Embassy of the Republic of Uzbekistan in Singapore

Ўзбекистон 121 мамлакатни ўз ичига олган "Safety Perception Index 2023" – дунёнинг энг хавфсиз мамлакатлар рейтингида 1-ўринни эгаллади, дея хабар бермоқда "Дунё" АА мухбири.

"Uzbektourism.uz" маълумотига кўра, Ўзбекистон фуқаролар ҳаёти ва саёҳат қилиши учун хавф даражаси минимал экани айтилган.

Энг хавфсиз мамлакатлар юқори бешталигидан шунингдек, Бирлашган Араб Амирликлари, Саудия Арабистони, Норвегия ва Эстония жой олди.

Марказий Осиё давлатларидан Қозоғистон 14, Тожикистон 17, Қирғизистон 26-ўринга жойлашган.

Рейтингнинг энг қуйи қисмини Гвинея, Сьерра-Леоне ва Мали давлатлари эгаллаган.

"Safety Perception Index" озиқ-овқат ва сув, зўравонлик жиноятлари, ноқулай об-ҳаво шароити, ақлий соғломлик ҳамда меҳнат муассасаларидаги хавфсизлик каби факторларга эътибор қаратади. Ушбу омиллар мамлакатларнинг хавфсизлик рейтинги учун асос бўладиган образни ишлаб чиқишда муҳим ҳисобланади.

Ўзбекистоннинг мазкур рейтингда биринчи ўринда эканлиги чет эллик сайёҳларнинг мамлакатимизга бемалол келиб-кетишлари учун замин яратади.

------

Uzbekistan took 1st place in the ranking of the safest countries in the world "Safety Perception Index 2023", which includes 121 countries, reports Dunyo IA correspondent.

According to Uzbektourism, the rating indicates that the level of danger to the life and movement of citizens in Uzbekistan is minimal.

The five safest countries also included the United Arab Emirates, Saudi Arabia, Norway and Estonia.

Of the Central Asian countries, Kazakhstan took 14th place, Tajikistan – 17th, Kyrgyzstan – 26th.

Guinea, Sierra Leone and Mali took the lowest place in the rating.

The "Safety Perception Index" focuses on five factors: food and water, violent crime, adverse weather conditions, mental health and safety in work settings. These factors serve as an important basis for the formation of an image that will become the basis for the security rating of countries.

The fact that Uzbekistan is in first place in this ranking creates the basis for the unhindered arrival and departure of foreign tourists to our country.

Ўзбекистон Президенти Сингапур Парламенти Спикерини қабул қилди

Ўзбекистон Республикаси Президенти Шавкат Мирзиёев 2 май куни Тошкент халқаро инвестиция форуми доирасида Сингапур Республикаси Парламенти Спикери Сиа Киан Пенгни қабул қилди.
Суҳбат аввалида парламент раҳбари мамлакатимиз етакчисига самимий қабул учун миннатдорлик билдирди ва форум юксак даражада ташкил этилганини эътироф этди.

Ўтган бир йилда Ўзбекистон-Сингапур муносабатларида улкан натижаларга эришилгани мамнуният билан қайд этилди. Иккита давлат ташрифи муваффақиятли ўтказилди, товар айирбошлаш ҳажми, қўшма лойиҳалар сони, шу жумладан тўқимачилик ва кимё, қишлоқ хўжалиги, логистика ва бошқа тармоқларда изчил ошиб бормоқда.

Кадрлар тайёрлаш, инвестициялар, туризм ва жамоат хавфсизлигини таъминлаш соҳаларида ҳамкорликни ривожлантиришга алоҳида эътибор қаратилди.

Олий даражадаги келишувлар устидан биргаликда самарали парламент назоратини ўрнатиш муҳимлиги таъкидланди.

******

The President of Uzbekistan receives the Speaker of the Parliament of Singapore

On May 2, President of the Republic of Uzbekistan Shavkat Mirziyoyev received the Speaker of the Parliament of the Republic of Singapore Seah Kian Peng on the sidelines of the Third Tashkent International Investment Forum.
The head of parliament thanked the Leader of Uzbekistan for the warm welcome and highly appreciated the organization of the Forum.

It was noted with satisfaction that the past year was a breakthrough for relations between Uzbekistan and Singapore. Two state visits have been successfully carried out, trade turnover has increased, and the number of joint projects, including in the textile and chemical industries, agriculture, logistics, and others, is consistently growing.

Particular attention was paid to increasing cooperation in personnel training, investment, tourism, and public safety.

The importance of effective joint parliamentary control over the implementation of agreements at the highest level was noted.

O'zbekistonning yangi elchisi Singapur prezidentiga ishonch yorliqlarini topshirdi

O'zbekistonning yangi tayinlangan Favqulodda va Muxtor Elchisi Alisher Qayumov Singapur Prezidenti Tarman Shanmugaratnamga ishonch yorliqlarini topshirdi.

O'zbekiston elchisi sharafiga "Istana" hukumati qarorgohida faxriy qorovul saf tortdi.

Singapur Prezidenti bilan suhbat chog'ida 2023-yilda amalga oshirilgan oliy darajadagi o'zaro tashriflardan so'ng alohida jadallik kasb etgan ko'p qirrali O'zbekiston-Singapur hamkorligining bugungi holati va istiqbollari muhokama qilindi.

Singapur rahbari O'zbekistonda amalga oshirilayotgan islohotlarni yuksak baholab, Prezident Shavkat Mirziyoyev rahnamoligida mamlakatimizda kuchli fuqarolik jamiyati barpo etish, ochiq va muvozanatli tashqi siyosat yuritish, barqaror iqtisodiy o'sishni ta'minlash borasida salmoqli yutuqlarga erishilganini ta'kidladi.

