標籤化亦會影響個人人格成長，令人不自覺地用「我應該…」去限制左自己或其他人。

不過人總有自由選擇嘅權利，所以應該更在乎自己嘅內心，盡情慶祝吧！🥳

#人格心理學
#三八婦女節


MBTI 認識-4

今次係人格系統嘅最後一個介紹啦。最後將會講感知型同判斷型人格嘅分別。

感知型同判斷型人格係講緊我地如何去看待同認識我地身處嘅世界。感知型人格嘅人係對感受作出反應同行動，用感覺去生活，例如我覺得同事好惡，你就會馬上生成一個感覺就係公司文化好差或者壓力好大，唔值得留低。同時佢地喜歡尋找機會同做野比較彈性，不過佢地傾向非結構性咁去理解環境所以有機會以偏概全或者比較零亂。

判斷型人格嘅人正好相反，講求系統化去理解世界，需要秩序同有組織咁去了解事情，無決定性結果前絕對唔會去冒險。不過佢地好易受影響，當有新嘅資料加入，佢地就可能需要重新再理解先可以決定，比人感覺好慢吞吞。用返上面嘅例子，佢可能先分打聽下到底果位同時發生咩事，再睇睇公司政治同福利，再決定入唔入去做。

講左咁多，其實我係咩型人？其實我係ISFP，藝術家🧑🏻‍🎨，大家又點睇我呢？你估唔估到？我同你又似唔似？

大家又點睇自己呢？歡迎分享你嘅睇法。

#人格心理學
#榮格

人人都有壓力，疫情又上新高峰。日日見到幾千宗確診，內心都會有唔開心。如果你認識有朋友，因為疫情或者社區隔離而產生情緒問題，可以搵我傾傾，疫情期間費用全免。甚至純粹想搵人傾訴下都可以，只要係疫情中幫到大家就已經足夠。

為左方便大家，會提供電話或WhatsApp 聯繫。確定好時間後我會聯絡你。如有需要，請先Messager或WhatsApp 聯絡我預約。歡迎轉發。

#香港人加油
#戰勝疫情

MBTI 認識-3

思考/ 情感型係代表你將會用咩傾向去做判斷或者決定。

大家都應該好清楚明白，呢一pair亦係4個分類入面最唔使多講嘅。思考型係喜歡用邏輯決定事情嘅人，好擅長分析（啱唔啱就另一回事）用拼圖為例，佢地會先諗點拼，可能拼左邊邊先，或者睇到有咩特定圖案先分左出嚟拼好先。而情感型嘅人偏重感受，無論自己定其他人。拼圖時比較freestyle，或者根據感覺行先，例如，佢地會問朋友點拼好，尋求同別人交流，拼圖可能反而係其次。

對於稱讚亦有唔同，思考型要求你讚到位同仔細，你讚佢數據分析得好、或者格式100佢地就最開心，反而對讚情感型嘅人，就要從「人」入手，讚佢用色令人好舒服、版面設計好人性化，就算最終你唔知讚左d咩，佢都會好開心。

大家又點睇自己呢？歡迎分享你嘅睇法。

#人格心理學
#榮格

MBTI認識-2
今次我地認識一下另一組MBTI 嘅元素：直覺型對實感型。呢兩個元素係相對嘅，不過同樣都係講緊我地認識世界同處理資訊的方法。

直覺型主要靠感覺去感知呢個世界，一般都係用感覺同想像去認識世界。例如你會聽到佢地會話「我想像到咁樣做會…」。另外，比起實際行動，佢更傾向喜歡想像去諗野，同利用符號或者圖像等抽象事物去處理事情，佢地可以好天馬行空。佢地唔鍾意留意細節，反而關注大局。

而實感型嘅人擅長用五感去認識世界，好似好鍾意去摸野、睇野、或者聞野等等。佢地通常都係經驗行先，而唔會相信感覺出發。好容易會因為一種氣味而記得間餐廳一世，如果間餐廳味道唔多好就死得。因為鍾意細節、經濟同事實，所以佢地會針對每個重點，但唔會花時間留意大局。