O'zbekistonning xalqaro biznes, jumladan, singapurliklar uchun jozibadorligi tobora ortib borayotgani, buning yaqqol isboti sifatida Singapur parlamenti spikeri boshchiligidagi va 25 dan ortiq ushbu davlat kompaniyalari vakillaridan iborat delegatsiyasi bo'lajak Toshkent xalqaro investitsiya forumida ishtirok etishi ta'kidlandi.

Suhbat yakunida Singapur Prezidenti ikki tomonlama munosabatlarni mustahkamlash va rivojlantirish borasidagi sa'y-harakatlarga har tomonlama hissa qo'shishga tayyorligini bildirdi, shuningdek, O'zbekiston rahbariyati va xalqiga o'zining ezgu tilaklarini yo'lladi.

Eslatib o'tamiz, Alisher Qayumov Singapurga mart oyi o'rtalarida tashrif buyurgan edi. U O'zbekistonning Singapurdagi (2018–2024) va Avstraliyada (2022–2024) o'rindoshlik asosidagi elchisi (qarorgohi Singapurda) bo'lib ishlagan Qahramon Shokirov o'rniga tayinlandi. Yangi elchi Singapurga tayinlanishidan oldin O'zbekistonning Germaniyadagi elchixonasida maslahatchi bo'lib ishlagan.

Prezident iftorlikda ishtirok etdi

Prezident Shavkat Mirziyoyev 25-mart kuni butun mamlakatimiz bo‘ylab o‘tkazilgan iftorlikda ishtirok etdi.
Xalqimiz hayoti va ma’naviyatida Islom dinining o‘rni beqiyos. Yurtimiz musulmonlari muqaddas aqidalarga amal qilib, ezgu an’analarni davom ettirib kelmoqda.

Bu yil ham elimiz ma’naviy poklik, xayr-u saxovat ayyomi bo‘lgan Ramazon oyini katta xursandchilik bilan kutib oldi. Masjidlarda Qur’oni karim xatm qilinib, yurtimizga fayz-u baraka yog‘moqda. Jamiyatimizda do‘stlik-birodarlik, mehr va saxovat tuyg‘ulari kuchaymoqda. Odamlar bir-biriga yanada mehr-oqibatli bo‘lib, bemorlar va keksalar, yordamga muhtoj insonlarga g‘amxo‘rlik ko‘rsatish tobora kengaymoqda.

Bugungi muborak oqshomda yurtimizning barcha hududlarida, viloyat, shahar va tumanlardagi hamma mahallalarda iftorlik dasturxonlari yozildi. Namangan viloyatidagi ehsonga Farg‘ona va Andijon viloyati nuroniylari ham tashrif buyurdi.

Davlatimiz rahbari mamlakatimiz musulmonlarini Ramazon oyi bilan yana bir bor tabrikladi.

– Bugun barchamiz – muhtaram ulamolarimiz va nuroniylarimiz, jamoatchiligimiz vakillari birgalikda iftor qilmoqdamiz. Yagona, ahil oila bo‘lib yashayotgan ko‘pmillatli O‘zbekiston xalqi bugun go‘yoki bir dasturxon atrofida jam bo‘lib o‘tiribdi. O‘ylaymanki, bu savobli tadbir inson qadrini ulug‘lashga, o‘sib kelayotgan yoshlarimizni mana shunday olijanob ruhda tarbiyalashga xizmat qiladi, – dedi Shavkat Mirziyoyev.

Prezident bu ishlarga hissa qo‘shayotgan iymon-diyonatli, saxovatli yurtdoshlarimizga tashakkur aytdi.

Chindan ham, xalqimiz azal-azaldan bir-biriga tayanch bo‘lib, mehr-muruvvat ko‘rsatib yashashni odamiylikning oliy mezoni deb biladi. Ayni shu olijanob fazilatlar bizlarni doimo yagona xalq, yagona millat etib birlashtiradi, hayot sinovlari va qiyinchiliklarini yengib o‘tishda beqiyos kuch-quvvat beradi.

Keyingi yillarda xorijda o‘qiyotgan va ishlayotgan vatandoshlarimizga ham munosabat o‘zgardi. Ularning huquq va manfaatlarini himoya qilish, moddiy va ma’naviy qo‘llab-quvvatlash bo‘yicha salmoqli ishlar olib borilmoqda. Jumladan, ularni Vatanimizga qaytarish, ish o‘rni va daromad manbai bilan ta’minlash, oila a’zolari va farzandlarini ijtimoiy himoyalash yuzasidan muhim chora-tadbirlar amalga oshirilmoqda.

Yaqinda 40 dan ziyod ulamolar Rossiya, AQSH, Janubiy Koreya, Turkiya, Misrga safarga yuborildi. U yerlardagi vatandoshlarimizni din-u diyonatga da’vat etish bilan birga, hozirgi tahlikali vaziyatda ogoh bo‘lib, qonunlarni hurmat qilish, yomon yo‘llarga kirmaslik zarurligi haqida suhbatlar qilishdi.

Davlatimiz rahbari chet eldagi yurtdoshlarimizni ham ulug‘ ayyom bilan tabriklab, ularga sog‘liq-omonlik va omad tiladi.

Ma’lumki, yangilangan Konstitutsiyamizda “O‘zbekiston - ijtimoiy davlat” degan muhim qoida belgilab qo‘yilgan. Shu asosda mamlakatimizda mutlaqo yangi ijtimoiy himoya tizimi shakllanmoqda. Bu tizim birinchi navbatda ehtiyojmand kishilarga, jumladan, nogironligi bo‘lgan, kam ta’minlangan, yetim qolgan, o‘zgalar parvarishiga muhtoj insonlarga har tomonlama e’tibor va g‘amxo‘rlik ko‘rsatishga qaratilgan.

Bu haqda so‘zlar ekan, Shavkat Mirziyoyev Alisher Navoiy bobomizning “Kimki bir ko‘ngli buzug‘ning xotirin shod aylagay, oncha borkim, Ka’ba vayron bo‘lsa, obod aylagay” degan hikmatini yodga oldi.

Bunday qarash muqaddas dinimizning asl insoniy mohiyati bilan hamohangdir. Haqiqatan ham, chinakam musulmon o‘ziga ravo ko‘rgan narsani boshqalarga ham ravo ko‘radi.

Mamlakatimizda xalq farovonligini oshirish, kambag‘allikni qisqartirishga sa’y-harakatlar mohiyati aytib o‘tildi.

Davlatimiz rahbari so‘zining yakunida eng ezgu tilaklarini bildirdi.

– Muborak Ramazon oyi sharofati bilan yurtimizda, jami musulmon o‘lkalarda, butun dunyoda tinchlik, barqarorlik hukm sursin, odamlar, xalqlar o‘rtasida do‘st-birodarlik, o‘zaro hurmat tuyg‘ulari ustuvor bo‘lsin. Kuchlilar – ojizlarga tayanch, saxovatpeshalar – muhtojlarga yordamchi, yoshlar – qariyalarga g‘amxo‘r bo‘lsin. Dinimizda belgilab berilgan to‘g‘ri yo‘ldan og‘ishmaylik, ayni paytda zamon bilan hamnafas yashaylik. Yoshlarimiz bilimlari bilan jahonga tanilib, yurtimiz dovrug‘ini yuksaklarga ko‘tarishsin. O‘zbekiston dunyoning eng oldi, eng ilg‘or davlatlaridan biriga aylansin. Tutgan ro‘zalarimiz, duolarimiz dargohida qabul bo‘lsin, – dedi Prezidentimiz.

Qur’on oyatlari tilovat etilib, Alloh taolodan xalqimizga tinchlik-farovonlik tilab duolar qilindi.

Кун билан тун тенг бўлди, кўрдим жамолинг, Наврўз!

Баҳор яқинлашгани сайин қалбингиз ишқ туйғуларига тўлади, кенгликларни қўмсайсиз, ўтган қадрдонларни эслайсиз, бобо қуёш қадар қадимий халқимизнинг ўтмиш оҳанглари юрагингизга ҳаяжон солади. Кўкламда юраклар уйғониб, куртаклар изҳорга лаб жуфтлайди, чучмомалар, қўзигуллар қуёшга юз очади. Алвон туйғулардан ялов осган қизғалдоқлар баёти эриб, сатрларга қуйилади.
Наврўз арафасида Қашқадарё воҳасидаги қишлоқларга чиқдим. Баҳорнинг лутфи, тароватини томоша қилиб, гиёҳларни кўзимга суртдим. Ўзимча чўпонлар билан суҳбат қурган бўлдим.

– Насиб бўлса, бу йил баҳор баракали келади, яйловларда ўт мўл, моллар семиряпти, – дейди хуш кайфият билан Деҳқонобод туманидаги “Оқиртма”лик чўпон Нортажи Қирашаров. –Билсангиз, биз чўпонлар осмонга қараган халқмиз. Қор ва ёмғирдан доим умидвормиз. Чорвамизни ва ўзимизни тақдиримиз шу ўзгарувчан табиатга боғлиқ.

Манглайга кафт қўйиб, кенг адирга қарайман. Исириқ, қўзигул иси аралашиб кетган ёқимли ҳидни фақат шу даштларда туясиз. Чучмома ва қизғалдоқдан тўшалган гиламлар ўзгача кайфият беради одамга. Бу заминнинг қўй-қўзиси майса аралаш гул истеъмол қилади. Шунинг учун ҳам гўшти тотли. Гулнинг ҳам минг хилини учратасиз: қизғалдоқ, қўйзира, сариқ чучмома, бўтакўз, тошбақагул, бинафша, қўзигул, сариқ гул, элбоҳа...

– Қишлоқ урф-одати ҳақида озгина сўзлаб берсангиз, – дейман дашт томонларда тобланган, қўллари баркашдай чўпон йигитга юзланиб.

Суҳбатдошим қора қумғонда ғарғара қилаётган қайноқ сувдан аччиқ чой дамлаётиб, ўйланиб қолади ва кулимсираб дейди:

– Тоғда яшайдиган қўнғирот аёллари миллий либосидан бошлайман унда. Бир вақтлар момоларимиз бошларига баланд дастор (ёшлар қизил алвон, кексалар оқ матодан) ўраб юрган. Дастор тўрт-беш метр газламадан иборат бўлган. Келинлар бошига силсила, бўйнига ҳапамат, безмат, қўлларига қатор-қатор узук ва билагузуклар тақишган. Салла устидан йўл-йўл газмолдан тикилган, ёзда салқинни ушлаб, қишда совуқдан ҳимоя қиладиган желак ёпинишган. Ҳозир ҳам бу аньаналар қўнғирот аёлларимиз орасида сақланиб қолган.

Нортажи чўпоннинг гапларидан кейин қишлоқ ҳаётига қизиқишим тобора ортади.

– Чўпонларнинг кўп вақти яйловда кечади, отарни ҳайдаб узоқроққа кетганда нима тановул қилишади улар?