係佢地同時去諗一件事嘅時候就會分得好清楚。例如做生意，直覺型嘅人會首先諗到點可以收支平衡同發大嚟做，實感型嘅人都唔知你想點做；而實感型會諗點樣每一樣產品可以點吸引客戶，然後加埋數據分析，令直覺型聽到一頭霧水。

你又係覺得自己屬於咩類型？似唔似你？

#人格心理學
#榮格

MBTI認識-1
大家玩過性格測驗嗎？最出名又大路嘅莫過於MBTI啦！由榮格（Carl Jung）創立嘅人格心理學為原型，並由美國一對母女Myers同Briggs創造出嚟。雖然佢地都無心理專業背景，但經心理學家測試後投入應用。

其中兩個態度指標，同四個功能指標組成。今日會講講態度指標。態度指標分外向型同內向型。一聽外向同內向係咪諗「講唔停」同「孤獨精」嘅人呢？其實榮格所指嘅外內向係指人嘅動力來源系統，外向係要係別人身上獲得動力，例如面對壓力或者傷心時必然會捉住朋友傾通宵，而內向嘅人面對同樣嘅事就想做宅男女，最好無人搵到佢。

不過大家注意外向同內向係講緊傾向性而唔係絕對，即係外向唔一定鍾意吹或者做presentation ，而內向唔代表佢一定要褶埋，佢都可以玩得好放。不過佢地都會有一定嘅行為模式，從對話可以聽得出。外向型人簡單直接，一就一唔會講得太多，一般都係講指示式對話，例如「你照我咁講就得啦」，通常唔會講多次。而內外型好擅長延長句子，簡單就係「噚氣」，例如「你聽我講，件事其實可以…不過你都可以…」，煩到嘔。所以如果當外向型同內外型講野最好比多少少耐性聽下佢個重點係邊；而當內向型同外向型講野，最好諗好重點先講。

可能有人睇落我好似踩到內向型嘅人好煩又衰咁，一定以為我好討厭佢地啦。錯！其實我係極度內向型嘅人，吹咩！😂

#人格心型學
#榮格

係2021年最後一日，我會繼續講點樣可以幫助你成功實現你嘅全年大計。

要實現嘅話，先要了解何謂動機及動力。動機（motivation ）係簡單指你點解要完成你嘅計劃，而動力（drive）係指幫助你完成計劃嘅力量。兩者缺一不可，呢個就係我上個post講如果如何令你堅持完成嘅重點啦。

你計劃你要完成嘅事前，首先要明白你嘅計劃會對你有咩影響，如目標係每個月睇兩本英文書，然後無任何得益，就無任何動機推動自己去，不過目標記住要set得正面。例如每個月睇兩本英文書去改善我嘅英文水平幫助我去考IELTS 入心儀大學。當目標明確同你重視嘅事物有關連就會產生動機去驅使你去做。千萬唔好反覆諗如果唔得就世界末日，咁只會打沉自己。如果唔明點解，可以睇返我上一個post。

動力又點呢？繼續以買樓為例。一個好大嘅目標，唔講無一個明確目標，心理上遇到一個好大好難達成嘅目標時，人就會容易退縮並產生拖延問題，動力係呢個時間就可以發揮作用。例如目標係要儲100萬做首期，定一d你好鍾意嘅活動，當你達成一個里程碑時適時獎勵一下自己。可以儲到5萬時，比自己請兩日假期去staycation ，然後10萬就去約朋友去party room玩通宵，50萬就去玩d興趣班，而完成目標就食餐貴buffet。當然你可以調整，但唔好太多太密。

另外重有d小tips，一可以寫一個完整計劃貼出嚟提醒自己，二可以將你嘅計劃話比你信任嘅人幫你監察同鼓勵你。如果係運動嘅，比如定左每日跑步，將運動服放係床邊，提醒自己要每日做亦係一個好方法。想出一個提醒自己嘅合適方法係好重要嘅。

點解年頭大計好似永遠都實現唔到？

「我要今年開始做運動」、「我要儲首期買樓」、「我唔要再做A0，我要出pool」等等嘅目標寫好哂，但到年尾老馮實現唔到，點解嘅？

當你set完一個所謂目標，無方向又含糊，身體同大腦好誠實，自然唔會做，因為人嘅天生個性係想要一個確定而不變嘅環境。要打破佢，需要制訂smart goal、不要帶有「不」字或負面字眼及適當嘅獎勵計劃。