– Одатда, чўпонлар шароитга қараб, тез ва осон пишадиган таом тайёрлашади. Масалан, косага яримта нон, битта пиёз тўғралади, бир қошиқ ёғ, таъбга кўра туз ва мурч ташлангач, устидан қайноқ сув қуйилади. Айримлар шунга озгина қатиқ ҳам қўшади. Қарабсизки, егулик тайёр-да. Ёки қовурилган гўшт салгина илитилиб, ёғи эригач, бемалол истеъмол қилаверасиз. Булар энг осони, яъни қозонсиз тайёр бўладиганлари. Лачирли шўрва, ичак кабоб... О! бу таомларни емабсиз, дунёга кемабсиз.

Қишда чўпоннинг қўрасига баъзан бўри «меҳмон» бўлса, ёзда эса чаён ва соя излаган ўқ илонлар ўзини ўтовга уради. Лекин шу шароит чўпонлар учун кўникма ҳаёт, тақдир.

Мезбоннинг қўналғасидан олислай туриб, катта шаҳарларда интернет ярим соатга ишламаса, ТВ кабели ўчиб қолса, такси кечикса... юзага келадиган бетоқатликлар ҳақида ўйладим. Инсон шуларсиз ҳам яшаса бўларкану. Айланиб-айланиб, сайхонликдаги Наврўз тантанаси устидан чиқаман. Бахши қўлига дўмбирасини олиб, баҳордан илҳомланиб, хиргойи қилади:

Кун билан тун тенг бўлди, кўрдим жамолинг, Наврўз,

Олам ёғдуга тўлди, эсди шамолинг, Наврўз.

Булутлар олақуроқ, яшинлар чақар чақмоқ,

Осмонларга туташган шаҳдинг, залворинг, Наврўз.

Сен билан кирди Ҳамал, оғочлар қилди амал,

Беқиёс-у, мукаммал эзгу аъмолинг, Наврўз.

Байрамларнинг вақтидир, ғанимати, нақдидир,

Элим-юртим бахтидир оламда боринг, Наврўз!

Қишлоқ аҳли дастурхонга таклиф қилишади. Қайнатилган, қовурилган қўй гўшти, кўк патир ва сумалак дастурхонга ўзгача кўрк бериб турибди. Майдонда кураш, чиллик, бештош, хўроз уриштириш авжига чиқади.

Кексалар баҳорга, Наврўзга етказгани учун яратганга шукрона келтиради. Бу айём ҳар бир хонадонга, ҳар бир қалбга шодлик улашади. Олам гулга бурканади.

Ҳаяжон босади демоқликка сўз,

Олам нурга тўлсин сен билан, Наврўз!

Сатрлар қуйилиб кела бошлайди…

O‘zbekiston MDHda eng baxtli mamlakat deb topildi

Bu haqda 20-mart kuni e’lon qilingan World Happiness Report 2024 reytingida qayd etilgan.

Har yili 20-mart kuni nishonlanadigan Xalqaro baxt kuni e’lon qilingan reytingda ketma-ket yettinchi marta birinchi o‘rinni Finlyandiya egalladi. Ikkinchi o‘rinda Daniya bo‘lib, kuchli uchlikni Islandiya yakunlab berdi.

Yuqori o‘ntalikka Shvetsiya, Isroil, Niderlandiya, Norvegiya, Lyuksemburg Shveysariya va Avstraliya ham kirdi.

Markaziy Osiyo davlatlaridan:

O‘zbekiston — 47-o‘rinda;
Qozog‘iston — 49-o‘rinda;
Qirg‘iziston — 75-o‘rinda;
Tojikiston — 88-o‘rinda;
Turkmaniston ushbu reytingga kiritilmadi.

Reytingda Rossiya 72-o‘rinda, Ukraina 105-o‘rinda qayd etilgan. MDH davlatlaridan Moldova 71-o‘rinda, Armaniston 82-o‘rinda, Ozarbayjon 101-o‘rinda. Belarus ham Turkmaniston kabi ro‘yxatga kiritilmagan.

Afg‘oniston 143-o‘rin bilan reytingda so‘nggi pog‘onadan joy oldi.

Ma’lumot uchun, ushbu reytingni shakllantirishda aholi jon boshiga Yalpi ichki mahsulot ko‘rsatkichlari, mamlakatda o‘rtacha umr ko‘rish davomiyligi, fuqarolarni ijtimoiy qo‘llab-quvvatlash va ularning fuqarolik erkinliklariga rioya etilishi to‘g‘risidagi ma’lumotlar, shuningdek, mamlakatdagi korrupsiya darajasi hisobga olinadi.

Президент “Мурувват” уйидаги болалар ҳолидан хабар олди

Давлатимиз раҳбари Шавкат Мирзиёев ногиронлиги бўлган болалар учун 1-сонли “Мурувват” интернат уйини бориб кўрди.
Ўзбекистон – ижтимоий давлат. Бу халқимизнинг азалий қадриятларига, бугунги инсонни қадрлаш тамойилига мос. Сўнгги беш йилда “Мурувват” уйларига давлат бюджетидан ажратилган маблағлар 3 баробардан зиёд ошган. Улардаги ходимлар ва ўринлар сони ҳам кўпайтирилган.

Аҳолига сифатли хизмат ва ёрдам кўрсатиш мақсадида ўтган йили Ўзбекистон Республикаси Президенти ҳузурида Ижтимоий ҳимоя миллий агентлиги ташкил этилган эди. Пансионат, реабилитация маркази каби кўплаб ижтимоий муассасалар қатори “Мурувват” уйлари ҳам ушбу агентлик тизимига ўтказилди.

Ўтган йили бундай муассасалар учун давлат бюджетидан 624 миллиард сўм ажратилди. Шунингдек, уларни дори воситалари ва тиббий буюмлар билан таъминлаш учун аввалгига қараганда икки баробардан ортиқ маблағ берилмоқда.

Илгари “Мурувват” уйлари ўртасида ҳамкорлик бўлмаган. Ҳозир улар ўзаро фикр алмашиб, самарали усулларни, таълимдаги тажрибаларни татбиқ этмоқда.

Давлат ғамхўрлиги натижасида Тошкентдаги ушбу “Мурувват” уйи ҳам янги қиёфага кирди. Қўшимча бино қурилиб, эски бинолар капитал таъмирланди. Ёзги спорт зали, ногиронларни парваришлаш ва жисмоний даволаш бўлимлари, тиббиёт ва машғулот хоналари, фаоллар зали, кутубхона, ётоқхона ва ошхона бутунлай янгиланди. Ҳар бир бўлим, махсус хоналар талаб даражасида жиҳозланди. Ҳаракатланиши қийин болалар махсус аравачалар билан таъминланди.

Муассасада руҳиятида сезиларли нуқсони бор 4 ёшдан 18 ёшгача бўлган болаларга тиббий-ижтимоий хизмат кўрсатилади. Бугунги кунда 299 нафар ўғил-қиз васийликка олинган. Уларга 334 нафар ходим, жумладан, малакали педагог, дефектолог ва шифокорлар ёрдамлашмоқда.

Шавкат Мирзиёев болаларнинг машғулотларини бирма-бир кузатди. Улар билан суҳбатлашиб, меҳрини изҳор қилди. Шароитларни яхшилаб, қулайликлар яратиб, ногиронлиги борларнинг иложи борича ҳаётда ўрин топишига кўмак кўрсатилишини айтди.

Президентимиз бунда ижтимоий хизмат ходимлари ишини эътироф этиб, болаларга меҳр-муруввати учун миннатдорлик билдирди.

– Болаларимизга яхши қараётганингиз учун катта раҳмат сизларга. Бу оғир меҳнат, лекин жуда савобли ва керакли меҳнат, – деди давлат раҳбари.

Болаларни имкон қадар реабилитация қилиш ва ҳаётга мослаштириш, ота-оналарга психологик ёрдам бериш масалалари бўйича фикр алмашилди. Сўнгги йилларда имконият ва тизим пайдо бўлгани, бошқа ижтимоий муассасалардаги шароитларни ҳам яхшилаш зурурлиги таъкидланди.

Эндиликда “Мурувват” уйлари замонавий реабилитация жиҳозлари билан таъминланиб, ўз ишини янги концепция асосида йўлга қўяди. Унга кўра, болалар индивидуал ривожланиш дастурлари асосида жамиятга интеграция қилинади. Барча “Мурувват” уйларида учрашув хоналари ташкил этилади.

Шунингдек, “Қўллаб-қувватлаш клублари” тузилиб, малакали мутахассислар васийларга ногиронлиги бўлган болани парваришлаш, оила шароитида тарбиялаш ва жамиятга мослаштириш бўйича билимлар беради. Алоҳида таълимга тавсия берилмаган, оғир даражадаги касалликлари мавжуд болалар учун “Ғамхўрлик гуруҳи” ташкил этилади. Барча ҳудудий реабилитация марказларида ногиронлиги бўлган болалар учун шундай хизматлар йўлга қўйилади.

Муассасанинг қозонхонаси ва муҳандислик тармоқлари ҳам тўлиқ янгиланган. Ҳудудга манзарали ва мевали дарахт кўчатлари экилиб, ташқи ёритиш чироқлари ўрнатилган, йўлаклар асфальтланган.

Муборак Рамазон ойида беморлар ҳолидан хабар олиш, инсонларга янада меҳр-эътибор кўрсатиш халқимизнинг эзгу қадриятидир.

Наврўз айёми пойтахт эртасига дахлдор яхши янгиликлар билан бошланмоқда

Президент Шавкат Мирзиёев 19 март куни Тошкент шаҳридаги саноат ва ижтимоий соҳа объектлари фаолияти, маҳалладаги ободонлаштириш ва бунёдкорлик ишлари билан танишди, баҳорги дарахт экиш тадбирида иштирок этди.
Дастлабки манзил Қуюв-механика заводи бўлди.

Қирқ гектардан зиёд майдонли бу завод бир пайтлар тўлиқ ишламай, паст рентабелли бўлиб қолган эди. Шу боис “Ўзбекистон темир йўллари” акциядорлик жамияти тасарруфига ўтказилиб, 2013 йилда модернизация қилинди. Сўнгги йилларда маҳаллийлаштириш жадал кенгайиб, унинг иқтисодий самарадорлиги янада ошди.

Бугун мажмуа йилига 1 минг 200 та юк вагони ишлаб чиқариш ва 1 минг 500 тасини таъмирлаш қувватига эга барқарор корхона.

Вагонлар таркиби ҳам талабгир. Жумладан, ярим очиқ, усти ёпиқ, узун базали ҳамда дон, цемент, минерал ўғит ташишга мўлжалланган 6 турдаги юк вагонлари ишлаб чиқарилмоқда.

Металл қуйиш оғир саноатнинг энг муҳим тармоғи, таъбир жоиз бўлса, "юраги" ҳисобланади. Бу ерда 120 миллион доллар ҳисобига қуюв цехи барпо этилган. У йилига 26 минг тонна маҳсулотлар тайёрлашга мўлжалланган. Бу ерда темир йўллар эксплуатацияси ва ҳаракат таркибида ишлатиладиган барча турдаги эҳтиёт қисмлар қуйилади.

Давлатимиз раҳбари ушбу маҳсулотларни кўздан кечирди.