SMART 係指要準確、可以量度、可實現、實際、有時限。即係點？以做運動為例，要做到以上五點，可以改為「我要一星期跑兩次步，先為期一個月，之後再視情況再加次數或做其他運動」。準確，就係要目標清晰；可以量度，就係可以比你計算同到；可實現；就要定得唔好過分高難度；實際，要有調整嘅機制；有時限，就要為自己定一個短期或中期目標。

「不」點解唔可以？一個不字暗示住你不得不做又或者唔想要某樣野，帶著負面情緒。大腦其實好蠢，知你唔想或不得不知會自動filter左佢，變成由「不要」變左「要」，因為咁好似對你最好。例如要減肥，可以改成想要一個健康嘅身體。

咁未完成都要獎勵自己？通常細個都係完成左先有獎勵，例如我果個年代，考到十名以內先有得去海洋公園，邊有話下學期成績都未出就有野咁好架🤣。不過適當嘅獎勵，只要唔過份係可以增加實行目標嘅動力；尤其是長期目標，例如買樓，可能目標要十年先完成，試想想如果十年間一d獎勵都無，邊有動力行落去啫？

你嘅新一年嘅目標又係咩呢？話比我知啦😆下個post我將會講下點樣提升完成目標嘅動力同動機。

#認知行為 今次唔係治療
#動機

最近性上癮成為熱話，如果大家有留意應該就知道。其實性上癮係咩？係咪指d人郁d就話要？定講得鹹濕野多嘅人就係？

其實性上癮又叫性慾異常亢奮（Sex Addiction），雖然被報導嘅係男性居多，但實質上係無分男女，男女比例大約係9:1。患者會對任何與性有關的行為過多，以致影響患者的日常生活及對身邊所有人造成困擾，並產生病態性嘅衝動或強迫性的性行為；如果性慾得不到滿足，就會出現極度焦慮、沮喪又或者情緒變得暴躁。

性上癮患者大多是希望透過可控的情況及環境下，逃避症狀所衍生的痛苦及壓力等負面情緒。性上癮通常來自內心的逃避心理，亦有可能同兒時經歷有關，會嚴重影響患者的日常生活。也因為患者難以分辨自身情感，需要或想要的分別，令患者不斷向外尋歡、提出性邀約、做出衝動而不顧後果嘅行為，導致破壞家庭和諧，並會嚴重影響身體機能。由於患者荷爾蒙出現異常，令自己無法控制行為，往往會為滿足性而放棄所有原來重要的事物。

而性慾強只係停留係想要階段，同性上癮患者因為要舒緩情緒而「需要」嘅分別好大。簡單而言，性慾強唔會因為想做而唔返工食飯，但性上癮患者可能會。至於講鹹濕野、成日有性幻想，又或者純粹多性伴侶係完全另外一回事，同是否成癮無半點關係。

音樂到底會唔會助眠？
音樂的確可以令人放鬆，加速進入睡眠狀態，更容易訓著，但係唔係真係好？台大醫院精神部主治醫師陳錫中認為，音樂會令大腦無法完全進入放鬆狀態，並長期啟動自律神經，無法真正休息，影響荷爾蒙分泌，及造成依賴。
以下有3大方法可以改善失眠問題：
1. 養成固定作息時間 - 當你日夜顛倒時，搞亂生理時鐘，自由睡眠質量會差，固定時間休息可以比你身體適應。
2. 睡前一小時停止使用電子儀器 - 電子產品產生嘅藍光會抑制褪黑激素分泌，褪黑激素係一種調節生理時鐘及幫助睡眠的荷爾蒙，讓人鎮靜並產生睡意。遠離電子產品一段時間就可以幫助你進入睡眠狀態。
3. 補充GABA - 最後嘅方法，雖然唔太建議，但如果無辦法都可以試試。GABA是一種人體的胺基酸，存在人體的腦部及眼部中，它能促進安眠，讓亢奮的腦細胞休息。當然，如果需要服藥，之前最好問問醫生。