– Бугунги кундаги энг катта мақсадимиз – кўпроқ иш ўринлари яратиш. Масалан, бу йил мамлакатимизда 100 мингта уй қурмоқчимиз. Улар қачон одамларга маъқул бўлади? Ёнида иш ўрни билан бўлса. Шунинг учун, худди томорқаларда бўлаётганидек, кўп қаватли уйлар бўйича ҳам маҳаллаларда иқтисодий лойиҳалар қилинади. Қайси хонадонда ишсиз бўлса, бандлигига кўмаклашилади. Бунда мана шундай заводлар муҳим, – деди Шавкат Мирзиёев.

Шу боис мажмуада шаҳарсозлик, коммунал ва бошқа тармоқлар учун ҳам маҳсулотлар ишлаб чиқариш, бу имкониятлар билан тадбиркорларни таништириб, буюртмаларни кўпайтириш кераклиги таъкидланди. Бу, ўз навбатида, турдош тармоқларда ҳам иш ўринлари очилишига туртки беради.

Заводда юк вагонлари қуриш, механика йиғув, ғилдирак йиғув, қуюв, таъмирлаш, темирчилик ва пресслаш, тайёрлов ва комплектлаш каби 26 та цех бор. Президентимиз мажмуа бўйлаб юриб, улардаги иш жараёнини кўздан кечирди.

Корхонада 2018-2023 йилларда маҳаллийлаштириш дастури бўйича 100 га яқин турдаги маҳсулотларни ишлаб чиқариш ўзлаштирилган. 2023 йилда жами 267 миллиард сўмлик маҳсулотлар ишлаб чиқарилган, 10 миллион долларлик 170 та вагон ва эҳтиёт қисмлар экспорт қилинган. Жорий йилда экспорт ҳажмини 15 миллион долларга етказиш бўйича шартномалар имзоланган.

Корхонада халқаро стандартларга мувофиқ ISO 9001 сифат менежменти ва ISO 50001 энергетика менежменти тизими жорий этилган.

Шундан сўнг давлатимиз раҳбари пойтахтимизнинг Сергели туманида ташкил этилаётган Ёшлар боғига кўчат ўтқазди.

Маълумки, Президент ташаббуси билан 2021 йилдан буён “Яшил макон” умуммиллий лойиҳаси амалга оширилмоқда. Жумладан, экологик вазиятни яхшилаш мақсадида Тошкентнинг “яшил белбоғи” ташкил этилмоқда. Ёшлар боғи шу ҳалқанинг муҳим бўғини бўлади.

Давлатимиз раҳбарига боғ лойиҳаси ҳақида ахборот берилди. Унинг майдони 75 гектардан зиёд бўлиб, ҳудуди жиҳатидан пойтахтимизда “Янги Ўзбекистон” боғидан кейин иккинчи ўринни эгаллайди.

Боғ еттита катта ҳудудга бўлинади. Марказий хиёбонда турли майдонлар, минг ўринли очиқ амфитеатр, миллий ва халқаро гастрономик зоналар барпо этилади.

Очиқ ҳавода овқатланиш ва қизиқарли машғулотлар учун алоҳида жойлар бўлади. Мусиқий фавворалар, очиқ осмон остидаги кинотеатр, санъат кўргазмалари ва лазер-шоу имкониятлари яратилади. Болалар учун спорт ва ўйин майдонлари, машҳур эртаклардаги қишлоқлар, устахона, кутубхона ташкил этилади. Сунъий кўл, каноэ ва сузиш ҳавзаси, балиқ ови дам олувчиларга ҳузурбахш бўлади.

Шу куни Тошкент шаҳри жамоатчилиги, давлат ташкилотлари ва дипломатик корпус вакиллари, ёшлар иштирокида боққа кўчатлар экилди.

Президент боғ лойиҳасида қатнашаётган инвестор ва лойиҳачилар, чет эллик дипломатлар билан мулоқот қилди.

– Халқимиз қаерда бўлса, дарахт экишга интилган. Амир Темур Самарқанд атрофида сўлим боғлар барпо этган, бошқа шаҳарларни ҳам обод қилган. Буюк боболаримизга муносиб бўлиб, бу ишларни қилаяпмиз, – деди Шавкат Мирзиёев.

Давлатимиз раҳбари боққа келган юртдошларимиз билан суҳбатлашиб, уларни Наврўз билан табриклади.

Боққа биринчи босқичда минг тупдан зиёд каштан, эман, шарқ чинори, қизил куртак, магнолия, гужум каби манзарали дарахтлар ҳамда бута ва гуллар экилади. Лойиҳа якунига қадар уларнинг сони 20 минг тупга етади.

Яна бир эътиборли томони, бу боғда табиийлик, ўрмон шакли, экзотик манзара ҳосил қилинади. Боғ фойдаланишга топширилиши билан 350 тадан ортиқ иш ўрни яратилади.

Айни кунларда ҳам ҳудудларда кўчатлар экилмоқда. Умуман, юртимизда 347 гектар майдонда “яшил ҳудуд”, 187 та вазирлик ва ҳокимлик боғлари барпо этилган.

Президент Шавкат Мирзиёев Тошкент йўловчи вагонларни қуриш ва таъмирлаш заводини бориб кўрди.

Мамлакатимизда темир йўл транспорти ривожланиб, қатновлар сони кўпаймоқда. Бу вагонларга бўлган талабни ҳам оширади. Мазкур заводда 16 турдаги йўловчи вагонлари ишлаб чиқарилади ва таъмирланади.

Ўтган йили корхонада 32 та йўловчи вагони тайёрланиб, 319 таси таъмирланган. Муҳими, кооперация орқали эҳтиёт қисмларнинг 70 фоизи маҳаллийлаштирилган.

Умуман, аввалги йилларда 300 дан зиёд йўловчи ва техник хизмат вагонлари ишлаб чиқарилиб, 50 дан ошиғи экспортга юборилган. Бундан ташқари, 112 та метрополитен вагонлари модернизация қилинган.

Улар 28 йил давомида фойдаланишга мўлжалланган ва халқаро талабларга тўлиқ жавоб беради, йўловчилар учун ҳар томонлама қулай, юқори сифат ва хавфсизликка эга.

Вагонларда иситиш ва совитиш тизимлари, ҳаво айланиши янада яхшиланган. Сув иситиш ускунаси ҳам электр энергиясида, ҳам кўмирда ишлашга мўлжалланган. Йўловчиларни тоза ва салқин ичимлик суви билан таъминлаш, телефон қувватини тўлдириш учун махсус мосламалар ўрнатилган. Бу ерда 619 нафар муҳандис-ишчи меҳнат қилмоқда.

Президентимиз вагонларга чиқиб кўрди. Уларнинг дизайнини ўзгартириш, йўловчиларга қулайликларни ошириш зарурлигини таъкидлади. Электр поездлар тармоғини кенгайтириб, аҳоли кўп туманларга олиб бориш, соҳанинг алоҳида генерация қувватларини ташкил этиш бўйича топшириқлар берилди.

Жорий йилда яна юзлаб вагонларни қуриш ва таъмирлаш режалаштирилган. Бундан ташқари, кон-металлургия корхоналари учун махсус вагонлар қуриш, кенг купели янги турларни ўзлаштириш кўзда тутилган.

Шу ерда заводда режалаштирилаётган янги йўналиш – электр ва метрополитен поездлари лойиҳаси кўриб чиқилди.

Шунингдек, Тошкент – Хива йўналишига қўйиладиган тезюрар поезд ҳақида ахборот берилди. Президентимиз бу ҳақда 2022 йилда Хоразмда Жалолиддин Мангуберди ҳайкалининг очилиш маросимида айтган эди. Бу учун Жанубий Кореянинг “Hyundai Rotem” компаниясидан юқори тезликдаги электропоезд олиб келиниши мўлжалланган. 7 вагонга эга электропоезд 351 та ўриндиққа эга бўлади. Соатига 250 километр тезликда ҳаракатлана олади.

Пойтахтимизнинг Яккасарой туманидаги Дилбулоқ маҳалласига бу йилги Наврўз янада кўтаринкилик билан келди. Давлат-хусусий шериклик асосида замонавий маҳалла идораси қурилди. Кўп қаватли уйлар йўлаги ва ички кўчалар, ертўлалар таъмирланди. Анҳор бўйи тартибга келтирилиб, обод сайилгоҳга айлантирилди. Ишкомлар, ниҳоллар, пиёдалар йўлаклари маҳаллага кўрк бағишлади.

Ўтган йили кузда “Яшил макон” умуммиллий лойиҳаси доирасида қарийб 4 минг туп дарахт ва бута кўчати ўтқазилган эди. Шу кунларда кўп қаватли уйлар олдидаги майдонларга райҳон, намозшомгул каби гуллар экилди.

Дилбулоқ маҳалласида 6 минг 700 нафардан зиёд аҳоли яшайди. Маҳалла хизмат кўрсатиш ва ишлаб чиқаришга ихтисослашган. Уч юзга яқин савдо, саноат ва хизмат кўрсатиш шохобчаларида маҳаллий ёшлар ва аёллар ишламоқда. Мактабгача таълим ташкилоти, оилавий поликлиника, ихтисослаштирилган спорт мактаби, педагогика институти филиали фаолият юритмоқда.

“Хавфсиз маҳалла” тамойили асосида ҳудудга 360 та видеокузатув мосламалари ўрнатилган, улар маҳалла профилактика инспектори хизмат хонасига уланган.

Ўтган йили 112 киши ишга жойлаштирилиб, 181 нафари ўзини-ўзи банд қилган. Аҳолини тадбиркорликка жалб қилиш учун 23 та лойиҳага кредит ва ўнга яқин фуқарога субсидия ажратилган. Хусусан, бу ерда тикувчилик цехи, гўзаллик салони, полиграфия ва компьютер хизматлари, кутубхона, озиқ-овқат ва қандолат дўконлари ташкил этилган.

Давлатимиз раҳбари ушбу мажмуаларни кўздан кечирди, маҳалла аҳли билан самимий суҳбатлашди.

– Аввало, сизларни улуғ айём кунлари, келаётган Наврўз билан табриклайман. Маҳаллангиздаги ободликни, иш жойларини, байрам нафасини кўриб, хурсанд бўлдим. Нима учун ҳудудларда кўп юраман? Чунки мен одамларга ишонаман. Ҳамма маҳаллаларни шундай ўзгартиришга ҳаракат қилишимиз керак. Мамлакатимизда 9 минг 450 та, Тошкентда 585 та маҳалла бор. Ҳозир уларга иқтисодий комплекс ташкилотларини бириктирадиган тизим қилаяпмиз. Мақсадимиз – ҳар бир хонадонга, ҳар бир инсонга етиб бориш. Халқнинг розилиги, дуоларига муносиб бўлиш ҳаммамизга насиб этсин, – деди Президент.

Шу борадаги манзилли чора-тадбирлар “маҳалла еттилиги” ва мутасаддилар билан мулоқотда муҳокама қилинди.

– Хабарингиз бор, иқтисодий комплекс ташкилотларини маҳаллаларга бириктираяпмиз. Бунда банкларнинг ҳам ўрни бор. Улар орқали туманлардаги корхоналарга қўшимча шароит яратиб, енгил кредитлар бериб, яна иш ўринлари очишини қўллаб-қувватлаш керак. Энди маҳаллалар ҳам замонга муносиб, ҳаракатчан бўлиши лозим. Умуман, ишлайман деган одамга шароит яратиб беришимиз шарт, – деди давлатимиз раҳбари.

Мутасаддилар иқтисодий комплекс фаолиятини маҳаллаларда ташкил этиш, шаҳар шароитида одамларни иш билан таъминлаш вазифалари тўғрисида ахборот берди.

Сўнг давлатимиз раҳбари Шавкат Мирзиёев ногиронлиги бўлган болалар учун 1-сонли “Мурувват” интернат уйини бориб кўрди.

Ўзбекистон – ижтимоий давлат. Бу халқимизнинг азалий қадриятларига, бугунги инсонни қадрлаш тамойилига мос. Сўнгги беш йилда “Мурувват” уйларига давлат бюджетидан ажратилган маблағлар 3 баробардан зиёд ошган. Улардаги ходимлар ва ўринлар сони ҳам кўпайтирилган.

Аҳолига сифатли хизмат ва ёрдам кўрсатиш мақсадида ўтган йили Ўзбекистон Республикаси Президенти ҳузурида Ижтимоий ҳимоя миллий агентлиги ташкил этилган эди. Пансионат, реабилитация маркази каби кўплаб ижтимоий муассасалар қатори “Мурувват” уйлари ҳам ушбу агентлик тизимига ўтказилди.

Ўтган йили бундай муассасалар учун давлат бюджетидан 624 миллиард сўм ажратилди. Шунингдек, уларни дори воситалари ва тиббий буюмлар билан таъминлаш учун аввалгига қараганда икки баробардан ортиқ маблағ берилмоқда.

Илгари “Мурувват” уйлари ўртасида ҳамкорлик бўлмаган. Ҳозир улар ўзаро фикр алмашиб, самарали усулларни, таълимдаги тажрибаларни татбиқ этмоқда.

Давлат ғамхўрлиги натижасида Тошкентдаги ушбу “Мурувват” уйи ҳам янги қиёфага кирди. Қўшимча бино қурилиб, эски бинолар капитал таъмирланди. Ёзги спорт зали, ногиронларни парваришлаш ва жисмоний даволаш бўлимлари, тиббиёт ва машғулот хоналари, фаоллар зали, кутубхона, ётоқхона ва ошхона бутунлай янгиланди. Ҳар бир бўлим, махсус хоналар талаб даражасида жиҳозланди. Ҳаракатланиши қийин болалар махсус аравачалар билан таъминланди.

Муассасада руҳиятида сезиларли нуқсони бор 4 ёшдан 18 ёшгача бўлган болаларга тиббий-ижтимоий хизмат кўрсатилади. Бугунги кунда 299 нафар ўғил-қиз васийликка олинган. Уларга 334 нафар ходим, жумладан, малакали педагог, дефектолог ва шифокорлар ёрдамлашмоқда.

Шавкат Мирзиёев болаларнинг машғулотларини бирма-бир кузатди. Улар билан суҳбатлашиб, меҳрини изҳор қилди. Шароитларни яхшилаб, қулайликлар яратиб, ногиронлиги борларнинг иложи борича ҳаётда ўрин топишига кўмак кўрсатилишини айтди.

Президентимиз бунда ижтимоий хизмат ходимлари ишини эътироф этиб, болаларга меҳр-муруввати учун миннатдорлик билдирди.

– Болаларимизга яхши қараётганингиз учун катта раҳмат сизларга. Бу оғир меҳнат, лекин жуда савобли ва керакли меҳнат, – деди давлат раҳбари.

Болаларни имкон қадар реабилитация қилиш ва ҳаётга мослаштириш, ота-оналарга психологик ёрдам бериш масалалари бўйича фикр алмашилди. Сўнгги йилларда имконият ва тизим пайдо бўлгани, бошқа ижтимоий муассасалардаги шароитларни ҳам яхшилаш зарурлиги таъкидланди.

Эндиликда “Мурувват” уйлари замонавий реабилитация жиҳозлари билан таъминланиб, ўз ишини янги концепция асосида йўлга қўяди. Унга кўра, болалар индивидуал ривожланиш дастурлари асосида жамиятга интеграция қилинади. Барча “Мурувват” уйларида учрашув хоналари ташкил этилади.

Шунингдек, “Қўллаб-қувватлаш клублари” тузилиб, малакали мутахассислар васийларга ногиронлиги бўлган болани парваришлаш, оила шароитида тарбиялаш ва жамиятга мослаштириш бўйича билимлар беради. Алоҳида таълимга тавсия берилмаган, оғир даражадаги касалликлари мавжуд болалар учун “Ғамхўрлик гуруҳи” ташкил этилади. Барча ҳудудий реабилитация марказларида ногиронлиги бўлган болалар учун шундай хизматлар йўлга қўйилади.

Муассасанинг қозонхонаси ва муҳандислик тармоқлари ҳам тўлиқ янгиланган. Ҳудудга манзарали ва мевали дарахт кўчатлари экилиб, ташқи ёритиш чироқлари ўрнатилган, йўлаклар асфальтланган.

Муборак Рамазон ойида беморлар ҳолидан хабар олиш, инсонларга янада меҳр-эътибор кўрсатиш халқимизнинг эзгу қадриятидир.

Зиёдулла ЖОНИБЕКОВ,

Икром АВВАЛБОЕВ,

ЎзА мухбирлари